Artxiboko irudia.
Emakumezkoen ligako euskal talde bien arteko lehia herenegun izan zen, eta Gernika-Lumotik joandako zenbait zaletuk ere Gascan bertatik bertara jarraitu zuten partida. 600 bat zale bildu ziren, zein bere taldeari gogor animatzeko gogoz.
Partida berdindua izan zen, eta bost puntuko aldeagaz gernikarrentzat izan zen garaipena: 57-62.
Hasierako minutuetan Claudia Pop jokalariak bereganatu zuen arreta. Beste behin bere esperientziari errenta ateratzen jakin zuen taldeak, eta lehen laurdenean bederatzi puntu pilatzea lortu zuen Popek. Hala, 13-16-ko markagailuagaz amaitu zuten lehen laurdena.
Sentsasio onekin jokatzen ari ziren bi taldeak, baina, gernikarrek zenbait minututan kontzentrazio falta izan zuten, eta hori ondo aprobetxatu zuen aurkariak. Hala ere, minutu batzuk punturik lortu barik egon ostean, Izaskun Garciak hirukoa sartu zuen, eta 20-19 hurreratu ziren. Eta atsedenaldira ere puntu bakarreko aldeagaz heldu ziren: 29-28.
Atsedenalditik bueltan, hainbat hiruko jarraian egin zituen etxeko taldeak, eta horri esker aldea handitzea lortu zuten: 42-34. Baina, talde gernikarreko jokalariak ez zeuden amore emateko prest, eta joko-erritmoa areagotzen hasi ziren.
Hala, Adrianne Ross jokalari estatubatuarrak erakustaldia emanez, ia zazpi puntu jarraian egitea lortu zuen. Bi taldeek beren jokaldiak egiteko aukera izan zuten, eta berriro ere puntu bakarreko aldeagaz hartu zuten atsedentxoa. 42-43 amaitu zen hirugarren laurdena.
Azken laurdenean ere bi taldeen jokaldiez gozatu zuten zaleek, eta partida amaitzeko bi minuturen faltan, 53-56 zihoazen. Azken minutuetan, lasai jokatuz defentsa lan sendoa egin zuen Gernika Bizkaiak eta aldeko emaitza horri eutsi zion.
Sailkapeneko bogarrena
Emakumezkoen ligako 2015-2016 denboraldiko lehen itzulia amaitzeko bi jardunaldi baino ez dira geratzen. Gernika Bizkaia hemezortzi puntugaz sailkapeneko bosgarrena da. Mann Filter laugarrenak eta Bembibre seigarrenak ere hemezortzina puntu dituzte.
Gaur gaurkoz Avenida da liderra 21 puntugaz, Girona bigarrenak hogei puntu ditu eta Conquero hirugarrenak hemeretzi puntu ditu.
