Aurrekontua onartuta, lehentasunak finkatuta lan egingo du aurten Mundakak
Mundakako Udalak 2.272.90 euroko aurrekontua izango du aurten, 2013koagaz alderatuta, “nabarmen baxuagoa”. 2.205.933euroko aurrekontua onartu zuen iaz Mundakak; dena den, diru kopurua gehituz joan zen urtean zehar kudeatutako diru-laguntzei esker. Hala, udalaren 2013ko azken aurrekontua 2.986.710,79eurokoa izan zen. Aurrekontu baxuagoagaz, beraz, lehentasunak finkatuta lan egingo duela azaldu du udalak; hartara, baliabideak optimizatzeko, gastuak kontrolatzeko, zerbitzuak mantentzeko eta mundakarren bizi kalitatea bermatzeko.
“Aurrezteko beharrizana” du Mundakako Udalak eta horrek eragin nabaria du 2014ko aurrekontuko partida guztietan: ondasun arrunten eta zerbitzuen gastuen kapituluak, esaterako, murrizketarik nabarmenena jasango du aurten; iazko aurrekontuagaz alderatuta, %41,48koa, hain zuzen ere. Dena den, murrizketa horrek ez duela hiri-altzarien mantenimenduko gastuetan eragingo jakinarazi du udalak.
Beste hainbat partidetan ere somatuko du herriak diru kopuru murrizketa; hala nola, ekintza sozio kulturalei, kirolekoei zein jaiei dagokien partidetan.
Inbertsioen partidan, 72.100 euro
Inbertsioen partida 72.100 eurokoa izango bada ere, udalaren “jarrera proaktiboaren” bitartez, partida handitzea espero dute; hain zuzen, proiektuen garapenei eta diru laguntzen kudeaketari esker. Hala, 2014an, honako inbertsioak egitea aurreikusten du udalak: energetikoki eraginkorragoak diren argi instalazio berriak ezartzea, hiri kalitatea eta zerbitzua hobetzeaz gain, argi kontsumoa murrizteko; zenbait altzari erostea (ludoteka eta liburutegirako apalak, hiri-hondakinen aukerako bilketa hobetzeko euskarriak, Tribisarrospe kultur etxera sartzeko kudeaketa sistema, aisialdirako eta kirola egiteko hiri-altzariak, segurtasuna bermatzeko burdin sareak…); kiroldegiko sarbidea kontrolatzeko software bat erostea eta espedienteen digitalizaziorako artxibo sistema propioa ezartzeko fase berri bat aurrera eramatea, besteak beste.
Igoera izan duren kapitulua, bestalde, finantza gastuena izan da; hain zuzen ere, %9,3 igoera izan du; “Beharrezkoa izan da 2008an Mundakan gertatutako istripuagatik ordaindu behar den 1,2 milioi eurotako kalte-ordainari aurre egiteko”, azaldu du udalak.
Ekintza soziokulturalei, kirolei zein jaiei dagokienean ere nabariko da murrizketa
