Taelladiegaz batera hasiko dira bihar, Bermeoko Olinpiadak
Gazte Asanbladak antolatutako Taelladara aurkeztu gura dutenek 11:00etan eman beharko dute izena. Zortzi probako olinpiadak antolatu ditu Txosna BatzordeakBosgarren urtez jarraian, Bermeoko Gazte Asanbladak Taelladie Talako paella txapelketa antolatu d...
Gazte Asanbladak antolatutako Taelladara aurkeztu gura dutenek 11:00etan eman beharko dute izena. Zortzi probako olinpiadak antolatu ditu Txosna Batzordeak
Bosgarren urtez jarraian, Bermeoko Gazte Asanbladak Taelladie Talako paella txapelketa antolatu du. Hala, parte hartu gura duten guztiek Talan dute hitzordua, bihar. Era berean, Talan bertan emango diote hasiera Txosna Batzordeak aurten lehenengoz antolatutako Bermeoko Olinpiadei.Zapatuan paellak txapelketara aurkeztu gura dituzten horiek 11:00etan eman beharko dute izena, Talan. 13:30etik aurrera epaimahaikideak jarriko dituzte lanean; txapelketara aurkezten dituzten paellak dastatzeko tartea izango dute, ordu horretan aurkeztu beharko dituzte parte hartzaileek goizean egindako arrozak.
12:00etan, umeentzako jolasak prestatuko dituzte Gazte Asanbladako kideek. Jolasetan parte hartzeko asmoa duten umeei bainujantzia eroateko gomendioa egiten diete. Goizean, bertsolariak ere ibiliko dira Talako giroa alaitzen.
Taelladako paellarik gozoenak zeintzuk diren 17:00etan esango dute. Jakinarazi dutenez, hiru sari banatuko dituzte.
Irailaren 17ra arte
Bestalde, bihar hasi eta irailaren 17ra bitartean, herri olinpiko bihurtuko da Bermeo. Izan ere, Txosna Batzordeak Bermeoko Olinpiadak antolatu ditu aurten, lehenengoz. Taelladiegaz batera hasiko dira bihar olinpiadak, eta Andra Mari eta Santa Eufemia jaietan amaituko dira. Bitartean, izena ematen duten taldeek zortzi proba lehiatu beharko dituzte.
Adin guztietako jendea batu gura dutela azaldu dute antolatzaileek. Bost laguneko taldeak osatu behar dira, eta talde bakoitzak ordezkari bat izendatu beharko du, bai eta taldearentzako lelo bat asmatu ere.
Talde bakoitzak izena emateko orri bat bete beharko du. Orri hori Talako eta Aritzatxu hondartzako kantinetan, Luma liburudendan, Aue-n eta Gizarte eta Kultura Etxean aurkitu daiteke. Hurrengo helbide elektronikora mezu bat bidaltzerik ere badago: olinpiadak2016bermeo@gmail.com.
Bihar 17:30ean hasiko dituzte Talan olinpiadak. Gura dutenek bihar bertan eman ahalko dute izena, 13:00etan.
Bermeoko Olinpiadekin herritarren arteko harremanak sendotzea dute helburu antolatzaileek, adin ezberdinetako jendea batuta. Era berean, jende berria ezagutzeko aukera eta jaiak barrutik ezagutzeko aukera ere emango dutela azaldu dute. Beraz, herritarrak animatu gura izan dituzte taldeak osatzera eta izena ematera.
