Askoren gustua egin du aurten Rock&Rallyak

Publiko zabalarengana heldu da jaialdia, eta helburuak bete ditu

2015/06/09

Porco Bravoren kontzertua/Kostan Delgado

Jendeak ondo erantzun dio Rock&Rally jaialdiari, eta emaitzarekin pozik daude antolatzaileak. Apustu ezberdina egin dute aurten, eta hasieran zehaztutako helburuak bete dituztela esan dute Iparragirre Rock Elkartekoek. “Busturialdetik kanpoko taldeak ekarri ditugu, eta jaialdiak eskualdeko mugak gainditu ditu aurten”, esan dute. Ipar Euskal Herritik, Iruñetik, Madrildik… erosi dituzte sarrerak, eta, publiko zabalarengana heldu dira aurten. Jatorria ez ezik, adin tarte ezberdineko musika zaleak batu zituen Rock&Rallyak zapatuan. Nafarroatik heldu zen Aberri Txarrak taldea, jende gaztearengana helduz. Lekeitiotik, eszenatokietara bueltan da Etsaiak taldea, eta jarraitzaile berriak ez ezik, betidaniko zale asko ere izan zituen zapatuan, publikoaren artean. Soziedad Alkoholika gasteiztarrek ere Euskal Herriko eta mugaz gaindiko jendea ekarri zuen, eta bere publiko fidelari ez zion hutsik egin Porco Bravok. “Eguraldiak ez zuen askorik lagundu, eta hasiera batean beldur ginen. Baina azkenerako jendea batu zen Astrako aparkalekuan”. 1400 sarrera inguru saldu zituzten; 500 bat egunean bertan. Jaialdiaren balorazio orokorra oraindik egin ez duten arren, irabaziak izango dituztelakoan daude antolatzaileak. Gastuak ere handiagoak izan dira aurten, baina balorazio orokorra positiboa izango dela esan dute: “Helburuak sobra bete ditugu”. Antolatzaileak legez, jaialdian izan zirenak ere gustura atera ziren Astratik. Eta taldeak eurak ere pozik joan zirela azaldu dute antolatzaileek. “Tratuarekin eskertuta agerru dira. Gure lana boluntarioa da, ez gara jaialdiak antolatzen dituzten profesionalak. Hala ere, haienganako harrerarekin oso pozik azaldu dira. Aipatu digutenez, antzeman izan dute jaialdia antolatu dugunok ere musikariak garela, eta talde batek zer behar duen jakin badakigula”. Beste alde batetik, diotenez, komertzialak ez diren taldeekin ere musika jaialdi on bat antolatu daitekeela erakutsi du aurtengo Rock&Rallyak. Argazki galeriak ikusgai, hemen.