Igor Mendizabal 'Goxerri' mutrikuarraren hitzaldiagaz hasiko da XVI. Mendi Astea
Goxerrik High Sierra eta Yosemiten bizitako esperientziaren berri emango du. GPS ikastaroan parte hartu nahi dutenek Anaitasuna tabernan eman beharko dute izena, azaroaren 15a aurretikOndarroako Aurrera Mendi Taldeak prest du XVI. Mendi Astea. Hiru ast...
Goxerrik High Sierra eta Yosemiten bizitako esperientziaren berri emango du. GPS ikastaroan parte hartu nahi dutenek Anaitasuna tabernan eman beharko dute izena, azaroaren 15a aurretik
Ondarroako Aurrera Mendi Taldeak prest du XVI. Mendi Astea. Hiru asteburutan banatuta, bost ekimen antolatu dituzte. Lehenengoa etzi egingo da Portuko Ranpan, Igor Mendizabal Goxerri eskalatzaile eta alpinista mutrikuarraren eskutik.Goxerrik High Sierra-Yosemite diapositiba emanaldia eskainiko du, eta bertan, Ameriketako Estatu Batuetako Yosemite parke nazionaleko horma erraldoian eta High Sierra mendikatean bizitako esperientziaren berri emango du.
Hurrengo asterako, berriz, bi eguneko GPS ikastaroa antolatu dute. Azken urteotan ohikoa den modura, mugikorrekin egingo dute ikastaroa. Lehenengo egunean bi ordu inguruko saio teorikoa egingo dute, eta bigarren egunean, aldiz, praktikan jarriko dute saio teorikoan ikasitakoa. Horretarako, mendi ostera motz bat egingo dutela iragarri dute Aurrera Mendi Taldekoek. «Saio teorikoan ikasitakoa praktikan jartzen saiatuko gara. Hemen inguruan ibiliko gara, urrutira joan barik».
Mendi taldekoek iragarri dutenez, Oruxmaps doako aplikazioa zelan erabili ikasiko dute ikastaroan. «Mugikorrentzako hainbat aplikazio daude, baina ikasiko dugun hau oso eraginkorra eta gomendagarria dela deritzogu. Oso interesgarria da, eta erabiltzeko erraza». Ikastaroan parte hartu nahi dutenek azaroaren 15a baino lehen eman beharko dute izena, Anaitasuna tabernan.
Neguan egindako lehenengoa
Azken asteburuan, ostera, ekimenez beteta etorriko da. Azaroaren 25ean, esaterako, Alex Txikon alpinista lemoarrak Nanga Parbat mendiaren lehenengo neguko igoera diapositiba emanaldia eskainiko du.
Txikonek, hain zuzen ere, Simone Moro italiarragaz eta Ali Sadpara pakistandarragaz batera Pakistango Nanga Parbat (8.125) mendia igo zuen, eta alpinismoaren historian lekua egitea lortu zuten, Nanga Parbat estreinako neguan igota ordura arte urtarorik hotzenean eskalatu gabeko zortzimilakoa zen. Espedizioaren inguruko hainbat argazki proiektatuko ditu Txikonek, eta esperientzia horren inguruan berba egiteko tartea hartu ahalko dute Kofradia Zaharrera doazenek.
Azaroaren 26an, aldiz, boulderragaz gozatzeko aukera izango dute Bizkai osotik etorriko gaztetxoek. Eta mendi asteari amaiera emateko, Finalista Eguna egingo dute azaroaren 27an.
Ohi modura, mendizaleek Ondarroatik irtengo dute; Alamedatik, Kalamendira joango dira, eta Berriatuako plazan geldiadia egingo dute, «beste batzuekin elkartzeko». Handik, Magdalena auzora igoko dira, eta hantxe egingo dute Finalista Eguneko ekitaldi xumea, opari banaketa eta guzti.
