Sinadura bilketa bat hasi dute Totorikaguenako beharginek
https://www.youtube.com/watch?v=3PWo9Xbw3nM&feature=youtu.be
Gernika-Lumoko enpresak negoziaziorako borondaterik ez daukala eta, euren lanpostuak defendatzeko borrokan beste pauso bat ematea erabaki dute beharginek. Gaur bertan jakinarazi dutenez, sinadurak batzen hasi dira. “Gure alde daudenen kopurua zenbatu nahi dugu”, esan dute. Hala, izenpeak batzen Merkurio iturriaren inguruan eta Totorikaguena denden aurrean izango direla zehaztu dute. Halaber, esan dute Busturialdeko beste leku batzuetara jotzea ere ez dutela baztertzen. “Gure lanpostuak defendatzeko edozer egiteko prest gaude”.
Sinadura bilketaren berri emateaz gain, bihar (maiatzak 7) Emakunderekin bilduko direla jakinarazi dute, eta gogorarazi dute maiatzaren 13tik aurrera hasiko direla jasotzen kaleratze gutunak. Hala ere, borrokan jarraituko dutela nabarmendu dute.
Orain arteko ibilbidea ere ekarri dute gogora beharginek, hainbat erakundetara jo arren eta hainbat mobilizazio egin arren, enpresak negoziaziorako gogorik ez daukala nabarmenduz. Jarrera hori “ulertezina, bidegabekoa eta kapritxozkoa” dela uste dute Totorikaguenako langileek. “Agerian dago gurekin negoziatu nahi ez dutela, atzetik dena negoziatuta dutelako”.
