Bermeoko Minbiziaren Aurkako Elkarteak boluntario gazteagoak behar ditu

Olaia Zabalondo

2016/12/16

Bermeoko Minbiziaren Aurkako Elkarteak 22 urte daramatza lanean. Josune Egiak sortu zuen taldea, eta orain dela hiru urte minbiziaren ondorioz hil arte, berak gidatu izan du taldea.

Bermeoko boluntarioetako batzuk euren egoitzan

Elkartea sortu aurretik, hala ere, minbizia zeukaten herritarrak hilean behin batzen zirela dio elkarteko gaur egungo presidente Karmele Molanok: «Mediku eta psikologo bat etortzen ziren, eta arreta eskaintzen zieten. Andra Mari edo Santa Eufemia elizetan batzen ziren». Egiak talde horretan parte hartzen zuen, bai eta Gizakia Helburu proiektuan ere. Bilboko Minbiziaren Aurkako Elkartetik proposatu zieten Bermeoko elkartea sortzea, eta hala egin zuten. Ondoren, gaixoak taldera batzen joan ziren, bai eta boluntarioak ere. Gaur egun Gizarte eta Kultura Etxea dagoen antzinako Josefina eskoletan eduki zuten lehenengo egoitza, urte asko egin zituzten han. Gaur egun, berriz, Erreten parkean daude. Hasi ziren boluntario taldetik hiru baino ez daude gaur egun. Hala ere, hamasei lagun batzen dira taldean. Boluntario gazteagoak beharko lituzketela dio Molanok: «Adinekoak gara guztiak. Gaudenok taldea uzten dugunean elkartea desagertu egingo da. Egia da bai bermeotarrek gustuko dutela laguntza ematea; beste gauza bat da, ordea, boluntario egitea». Hiru egunetan batu Astelehenetan, eguaztenetan eta barikuetan batzen dira, 18:00etatik aurrera. Hala, ateak zabalik izanda, herritarrak boluntario egitera animatu gura dituzte, «ez du-eta lan handirik ematen». Taldeko boluntarioek esan dutenez, gaur egun ez dituzte gaixoen arteko batzarrak herrian egiten, «behin antolatuta jendea ez delako agertzen». Jendeak eskatutakoaren inguruko hitzaldiak eta batzarrak antolatu izan dituztela dio Molanok. Horiek egiteko, baina, Bilboko elkartetik mugitu behar dituzte profesionalak, «gero lau lagun egoteko». Modu horretan, jendea eurengana laguntza eske hurbiltzen denean, informazioa eman eta Bilbora jotzeko bidea errazten diete. Handik arreta eskaintzen diete Bizkaiko herri guztietako gaixoei, bai eta bermeotarrei ere. Bermeon gaixo asko daudela diote, eta besteak beste, ohe bereziak uzten dizkiete behar dutenei. Iaz, esate baterako, hamasei lagunek jaso zuten laguntza Bilboko egoitzatik. Elkarterako dirua eskatzen dute urtean behin: irailaren 16an, Santa Eufemia egunean. Egun horretan itsulapikoekin kalera ateratzen dira taldeko boluntarioak eta hainbat laguntzaile, eta diru asko batzen dutela diote. Aurten 4.822,50 euro batu dituzte, esate baterako. Diru hori ikerketarako edota gaixoei laguntza emateko bideratzen dute. «Ahal duguna egiten dugu Bermeotik. Gutxi dela iruditu arren, gure eskuetan dagoen guztia egiten dugu», dio Molanok. Bestalde, herritarrei informazioa eman asmoz, hainbat kanpainatan informazio mahaiak jartzen dituzte: bularreko zein koloneko minbiziaren nazioarteko egunetan, tabakoaren aurkako egunean, azaleko minbiziaren aurkako kanpainetan… Boluntario izatea pozgarria dela diote. Gabonetan lan handia izaten dute mahai apaingarrien lehiaketa antolatzen. Hala ere, poz-pozik egiten dutela azaldu dute.

Iazko irabazleak

Abenduaren 20an aurkeztu beharko dira mahai apaingarriak

Minbiziaren Aurkako Bermeoko Elkarteak Gabonetako mahai apaingarrien lehiaketa antolatu du, beste behin ere. Aurtengoa lehiaketaren hemeretzigarren edizioa izango da, eta parte hartu gura dutenek abenduaren 20rako prest eduki beharko dituzte lanak. Gabonetako mahai apaingarriak Nestor Basterretxea aretoan aurkeztu beharko dituzte parte hartzaileek, datorren martitzenean, 12:00etatik 14:00etara eta 18:00etatik 20:00etara. Parte hartzaile bakoitzak, gehienez, bi mahai apaingarri aurkeztu ahalko ditu. Lanak egiteko erabiliko den materialaren balioa ezingo da 18 euro baino gehiagokoa izan, eta debekatuta dute gorostia erabiltzea. Epaimahaikideak abenduaren 21ean batuko dira, 18:00etan. Erabakia hartu ostean banatuko dituzte sariak, hiru sari, hain zuzen ere. Lehiaketako sariak, Bermeoko merkatarien laguntzari esker eman ahal dituzte. «Herriko denda asko eta askok parte hartzen dute oparitxoren bategaz, eta guk, horiek batuta, otzarak egiten ditugu», dio elkarteko presidente Karmele Molanok. Epaimahaiak originaltasuna, zailtasuna eta lan artistikoa kontuan hartuko ditu sariak emateko. Urtero legez, parte hartzaileek dohaintzan utzi ahalko dituzte lehiaketara aurkeztutako mahai apaingarriak. 12 eurotan salgai jarriko dituzte abenduaren 22an, 12:00etatik 14:00etara eta 18:00etatik 20:00etara. Dirua, AECCrentzat izango da. Elkartea herrian ezagutzera eman gura zutelako antolatu zuten lehenengoz lehiaketa. Orduko boluntarioek egindako lanak eta bi herritarrenak baino ez zituzten aurkeztu. Gerora, baina, arrakasta hartzen joan da, eta, iaz, esaterako, 50 mahai apaingarri baino gehiago aurkeztu zituzten lehiaketara. Gero eta lehia handiagoa dagoela azaldu dute, gero eta mahai apaingarri landuagoak aurkezten dituztelako. «Azken urteetan oso lan onak aurkeztu dituzte», esan dute