Foru aldundiak bukatu ditu Bermeoko saihesbideko tunel nagusiaren indusketa lanak
https://www.youtube.com/watch?v=vlvihsCmddM
Hamaika hilabeteko lanaren ostean, Gainzabalako tunelaren alde biak elkartzea lortu du aldundiak gaur goizean. Tunelak 710 metro ditu eta azken metroetako indusketa lanetan aritu dira beharginak gaur goizean. Saihesbideko obra horiek bukatzeko, baina, hainbat lan egin beharko dituzte oraindik: aho bietan tunel faltsuak eraikitzea eta tunelaren barruko estaldura eta instalazio teknikoak jartzea, besteak beste.
Bizkaiko Foru Aldundiak jakinarazi duenez, tunelaren gehieneko garaiera 9,5 metrokoa da; hala, estaldura, bide-zorua eta instalazioak guztiaz amaituta daudenean, tunelak 5 metroko galiboa izango duela azaldu du. Gehieneko zabalera, berriz, 17 metrokoa izango dela adierazi du: “hiru errei, erdibitzailea, bazterbideak eta espaloiak hartzeko beste, alegia”. Horrez gain, oinezkoentzako 370 metroko luzera duen galeria bat ere egongo dela gaineratu du.
Bermeoko saihesbidea egiteko 53.310.930,14 euroko aurrekontuaz baliatu da aldundia; hiru kilometroko luzera izango duen azpiegitura horri esker, Bermeoko trafiko arinduko da, eta ibilgailu astunek ez dute zertan herri erditik igaro behar izango, saihesbideak hego-ekialdetik inguratuko baitu herrigunea, Landabaso poligonotik hasi eta portuaren ingururaino. Hartara, Bermeo eta Mungia arteko BI-631 errepidearen eta Bermeo eta Gernika-Lumoren arteko BI-2235 errepidearen trafikoak batu ahal izango dira.
Aipatu azken lan horiek datozen hilabeteetan bukatzea aurreikusten du aldundiak.
Gaur goizean bukatu ditu aldundiak saihesbideko tunelaren indusketa lanak
