Seber Altubek herritarrak bildu nahi ditu barikuan, Pasealekuan
Azaroaren 18an jaialdia egingo dute Pasealekuan, Mende erdi, etorkizun bete… lelopean, ikastetxearen bost hamarkadak ospatzeko. Jaialdia aurkezteko prentsaurrekoa egin dute gaur, irakasle, ikasle ohi eta gaur egungo ikasle eta irakasleekin.
1966ko abuztuaren 30ean jaio zen Seber Altube, Gernika-Lumoko zenbait herritar ikastola sortzeko batu zirenean. Pili Alberdi izan zen ikastetxeko lehen irakaslea, eta, 50 urte beranduago, garai hartan zegoen giro berezia gogoratu du gaur: “Gure umeei, eta herriari oro har, aukera berriak eskaintzeko beharrizana argi genuen”.
Jarraian, Ainara Elgezabal irakasleak hartu du hitza. Esan duenez, “aukera falten aurrean, bide propioak jorratzen ikasi dugun herritar talde zabala” izan zen ikastola bultzatu zuena. Seber Altube bezalako proiektuen izaera irekia eta publikoa ere aipatu ditu. Kooperatiban antolatua, aberasteko asmorik gabekoa eta Euskal Herri osoan euskara euskal kulturan heztea bermatzen duela gogoratu du Elgezabalek.
Ikastolak herri honen aberastasun sozialaren eta dinamismo kolektiboaren adierazgarri direla nabarmendu du Elgezabalek: “Azken urteetan kolektiboan eta elkarlanean hezi gara, Gernika-Lumon erabat errotuta dagoen proiektua izatea lortuz eta denon artean egindako lanak bere fruituak eman ditu”, adierazi du. Era berean, etorkizunean ere hala jarraitzeko asmoa dutela nabarmendu du: “Herri moduan garrantzitsua dela uste dugulako”.
Egiten genuenean sinesten genuen eta denon artean egin du aurrera”Auzolanetik eta ilusiotik sortu zen proiektua izan zela azpimarratu du Alberdik. Hala ere, lan gogorra egin behar izan zutela gogoratu du, ordura arteko hezkuntza irauli eta proiektu herritar euskaldun hura aurrera atera ahal izateko. “Egiten genuenean sinesten genuen eta denon artean egin du aurrera”, gehitu du.
Ibai Zobaran ikaslea, Ioritz Gaztelu guraso eta ikasle ohia, Ainara Elgezabal irakaslea eta Pili Alberdi irakasle ohia, gaurko prentsaurrekoan.
Ikastolak herri honen aberastasun sozialaren eta dinamismo kolektiboaren adierazgarri dira”Ioritz Gaztelu guraso eta ikasle ohiak belaunaldi aldaketaren adierazgarri gisa hartu du hitza. Azaldu duenez, alabarentzako ikastola aukeratu du eskaintzen dituen aukerengatik eta baita bere izaeragatik: “Nahi dugun hezkuntza eredua eraikitzeko aukerengatik”. Herritarrekin batera. Ospakizun jaialdia Pasealekuan egingo dutela jakinarazi du Ibai Zobaran ikasle gazteak. Herrian ospatzeko nahia azaldu eta gainontzeko ikastetxe, erakunde eta eragileei gonbidapena luzatu diete. Barikuan [azaroaren 18] 17:00etatik aurrera, puzgarriak, txokolate jana eta trikitilariak egongo dira Pasealekuan. Ekitaldi nagusia 19:00etan hasiko da. Festa egunari amaiera emateko erromeria eta kale animazioa egongo dira. Jaialdiaz gain, 50. urteurrenaren ospakizunen barruan beste hainbat ekintza ere egingo dituztela aurreratu dute gaurko prentsaurrekoan. Horien artean, etorkizuneko erronken gainean hausnartzeko saioak eta baita ikastolako afaria ere. EGITARAUA
