Epaiketa zentzugabea dela salatuko dute 28 gazte auzipetuek hilaren 14an, Astran

Busturialdeko Hitza

Busturialdea

2014/09/04

Udan jaso duten babesa eskertu zuten auzipetuek atzo, Iruñean

Udan zehar Segiko kide izatearen akusaziopean epaitu gura dituzten 28 gazte auzipetuei babesa erakusteko hainbat ekimen eta ekitaldi egin dira Euskal Herrian zehar. Orain, atxikimendu kanpainarekin hasi dira gazteak, eta politika, kultura, kirol… arloan esanguratsuak diren hainbaten babesa lortu dute dagoeneko. Horretarako, adostutako testu bat prestatu dute, eta hori berori Gernika-Lumon aurkeztuko dute, irailaren 14an, Astra kulturarako fabrika sozialean. 12:00etan hasiko da ekitaldia. Irailaren 22an hasiko da 28 gazteen kontrako epaiketa, Madrilen; eta epaiketa hori zentzugabea dela salatu gura dute gazteek. Ainara Ladron auzipetuak azaldu duenez, Espainiako Auzitegi Nazionalak ez du inolako zilegitasunik eurak epaitzeko. Dioenez, gaur egungo marko politikoa kontuan izanda, mota horretako epaiketek “gatazka betikotzea” beste helbururik ez dute. Militantzia politikoagatik epaituko dituztela nabarmendu du, “baina militantzia bera ezin da epaitu”. Era berean, akusatuen kontrako salaketak torturapean lortutako deklarazioetan edo autoinkulpazioetan oinarritzen direla gogoratu du Ladronek. Beraz, uda igaro ostean ere, beraien dinamika ahalik eta zabalena izatea espero dute auzipetuek, “erantzuteko modurik onena denok batera aurre egitea delako”. Hori horrela, auzipetuen zenbait herritan Asteburu laranja antolatu dute: “Holako erasoei desobedientziarekin erantzun behar zaiela uste dugu”.