BBK Urdaibai zentroak mota guztietako jarduerak eskainiko ditu
Proiektua datorren urtean hastea aurreikusten dute arduradunek.. «Aisialdi aktibo, konstruktibo eta hezigarri» baterako jarduera berriak egingo dituztela adierazi duteBusturin kokatuta dagoen BBK Urdaibai zentrorako erabilera berrien plana aurkeztu z...
Proiektua datorren urtean hastea aurreikusten dute arduradunek.. «Aisialdi aktibo, konstruktibo eta hezigarri» baterako jarduera berriak egingo dituztela adierazi dute
Busturin kokatuta dagoen BBK Urdaibai zentrorako erabilera berrien plana aurkeztu zuen BBK-k pasa den barikuan.Gaur egun, Mundakako itsasadarraren ondoan dagoen esparrua Udalekuen eta SESZ/CEEP eta Jagon hezkuntza-programen egoitza da, eta 4500 neska-mutil baino gehiago baliatzen dira urtero jarduera hauetaz.
Zentroan bertan egindako proiektuaren aurkezpenean Gorka Martinez BBK-ko zuzendari nagusia, Adonai Gomez BBK Urdaibai proiektuko arduraduna eta Ainhoa Elortegi zentroko arduraduna izan ziren. Azaldu zutenez, proiektua datorren urtean gauzatzeko asmoa dute, eta zentroa «Bizkaia osora irekitzea» bilatzen dute, jarduera berriak eskainiz bai ume zein nagusientzat. Jarduera horiekin zentroa «leku erakargarria» bilakatu nahi dute, kirol-jarduerak eginez eta belaunaldien arteko «ohiturak eta balioak» transmititzeko helburuagaz.
Busturian dagoen zentrorako prestatu duten proiektua ingurumenarekiko begirunetsua da, eta bere helburu nagusia zentroaren jarduera jende guztiarentzat izatea da, «aisialdi aktibo, konstruktibo eta hezigarrirako jarduera berriak eskainiz», zentroak bere eremuan dituen 8 hektareatan. Horrela, ingurune pribilegiatu batean guztientzat izango den instalazio-multzoa sortu nahi dute, aire zabaleko hainbat jarduera eskainiz.
Denontzako jarduerak.
Bertan globo arestostatiko batera igo eta Urdaibaiko biosfera osoa ikusteko izateko aukera edukiko da, baita zuhaitzetatik esekitako etxeak errealitate birtual bidez ikusteko ere, aisialdirako gune hau teknologia berriei irekiz. Ohe elastiko, surf eta arraunketa birtualerako gune bat ere izango da, tirolinan eta rokodromoan aritzeko aukeragaz batera.
Berrikuntza nagusietako bat Scape Room-a egitea izango da, «Euskal Herria» gaiaren inguruan lan kooperatiboa sustatuz. Gela horretan, eztabaida-guneak eta erabakiak hartzeko guneak sortuko dira, hizkuntza-komunikazio, matematika, ezagutza, eta norberaren autonomia edo ekimenari buruzko gaitasunak landuz.
Balio Anizkuneko Gune bat izango ere izango da BBK Urdaibai zentroan, non 6D zinema-areto bat egongo den, esperientzia izugarriak bizitzeko. Gune berri honetan gastrobar bat ere egongo da, baita tailerrak eta erakusketak egiteko lekua ere. Zerbitzu berri hauek egun bateko edo asteburuko jardunaldietan eskainiko dira, eta elkarteei edo gizarte, kultura eta kirol arloetako erakundeei zuzenduta egongo dira, baita familiei eta jende guztiari ere.
