Txomin Arana: "Motor berria guztiz ezberdina da, eta egokitu beharko naiz horretara"
Hirugarren urtez jarraian, Dakarrean parte hartzeko gogotsu dago Txomin Arana (Ereño, 1985). Hala ere, Husqvarna markako motorragaz estreinako ariko da, urtarrilaren 2tik 16ra.
Bi aste barru hasiko da Dakarra. Berritasunik ba al dago?
Aurten aitzin-etapa izango dugu lehenengo egunean, eta gero, beste hamahiru etapa izango dira; guztira, hamalau etapa. Uste dut Dakar gogor bat izango dela. Argentina eta Bolivia pasatatuko ditugu bakarrik oraingoan, baina Argentinan sekulako beroa jasan behar izaten dugu. Uste dut niretzat parterik gogorrena hori izango dela, beste urteetan ere hala izan da. 45 gradutik gorako tenperatura egoten da. Txile kentzea pena bat da. Dunak eta harea egonik, apur bat freskoago da, eta norberarentzat hobea izaten da.
Iaz 16. postuan amaitu zenuen. Zein da aurtengo helburua?
Gustatuko litzaiguke aurreko marka gainditzea, edonori bezala. Baina oso gaitza izango da; hori badakigu. Oso postu ona eskuratu genuen iaz; punta-puntako pilotuekin egon ginen lasterketa guztian zehar, eta aurten ahalegina egingo dugu leku berean egoteko. Aurten pilotu asko igo dira beste espezialitate batzuetakoak. Oso pilotu azkarrak dira. Lasterketa ezberdina eta luzea da, eta inor ez dago horretara ohituta, baina ikusiko da. Haiek oso bizkor joango dira, hor ez daukat zalantzarik, baina haien pare egoteko norberak ere azkarra izan beharko du. 27. postuan irtengo naiz, eta hori abantaila da; aurrekoan, esaterako, 69. urten nintzen. Atzetik irtenda, hauts asko topatzen da bidean, eta lehia zailagoa bihurtzen da. Aurreratzea oso gaitza eta oso arriskutsua da. Pena da justu 27. irtengo naizenean aitzin-etapa ipini dutelako. Aurreko bietan ez da egon halakorik.
Lasterketa berezia da zentzu askotan. Zer da zuretzat Dakarrak duen gauzarik bereziena?
Autoek, motorrek eta kamioiek lehiatzen dugun rally bat da, eta horrek egiten du desberdin. Enduroetan ohituta gaude motorrak bakarrik ikusten edo rallyetan autoak bakarrik. Baina han, motorrak, autoak eta kamioiak denak batera ikusteak inpresio handia ematen du. Asko inpresionatzen du, eta bertan mugitzen den dena ikaragarria da: antolakuntza, zenbat jende mugitzen duen, zenbat ibilgailu, horien asistentziak… Quadak kontuan hartuta, 180 bat ibilgailu gara; gehiegizkoa da, ikusgarria.
Diru bilketa aurrera doa; iaz baino diru gutxiago bildu duzue, momentuz. Hala ere, Dakar festan, esaterako, jende askoren babesa jaso zenuen.
Dakar festa ondo joan da, beste urte batez, jende pila bat animatu da aurten ere, eta poztekoa eta eskertzekoa da. Iaz moduan, crowfunding bitartez topatu dugu beste aukera bat dirua biltzeko. Diru bilketa ez da aurrekoan bezain ondo joan, eta epea luzatu behar izan dugu. Baina jendeak babesa erakutsi dit; ikusten da gero eta jende gehiago mugitzen dela. Denek euren borondatea eskaintzen dute, eta hori eskertzekoa da.
