Ilusioz beteta datoz baserritarrak Gernikara
Urriko Azken Astelehenekoa egun benetan berezia da inguruko baserritarrentzat. Hori dela eta, gogo handiz hartzen dute beraien produktuak jendearen aurrean jarri eta saltzeko ordua
Gernika-Lumon astelehenean ospatuko den Urriko Azken Asteleheneko azokak urteak pasa ahala aldaketa handirik jasan ez duen arren, herriko bizilagun eta kanpoko bisitari askorentzat ondo pasatu eta kuxkuxeatzen aritzeko eguna da, hainbat jarduera eskaintzen dituen jai eguna dugu eta: bertsolariak, zesta eta pilota partiduak, idi-probak eta bestelakoak aitzakia itzela dira bisitari askorentzat udalerrira hurreratu eta egun eder bat pasatzeko.
Hala eta guztiz ere, egun berezi horren ardatz izaten jarraitzen du azokak berak. Salmahaietan, nola ez, inguruetako mota guztietako produktuak dastatu eta erosteko aukera egongo da: gaztak, txakolina, artisautza lanak, ogia, eztiak, loreak eta beste hainbat produktu. Eguneko protagonistak, dena den, baserritarrak eta beraien baratzetatik irtendako ortuariak izaten dira azokan.
Baserritarrek ilusio handiz itxaroten diote Urriko Azken Astelehenaren etorrerari. Urteko egun berezienetako eta garrantzitsuenetakoa da indabak, piperrak, kalabazak, tomateak, patatak edota kipulak erein, batu eta saltzen aritzen diren nekazarientzat.
Bere ustetan, azken urteetan azokara erosteko asmoagaz hurbiltzen diren bezeroen kopurua mantendu egin da. Azaldu duenez, eguraldiak berebiziko garrantzia dauka, eta euria egin duen urteetan asko igartzen du salmentek behera egiten dutela. Jendea postuetatik urrun gelditzen da, ezin dira horrenbeste hurbildu, eta horrek salmentetan eragin zuzena dauka. “Iaz, adibidez, ez genuen askorik saldu, jende gutxi ibili zen Gernikatik. Horrez gain, ez dira animatzen euriarengatik erosketak egitera eta poltsekin ibiltzera. Baina duela bi urte, eguraldi onak lagunduta, salmenta onak izan genituen”.
Berak ere gogo handiz hartuko du datorren astelehena, bertako nekazarientzat urteko egunik garrantzitsuenetakoa dela uste baitu. “Ez nuke lan guzti hau egingo azokara ilusio barik joango banintz”.
Kalitate handiko uztak. Aurtengo azokarako, gainera, kalitate handiko generoa eramango duela nabarmendu du Txertudik. “Ez dugu uzta handirik batu, baina bildutakoa kalitate handikoa izan da, pozik gaude”, adierazi du. “Neguan euri asko egin du, baina irailean eta urrian ez da horrela izan, eta horrek genero ona lortzera eraman gaitu”.
Uriartek ere zorte berbera eduki du. Aurtengo generoa “oso ona” izan dela azaldu du, “zonaldean uzta onak” egon dira bere esanetan. “Indaba batzeko garaian edukitako eguraldi onak asko lagundu digu, eta alperrik galdutako genero gutxi izan dugu”. Adierazi duenez, joan den urtean lortutako uztekin alderatuta, pozik geratu dira: “Iaz, askoz ere indaba gehiago batu genituen arren, ia erdia galdu egin genuen euriteen ondorioz”. Azoka epe luzerako bezeroak lortzeko eta produktuaren izena zabaltzeko modu aparta da Uriarterentzat. “Urtero erostera hurbiltzen diren bezeroek dagoeneko produktua ezagutzen baldin badute ere, lehen aldiz hurbiltzen diren bezeroentzako aukera ezin hobea da produktua ikusteko”.
Felix Uriartek bizitza osoa darama baserrian indabak erein eta horiek saltzen, eta bere esanetan, argi dauka Urriko Azken Asteleheneko azokak berebiziko garrantzia daukala. Nekazariak Bilbon abenduan ospatzen den San Tomas eguneko azokagaz alderatzen du Gernika-Lumokoa. “Ilusioa egiten du Urriko Azken Asteleheneko azoka egunak, asko saltzea lortzen dugu bertan, eta inguruko azokarik onenetarikoa da”, dio Uriartek. Hala ere, azken hamar urteetan salmentek behera egin dutela argitu du: “Gaur egun bisitariak azokara eguna igarotzera hurbiltzen dira» azaldu du, eta «eskuetan ez dute zamarik eraman nahi”. Azokak eta bisitariek izan duten aldaketa kontuan hartuta, “almentek onak izan jarraitzen dutela” adierazi du Uriartek, baina “aldaketa nabaria izan dela”. Jacqueline Txertudik, beste alde batetik, zazpi urte daramatza Urriko Azken Astelehenean bere produktuak saltzen. Salmahaian Gernika eta bere inguruetan landaturiko denetariko ortuariak aurki ditzakegu. Dena den, indabek berebiziko garrantzia daukate Txertudin postuan, eta Gernikako Indabez gain, Tolosakoa, beltza eta zuria saltzen ditu. Azaldu duenez, azokara hurbiltzen direnek gaztak edota bestelako produktuak “kapritxo modura” erosten dituzte, baina ortuariek etorkizunean berriz erostera animatuko diren bezeroak erakartzen dituzte.Urteko egunik garrantzitsuena da astelehenekoa baserritarrentzat
Indabek berebiziko garrantzia daukate Jaquelin Txertudiren postuan, eta Gernikako Indabez gain, Tolosakoa, beltza eta zuria saltzen ditu.
Ikusi eta ukitu. Horren harira, produktuaren aurkezpenak daukan garrantzia ere nabarmendu nahi izan du. Adibidez, duela urte batzuk indabak zaku txikietan saltzeko moda ezarri zela gogoratu du. Gaur egun ere, azokan horrela eskaintzen dituztela dio, baina bezeroarentzat produktua bera ikustea garrantzitsuagoa dela azpimarratu du: “Indabak pilaka ikusi eta ukitzea gustatzen zaio bezeroari. Zakuetan jarrita polito geratzen da, baina produktua ezkutatuta dago, ez dute ikusten”. Hala, erosleari generoa ikusteak “ilusioa” egiten diola dio Uriartek. Ez hori bakarrik, bere ustetan, kalitatezko zigilu eta bestelako markak ere alde batera geratzen ari dira azkenaldian. “Duela urte batzuk Eusko Label markak balio zuen, bezero batzuk horren bila ibiltzen ziren. Baina gaur egun nahiago dute indaba bera ikustea eta produktuak duen kalitateaz ziurtatzea, ez dute inongo zigilurik behar hori egiaztatu ahal izateko”. Uriarteren berbetan, herritarren artean berriro hazten ari da baserritarren produktuak erosteko grina. Baserritarren azokak egiteko gogoa berreskuratzen hasi direla uste du, bai saltzaileen eta bai erosleen aldetik. “Indarra hartzen ari direla” nabarmendu du, “supermerkatuetan denetariko generoa aurkitu ahal den arren, azokek bertoko produktua erosteko aukera ematen dutelako”. *URRIKO AZKEN ASTELEHENEKO ALBISTEAK:Nekazariak pozik geratu dira aurten lortu dituzten uztekin
