George Steer (semea): "Aita bizirik balego, errefuxiatuek bizi dutenari buruz idatziko luke"
Gernika bonbardatu zutela 79 urte dira gaur, eta egun hartan gertatutakoa oroitzeko zein eraso hartako biktimak omentzeko hainbat ekitaldi egingo dituzte gaur.
Mundu zabalari bonbardaketaren berri eman zion George L. Steer kazetaria ere omendu dute. Azken urteetan legez, Gernika-Lumon da George Steer semea, eta aitaren omenezko ekitaldian izan da. Gernikarren eta euskal jendartearen babesa eskertzeaz gain, erakutsi duten jarrera tolerantea ere goraipatu du Steerrek.
Era berean, gaur egungo gatazkak ere aipatu ditu, eta errefuxiatuen egoera izan du gogoan. “Nire aita bizirik balego, errefuxiatuek gaur egun bizi duten egoerari buruz idatziko luke”, esan du.
Gernika Sariak banatzeko ekitaldia 12:00etan hasi da, Lizeo antzokian. Han ere, errefuxiatuak izan dituzte gogoan, eta minutu bateko isilunea egin dute hil diren errefuxiatuengatik. Francisco Etxeberria antropologo eta mediku forentseak eta Uruguaiko presidente ohi Jose Mujicak hartu dute aurten Gernika saria. Gernikako herriak egin dien errekonozimendua eskertu dute, eta oroimen historikoak eta iraganak gaur egungo egoeran duen garrantzia azpimarratu zuen Aranzadikoak HITZAri emandako elkarrizketan.
Bonbardaketaren urteurrena gogoan izango dute egun osoan zehar. 14:45ean Gernika 04 minutu ekimenean, sirena hotsa entzungo da herrian, eta lau minutuko geldune eta isilaldia egingo dute herritarrek. Lobak-en ekimenez, Astrako babeslekuan piztuko dute aurten sirena, eta Yahia Koddo eta Ruba Hassan siriarren laguntza izango dute horretarako.
Zallo hilerrian batuko dira gero herritar, alderdi politikoetako zein erakunde publikoetako ordezkariak eta eragileak. Kanpai hotsak entzun ostean, lore sortak eta koroak eskainiko dituzte, bonbardaketan hildakoen omenez.
Gernika garretan herri kale antzerkia 19:30ean hasiko da, Foru plazan, eta 21:30ean abiatuko da kandelen manifestazio isila, Foru plazatik bertatik. Gernika Batzordeak, urtero legez, kandelen argipean eta manifestazio isilarekin gogoratuko ditu Gernikako bonbardaketaren biktimak.