Motor berri-berriagaz zoaz oraingoan. Zelakoa da? Ezaugarriei dagokienez, aurrekoaren aldean oso motor ezberdina da. Azkenean, rallyetako motor bat da, eta aurrekoa motokroseko Yamaha bat zen, Dakarrerako eginiko prototipo bat. Oraingo motorra Husqvarna rally bat da, fabrikatik ateratakoa. Rallyetarako prestatuta dago, eta guztiz ezberdina da, bai txasisa, bai motorraren konportamentua… Dena. Probatzeko astia izan duzu. Zer moduz doa? Motor berrira egokitu behar izan dut, eta apur bat kostatzen da. Baina, uste dut oso ondo joango dela. Guztiz diferentea da, baina ni egokitu edo moldatu behar naiz horretara, eta uste dut egingo naizela. Ez daukat aukerarik motorra gehiago probatu edota motorrera egiteko. Motor bakarra dugu, eta berri-berri joan behar du Dakarrera. Horregatik, ahal den gutxien ibili naiz, ahalik eta kilometro gutxien eginda.“Gustatuko litzaiguke aurreko marka gainditzea, baina oso gaitza izango da”
Gainera, biak alderatzeko aukera izan duzu Monegrosen. Egia esan, aurreko motorra oso ondo dabil, baina mantenimendu asko behar du, motor ofizial bat da, eta mekanikariak behar asko izaten zuen. Hau sinpleagoa da, behar egiteko errazagoa, eta uste dut mekanikariarentzat nahiko hobea izango dela. Eta niretzat? Ni egokituko naiz. Motor on bat izango da. Hala ere, oraindik ziur ezin dut esan bertan probatu ez dudalako. Dakarrean ikusiko da. Dakarrerako aurkezpenean esan zenuen aurrekoetan baino hobeto prestatu zarela. Bai, Marokon, Merzougako rallyan eta Turkian, TransAnatolia rallyan egon gara, eta ondo moldatu naiz. Uste dut bi rally horiek lehiatuta nahikoa ondo prestatuta noala. Merzougako rallya Dakarrerako entrenatzeko oso ona da. Gainera, altueran ere entrenatzeko astia izango dut, Sierra Nevadan. Lehen aldiz joan aurretik, Chamonisen egon nintzen, eta igarri nuen. 2014-rako ez nuen presatakuntza hori egin, eta altuerako etapetan zorabio batzuk izan nituen. Oraingoan, bi rally korrituta goaz; aurreko bietan, bakarra eginda joan nintzen. Oraingoan, hala ere, kilometro gehiagotxo eginda noa. Motor berria gutxi probatu arren, aurrekoa gutxiago probatu nuen. Oso pozik nago egindako prestaketagaz, eta Dakarrerako prest nago. Prestaketa fisikoaz gain, psikologikoki ondo prestatuta joatea ere beharrezkoa da, ezta? Psikologikoki oso gogor egon behar da han pasatzen ditugunak jasateko. Oso atseden gutxigaz, goizeko lauretan motorra hartu eta arratsaldeko seirak arte norbera bakarrik. Tenperatura aldetik jasaten ditugun aldaketak ere itzelak izan dira; 30 gradutara egotetik hamar gradu zero azpitik izatera pasatzen gara. Jendea hipotermiagaz, desidratatuta… Oso gogorra egiten da. Ez dut uste gorputza egiten denik, baina eutsi egin behar zaio.“Hamalaugarren postu bat Europako txapelketan oso ondo dago”
Dakarretik aparte, zer moduz joan da aurtengo denboraldia? Denboraldia ondo, balantzea positiboa da. Arazo mekanikoak eta eroriko bat izan ditut, baina lasterketa askotan oso ondo ibili naiz. Hamalaugarren postu bat Europako Txapelketan oso ondo dago, eta Espainiakoan ere uste dut hamalaugarren egin dudala. Aurtengo Dakarra amaituta, Motokroseko Espainiako Txapelketa hasi genuen, eta Europako Txapelketako lehen lasterketan ere oso ondo aritu nintzen. Gero, lepauztaia apurtu nuenez, Europako lasterketa bat galdu nuen. Nahikoa azkar errekuperatu nintzen, eta bi astera Europako Txapelketagaz jarraitu nuen. Hiru bat lasterketa egin nituen jarraian, eta oso ondo aritu nintzen. Italian inoiz lortu dudan emaitzarik onena eskuratu nuen: bosgarren postua, hain zuzen ere. Suedian seigarren postu bat lortu nuen, eta oso pozik nago horregatik. Orduan, zortzigarren nengoen Europako sailkapenean, baina azken bi lasterketak falta zirela, batean motorra apurtu eta gero golpe bat hartu nuenez, sailkapenean behera egin nuen. Bestalde, Espainiako Txapelketaren azken txanpako bi lasterketetan ez naiz lehiatu, Dakarrerako prestaketekin ibili garelako.“Psikologikoki oso gogor egon behar da han pasatzen ditugunak jasateko”
