Zazpigarrena, eta indartsu

Kartel handia dakar aurten Gernika-Lumoko Rock & Rallyak, «potentea». Ekainaren 6an izango da zita: S.A., Etsaiak, Porco Bravo, Aberri Txarrak, Backbone eta Blaster M.

Oihana Cabello Elorriaga

Gernika-Lumo

2015/05/22

Rock&Rally

Gernikatik kanpora ere zabalduko den kartela. Hori da, antolatzaileen esanetan, aurtengo Rock & Rallyak dakarrena. Zazpigarren edizioa egingo dute, eta hasiera batetik finkatutako helburua betetzeko asmoa dute Iparragirre Rock Elkarteko kideek. Hau da, eszenarioa kalera ateratzetik harago joan eta Rock & Rallya musika festibala izateko itxura duela diote Mikel Fidalgok, Haritz Laboak eta Asier Musatadik. «Hasieran markatutako helburuetatik harago joan eta Rock & Rallyak jauzi bat eman duela esan daiteke. Hasieran kontzertu desberdin bat eskaintzen zuen Rock & Rallyak, eszenarioa lokal barrutik kanpora ateratzea. Orain, baina, festibal itxura hartu du Rock & Rallyak, eta aurten helburu horretara are gehiago hurbilduko garelakoan gaude». Kartel buru «potentea» lotzearen alde egin zuten hasiera batean. «S. A.rekin (Soziedad Alkoholika) hasi ginen harremanetan, eta berau lortzean kartela zelanbait konpentsatu behar zela ikusi genuen». Etsaiak taldea festibalera ekartzeko aukera ikusi zuten, eta aprobetxatu. «Urte asko eman dute eszenarioetatik kanpora, eta berriro elkartu dira». Musika eszenara bueltatu dira lekeitiarrak, eta aurten eskainiko dituzten kontzertuen artean lehenengoa izango da Gernika-Lumoko Rock & Rallyan emango dutena. «Gainera, antza denez, gogotsu datoz oraingoan». Eta bi horiekin batera, ekainaren 6ko jaialdia borobilduko duten taldeak ere gehitu dituzte kartelera: Porco Bravo (Barakaldo), Aberri Txarrak (Nafarroa) eta Backbone eta Blaster M gernikarrak. Kartel orekatua Gernikako taldeek osotzen zuten garai batean Rock & Rallya, eta kanpoko talde batek zabaltzen zuen kartela. «Bertoko taldeentzako eskaparate bat ere bazen, izena eta proiekzio handiagoa zuten taldeekin jotzeko aukera ematen zuen, baita kanpotik etorritako publikoaren aurrean jotzeko ere». Gaur egun oraindik zaindu egiten dute hori, eta etxeko taldeek ere lekua izaten dute Rock & Rallyaren kartelean; «horrek egiten du berezia festibala».

Festibal itxura hartu du Rock & Rallyak, eta aurten helburu horretara are gehiago hurbilduko garelakoan gaude”

Eta aurtengoa ere berezia izatea espero dute. «Aurrekoetan kartelburu bat izan dugu –aurrekoetan Gatibu izan da–; eta horrek erakartzen zuen, batez ere, jendea. Baina aurten, Soziedad Alkoholika kartelburu izanda ere, ohartu gara Etsaiak ere bere oihartzuna izaten ari dela, interesa piztu duela. Horregatik diogu aurtengo edizioak festibal itxura hartu duela». Taula gainera igoko diren taldeen musika estiloan desberdintasun handirik ez dago; hala ere, bakoitzak bere publikoa ekarriko duela diote antolatzaileek, «bakoitzak berea, eta horrek ere osotu egiten du festibala». Elkartearentzat diru iturri Baina tamaina horretako Rock & Rally batek lan asko eskatzen du, eta, batez ere, diru asko. Finantziazioa. «Hau guzti hau aurrera eramateko eta talde ezberdinak ekartzeko dirua behar da». Irabazi asmorik gabeko ekimena da Rock & Rallya. «Musika gustuko dugu, eta guretzat egiten dugu, guk ensteatzeko eta kontzertuak antolatzeko leku bat izan dezagun, horretarako dirua izateko».

Musika gustuko dugu, eta guretzat egiten dugu, guk ensteatzeko eta kontzertuak antolatzeko leku bat izan dezagun”

Era berean, Iparragirre Rock Elkartearen izena zabaltzen ere laguntzen du. Baina, batez ere, gauzak egiteko beste modu bat ere badagoela erakutsi gura dute Iparragirrekoek: «Jaialdi honen atzean ez dago promotorarik; atzean dagoen gauza bakarra da jende askoren lana». Elkartea bera finantzatzea da asmoa; Rock & Rallyan batzen duten dirua Iparragirreren gastuetarako da. «Esfortzu ekonomiko handia da gure partetik, baina laguntza ere izan dugu, eta eskertu beharrean gaude». Hain zuzen, Gernika-Lumoko Kultur Etxearen eta hainbat tabernaren laguntza izan dute aurtengo jaialdia antolatzeko: Arima, Aterpe, Garamendi, Zeppelin, Arrien, Zarata, Endika, Ipar, Lagun-Etxea, Ospa, Zaplast, Irritzi, Izarra eta Arrano Kultur Elkartea.

aialdi honen atzean ez dago promotorarik; atzean dagoen gauza bakarra da jende askoren lana”

Astra ondoko parkinean egingo dute aurten jaialdia, eta sarrerak salgai dituzte dagoeneko, 15 euroan. Arima, Ospa, Zarata eta Ipar tabernetan erso daitezke Gernika-Lumon; Luma liburudendan Bereon; Izki tabernan Durangon; Kos Taskan Mungian, eta baita Interneten ere: entradium.com-en. Egunotan, gainera, errifak saltzen ari dira Iparragirrekoak, eta sarien artean sarrerak ere zotz egingo dituzte. Apirilaren 6an 16:30ean zabalduko dituzte ateak, eta egunean bertan sarrera 18 euroan erosi ahalko dira, «beti ere, aurretiaz denak saldu ez baditugu», diote antolatzaileek.