Xixili Torneoan parte hartu duten taldeek maila oso ona erakutsi dute
Zapatuan lehiatu zuten torneoaren balorazio oso ona egin du Xixili Gimnastika taldeak. “Maila altua egon da, eta emaitzagaz oso pozik gaude. Dena ondo irten da, eta kanpotik etorritako taldeek antolakuntzagatik zoriondu gaituzte”, azaldu du Andres Uriondo talde bermeotarraren kideak.
Etxeko taldeari dagokionez, kluben arteko txapelketako saria lortu du, eta kadeteen taldeko sailkapenean bigarren postua eskuratu du. Halaber, gaztetxoen mailako bakarkako lehian Estibaliz Basterretxea lehenengoa izan da.
Bestalde, bakarkako kadeteen lehian, Ipurua taldeko Alaitz Aranberri gipuzkoarra nagusitu da, eta gazteetan, berriz, Nerea Monasterio Aresketa taldeko arabarra izan da onena.
Espainiako txapelketa
Zapatuan Bermeon eta domekan Logroñon jokatu dituzte Espainiako txapelketaren aurreko azken bi txapelketak. Izan ere, Xixili Torneoa txapelketa horretarako prestaketa moduan hartzen dute bertan lehiatzen diren gimnastek.
Uriondok azaldu duenez, talde batzuk oso ondo prestatu direla ikusi zen zapatuan Arene Kiroldegian. Esate baterako, etxeko taldeagaz batera, gazteetan Laredok, eta kadeteetan Castro Urdialesek talde gogorra dutela erakutsi zuten.
Asteburu honetan Valladoliden (Gaztela eta Leon, Espainia) jokatuko dute Espainiako Txapelketa. Xixilitik, talde kategorian kadete eta gazte mailak lehiatuko dituzte, eta bakarkakoari dagokionez, Basterretxeak gaztetxoen mailan parte hartuko du.
“Ikusi beharko da beste taldeek zelako maila duten. Normalean, valentziarrak aurkari gogorrak izaten dira, baina, esaterako Andaluziako edo Gaztela eta Leongo taldeak ere indartsuak dira”, zehaztu du Uriondok.
XIXILI TORNEOAREN SAILKAPENAK:
Guztira, lehen mailan lehiatzen diren hamazortzi taldetako kideak batu ziren zapatuan, Bermeoko Arene Kiroldegian.
Etxeko taldeagaz batera, Bizkaitik Sakoneta, Dana eta Santutxu taldeetako ikasleak lehiatu dira, Gipuzkoako talde bakarra Ipurua izan da, eta Oskitxo eta Aresketa talde arabarretako kideak ere aritu dira lehian.
Bestalde, Calahorra talde errioxarra, Asturiasko Versalles eta Siero taldeak eta Gazte eta Leongo Armonia taldeko gimnastikalariak ere egon dira. Hala, parte hartzaile gehienak talde kantabriarretakoak izan dira: Santander, Castro Urdiales, Laredo, Torrelavega, Serpentinas, Cartes eta Santillana-Reocin.
Argazkia: Xixili Gimnastika taldea.
- TALDEKAKOA:
- Xixili
- Castro Urdiales
- Torrelavega
- GAZTETXOAK:
- Estibaliz Basterretxea
- Zuriñe Trabudua
- Lucia Villalba
- KADETEAK:
- Alaitz Aranbarri
- Naia Valladares
- Maria Arpide
- GAZTEAK:
- Nerea Monasterio
- Irene Esparza
- Sheila Vilchez
