Erabakitze eskubidearen aldeko aldarria kalera

http://youtu.be/ooiin-15NmA

Busturialdeko Hitza

Busturialdea

2014/05/19

Joan den asteburuan ere, Busturialdeko herritarrek erabakitze eskubidearen aldeko aldarria atera zuten kalera. Hain zuzen, Gernika-Lumon, Busturian, Nabarnizen eta Muxikan batu ziren Gure Esku Dago dinamikaren aldeko herritarrak. Gernika-Lumon, esaterako, mosaiko erraldoi bat egin zuten herritarrek. Bildutakoek esku handi bat irudikatu zuten. Mosaikoarena, baina, ez zen eguneko ekintza bakarra izan. Gernikarrek triki-poteoa eta lagunarteko bazkaria ere egin zuten. Busturian ere, jendez osatutako mosaikoa egin zuten. Nabarnizen eta Muxikan, bestalde, dinamikaren aurkezpena egin zuten herri horietako biztanleek. Nabarnizen musikagaz eta bideo emanaldi bategaz hasi zuten aldarrikapen eguna, domekan. Ostean, bildutako herritarrak Iluntzar mendira igo ziren. Mendi gainetik bajatu ostean egin zuten aurkezpena. Muxikan, bestalde, Ariatza auzoko eskolan eman zituzten dinamikari buruzko azalpenak.