Busturialdeko bertsolari gazteek Bilbon jokatuko dute gaur BBK txapelketako finala
Hego Uriberen kontra ariko dira, Bizkaiko Bertsolari Gazteen 24. txapelketa irabazteko lehian.
Bilboko Kafe Antzokian 19:00etan hasiko da finala. Lehenengo, 18 urtera bitartekoen txanda izango da; eskualde bakoitzetik hiru bertsolari igoko dira oholtzara. Ondoren, 19 eta 24 urte bitartekoek kantatuko dute, eskualde bakoitzetik hiruna bertsolari.
Busturialdeari dagokionez, 18 urtera artekoen taldean honakoek parte hartuko dute: Beñat Bilbao Landa, Enare Muniategi Etxabe eta Lurdes Ondaro. 19 eta 24 urte bitarteko taldean, berriz, Gurutz Uruburu Ibarguengoitia, Ibai Amillategi Omaetxebarria eta Koldo Gezuraga Seijido ariko dira bertsotan.
Era berean, 18 urtetik beherakoetan Ander Anakabek, Enare Muniategik eta Iker Garitagoitiak osatuko dute Hego Uribeko taldea. 19 eta 24 urte bitartekoen atalean, ostera, Txaber Ormazabal, Andere Molinuevo eta Peio Molinuevo ariko dira lehian.
Ondokoek izango dute bertsolarien lana epaitzeko ardura: Alaitz Etxanobek, Leire Etxebarriak eta Miriam Juaristik.
48 bertsolari
Otsailaren 17an ekin zioten Bizkaiko Bertsolari Gazteen Txapelketari, eta guztira 48 bertsolarik parte hartu dute, eskualde bakoitzetik seina ordezkarik. Hain zuzen ere, eskualde hauek parte hartu dute aurten: Arratia, Busturialdea, Durangaldea, Enkarterri-Ezkerraldea, Hego Uribe, Lea-Artibai, Uribe-Butroe eta Uribe-Kosta.
