Uztailari agur, festei ez
Udako festen giroari eutsiko diote hainbat herrik saninazioetan. Busturialdean, Foruan, jai handiak dituzte uztail bukaerakoak, baina beste hainbat herri eta auzotan ere festa giroan murgilduko dira herritarrak.Uda festa giroan bizi dute herritarrek, e...
Udako festen giroari eutsiko diote hainbat herrik saninazioetan. Busturialdean, Foruan, jai handiak dituzte uztail bukaerakoak, baina beste hainbat herri eta auzotan ere festa giroan murgilduko dira herritarrak.
Uda festa giroan bizi dute herritarrek, eta Santiago eta Santa Ana festei erreleboa ematera helduko dira saninazioak. Eta saninazioekin batera, uztailari agur esango diote herritarrek; festei ez, ordea.Busturialdean, urteko jai nagusiak dituzte Foruan. Uztailaren 29an hasi, eta abuztuaren 7ra bitartean, herriko festak goi-goitik ospatuko dituzte foruarrek. Ume, gazte zein nagusi, denen neurrirako egitaraua prestatu dute.
Foruagaz batera, Bedaroak (Ea) ere festak ospatuko ditu. San Inazio bezperan ume eta ume ez direnek ere izango dute zegaz gozatu. Apar festa, mus eta bolo txapelketak, bertso poteoa.. Eguna erromerian amaitzeko aukera izango dute. Hilaren 31 ere, kirolean zein jolasean, festa giroan emango du.
Urrutxuk (Muxika), Laidak (Ibarrangelu), Larruskainek (Markina-Xemein) eta Ondarroak ere saninazioak ospatuko dituzte. Bermeon, berriz, mezak emango dituzte Gaztelugatxen, uztailaren 31n.
Kuadrillak protagonista
Ondarroan, uztailaren 26tik 30era, San Inazio kaleko dendariek kalearen inguruko lau galderaz osaturiko sorta banatuko dute erosleen artean. Erosleek galdera horiek erantzuteko aukera izango dute, eta ondo erantzuten dutenen artean afari baten zozketa egingo dute.
Uztailaren 30ean eta 31n, aldiz, jai giroa izango da nagusi herrian.
San Ignazio egunari kuadrillen arteko erlojupeko bizikleta martxa herrikoiagaz emango diote hasiera. Parte hartzaileek 09:30etik 10:30era bitartean eman beharko dute izena, Torrepe inguruan.
Taldeak 4 eta 8 parte hartzailekoak izan beharko dira, eta talde bakoitzean, gutxienez, emakumezko edo gizonezko bat egon beharko du.
Ostean, popa ustel bizikleta lasterketa eta ezusteko bizikleta lasterketa egingo dituzte. Irabazleek saria edukiko dute.
