Itsaspeko Zinemaren Nazioarteko Zikloa martxoaren 28an egingo dute, Arrantzaleen Museoan

Hegaluze Sarirako proposamenak aurkezteko epea zabalik da

Olaia Zabalondo

2015/03/18

Gaur goizean aurkeztu dute Arrantzaleen Museoan Itsaspeko Zinemaren Nazioarteko zikloa

Orain arte Bermeoko Arrain Azokako asteburuan egin izan den Itsaspeko Zinemaren Nazioarteko Zikloa, martxoaren 28an, zapatuan, egingo dute aurton. Gainera, aipatu zine zikloa eszenatoki berri batean egingo da, Arrantzaleen Museoan, hain zuzen ere. Arrain Azoka Elkarteak eta Actividades Subacuaticas Real Sociedad de Futbol elkarteak antolatzen duten zinema ziklo horrek itsaspeko zinemaren kalitatezko filmak eskaintzen ditu. Arrain Azokako asteburuan «behar bezalako oihartzunik ez dutela eta» hortik ateratzea erabaki dute, «herritar gehiagoren atentzioa» erakarri asmotan. Goizez eta arratsaldez eskainiko dituzte filmak: Gainera, Irune Ormaetxea Turismo eta Merkataritza zinegotziak azaldu duenez, «Arrain Azokaren helburua denboran zehar zabaltzea da, asteburu batera mugatu barik». Hegaluze saria Gaur goizeko agerraldian gogorarazi dutenez, aurten, XIX. Hegaluze saria ere emango da maiatzaren 15ean Nestor Basterretxea aretoan egingo den ekitaldian. Itsuki Irratiak antolatzen du Hegaluze saria Arrain Azoka Elkartearen babesarekin. Sari horren bitartez, ekintza puntual bat edo jarraipen profesional bat saritu gura da, «Bermeoren izena zabaldu eta goratu duenari edota herriaren alde lan egin duenari» ematen diote. Horretarako, baina, urtero, herritarrek aurkezten dituzte proposamenak eta jakinarazi dutenez zabalik dago jada horiek aurkezteko epea. Proposamenak egin gura dutenek orri batean idatzi beharko dute aukeratuaren izen-abizenak eta zergatik aukeratu duten. Hiru modutara aurkez daitezke proposamenak: posta elektronikoz (hegaluze@itsuki-irratia.net) edota gutunez Itsuki Irratira (Hegaluze Saria, 120p.k-48.370 Bermeo) bidalita. Bestela, zuzenean, Turismo Bulegora eraman daitezke maiatzaren 11 baino lehen. Irabazlea epaimahai baten bidez aukeratzen da.