II. Kros Mistoa jokatuko da domekan, Markina-Xemeinen
5 kilometro pasatxoko ibilbidea egin beharko dute bikoteek. 12:00etan hasiko da lasterketa. Zelaiaren beheko partean egongo da irteera eta helmugaKros mistoa antolatu dute bigarren urtez Markina-Xemeingo Atletismo Taldeak eta kirol batzordeak. Proba do...
5 kilometro pasatxoko ibilbidea egin beharko dute bikoteek. 12:00etan hasiko da lasterketa. Zelaiaren beheko partean egongo da irteera eta helmuga
Kros mistoa antolatu dute bigarren urtez Markina-Xemeingo Atletismo Taldeak eta kirol batzordeak. Proba domekan izango da, eta iaz bezala, kirola sustatu eta emakumeak kirola egitera animatzea ditu helburu.Aurten ere Zelaitik irtengo dira bikoteak, 12:00etan, eta 5 kilometro pasatxoko ibilbidea egin beharko dute. Zelaiaren beheko partean egongo da irteera eta helmuga, eta antolatzaileek azaldu dutenez, bikoteak batera irten eta sartu beharko dira.
Zelaiari buelta bat emanda hasiko dute lasterketa, eta San Agustik kaletik Xemeinera abiatuko dira korrikalariak, eta Arretxinagatik igarota Barroetaraino joango dira. Ondoren, Beko Benta kaletik bide gorrirantz hartuko dute, eta kiroldegi aurretik Aldaola kalerantz joko dute Ituarte aurreko olibondoraino. Handik Arretxinagara abiatuko dira berriz, eta zuhaitz arteko bide gorritik igarota, Lea-Artibai Ikastetxearen erreka ondoko bidea hartuko dute Uhagon pareraino. Uhagonetik Zelairako azken metroak eginda sartuko dira helmugan bikoteak.
Izen ematea zabalik
Bikoteek herrikrosa webgunean eman dezakete izena jada, edo baita egunean bertan ere, proba hasi baino ordu erdi lehenago. Lasterketan parte hartzeko 5 euro ordaindu behar dira bikoteko; dortsala jasotzean ordaindu beharko dira.
Krosaren amaieran sariak banatuko dituzte; lehen hiru bikote sailkatuek herriko produktuez osatutako oparia jasoko dute.
