Euskal Zine Bilera indartsuenetako bat hartuko du Lekeitiok
Euskal ikus-entzunezko ekitaldiz beteta dator zazpi egunetako agenda. Aurtengo Begirada Saria Kimuak programari emango diote. Lekeitiarren filmak egongo dira ikusgaiIkus-entzunezkoen arlo ezberdinak landu eta sektorean lan egiten dutenei protagonismoa ...
Euskal ikus-entzunezko ekitaldiz beteta dator zazpi egunetako agenda. Aurtengo Begirada Saria Kimuak programari emango diote. Lekeitiarren filmak egongo dira ikusgai
Ikus-entzunezkoen arlo ezberdinak landu eta sektorean lan egiten dutenei protagonismoa emango dien Euskal Zine Bilera indartsuenetako bat iragarri zuten atzo, Bilboko Rekalde aretoan egin zuten aurkezpen ekitaldian, Koldo Goitia Lekeitioko alkateak, Aitziber Atorrasagasti Eusko Jaurlaritzako Kultura Sustatzeko zuzendariak, Andoni Iturbe Bizkaiko Foru Aldundiko Kultura zuzendariak eta Aitor Gametxo 40+1 Euskal Zine Bilerako koordinatzaileak. Zapatuan hasi eta urriak 12ra bitartean euskal ikus-entzunezko ekitaldiez beteta egongo den agenda aurkeztu zuten. «Urteak igaro ahala Euskal Zine Bilera indartzen doa, garatzen doa», adierazi zuten jaialdirako gonbidapena luzatuz.Telmo Esnal zuzendariaren Dantza filmak emango dio hasiera Ikusi, entzun, amestu, bizi, erein lelopean ospatuko den 40+1. Euskal Zine Bilerari. Irekiera ekitaldia Loli Astorekak eta Aitor Abaroak aurkeztuko dute, Muntu antzerki taldearen laguntzagaz. Irekiera ekitaldi horretan emango du jaialdiak euskal zinemagintzaren figura eta ekimenak omentzea helburu duen Begirada Saria.
Kimuak programa sarituko dute aurten, urte askotan euskarazko filmen hedapenean egindako lanagatik. «Filmategiaren 40. urteurrenagaz bat, Kimuak ekimenaren 20. urteurrena ospatu nahi izan dugu sari berezi horregaz, atzera begirakoen bitartez, figura horien lanak ezagutaraztera emanez» argitu zuten.
Euskaltzaleen Topaguneagaz elkarlanean antolatutako Kameratoia ikus-entzunezko rallya ere asteburuko protagonista izango da. Bigarren bider ospatuko da Lekeitioko EZBren baitan, eta lehen asteburua aukeratu dute gazteei zuzendutako 24 orduko lehiaketa egiteko. Domekan 17:30ean ikusi ahalko dira emaitzak, Ikusgarri aretoan. «Aurten 14 talde ariko dira euskarazko film laburrak ekoizten». Lan guztiak proiektatuko dituzte Ugaitz Alegriak aurkeztutako sari banaketa ekitaldian.
Film ugari
Ondoren, 20:00etan, (H)emen gaude euskal ikus-entzunezkoen sektoreari zuzendutako atalari hasiera emango diote Maider Oleagarengan fokua jarri eta bere Verabredung film luzea proiektatuz. Zine bileraren azken egunean, Izaskun Arandiarekin batera, Oleagaren ibilbideari eta lan prozesuari buruz solasean jarduteko beste aukera bat egongo da kafe tertulia formatuan.
Datorren astelehenetik ostegunera bitartean, film ugari proiektatuko ditu zinema bilerak Ikusgarri aretoan. Alde batetik, EZBko Lehiaketan aukeratutako 20 filmak emango dituzte. «Jaialdi honetan, berrikuntza gisa, ikuslearen saria ere emango da. Egunero zinemara hurbiltzen diren ikus-entzuleek erabaki ahalko dute sari berezi horren irabazlea».
Bestalde, Begirada Sariagaz omenduko duten Kimuak ekimenaren bitartez, EZBtik igaro diren filmen emanaldi eta solasaldiak eskainiko dituzte; eta azkenik, Zoom programa pedagogikoaren baitako ekitaldi bi egongo dira. «Lekeitioko ikas-komunitatearen baitan zinemagintzaren ahalmen pedagogikoa landuko da programa horren barnean egingo diren lantegi, formakuntza saio, proiekzio eta gainontzeko ekimenen bitartez, Arropaineko Arragua eta Filmazpit-egaz elkarlanean».
40+1. EZBren azken eguna ere jardueraz bete datorrela azaldu zuten. «Hasteko, ATZO8 ekimenaren emaitzak ikusten hasi ahalko gara. Alde batetik, Lekeition edota lekeitiarrek filmatutako irudiak bilduko dituen Lehen Irudiak erakusketa hartuko du Barandiaran aretoak, 10:00etatik 14:00etara eta 16:00etatik 20:00etara; eta bestalde, Super8 lantegia egingo da egunean». Lantegi horretako parte hartzaileek formatu horretan egindako filmak sortzeko oinarrizko prozesuak eta materialak ezagutuko dituzte Maite Alonso eta Unai Ruiz arduradunekin. Tailerra doakoa bada ere, aurretiaz izena eman behar da, eta epea oraindik zabalik dago. Lantegian fimatutako irudiak Ikusgarri zineman proiektatuko dituzte arratsaldean.
Eta amaitzeko, zelan ez, 40+1. Euskal Zine Bileraren amaiera ekitaldia eta sari banaketa egingo dituzte. Horrela, barikuan 19:30ean lehiaketan parte hartu duten film laburren artean, lau sari banatuko dira, eta Urrezko Antzarra zeinek eramango duen jakingo da. «Aurtengo epaimahaia Mikel Zumeta, Itziar Itun?o, Eider Eguren eta Maider Oleagak osatuko dute, eta haiek izango dira zuzendaritza, gidoia eta film onenaren sariak erabakitzeko arduradunak». Ikuslearen saria ere egun horretan emango dute.
Beste alde batetik, Zinemazale Elkarteagaz batera, Jatorrizko bertsioa euskeraz programa ere jarri du martxan EZBak. Programa horretan euskarazko azpitituluekin mundu mailako film entzutetsuak ikusi ahalko dira jatorrizko bertsioan. «Lau film proiektatuko dira helburu bikoitzagaz: batetik, jende artean jatorrizko hizkuntzan egindako pelikulen zaletasuna sustatzea, eta, bestetik, euskarak zinemarekiko duen jarduera esparrua zabaltzea». Filmak hiru hilabetero emango dituzte, kasuan kasuko hilabetearen lehen eguenean, 20:30ean, Ikusgarri aretoan. Lehenengoa, Damien Chazellen La La Land, gaur bertan emango dute.
