Urtea agurtzeko hamaika era

Busturialdeko Hitza

Busturialdea

2014/01/02

Urteko azken bainua, Bermeon. Argazkia: Bermeoko Udala

Ohiturari eutsiz, urtea kirola eginez agurtu dute hainbat lekutan. Goiztiarrenak foruarrak izan ziren, abenduaren 25ean joan baitziren Haitz biribilera, aurreko urteko ikurrina jaso eta berria jartzeko. Arteagarrek, berriz, urteko azken egunean egin zuten Antolin deunaren baselizara igoera, Antoliñape kultur elkarteak antolatuta. Bestalde, mendiko bizikletekin Lumora kronoigoera egin zuten Gernika-Lumon abenduaren 31eko goizean, Ikasbide txokotik abiatuta. Oraingoan, gainera, ibilaldia Elkarteak babestu du kronoigoera, eta umeek ere eduki dute parte hartzeko aukera. Hartara, hiru izan ziren kategoriak: 7-11 urte bitartekoena, 12-15 urte bitartekoena eta 16tik aurrerakoena. Teku Salegi nagusitu zen lehenengoan, eta Peio Zulueta eta Iker Lopez izan zituen podiumean lagun. Gaztetxoetan, bestetik, Aitor Garatxenak, Ibai Bilbaok eta Iraitzek osatu zuten hirukoa. Nagusietan, azkenik, Aritz Martinek irabazi zuen, eta Aritz Zabala eta Gorka Cabello Kiri izan ziren bigarren eta hirugarren sailkatuak, hurrenez hurren. San Silvestre krosaren XXVII. edizioa egin zuten Mundakan, urteko azken egunean, eta hainbat lagunek parte hartu zuten. Gainera, 2013an hildako Jaime Odriozola kirolaria omendu zuten mundakarrek. Udalak zehaztu duenez, txirrindularia eta hogei urte baino gehiagotan lasterketa eta maratoietan afizionatutako laguna apirilean hil zen kamioi batek harrapatuta, “gehien maite zuen kirola praktikatzen zegoela”. Hala, “San Silvestre bezalako lasterketetan eduki duen ibilbideagatik” omendu gura izan du udalak. Minutu bateko isilunea gorde zuten bildutakoek, eta ondoren oroigarri bana jaso zuten Zutoia eta Bersoitz Odriozolak eta Maitasun Urkiza Jaime Odriozolaren seme-alabek eta emazteak. Gernika-Lumoko Abixadan proban ere parte hartu dute eskualdeko bizilagunek, abenduaren 29an. Pasealekutik abiatuta, kros herrikoia eta mendi martxa izan zituzten aukeran egun horretan, udalaren kirol patronatuak antolatuta. Bermeon, txirrindulari elkarteak antolatuta, urteko azken bainua hartu zuten abenduaren 31n hainbat lagunek, umorez zipriztindutako ekitaldian. Urtea agurtu beharrean, urteari ongi etorria eman diote Gernikako piperberde independentistek, “urte berriari hasiera independentista emateko martxa ibiltaria egin baitzuten urtarrilaren 1ean, Aixerrotara igoz. Bertan, bandera independentista jarri zuten, eta amaitzeko Lumon egin zuten hamaiketakoa. “Independentzia gero eta hurbila dagoelako; independentistak garenok gero ta gehiago garelako; gure martxa gelditu ezina bihurtzen ari delako; independentziaren kontrako argudioak gero eta ahulagoak direlako … Etorkizuna gurea delako: Euskal Herri estatu independentea”. Gernika-Lumoko Lurgorri auzoan, bestalde, Gabonetako egitarau berezia prestatu dute lehenengoz, eta hainbat ume eta heldu batu dira antolatutako jardueretan. San Silvestre lasterketa eta txokolate jana egin dituzte, besteak beste.