Gernika-Lumoko jaiek kartel bete kontzertu dakarte
Esne Beltza, Doctor Deseo, McOnak, Lehendakaris Muertos, Bad Maners eta Gozategi izango dira aurtengo Gernika-Lumoko eta Lurgorriko jaietako kartel buruak. Jai Batzordeko, Txosna Batzordeko eta Udaletxeko Kultur arloko ordezkariek aurkeztu dituzte aurtengo jaietako kontzertuak. Esan dutenez, “aurten ahalegin berezia egin dugu eskaintza zabalena egiteko, eta publiko zabalenari zuzenduta”.
Aurtengo Lurgorriko eta Gernika-Lumoko San Roke eta Andra Mari jaietako kontzertuetan denetarik egongo dela azaldu dute Jai Batzordekoek. Batzuek errepikatu egingo dute eta beste batzuk berriz, Euskal Herriko talde ezagunak izan arren, lehen aldiz etorriko dira hiribilduko jaietara.
Aipatutakoez gain, Tximeleta, Joxpa eta Garilak 26 erromeriek ere girotuko dituzte festak. Eskualdeko taldeek ere bere lekua badute kartelean; hala nola, Tooth, Dientes de Luna, The Riff Truckers eta The Uski´s taldeak.
Aurtengo jaietarako “ahalik eta musika estilo ezberdinenak” biltzen saiatu direla azaldu dute Jai Batzordekoek. Hala ere, aurtengo aurrekontua aurreko urteetakoa baino baxuagoa izan dela-eta, ahalegin berezia egin behar izan dutela aitortu dute.
Kartel lehiaketa
Era berean, jaietako kartel lehiaketaren deialdia ere zabalik dagoela jakinarazi dute. Aurtengo lehiaketan, gainera, berritasunik ere bada. Hain zuzen, lehen saria 400 eurokoa barik, 500 eurokoa izango da. Aurreko urteetan kartelak inprimatzerako orduan zenbait arazo izan zituzten; horregatik, aurten formatu digitalean aurkeztu beharko dira, CD euskarria erabiliz. Eskuz egindako lanak ere eskaneatuta aurkeztu beharko dira. Kartelek 45×65 zentimetroko tamaina izan beharko dute.
Lanak aurkezteko azken eguna ekainaren 24a izango da. Uztailaren 6an aldiz, Jai Batzordeak osatutako epaimahaiak kartelik onena aukeratuko du, eta erabakia egun berean jakinaraziko dute. Ekainaren 27tik eta irabazlea plazaratu arte, lanak erakusten ipiniko dituzte Kultur Etxean.
PROGRAMA
Estilo ezberdinetako doinuak dakartzate aurtengo Gernika-Lumoko jaietako kontzertuek
- Abuztuak 11 Lurgorriko jaiak The Uski´s Esne Beltza Tximeleta
- Abuztuak 13 Pasealekuan Tooth Doctor Deseo
- Abuztuak14 Pasealekuan Dientes de Luna McOnak Joxpa Mariachi Imperial Villa Hidalgo (San Juan Ibarra Plazan)
- Abuztuak 15 Pasealekuan Niña Coyote & Chico Tornado Lehendakaris Muertos Oihan Vega (San Juan Ibarra Plazan)
- Abuztuak 16 Pasealekuan Bad Maners Garilak 26 Bilbao Mapa Mundi (San Juan Ibarra Plazan)
- Abuztuak 17 Pasealekuan The Riff Truckers Gozategi
- Abuztuak 18 Pasealekuan Erramun Martikorena
