Kontzertu osteko jaialdi batekin dator aurton Halloween Metal Festa
Antolatzaileak mozorrotuta aurreko edizio batean
21:15ak aldera hasiko dira musika taldeak taularatzen. Eskualdeko Sealed Room taldea izango da lehena, ondoren Iruñako Dawn of The Mayak hartuko du lekukoa. Hirugarren taldea Crisix izango da, Bartzelonakoak. Azkenik, jaialdiaren jarraitzaileek ondo ezagutzen duten Vita Imana madrildarren txanda izango da: “Halloween Metal Fest jaialdiko klasiko batzuk dira hauek, uste dugu bere generoan onenetarikoak direla eta horregatik ekartzen ditugu”. Musika taldeen emanaldiak amaitu ondoren, jaialdi batekin jarraituko dute. Jaialdia Overdry taldeak gidatu du.
Halloween jaian girotzea da antolatzaileen helburua, hortaz, bertaratzen direnei mozorrotuta hurbiltzeko deia luzatzen die. Gainera, mozorro onenak saria jasoko duela jakinarazi dute.
Halloween Metal Fest jaialdirako sarrerak hainbat tokitan aurki daitezke: Bermeon, Luma liburudendan, Zarata Rock dendan edo Kafe Antzokian; Gernika-Lumon, Ospa tabernan eta Bilbon, Arisen. Interneten ere badaude salgai; www.kulturalive.com-en, eta www.ticketea.com-en. Aurretiaz erosita, sarrerek zazpi euro balio dituzte. Egun berean, leihatilan erosten duten horiek, berriz, hamar euro ordaindu behar dituzte. Sarrerak zenbatuta egongo direla zehaztu dute eta zenbaki horiek izango dira zozketan sartuko direnak.
“Hazteko asmoa”
Spookypheria Productions kultur elkartearen asmoa “haztea” da: “Gure sentsazioa, baina, herrian baino gehiago kanpora begira hasten ari garela da. Zehatzagoak izateko, iaz, esaterako, 200 lagun ingurutik 120 herritik kanpokoak ziren”. Aurten, gainera, badakite Italiatik eta Esloveniatik jendea datorrela eta Bilbotik ere Bermeora etortzeko autobus bat antolatu dutela.
Aurten, beste behin ere, HITZA egunkariak Halloween Metal Fest jaialdira doan joateko aukera emango die lau laguni; izan ere, harpidedunen artean bi lagunentzako bina sarrera zozkatzen ari da asteon.
Halloween Metal Fest jaialdia iragartzeko bideoa:
