Garciak, Lazarok eta Diezek Basket Basque Tour 2016 txapelketa jokatuko dute asteburuan
Euskal selekzioagaz ariko dira lehian, Jon Txakartegi entrenatzailearen aginduetara.
Bihar hasi eta domekara bitartean, Zornotzan eta Durangon hiruko txapelketa jokatuko dute Argentinako, Venezuelako eta Euskal selekzioek.
Hain zuzen ere, Argentinako selekzioagaz jokatuko dute 2015-2016 denboraldian Gernika Bizkaian aritutako Gisela Vegak eta Victoria Llorentek. Azken horrek hurrengo bi denboraldietan talde gernikarrean jokatzeko kontratua du.
Vega eta Llorentegaz batera, jokalari indartsu asko ditu argentinar selekzioak. Besteak beste, Emakumezkoen Ligan Zaragozako taldean jokatutako Melisa Gretter, Macarena Rosset eskolta edota Andrea Boquete hegaleko jokalari argentinarrak dira selekzioko izarrak.
Halaber, Venezuelak ere talde sendoa dauka, eta horren adierazgarri da Hego Amerikako txapelketan azpitxapeldun geratu izana. Txapelketa horretan, finala izan ezik (Brasilen kontra galdu zuen) partida guztiak irabazi zituen. Hauek dira Venezuelako selekzioaren jokalari indartsuenak: Waleska Perez joko antolatzailea, Roselis Silva eskolta, Ivaney Marquez hegaleko jokalaria, Ana Roman, Yosimar Corrales eta Daniela Wallen.
Partiden egutegia
Bihar, Venezuelaren eta Euskal selekzioaren arteko lehia egongo da Durangoko Landako kiroldegian. 19:30ean hasiko da neurketa.
Bestalde, zapatuko eta domekako partidak Zornotzako Larrea kiroldegian jokatuko dituzte.
Zapatuan, 17:00etatik aurrera, Argentina eta Venezuela ariko dira nor baino nor gehiago. Domekan, berriz, Argentinak eta Euskal selekzioak jokatuko dute, 12:00etan hasita.
Euskal selekzioko jokalariak:
- Izaskun Garcia (Gernika Bizkaia)
- Yaiza Lazaro (Gernika Bizkaia)
- Naiara Diez (Orain arte Gernika Bizkaian baina oraindik ez du kontratua berritu)
- Arrate Agirre (ADB Araski AES)
- Iulene Olabarria (IDK Gipuzkoa UPV)
- Onintza Aduriz (IDK Gipuzkoa UPV)
- Maria Asurmendi (Perfumerias Avenida)
- Intza Lizarazu (Añares Rioja ISB)
- Laura Pardo (ADB Araski AES)
- Ane Aldaur (ADB Araski AES)
- Amaya Gastaminza (Campus Promete)
- Maria Eraunzetamurgil (IDK Gipuzkoa UPV)
Basket Basque Tour 2016 txapelketaren aurkezpena, Getxon.
