60 bat musikariren doinuak ekarriko ditu XIII. Txistu Alardeak Bermeora
Hamahirugarren urtez, Txistu Alardeak Bermeoko Artza frontoia soinuz jantziko du zapatuan. Hala, 20:00etatik aurrera, 60 bat musikarik eskainitako doinuez gozatzeko aukera izango du frontoira bertaratzen denak. Horiekin izango da, gainera, Jose Seijido Tximino taldeko abeslari bermeotarra ere, taldea bera baita aurtengo gonbidatua.
Besteak beste, Bermeoko Udal Musika Eskolako txistulariek, kamara koroko kantariek, baterijoleek eta akordeoilariek, Kankinkabara txistu taldeak, herriko dantzariek, txalapartalariek eta irrintzilariek parte hartuko dute zapatuko emanaldian.
Hain zuzen, taulagainean izango diren herritar horiek Javier Setienen dantza eskolako dantzariekin batera, Jose Antonio Egia musikariaren Negar zotinak tangoa interpretatuko dute; izan ere, musikaren ondarea errekuperatzea da asmoa.
“Gure kultura landuz eta zabalduz, herritar guztiak kulturaren parte eta jabe izatea lortu nahi dugu. Horretan dihardugu Udalaren Musika Eskolako ikasle eta irakasleok”, adierazi du Bermeoko Udal Musika Eskolak. Hala,
“ilusio eta gogo handia jarrita buru-belarri prestatu du” udalaren musika eskolak zapatuko egitaraua. Hori horrela, eskualdeko musikazale guztiak gonbidatu ditu XIII. Txistu Alardera. Sarrera doanekoa izango dela jakinarazi du.
