Alderdietako hautagaiak kanpaina betean daude, herritarren boto eske
EH Bildu koalizioak gobernu programa aurkeztu du Gernika-Lumon. Gipuzkoako EAJren hautagaiek Mutrikun hasi dute hauteskunde kanpainaHerritarren boto eske, kanpaina bete-betean dira Eusko Legebiltzarrerako hauteskundeetarako hautagaiak. Barikuan hasi ze...
EH Bildu koalizioak gobernu programa aurkeztu du Gernika-Lumon. Gipuzkoako EAJren hautagaiek Mutrikun hasi dute hauteskunde kanpaina
Herritarren boto eske, kanpaina bete-betean dira Eusko Legebiltzarrerako hauteskundeetarako hautagaiak. Barikuan hasi zen kanpainaren zenbait ekitaldi egin dituzte dagoeneko bertoko herrietan, eta hilaren 23a bitartean ere egingo dituzte.EH Bildu koalizioak Gernika-Lumon aurkeztu zuen gobernu programa, zapatuan. 720 neurri, 27 lege proposamen eta 26 plan estrategiko dakartza koalizio abertzaleak hilaren 25eko hauteskundeetarako. Alor desberdinetan eragiteko zehaztu dituzten neurriak dira: enpleguan, kulturan, hezkuntzan, zerga politikan, pentsioetan, gazteengan, emakumeengan, bakean edota erabakitzeko eskubidean, kasurako.
Giza dimentsioan oinarritutako herri programa garatu nahi du EH Bilduk, eta bost erronka nagusi zehaztu ditu: erreskate soziala, burujabetza, bakea, gobernantza eta etorkizuna.
Gobernu programa bideragarri egiteko, 19 kontseilu eta batzorde herritar, 8 behatoki berri, 5 herri galdeketa proposamen, 3 agentzia berriren sorrera eta erakundeen arteko elkarlanerako 7 gune berri proposatuko ditu EH Bilduk.
Bizkaiko zerrendaburu Jasone Agirreren esanetan, ez dago herri proiekturik jenderik gabe; ez dago etorkizunik jendea kontuan hartzen ez bada, eta ez bada eraikitzen jendearen borondatearen, nahiaren eta lehentasunen gainean. «Hori izan behar da iparra. Eta horren gainean eraiki beharko dira Euskal Herriaren etorkizuna eta askatasuna bermatzeko akordioak».
Hezkuntza sistema propioa
Kultura, hezkuntza era hizkuntza alorrean koalizioak proposatzen dituen neurriei buruz aritu zen Agirre zapatuan, haien garrantzia azpimarratuz.
LOMCE eta Heziberri dekretuen aurka azaldu zen Bizkaiko zerrendaburua, hezkuntza sistema propioa aldarrikatuz eta hezkuntza akordio bat sustatzeko borondatea adieraziz.
Arnaldo Otegik ere hitza hartu zuen zapatuko ekitaldian. Haren berbetan, burujabetzarik gabe Euskal Herria «menpekotasunera» kondenatuta dago.
Horregatik, Gernikatik, etorkizuna eraikitzeko, lau ardatzetan oinarritzen den proposamena luzatu zuen: gehiengo politiko, sozial eta sindikalak babestuko duen herritarren subiranotasun osoa helburu duen bide-orria adostu eta ezarri, akordio sozial eta politiko zabalez; erabakitzeko eskubidea aitortuko eta praktikara eramateko bermeak eskainiko dituen estatus politiko berri baterako proposamena; estatus politiko berria berresteko herritar kontsulta abilitatzailea eta Estatu espainolak izan dezakeen jarreraz gaindi, galdeketa abilitatzailez euskal herritarrek demokratikoki adierazitako borondatea estatus politiko berriaz, errespetatu eta garatzeko konpromisoa.
Halaber, Agirrerekin batera, EH Bilduren hautagai den Iratxe Arriola Eako alkatea eta beste zenbait hautagai ere izan ziren astelehenean merkatu plazan, lehen sektorea zaintzearen garrantzia nabarmenduz.
Proposamen zehatza egin zuen Agirrek, lehen sektorean enplegua sortzeko eta egonkortzeko plan integrala egitea.
Horretarako, lehen sektorean inplikatutako instituzio eta eragile denekin hitz egiteko eta plan bat adosteko beharra dagoela azaldu zuen. Agirreren esanetan, azken urteetan instituzioen aldetik ez dute lehen sektorea zaindu, eta lanpostu asko galdu izan dira.
EH Bilduren programan mahai intersektorial bat sortzea jasota dagoela esan zuen Arriolak, ekonomia lokala suspertzeko eta enplegu egonkorrak sortzeko. Horretarako, politika aktiboak bideratu behar dira, Arriolaren esanetan.
Gernika-Lumoko udal zinegotziak ere merkatu plazan egon ziren, EAJk daukan programaren berri eman, eta banatzen.
Elkarrekin Podemos-eko Busturialdeko kideak, berriz, Pablo Picasso kalean ibili ziren propaganda banatzen, domekan.
Bestalde, Jone Goirizelaia eta Julen Arzuaga Bizkaiko EH Bilduren hautagaiek Lea-Artibai eskualde mailako mitina eman zuten domekan. Arzuaga, besteak beste, euskal presoen eta memoria historikoaren inguruko komisioko kide izan da, eta bertan Ondarroako gaiek izan duten garrantziaz aritu zen; Ibon Iparragirreren kasua, frankismoak hildakoak edo gerra zikinak hildakoak aipatu zituen.
Goirizelaia, berriz, EH Bilduren eskaintza politikoaren inguruan aritu zen, eta Euskal Herriak aurrera jarraitzeko akordioak beharrezkoak dituela azpi- marratu zuen.
Halaber, hurrengo lau urteotarako dituzten hiru erronka nagusiak azaldu zituen: eskubide sozialak murrizketa barik bermatzea, bakea gauzatu arte lanean jarraitzea eta estatus politikoa bideratzen duen herriaren erabakitze eskubidea.
Jeltzaleak Mutrikun
Gipuzkoako EAJren hautagaiek Mutrikun egin zuten barikuan Eusko Legebiltzarrerako hauteskunde kanpainako lehen ekitaldia. Joseba Egibar Gipuzkoako hautagai nagusiarekin eta zenbait hautagaiekin batera, Jose Angel Lizardi Mutrikuko alkatea eta Ion Ganbra herriko zinegotzia eta Gipuzkoako zerrendako hautagaia egon ziren.
Egibarrek nabarmendu zuenez, «politikan giltzarri da sinesgarritasuna izatea».
Sinesgarritasuna lortzeko bi baldintza betetzea berebizikoa dela gogoratu zuen. «Lehendabizi, zure herriarengan sinetsi behar duzu, bertako jendearengan, beren iritzi eta erabakiak errespetatuz. Horren gain, estrategikoak izango diren erabakiak hartzerakoan asmatu behar da, politikaren aldeko apustu argi eta garbia eginda. Iraunaraztea, soilik, demokratikoak diren bideei eutsitako politika da. EAJren ibilbideak argi erakusten ditu bi baldintza horiek, eta bi baldintza horiekin jokatzeak sinesgarritasun handiena ematen dio Eusko Alderdi Jeltzalearen eskaintzari».
