Euskal Jazz Bandak izango dira Jazzberreko protagonistak aurten
Bermeoko jaialdiak 21 urte beteko ditu. Lau eguneko «kalitatezko» egitaraua dakar eskualdean jazz musika zaletasuna eta ezagutza bultzatzea helburu dituen jaialdiakJazzagaz gozatzeko aukera eskainiko du beste urte batez Jazzberrek. 21. jaialdia izang...
Bermeoko jaialdiak 21 urte beteko ditu. Lau eguneko «kalitatezko» egitaraua dakar eskualdean jazz musika zaletasuna eta ezagutza bultzatzea helburu dituen jaialdiak
Jazzagaz gozatzeko aukera eskainiko du beste urte batez Jazzberrek. 21. jaialdia izango da aurtengoa, eta ekainaren 30ean hasi eta uztailaren 6ra bitartean luzatuko da. Bertako jazz taldeak ezagutzera eman nahi dituzte, «sortzaile gazteak bultzatuz», eta hala, aurtengo jaialdian euskal jazz bandak izango dira protagonistak.Egitaraua «kalitatezkoa» eta «oso erakargarria» izango dela nabarmendu dute jaialdiaren aurkezpenean Aingeru Astui Bermeoko Udaleko Kultura zinegotziak eta Joseba Verdes Jizz Jazz taldearen ordezkariak.
Besteak beste, EIJO Euskadiko Ikasleen Jazz Orkestra entzuteko aukera izango dute bertaratzen direnek. Verdes oso pozik azaldu da Bizkai, Araba eta Gipuzkoako musika eskola eta kontserbatorioetako ikasleek osatutako banda Jazzberrera datorrelako. Izan ere, Jizz Jazz taldeak aspalditik ekarri nahi izan du Big Band formatuko taldea jaialdira.
EIJO hogei bat musikari gaztek osatzen dute, eta mota guztietako tresnak jotzen dituzte. «Ondo pasatzeko aukera» egongo dela adierazi du Verdesek.
Euskal Herrian oso talde onak daudela eta jaialdia euren lana herriari aurkezteko agertoki aparta dela nabarmendu dute aurkezpenean.
Erreferentea
Astuiren berbetan, «eskualdeko erreferenteak» izatea lortu dute, eta Busturialdean egiten den jazz jaialdi bakarra izanik, azken 21 urteetan jazz musika zabaltzea izan da euren asmoa.
Azaldu duenez, «Bermeo musika jaialdi garrantzitsuen plaza» izatea nahi dute, «estilo ezberdinetako taldeak erakarrita». Hala, udalaren helburuetako bat «herritarrak kulturaren parte eta jabe izatea» dela azpimarratu du, eta hori lortzeko gakoa «udalaren eta herriko taldeen arteko elkarlana» dela esan du.
21. Jazzber jaialdia «arrakastatsua izatea» espero dutela adierazi du Astuik, eta lortu nahi dituzten helburuen artean eskualdean jazz musika zaletasuna eta ezagutza bultzatzea daude, eta, aldi berean, musika estilo berezi horren mundua herrira hurbildu eta jazz musikaren joera berrienak ezagutzera ematea.
Kontzertu guztiak Bermeoko Kafe Antzokian izango dira, 20:30etik aurrera. Sarrera guztiak doakoak izango dira, eta Bermeo eta inguruetako herrietako jazz musika zaletuei edota musika zaleei «kontzertuekin gozatzeko eta jazz estiloa hobeto ezagutzeko aukera» ematea espero dute.
Hori dela eta, «herriko, eskualdeko eta munduko pertsona guztiak» animatu dituzte 21. Jazzberrean parte hartzera eta saioez gozatzera
