Jaietako azken txanpan sartu dira bermeotarrak

Euriak baldintzatutako Sukalki Eguna ospatu zuten zapatuan, Talan. Hala eta guztiz ere, herritar askok ez zuten hutsik egin eta 142 kazola aurkeztu zituzten Eleizaldek antolatutako txapeketara.

Olaia Zabalondo

Bermeo

2015/09/14

Zapatuko sukalki txapeletara aurkeztutako kazoletako bat

Zapatuko sukalki txapelketara aurkeztutako kazoletako bat

Oraindik atsedenerako tarterik ez dute hartu bermeotarrek. Asteburu luzea izan dute oraingoa. Zapatuan, esaterako, Talara mugitu zuten festa, Sukalki Egun handia ospatzen baitzuten Andra Mari eta Santa Eufemia jaien baitan. Eguna, baina, euriak baldintzatu zuen, eta ohikoa baino kazola gutxiago aurkeztu zituzten. Hala ere, «giro ona» ez zen falta izan. Goizean goiz hasi ziren Talako txoko guztiak betetzen, eta gutxika gutxika suak pizten eta okelaz eta patataz egindako gisatua prestatzen hasi ziren bertaratutako koadrilak. Gazteek zein nagusiek parte hartzen dute urtero Eleizalde ikastolak antolatzen duen sukalki txapelketan, eta euria egin arren, herritar askok ez zuten hutsik egin. 152 kazolek eman zuten 41. sukalki txapelketarako izena, baina 142 izan ziren aurkeztutakoak. Doniene garaile Guztira, 91 sari banatu zituzten parte hartzaileen artean, eta lehenengo saria Doniene kazola aurkeztu zutenek jaso zuten. Gainera, sari berezi bi ere banatzen ditu Eleizalde ikastolak; bata gazteen arteko sukalki onenari ematen diote, eta bestea, izenik bitxienari. Epaimahaiarentzat aurtengo izenik bitxiena hurrengoa izan da: Zirimiri eta kresala, Talapeko laminen ala. Sukalki txapelketa, baina, ez da egunotan izan duten gauza bakarra. Izan ere, asteburu osoa jai giroan eman dute bermeotarrek. Besteren artean, batel estropadak, umeentzako tailerrak, musika emanaldiak eta kontzertuak, antzerkiak, euskal oiloen erakusketa, artisautza azoka, txirrindularitza lasterketa, herri kirolen erakustaldia, suzko zezena eta Senegaleko borrokaldiak izan dituzte aukeran.

Domekako artisautza azoka

Gaur, berriz, herriko nagusienak Bermeoko Kafe Antzokian batu dira elkarrekin bazkaltzeko. Arratsaldean, berriz, umeek bitsaren jaiarekin eta ur jaurtiketarekin ondo pasatzeko aukera izango duten eta umeen zein nagusien play back txapelketa eta esku pilota txapelketa ere egongo dira. Danborrada Jaietako azken txanpan sartu dira bermeotarrak. Bihar arratsaldean, urtero modura, danborradak iragarriko du etziko Santa Eufemia eguna. Oraingoan, nagusiak izango dira 18:00etan hasita, herriko kaleak danbor hotsekin beteko dituztenak.