Alex Ojanguren eta Irati Mendia nagusitu dira Bermeoko Salome Campos itsas zeharkaldian

Aintzina Monasterio

2015/09/07

Irabazleak sari banaketaren ostean.

Herenegungo 5.000 metro probako irabazleak dira. Fortuna Club taldeko Ojangurenek ordubete, 3 minutu eta 52 segundotan amaitu zuen itsas zeharkaldia. Bidasoa Igeriketa taldeko Mendiak, berriz, ordubete, 12 minutu eta 29 segundo behar izan zituen proba amaitzeko. Gizonezkoetan, Ion Mugika sailkatu zen bigarren, eta Jaime Caballero izan zen hirugarrena. Hala, emakumezkoetan, Amaia Cendoyak eskuratu zuen bigarren postua, eta Nerea Egia sailkatu zen hirugarren. Bestalde, 1.500 metroko zeharkaldia Ander Arruabarrenak eta Adriana Campoyk irabazi zuten. Ume eta gaztetxoen 500 metroko proban, berriz, Unai Arruabarrena eta Alba Romero nagusitu ziren. Biek denbora berean amaitu zuten lehia. Guztira 450 igerilarik hartu dute parte, hiru probetan: 5.000 metroko, 1.500 metroko eta 500 metroko zeharkaldiak. Bermeoko portuaren eta Izaro uhartearen arteko 5.000 metroko proba 255 lagunek egin zuten (iaz 200 inguruk egin zuten). 1.500 metrokoan, berriz, 151 igerilari lehiatu ziren (iaz 58 parte hartzaile izan ziren). Bestetik, umeentzako 500 metroko zeharkaldian 45 umek eman zuten izena (iaz 12 ume egon ziren). 09:00etan egin zuten izen ematea, eta 11:15ean hasi zen umeen froga. Gero, 11:50ean irten ziren 5.000 metroko proban parte hartu zuten emakumezkoak, eta proba bereko gizonezkoak, berriz, 12:00etan abiatu ziren. Ostean, 12:10 inguruan ekin zieten lehiari 1.500 metroko distantziako partaideek. Irabazleek beren pisua kontserbako hegaluzetan jaso dute. SAILKAPENAK:

5.000 metro, gizonezkoak:

Alex Ojanguren 1:03:52
Ion Mugika 1:04:00
Jaime Caballero 1:04:12

5.000 metro, emakumezkoak:

Irati Mendia 1:12:29
Amaia Cendoya 1:12:51
Nerea Egia 1:13:00

1.500 metro, gizonezkoak:

Ander Arruabarrena 0:22:20
Aritz Agilar 0:22:48
Gorka Olaizola 0:22:50

1.500 metro, emakumezkoak:

Adriana Campoy 0:24:11
Lara Vicandi 0:24:28
Leire Ochoa de Eribe 0:26:12

500 metro, gizonezkoak:

Unai Arruabarrena 0:08:04
Borja Rodrigo 0:08:20
Iker Arrieta 0:09:34

500 metro, emakumezkoak:

Alba Romero 0:08:04
Maialen Sudupe 0:08:47
Leire Martin 0:09:00