Busturian egingo dute barikuan Eskola Txikien Jaia
Busturialdeko eskola txikietako ikasleek urteroko hitzordua dute barikuan. Eskola txikia herriaren hazia lelopean Eskola Txikien Jaia ospatuko dute barikuan. Aurten, Busturiko Jose Maria Uzelai eskolak hartuko du jaialdia. Urtero legez, Gautegiz Arteagako Montorre eskolako, Muxikako Urretxindorra eskolako, Natxituko (EA) Haizeder eskolako eta Mundakako ikastetxeko ikasleek parte hartuko dute jaialdian, Busturiko ikasleekin batera.
Ikastetxe desberdinetako gazteak harremantzea, eta herri eskolen aldeko oihartzuna Busturialeko biztanleen artean zabaltzea dira antolatzaileen helburuak. Guztira, Haur Hezkuntzako eta Lehen Hezkuntzako 438 ikaslek parte hartuko dute.
10:00etan hasiko dute Eskola Txikien Jaia. Ordu horretan, Busturiko ikasleek harrera egingo diete gainontzeko ikasleei bertsotan; ondoren, taldeko argazkia aterako dute.
Ostean, 11:15ean, egingo duten musika emanaldirako probasaioak egingo dituzte zikloka. Izan ere, azken asteetan eskoletan prestatu dituzten abestiak kantatuko dituzte ikastetxe desberdinetako kideek. Probasaioak egin ostean, hamaiketarako tartea edukiko dute.
Musika emanaldiaren ostean, txikienek tailerretan parte hartuko dute. Lehen Hezkuntzako ikasleak, berriz, jolasean ariko dira.
13:00etan, bestalde, lagunarteko bazkaria egingo dute ikasleek eta irakasleek. Urtero legez, Eskola Txikien Jaia datorren urteko lekukoa pasatuz amaituko da, 15:05ean. 2018an Gautegiz Arteagako Montorre eskolak hartuko du eskualdeko herri ikastetxe txikien jaialdia.
Egitaraua:
Iaz, Ean batu ziren
Iaz, Ean batu ziren
- 10:00. Harrera eta argazkia
- 10:15. Musika saiorako probak (Euria baldin bada, tenis pistetan eta 2-3 urtekoak aretoan)
- 10:45-11:15. Hamaiketakoa (Euria baldin bada, tenis pistetan eta 2-3 urtekoak aretoan)
- 11:15. Musika emanaldia (Euria baldin bada, tenis pistetan)
- 11:45. Haur Hezkuntzakoentzako tailerrak eta Lehen Hezkuntzakoentzako jolasak
- 13:00. Bazkaria
- 14:00-15:00. Jolas librea
- 15:05. Agurra
