Urdaibaiko arraunlariak iaz, Kontxako bandera astintzen.
TKE Ligako liderrak abisua eman zuen atzoko estropadan. Denboraldian zehar bere nagusitasuna erakutsi du Hondarribiak, eta Kontxako lehen jardunaldian ere ezer oparitzeko asmorik ez duela demostratu zuen.
Hala ere, ezer ez dago erabakita. Aldea txikia da; segundu bat eta 92 ehuneneko errenta baino ez dute Ama Guadalupekoakoek.
Lehenengo txandatik irtenda, 19 minutu, 14 segundo eta 66 ehuneneko denbora egin zuen Urdaibaik. Bere txandako azkarrena izan zen. Oriotarrak heldu ziren atzetik, 12 segundo eta 52 ehunenera.
Txandako beste biei errenta handia atera zien Urdaibaik, Sanpedrotarrari 34 segundo eta 66 ehunenekoa, eta Donostiarrari 59 segundo eta 6 ehunenekoa.
Bigarren txandan ere ez zen ezustekorik egon. Hondarribiaren atzetik, Kaiku izan zen txandako bigarrena, 15 segundo eta 82 ehunenera. San Juan hirugarrena, berriz, lehenengoarengandik 22 segundo eta 88 ehunenera heldu zen. Eta Tirani 29 segundo eta 86 ehuneneko errenta atera zion Hondarribiak.
TKE ligako faboritoak ohorezko txandan
Lehen jardunaldiaren ostean, domeka honetan argituko da zein den aurtengo Kontxako banderaren txapelduna. Ohorezko txanda Hondarribiak, Urdaibaik, Oriok eta Kaikuk osatuko dute. Lehenengo txandan, ostera, San Juan, Tiran, San Pedro eta Donostiarra egongo dira.
Nesketan San Juan nagusi
Gizonezkoen aurretik, emakumezkoak lehiatu ziren atzo, eta San Juanek egin zuen denborarik onena: 10 minutu, 36 segundo eta 36 ehunen.
Hibaika sailkatu zen atzetik, 2 segundo eta 14 ehunenera. Aurreko eguenean sailkatze estropada irabazi zuen Zumaia, berriz, hirugarrena izan zen atzoko jardunaldian. Hain zuzen ere, lehenengoarengandik 3 segundora amaitu zuen, eta Orio laugarrenak 13 segundo eta 6 ehuenenera.
Lehenengo jardunaldiko sailkapenak:
Gizonezkoak:
- Hondarribia 19:12.74
- Urdaibai 19:14.66 [ +1.82]
- Orio 19:27.18 [ +14.44]
- Kaiku 19:28.56 [ +15.82]
- San Juan 19:35.62 [ +22.88]
- Tiran 19:42.60 [ +29.86]
- San Pedro 19:49:32 [ +36.58]
- Donostiarra 20:13.72 [ +1:00.98]
Emakumezkoak:
- San Juan 10:36.36
- Hibaika 10:38.50 [ +2.14]
- Zumaia 10:39.36 [ +3.00]
- Orio 10:49.42 [ +13.06]
