Uztaila agurtzera datoz santiagoak eta santanak

2018/07/19

Santiago eta Santa Ana jaiek herri ugari festaz beteko dituzte datozen egunetan. Morga, Kortezubi, Busturiko Axpe auzoa edota Nabarnizko Lekerika auzoa ospakizunetan sartzekotan daude. Morgatarrentzat jai nagusiak dira santiagoak eta santanak. Horiek ospatzeko, lau egunetarako egitaraua prestatu dute herrikoek, era guztietako eta denentzako jarduerez beteta. Uztailaren 28an, Sukalki Txapelketara mozorrotuta joango dira herritarrak; Musika izango dute mozorrotzeko gaia. Horrela, herria Broadway bilakatuko dute, eta garai ezberdinetako rock eta pop izarrak ikusi ahal izango dira Morgan. Arratsaldean, musika eta jana izango dira nagusi Andra Marin, Basajaunen erromeriagaz eta DJagaz. Taloak dastatzeko aukerarik ere ez da falta izango. Kortezubitarrek ere jai nagusiak dauzkate aurretik, eta ospakizunak bost egun luzez egingo dituzte. Etxeko txikienei zuzendutako ekimen eta jarduerak izango dira nagusi Kortezubiko jaietan: uztailaren 25ean, adibidez, beraientzako antzerkiaz gozatu ahalko dute arratsaldean, eta ostean, apar jaiagaz ederto batean pasatu ahal izango dute.

Kortezubitarrentzat jai nagusiak izango dira.

Uztailaren 27an, bestetik, futbito eta saskibaloi txapelketak jokatuko dituzte, eta horien ostean Xaiborrek eskainitako musika emanaldiaz gozatuko dute. Jaien azken egunean kirolak hartuko du protagonismoa; eguerdian, Ekin eskupilota taldekoek antolatutako umeen partiduak egongo dira ikusgai, eta ostean, herriko umeek egindako euskal dantzak. Sankristobalen ostekoak. Joan den astean San Kristobal auzoan batu ziren busturiarrak hango jaiak ospatzeko. Zapatuan, Euskal Artzain Txakurraren 25. Erakusketa egitekotan izan ziren, baina jarduera bertan behera geratu zen. Oraingoan, Axpen batuko dira. Martitzenean (uztailak 24) hasiko dituzte jaiak aipatu auzoan, Fabio Macerak eskainiko duen organo kontzertuagaz. Eguaztenean (uztailak 25), Bizkaiko Herri Kirol Liga ospatuko dute. Besteak beste, harri eta ingude jasotze eta zaku eramate erakustaldiak egingo dituzte. Uztailaren 26an, Irrintzi Alai Dantza Taldeak ikuskizun berezia eskainiko du, 50. urteurrenari lotuta. Nabarniztarrak, beste aldetik, Lekerika auzoan, Santiago baselizaren inguruan bilduko dira uztailaren 29an. Meza nagusiagaz hasiko dute eguna, eta gelditu barik ariko dira, iluntzera arte egitaraua jarduerez beteta edukiko baitute.

Lekerika auzoan ospatuko dituzte santiagoak nabarniztarrek.

Egitaraua: Busturia (Axpe auzoa)

Uztailak 24, martitzena
- 18:00. Pala txapelketa.
- 20:00. Organo kontzertua Fabio Macera organistagaz.
- 21:30. EinGO Kanta eta Dantza.
Uztailak 25, eguaztena
- 11:00. Kalejira herriko txistulariekin.
- 12:00. Meza nagusia.
- Ostean. Irrintzi Alai Dantza Taldearen ikuskizuna eta Etxebarria trikitilariak.
- 19:00. Bizkaiko Herri Kirol Liga: harri jasotze, ingude jasotze, zaku eramate…
- 20:30. Karrozen desfilea.
- 21:30. Dantzaldia.
Uztailak 26, eguena
- 11:30. Meza nagusia, Arrotegi egoitzan.
- Ostean. Irrintzi Alai Dantza Taldearen ikuskizuna.
- 17:00. Umeen parkea.
- 19:00. Idi probak.
- 21:00. Txokolatea.
Uztailak 27, barikua
- 19:00. Idi probak.
Uztailak 28, zapatua
- 12:00. Sukalki Txapelketarako izen ematea.
- 13:30. Kantu kantari.
- 14:30. Sukalkien aurkezpena eta sari banaketa.
- 17:00. Kili kili punk umeentzako ikuskizuna.
- 18:30. Eskupilota partiduak. Lehen mailako emakumezko afizionatuak: Bizkaia vs Araba.
- 21:00. Erromeria Sukar taldeagaz.

Kortezubi

Etzi, Uztailak 21
- 08:30. XIII. Kortezubiko Mendi Martxa. Ibilbide luzearen irteera 08:30ean izango da, eta laburrarena 10:30ean.
Uztailak 25, eguaztena
- 11:30. Meza santua.
- Ostean. Bakailao jana.
- 18:30. Umeen antzerkia.
- 19:00. Apar jaia.
Uztailak 26, eguena
- 11:30. Meza santua.
- 12:30. Hamaiketakoa.
- 19:00. Gizon probak.
- 20:30. Kike Biguriren bakarrizketa.
Uztailak 27, barikua
- 18:00. Futbito eta saskibaloi txapelketak.
- 19:30. Musika ikuskizuna Xaiborregaz.
- 21:15. Gizon probak.
Uztailak 28, zapatua
- 12:00. Ekin Esku-Pilota taldeko umeen partiduak. Banakako partidua: Ekain Aranaz -Eneko Lejarza .Binakako partidua: Amaia Zarrabeitia-Olatz Beitia /Aimar Urzaa-Aimar Goitia.
- 13:15. Kortezubiko umeen euskal dantzak eta herri kirolak.
- 15:00. Herri bazkaria.
- 16:00. Umeen jolasak.
- 18:00. Mariatxiak.
- Ondoren. Txokolatea.

Morga

Uztailak 25, eguaztena
- 13:00. Meza nagusia, Meakaurren.
- Ondoren. Dantzak, pintxoak eta trikipoteoa, Andra Marin.
Uztailak 26, eguena
- 13:00. Meza nagusia, Meakaurren eta pintxoak.
Uztailak 27, barikua
- 20:00. Txitxiburduntzia.
- 21:00. Joselu anaien erromeria.
Uztailak 28, zapatua
- 10:30. Sukalkirako izen ematea.
- 13:30. Batukada.
- 15:00. Herri bazkaria eta puzgarriak, frontoian.
- 17:00. Musika emanaldia DJ Markelinekin.
- 20:00. Basajaun erromeria.
- 21:00. Taloak.
- 22:00. Su artifizialak; ostean, Basajaun erromeriaren jarraipena.

Nabarniz (Lekerika auzoa)

Uztailak 29, domeka
- 11:30. Meza nagusia.
- 12:15. Kabelinatxe Dantza Taldearen emanaldia.
- 13:00. Iluntzar III. Mendi Lasterketa.
- 14:00-17:00. Umeentzako jolas parkea.
- 14:30. Marmitako txapelketaren sari banaketa.
- 17:00. Herriko umeen antzerkia.
- 17:30. Imanol Ituino magoa.
- 19:30. Musika iluntzean: EinGo erromeria.