Alicia Devaughn pibot estatubatuarra fitxatu du Lointekek
Barrualdea indartzeko jokalari bila zebilen kluba, eta azkenean heldu da. Talia Caldwell jokalaria arrazoi pertsonalengandik taldera beranduago heldu behar izateak, eta Amaya Gastaminzaren lesioak ekarri zuten jokalari baten beharra. Devaughn printzipioz hilabete baterako etorri dela jakitera eman du klubak.
Mario Lopez Lointek Gernika Bizkaiaren entrenatzaileak adierazi du “erreboteetan, aurkaria beldurtzen eta erasoko jokaldietan” lagunduko diola taldeari.
192 zentimetro eta 26 urteko pibot estatubatuarra unibertsitatean Maryland-en hasi zen jokatzen. Frantziar ligan esperientzia dauka; 2014-2015 denboraldian Tarbes taldean jokatu zuen, eta azken bi denboraldiak Flammes Carolo taldean eman ditu. Azken denboraldian batez besteko 10,6 puntu eta 5,8 errebote lortu zituen ligan, eta EuroCupean, berriz, 11,1 puntu eta 7 errebote.
Miribillan
Bestalde, Lointek Gernika Bizkaia taldeko zenbait jokalari eta Mario Lopez entrenatzailea Bilboko Miribillan egon ziren atzo Bilbao Basquet eta Real Madrilen arteko partiduan.
EuroCup txapelketa
Talde gernikarrak eguztenean (urriak 11) jokatuko du EuroCup txapelketaren lehenengo partidua Bilboko Casillan, eta ahalik eta zale gehien bertaratzeko asmoz, klubak autobusa jarri du.
18:30ean aterako dira zaleak Gernika-Lumoko autobus geltokitik (18:15ean bertan egoteko eskatu dute). Joan gura dutenek 5 euro ordaindu behar dituzte.
Autobusean joateko izena ematea beharrezkoa da telefono zenbaki honetara deituta: 650 96 19 98. Autobus zerbitzua egoteko, gutxienez 40 pertsonak izena eman behar dutela jakitera eman dute. Martitzena (urriak 10) da izena emateko azken eguna (20:00ak arte).
Partidua ikusteko sarrerei dagokienez, partidua hasi baino arinago zabalduko dituzte txarteldegiak (ez dago aurretiaz erosteko aukerarik ez eta partidu guztietarako bonurik ere). Lointek Gernika Bizkaiaren bazkideek 8 euro ordaindu behar dituzte, eta gainontzeko ikusleek 10 euro.
Halaber, 14 urtetik beherakoei sarrerak oparituko dizkie klubak, Bizkaiko Saskibaloi Federazioagaz lankidetzan. Horretarako, posta elektronikoa bidali behar da entradas@gernikasaski.com helbidera. Mezuan zenbat sarrera gura dituzten, eta sarrerak txarteldegian edo Bizkaiko Saskibaloi Federazioan eskuratuko dituzten zehaztu beharko dute.
ALBISTE HONEGAZ LOTUTA:
Denboraldiko etxeko lehenengo partiduan erakustaldia eman du Lointek Gernika Bizkaiak
Alicia Devaughn Loiuko aireportuan.
Argazkia: Gernika KESB.
Argazkia: Gernika KESB.
