Garaipenetatik, erronka berriei so

Busturialdeko Hitza

Busturialdea

2014/05/02

Skijoring-ean bigarren egin zuen Rodriguezek Euskadiko Txapelketan. Aurrekoa da arratzuarra

Atzera begiratuz, fardel korda bat eta galtzen gerriko bat gogoratzen ditu Iskander Rodriguez Araukua arratzuarrak. “Bost urte izango dira telebistan Errenteriako txakur kros lasterketa bat ikusi nuena”. Oraindik ere gogoan du. Mushing edo lera probekiko interesa piztu zitzaioneko oroitzapenak dira horiek. Ezer gutxirekin ere arrakasta lor daitekeela erakutsi du Rodriguezek; hark, behintzat, korda eta gerriko bat besterik ez du behar izan. Behetik gora egin du salto; sailkapenetik kanpo egotetik lehenengo postuetara. Lera lasterketen munduan sartu eta Espainiako Txapelketan hirugarren eta Espainiako Kopan bigarren postuak eskuratu zituen, beste hainbat sariren artean. Ordutik, garaipenez garaipen egin du aurrera, etenik barik. 2012-2013ko denboraldian, adibidez, Espainiako Txapelketan irabazle suertatu zen bikejoring izeneko proban; hau da, bizikletan. Estilo berean, gainera, Nafarroako Txapelketa ere irabazi zuen, baita Espainiako probaren bat edo beste ere. Skijoring-ean —eskien gainean— zazpi etapa biltzen dituen Alpentrail lasterketa ospetsuan bigarren egin zuen distantzia ertainean, eta laugarren Espainiako Txapelketan esprintean.

Iskander Rodriguez

Aurtengo denboraldian, berriz, bizikleta gainean Euskadiko eta Espainiako Txapelketetan nagusitu da. Patinean ere lehiatu da, eta Euskadiko Txapelketan bigarren eta Espainiakoan hirugarren sailkatu da, esaterako. Elurretan lortu du berarentzat garaipen garrantzitsuena: Alpentrail lasterketa irabaztea. Europa mailan ospetsua den lasterketa dela dio Rodriguezek, “oso gogorra”. Garaipen horregaz bertako mu-sher-ek asko baloratu dutela aitortu du. Elurretan eta eskien gainean ere, Euskadiko Txapelketan bigarren postua lortu du aurten. Horiek, baina, ez dira irabazi dituen proba bakarrak izan, beste hainbat garaipenekin ere egin baitu buelta etxera. Erronkak, geroz eta urrunago Lasterka hasi zuen lera proben ibilbidea arratzuarrak; betiere, border collie arrazako bere txakurra alboan. Lehenengo bi urteetan hala jardun zuen bikoteak. Mushing mundua ezagutzen joan ahala, baina, erronkak geroz eta urrunago finkatzen zituen gazteak: hurrengo pausoa bizikletan aritzea zen. Handik patina eta eskiak, eta geroago etorri zen lera. Nekeak tarteko, uko egin dio txakur krosean —korrika— lehiatzeari. Lurrean zein elurretan aritzen da Rodriguez bere txakurrekin batera; bizikletan zein patinean eta eskien gainean, hurrenez hurren. Batean zein bestean lehiatzea du gustuko Busturialdeko musher-ak. Txakurrek, dena den, elurrean aritzea nahiago dutela dio. “Lurrean 20 kilometro egiten dituzte, eta elurretan, berriz, 60 kilometro egiten dituzte”. Orain, baina, beste erronka bat du: sei txakurrekin batera, lera gainean jardutea. Hartara, fisikoki ez du bere burua entrenatu beharko; txakurrak ondo entrenatzearekin nahikoa izango du. Hala ere, buruko min handiagoa izango du trineoan aritu nahi badu. Lasterketetan zein txakurrek parte hartuko duten aukeratu behar izango baitu. Horretarako, bakoitzaren nortasuna kontuan hartuko duela argi du: “Taldeko liderra zein den, nolako izaera duten…”.

