Euskaraz bizi nahia aldarrikatu dute herritarrek

https://www.youtube.com/watch?v=3OSVdOufGP4&feature=youtu.be

Busturialdeko Hitza

Busturialdea

2013/12/03

Euskararen Nazioarteko Eguna dela eta, hainbat jarduera izan dira Busturialdean. Gernika-Lumon, adibidez, Berbalagunek antolatuta 11 orduko irakurraldia egin dute hirugarrenez, oraingoan Edorta Jimenezen Baleen berbaroa-gaz. Elai-Alai aretoko gela txikian aritu dira liburu hori irakurtzen, 09:00etatik hasita 20:00etara. Ondoren, 20:15ean, Bai Euskarari ziurtagiriaren banaketa ekitaldia egin dute Elai-Alai aretoan. Bestetik, ikastetxeetan ere hainbat jarduera egin dituzte, eta Ajangizen Belen Azkarate ipuin kontalariaren saioa edukiko dute zapatuan, 17:30ean, Mendieta auzoko kultur etxean. Ean ere ipuin kontari ariko dira, baina, kasu horretan Ixabel Milletegaz. Zapatuan izango da hori, 17:30ean, Eskolondoko liburutegian. Elantxoben, Gabonetako Postal eta Testuen Lehiaketako ekitaldia egingo dute zapatuan, Gorgonio Renteria Kultur Etxean. Marrazkiak eta testuak han ere aurkeztu ahalko dira. Merienda txiki bat eta parte hartzaile guztientzako sariak izango dira, eta baita ipuin kontalaria eta umeentzako jolasak ere. Biharamunean jakinaraziko dituzte saridunen izenak. Gainera, domekan kanta bazkaria izango da kostako herrian. 15:00etan ipini dute hitzordua, Makues tabernan. DOKUMENTUAK: Euskararen Eguneko gehigarri berezia