Eguenean [maiatzaren 7an] egingo dute aurkezpen publikoa, 19:00etan, J.M. Torrealday Kultur Etxean
Parte hartze prozesuaren berri eman zuteneko irudia
Foruko Udala Hiri-Antolamendurako Plan Orokor (HAPO) berria diseinatzera doa. Hori egiteko, baina, lehenik eta behin parte hartze prozesu bat abiarazi zuen udalak, izan ere, HAPOaren diseinuan herritarren partaidetza “lehentasunezkoa” dela azaldu du Foruko alkate Janire Urkietak. Parte hartze prozesu hori amaituta, amaierako txostena aurkeztuko die herritarrei, eguenean.
Herriko etorkizuneko antolamenduaren eredua ezartzeko herritarren “beharrizanak, zalantzak eta ikuspegia” kontuan hartzea izan du helburu udalak. Asmoa, alkatearen arabera, “foruarren beharrizanei erantzuna ematea eta prozesua gardentasunez eta adostasunez burutzea” da.
Eguenean aurkeztuko duten txostenak 2015eko otsailaren eta apirilaren artean egindako parte hartze prozesuaren diagnostikoan ateratako emaitzak eta ondorioak batzen ditu. Egindako analisien eta azterketen ekintzak, ondorioak eta HAPOaren idazketaren ondorengo faseetako ildoak azaltzen ditu, hain zuzen ere.
Orain arteko parte hartze prozesutik hiru ondorio nagusi atera dituzte. Hala, batetik, Foru bere identitatea berreskuratzea bilatzen duen herria dela ondorioztatu dute: “batetik bere ingurune naturalaren errefortzua behar du,eta bestetik, topaketetarako espazio komunak hobetu”. Argi geratu da, bestalde, foruarrentzat ingurune naturalak duen garrantzia. Horien arabera, “harro sentitzeko arrazoia” baita. Zentzu horretan, ingurune natural horren defentsa bilatzen saiatu behar direla uste dute, bi ikuspuntutik: paisaia fisiko eta kulturalaren babesa baloratuta eta ingurune naturala aktibo ekonomiko eta sozial gisa baloratuta. Hirugarrenez, partaidetzaren aldeko “gogoa” ikusi dela nabarmentzen du txostenak, eta informazio “jarraiaren eta eguneratuaren” beharra dagoela ikusten da.
Bestalde, Plan Orokorraren idazketaren lizitaziorako baldintza-agirien idazketari begira aztertu beharreko elementuak ere azaltzen dira dokumentuan.
Parte hartze prozesuaren diagnostikoa garatu duen teknikoek emango dituzte azalpenak eta udaleko teknikoak eta ordezkariak ere izango direla azaldu dute.