Herritarren ideia eta proiektuen erakusleiho izango da Lekeitio
Alternatiben azoka jarriko dute bihar, Eskolapean. Arazo sozialen aurrean lantzen dabiltzan alternatibak kaleratuko dituzte. Irratsaioa eta jolasak egongo diraLekeition martxan dabiltzan proiektu eta ideiak hurretik ezagutzeko aukera egongo da bihar, 1...
Alternatiben azoka jarriko dute bihar, Eskolapean. Arazo sozialen aurrean lantzen dabiltzan alternatibak kaleratuko dituzte. Irratsaioa eta jolasak egongo dira
Lekeition martxan dabiltzan proiektu eta ideiak hurretik ezagutzeko aukera egongo da bihar, 11:30etik 14:00etara, Eskolapean egongo den Alternatiba Azokan. …ta zein da zure Alternatibia? lelopean antolatu duten ekimenagaz, arazo sozial desberdinen aurrean kontzientziazio lana egiten, proiektu herritarrak aurrera eramaten edo aldarrikapen desberdinak egiten ibili diren eta dabiltzan herritar eta kolektibo desberdinen ideia eta proiektuak elkarren artean hobeto ezagutu eta herrira zabaltzea dute helburu.«Gure biziak injustizi askoz inguratuta daudela uste dugu. Kalean matxismoa eta arrazismoa deitzen ditugun bazterketa gogorrak, edo beharrean esplotatuta egotearen sentsazioa. Planeta bera sakutik hartzera bidaltzen ari garenaren kontzientzia, hilaren azkenera arazo ekonomiko barik ez heltzeko beldurra edo gurasoengandik emantzipatu ezin den gaztea», azaldu dute antolatzaileek. Baina egoera horreri buelta emateko asmoa erakutsi eta horretarako antolatzen denik ere, ez dela falta, diote. «Gure beharrizan eta nahiak askatasun giro batean asetu, eta modu batera edo bestera, zapalduak izatetik libre izatera pasateko ahaleginetan, ideiak sortzen eta proiektuak martxan jartzen dabil jendea, eta bide hori antolatuta egiten gabiltza, gainera».
Irratsaioa
Arazoei hobetoen taldean erantzuten zaiela eta elkarteak euren artean behar egitea garrantzitsua dela uste dute. Hori dela eta, horiek guztiak ezagutzera emateko elkartuko dira, guztiak, Eskolapean. «Zapalkuntzak anitzak diren modura, alternatibak eraikitzen gabiltzan norbanako eta taldeak ere anitzak gara. Herri alternatiba desberdinak dabiltza martxan».
Alternatiba Azokan zuzeneko irratsaioa, jan edana eta umeentzako jolasak ere egongo dira.
