Ekainaren 3an 'Ekarriz banaz' lemapean manifestazioa egingo du Gernika-Lumoko Sarek
Ispilue proiektuaren barruan ekainaren 3rako prestatu duten manifestazioarako deialdia egiteko agerraldia egin zuen atzo arratsaldean Gernika-Lumoko Sarek. 20:00etan abiatuko da manifestazioa Merkuriotik.
Ekarriz banaz lemapean dispertsioagaz amaitzea aldarrikatuko dute, beste behin. Ispilue proiektuagaz beste pauso bat eman gura izan dute aurten. “Uste dugu Gernikan dispertsioa amaitzearen alde gehiengo sozial nagusi bat dagoela, modu pasiboan adierazten duena, eta guk horri buelta eman, eta modu aktiboa bihurtu gura dugu, Gernika herri moduan dispertsioa amaitzearen alde dagoela irudikatzeko. Dispertsioaren kontra dagoela, giza eskubideen alde, konponbidearen alde dagoela adierazteko. Sare hau zabaltzen jarraitzeko konpromisoa dugu hemen gaudenok, eta herritarrei animatzen diegu sare honen parte izan daitezen”
Gogora ekarri zutenez, euskal preso eta iheslariak etxeratzeko bidean pausoak ematen joatea da helburua, dispertsioa “iraganeko errealitate bat” bihurtu dadin.
Sakabanaketa horren erantzule diren Espainiako eta Frantziako gobernuek 28 urtetan dispertsioa bere horretan mantendu dutela salatu zuten sarekideek. Jendartearen iritziaren kontrako norabidean doazela nabarmendu zuten.
Gernika-Lumoko Sareko ordezkarien esanetan, lan handia dago egiteko, eta haien “txikitasunean” haien “aletxoa” jarri gura dute. Hainbat alorretako jendea inplikatzea da Sareren erronka, ezberdinen arteko sarea zabaltzen joateko: “Horretarako, ez ditugun tresnak sortzeko konpromisoa hartu dugu, eta laster, konpromiso horren lehen kimua ezagutaraziko dugu”.
Gogora ekarri zuten, gaur gaurkoz, eskualdeko sei presok jasaten dutela sakabanaketa:
- Jabi Abaunza Martinez, Moulins-Yzeure (Frantzia). Etxetik 790 kilometrora.
- Kepa Arronategi Azurmendi, Almeria (Espainia). Etxetik 980 kilometrora.
- Ibon Goieaskoetxea Arronategi, Fleury-Megoris (Frantzia). Etxetik 900 kilometrora.
- Eneko Goieaskoetxea Arronategi, Alcala-Meco (Espainia). Etxetik 430 kilometrora.
- Oier Goitia Abadia, Murtzia (Espainia). Etxetik 800 kilometrora.
- Jone Amezaga Arriaga, Brieva (Avila, Espainia). Etxetik 445 kilometrora.
Atzo arratsaldean auditorian egin zuten agerraldia.
