650 korrikalarik eman dute izena Gernika-Bilbao Running lasterketan
Gaur da Internet bidez ( www.gernikabilbaorunning.com webgunean) izena emateko azken eguna, gauerdia arte dago horretarako aukera. Halaber, bihar eta etzi Bilboko Azkuna Zentroan izena eman ahalko da. Beraz, antolatzaileek 700 partaide inguru espero dituztela jakitera eman dute.
Momentuz, 160 korrikalarik hasiko dute lasterketa ez-lehiakorra, Gernika-Lumon. Proba Zornotzan hasteko, berriz, 150 pertsonak eman dute izena, eta jende gehien Galdakaon batuko dela zehaztu dute. Handik, 200 parte hartzailek burutuko dute Bilbora arteko ibilbidea. Bestalde, Basauriko irteerarako 140 korrikalari daude izena emanda.
34 kilometro
Domekan burutuko dute Gernika-Bilbo Running nazioarteko lasterketa ez-lehiakorra. Lehenengoz egingo da proba, eta Gernika-Lumo eta Bilbo artean, 34 kilometroko ibilbidea prestatu dute. Korrikalariak 10:00etan hasiko dira arineketan.
Bestalde, maratoi erdiko distantzia baino apur bat gehiago izango du Zornotza eta Bilbo arteko lasterketak: 22,7 kilometro. 10:55ean irtengo dira Zornotzatik.
Lasterketa laburragoa egin gura dutenek bi aukera dituzte. Galdakaotik irtenda, 11 kilometro egin ditzakete edo Basauritik irtenda 8,9 kilometro. Galdakaon 11:37an jarri dute irteera ordua, eta Basaurin, berriz, 11:47an.
Txip bana dortsaletan
Lau ibilbide daudenez, partaideek dortsal desberdinak izango dituzte. Gernika-Lumo eta Bilbo artekoa egiten dutenek, adibidez, urre koloreko dortsala izango dute; Zornotza-Bilbo korritzen dutenek, zilarrezko dortsala jantziko dute. Galdakaotik irteten direnek brontze kolorekoa edukiko dute, eta Basauri-Bilbo egiten dutenak dortsal zuriagaz ariko dira.
Antolatzaileek jakitera eman dutenez, dortsaletan txip bana eramango dute, eta ibilbidean zehar hainbat anoa postu egongo dira 5 kilometrotik behin jarriko dute.
Eta helmuga Bilboko Kale Nagusian, Bizkaiko Foru Aldundiaren eraikinaren parean egongo da. Besteak beste, Martin Fiz lasterketaren aitabitxia ere bertan egongo da.
Lasterketaren amaieran, berriz, parte hartzaileak Deustuko kiroldegian dutxatu ahalko dira.
