80 aditu baino gehiago bilduko ditu ornitologiari buruzko lehen kongresuak
80 aditu baino gehihago batuko ditu Euskadiko Biodibertsitate Zentroak, asteburu honetan. Gaur hasi eta domekara bitartean, hegaztien ikerkuntzan lanean ari diren erakunde publikoen, ekologista taldeen zein enpresen ordezkariek bilduko ditu kongresuak. Goizean eman dute prentsaurrekoa, eta Eusko Jaurlaritzako Natura Ingurunearen eta Ingurumen Plangintzaren zuzendari Alexander Botok azaldu duenez, kongresua hegaztiekin lanean ari direnen arteko sarea bultzatzeko abiapuntua izatea gura dute.
Aranzadi Zientzia Elkarteko Juan Arizaga da kongresuaren zuzendaria. Haren esanetan, hegaztiei buruz aritzeko lehenengoz baatuko dira entitate ezberdinetako ordezkariak. “Zertan gabiltzan, zer egin behar den eta zer hobetu daitekeen eztabaidatuko dugu, lehenengoz”, esan du. Hala, esan du ornitologian lanean ari direnen lana nola bideratu zehazteko ere baliogarria izan daitekeela asteburuko jaardunaldia, eta komunitatea sortzeko aukera eman dezakeela.
Erakunde publikoen babesa du lehen kongresu horrek, eta hori garrantzitsua dela aipatu du Arizagak. Haren ustetan, arlo ornitologikoa herritar denei eragiten dien gaia da, eta erakunde ezberdinen inplikazioa beharrezkotzat jo du.
Hiru eguneko kongresua izango dela azaldu du, eta, horretan, garrantzitsuak diren gai guztiak jorratuko dituztela: jarraipen proiektuak, ikerketak, kontserbazioa… Halaber, txostenak aurkeztu ez ezik, parte hartzea bermatzeko mahainguruak ere egingo dituztela esan du.
Euskal Herria hegaztien ikerkuntzan aitzindari izan dela esan du Aranzadi Zientzia Elkarteko Juan Agirrek, eta lan horretan 1947an hasi zirela aipatu du. Hartara, hainbeste urteren ostean lehenengoz egingo duten kongresu horri garrantzia eman dio Agirrek ere. “Adituek ikertzen ari diren hegaztiei buruz ariko gara, eta hegaztiek garrantzia hartuko duten arren, lanean ari diren pertsona eta ornitologoak ere garrantzitsuak dira”, aipatu du. Auzolanean ari diren herritarrak badirela nabarmendu du Aranzadikoak, eta egiten den lan guztia posible dela erakunde eta herritarren laguntzari esker.
Agirre, Boto eta Arizaga gaurko prentsaurrekoan
