Zapatuan Altsasura joateko autobusa antolatu dute
Altsasuko auzia dela eta, atxilotuei babesa emateko eta auzia salatzeko Nafarroako herri horretan zapaturako deitu duten mobilizaziora joateko autobusa aterako da Gernika-Lumotik. 10:30ean aterako da autobusa, eta Arrano tabernan eman behar da izena.
Hain zuzen, urriaren 15ean Altsasun gertatutako liskarrarengatik bederatzi gazte auzipetu ditu Espainiako Auzitegi Nazionaleko Carmen Lamela epaileak. Bi guardia zibil eta euren bikotekideen aurkako liskarretan parte hartzea leporatzen die, eta atzean terrorismo, gorroto, atentatu zein lesio delituak egon litezkeela dio. Bederatzi gazteetatik zazpi espetxean daude egun, eta 6.000 euroko bermea jarri die epaileak bakoitzari.
Gernika-Lumon, joan den zapatuan manifestazioa egin zuten ehunka lagunek, auzia salatzeko.
Gainera, bueltan bazkaria jateko aukera izango du gura duenak. Autobusa eta bazkariagatik 10 euro ordaindu beharko dira.