Ez da erraza egiten duen lana; egunerokotasunean ahalegin berezi bat eskatzen duela dio. Udaberri eta uda partean txakurrak aske direla entrenatzen da arratzuarra beraien ondoan, baina bizikletari lotuta eramatea bestelakoa da: “arriskutsua”. Horregatik, txakurrak motorrik gabeko motoari lotuta daudela egiten ditu entrenamenduak musher gazteak. “Horrela, txakurrek hobeto entrenatzeko aukera dute, eta nire segurtasuna ere bermatuagoa dago”. Txakur bakarrarekin ez du aparteko arazorik sumatzen, baina gehiago direnean, orduan izaten dira komeriak. “Txakurrak lotu eta nire tokira noanerako, bizikleta edo motoa arrastaka eramaten dute, eta halakoetan salto egin behar izaten dut horiek geratzeko”. Arriskutsu samarra izateaz gain, kirol garestia ere badela diote askok eta askok. Hala azaldu du Rodriguezek: “Txakurrei jaten emateak eta bidaiak egin behar izateak kirola garestitzen du”. Euskal Herrian, esaterako, txakur kros estiloko lasterketetan aritzeko aukera baino ez dagoela azaldu du; gainontzekoetan jarduteko, kanpora irten beharra dago. “Lurrean lehiatzeko, Kantabriara, Burgosera, Galiziara, Kataluniara, Madrilera… joan ohi dira musher-ak, eta elurretarako, berriz, Baqueirara. Orain, Linzara ere sar gaitezke, baina entrenatzeko distantzia motz geratzen zaigu”. Gauzak horrela, Ajangizko Kanpantxu auzoan entrenatzen da normalean Arratzuko musher-a. Eta elurretan entrenatzeko, pare bat aldiz joan ohi da urtean elurretara. Mushing denboraldia urri bueltan hasi eta martxoan bukatzen dute, eta, bitartean, hainbat lasterketa izaten dira jokoan: lasterketa hutsak, kopak zein txapelketak; lurrean zein elurretan. Mushing-arekiko zaletasun handiena Katalunian, Euskal Herrian, Madril aldean eta Galizian dagoela azaldu du, eta lasterketa moten arrakasta handiena txakur krosak du. “Errazena delako eta mugitzeko gastu gutxien ekartzen duelako erakartzen du zale gehiago”. Rodriguezen arabera, “Euskal Herrian geroz eta federatu gehiago daude, eta hori garrantzitsua da, erakunde publikoek laguntza gehiago eman dezaketelako”. Iskander Rodriguez, adibidez, Arratzuko Udalak eta Green Heart pentsu markak laguntzen dute diruz. Negu Kiroletako Euskal Federazioak ere laguntza ematen omen dio; ez, ordea, Espainiakoak. Aurten, esaterako, mundu mailako txapelketan parte hartzeko gonbidapena jasoa zuen Rodriguezek, baina ez joatea erabaki zuen, Espainiako Federazioaren aldetik ez duelako “zentimo bakar bat ere” jaso. Gaur egun jasotzen duenagaz aurrera egiten duela dio arratzuarrak, baina babesle gehiagoren laguntzagaz lasaiago arituko litzatekeela aitortu du. Halaber, laguntza ekonomikoaz gain, bestelakoa ere asko eskertzen du; adibidez, familia eta neska-lagunarengandik jasotakoa, “hori barik ezinezkoa litzatekeelako”. Hobetzeko hainbat pauso Telebistan mushing lasterketa bat ikusi zuenetik gaur egun arte, goranzko ibilbidea egin du Arratzuko gazteak. Bitartean, asko ikasi duela dio. Txakurren elikadura, entrenatzeko era, egoera fisikoa… hobetzeko hainbat pauso eman ditu, eta emaitzetan ere sumatu du. Hala, egoerak uzten dion arte, behintzat, kirol horretan jarraituko duen esperantza dauka. Dioenez, asko gozatzen du. Gastuak gastu eta arriskuak arrisku oso-osoan gogobetetzen duen kirola iruditzen zaio. “Txakurrek inork pentsa dezakeen baino askoz gehiago ematen didate”. Aurrerantzean, beraz, bizitzeko era horretan murgilduta jarraituko du.