Ondarroako Etxelilan bi ikastaro eskainiko dira datozen egunotan
Lau barikutan banatuta egingo da argazkilaritza ikastaroa. Asteburuan, gainera, mendi orientazioari buruzko ikastaroa egiteko aukera ere egongo daOndarroako Berdintasun Sailak eta Emakumeentzako Jabekuntza Eskolak antolatuta, bi ikastaro egingo dira eg...
Lau barikutan banatuta egingo da argazkilaritza ikastaroa. Asteburuan, gainera, mendi orientazioari buruzko ikastaroa egiteko aukera ere egongo da
Ondarroako Berdintasun Sailak eta Emakumeentzako Jabekuntza Eskolak antolatuta, bi ikastaro egingo dira egunotan Etxelilan.Alde batetik, etzi argazkilaritza ikastaroagaz hasiko dira. Ikastaroan, besteak beste, argazkigintzaren tekniken oinarriak ikasteaz gain, taldean lan eginda argazki lan bat egiten ahaleginduko dira. «Egun irudiak duen pisua zein den ikusita, beharrezkoa da emakumeok ere medio hau gureganatzea».
Itziar Bastarrika Madinabeitia argazkilari oñatiarraren eskutik, apirilaren 22tik maiatzaren 13ra bitartean, barikuero, egingo da ikastaroa, 17:00etatik 21:00etara, Etxelilan.
Mugikorragaz ere bai
Antolatzaileek nabarmendu dutenez, ikastaroan parte hartu ahal izateko ez da beharrezkoa argazkilaritzari buruzko ezagutzarik izatea. Hori bai, bertan parte hartu ahal izateko beharrezkoa da argazki kamera bat eramatea. «Argazki kamerarik ez baduzu, lasai. Mugikorrarekin ere posible izango da eta».
Bestalde, zapatuan eta domekan beste ikastaro bat egiteko aukera ere egongo da. Tontxu Ruiz de Larrinaga goi mendi eskolako begiralearen gidaritzapean, Orientazioa mendian tailerra egingo da, 09:00etatik 15:00etara.
Ikastaroaren helburua, hain zuzen ere, etorkizunean «mendiarekin eta naturak eskaintzen dituen onurekin» emakume gehiagok gozatzea da.
Ikastaroan egingo diren saio teoriko praktikoen bidez, mendiko orientazioaren ikuspegia eta mendian autonomo izateko bidea errazten duten tresna orokorrak ezagutzeko aukera egongo da. Hala nola, mapa bat zelan interpretatu eta irakurri, iparrorratzaren oinarrizko erabilpena ikasi, inguruarekiko errespetauren garrantzia landu eta orientazio teknikak zeintzuk diren ikasi ahal izango dira.
Antolatzaileek gogorarazi dutenez, ikastaro batean zein bestean aurretiaz eman beharko da izena honako lekuetan: Etxelilan, Artibai 3, 2.pisua; 94-613 40 08 edo udal berdintasun sailean Musika plaza z/g; 94-683 36 70).
