Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Aurrekontuaren %42,2 inbertsioak egiteko baliatuko du Nabarnizko Udalak

Busturialdeko Hitza — 2026-02-27 14:36:00

Nabarnizko Udalak 1.001.794,14 euroko udal aurrekontua onartu zuen urtarrileko osoko bilkuran, aho batez; iazkoa baino txikiagoa da aurtengo aurrekontua, iaz 1.077.584,4 eurokoa izan baitzen. Hala ere, diru sailetik 422.323,63 euro bideratuko dituzte inbertsioetara, aurrekontuaren %42,2.

Zehaztu dutenez, udal aurrekontuaren %27 (273.600 euro) giza baliabideetara bideratuko dute, hau da, langileriaren gastuak ordaintzera, eta %26,2 (262.270 euro) izango da ondasun arrunt eta zerbitzuetako gastuetarako erabiliko dutena. Diru sarrera nabarmenenenak, ohi legez, udal kutxatik jasotzen dituztela azaldu dute, baita zergetatik ere.

Hala ere, udalak beti egiten du ahalegin berezia inbertsioen diru saila osatzeko eta herria hobetuko duten proiektuak herritarrei eskaintzeko. Horregatik, inbertsioetako diru sailaren zati handi bat udal zerbitzuak hobetzeko eta herria irisgarriago egiteko baliatuko dute.

Hain zuzen ere, proiektu garrantzitsuenetako bat izango da Elexaldeko udaletxe zaharra eraberritzeko erabiliko dute, hori irisgarriagoa, seguruagoa eta balio anitzekoa bilakatzea. Hain zuzen ere, udaletxe zaharraren konponketarako lehen faserako 150.000 euro bideratuko dituzte. Aurretik, udaletxearen ingurua egokitu eta irisgarriago bihurtu dute, herriko irisgarritasun proiektuan jasotako hobekuntza plana kontutan hartuta; herriko tabernaren sarbidearen irisgarritasuna hobetu eta Elespe aurreko kalearerekiko oinezkoentzako lotura ere hobetu zuten. Orain, baina, udaletxe zaharra eraberritzeko lehen fasera bideratuko dute dirua, eta fase horretan, eraikinaren oinarria egitura eta fojadurak egokituko dituztela azaldu dute udal arduradunek.

Elexaldeko zein auzoetako parkeak eraberritzea ere bada udalaren asmoa, eta horretara aurtengo aurrekontuko 142.000 euro bideratuko dituzte. Ikazurietako, Zabaletako, Uribarriko, San Migeleko, Elexaldeko eta udaletxe aurreko parkeak eraberritzea da asmoa, eta dagoeneko hasi dituzte lanak Ikazurietan eta Zabaletan. Izan ere, parke txikiak zaharkituta eta egoera txarrean daude: irisgarritasuna ez da beti betetzen, lurra labana da batzutean, eta zenbait jolas zaharkituta daude. Hori horrela, parke horien zoruak hobetuko dituzte, eta irisgarritasuna bermatuko dute; gainera, jolas berriak ipintzea ere badute asmo, baita behar den lekuetan jesarlekuak berriak instalatzea ere.

Mendi bideen mantenu eta berritze lanak egitea ere beti bilatu du Nabarnizko Udalak. Hori dela eta, Kurtziaganetik eta Zabaletara arteko bidea konpontzeko hirugarren faseko lanak egin gura dituzte, eta 70.000 euro bideratuko dituzte horretara. 2024an lehen fasea egin zen eta iaz bigarrena; horretan, egoera txarrean zeuden hormigoizko plaka altxatu zituzten eta plaka berria jarri.

Nabarniz Jatetxea

Busturialdeko Hitza — 2026-01-30 11:27:51

Menestraren edo indaba gorrien usain soilak Nabarnizera eramango ditu Busturialdeko zein eskualdetik kanpoko herritar asko. Hainbati zuzenean Nabarniz Jatetxea etorriko zaie gogora, 40 urtez asko izan baitira Kontxiren sukaldetik ateratakoak dastatzera hurbildu direnak. Urte luzeko lanaren ostean, erretiroa hartzeko garaia iritsi zitzaion hari ere, eta bere joanagaz itzali ziren lauzpabost hilabetez jatetxeko argiak. Orduan baina, haren erraina den Haizea Abadek, 16 urtetik jatetxeetan lanean ibilitakoa denak, aurrerapausoa eman, eta familia negozioaren ardura beregain hartzea erabaki zuen.

Hala, abenduaz geroztik martxan da berriro ere Nabarniz Jatetxea. Betikoa. “Betikoa eta herritarrek eskatzen dutena” eskaintzera datorrena: “Betiko sistema jarraituko dugu. Gauza batzuk aldatu daitezke, adibidez, kartaz kanpo idi-okela, behi-okela eta arrainen bat ekartzen ari gara, baina oinarrian betikoa izango da: menestra eta indabak ukitu ere ez!”.

Herritarrek zein urte luzez jatetxearen bezero izan direnek ez dute aldaketa nabarmenik igarriko betikoak jatera urreratzen direnean; izan ere, Abadek amaginarrebaren eskutik ikasi ditu sukaldeko sekretuak, eta orain, bera da kozinatzeaz zein jatetxearen kudeaketaz arduratzen dena. Herri txiki baten ezaugarriak jatetxea aintzat hartuta, bariku, zapatu, domeka eta jai egunetan zabaltzea erabaki du Abadek, “herriari bizitasuna ematen” laguntzen dion jakitun baita.

Begirada gaztea.
25 urte ditu Abadek, eta familiak egindako lanari errespetu eta miresmen begiekin begiratzen badie ere, betikoari “begirada gazte bat” gehitu gura dio: “Betikoarekin jarraitzeko nago hemen, baina gaztetasunetik; jatetxea aurrera eramateaz gain, ikuspegi gazte bat eman nahi diot: terraza moldatu, taberna indartu, konbinatuekin jokatu… Azkenean, menestra eta indabak jatera etorri bai, baina inguruko herrietatik ere zerbait hartu eta lasai egotera ere etor daitezen”. Helburu hori lortzeko lehenengo pauso gisa, tabernan berrikuntza bat ezarri dute: konbinatuetarako izotz-makina.

Aukeran, bertokoa.
Sukaldeari dagokionez, “aukeran bertokoa” erabiltzearen aldeko apustua berretsi du Abadek. Are gehiago, posible den kasuetan, etxeko ortukoa erabiltzen duela nabarmendu du, bezeroei “onena” ematea bilatzen baitu. Nabarniz Jatetxeko jangelak 180 lagunentzako tokia du, eta herritarrak bertara hurbiltzera animatu ditu.

Jatetxe Nabarniz eta Maider Uriarte, txapeldun

Busturialdeko Hitza — 2026-01-12 12:30:22

Nabarnizko udal pilotalekuko probatokia goi mailako zaldi proben epizentroa izan da asteburuan, Bizkaiko Txapelketako final handiak lehiatu baitituzte bertan, kinttopekoen mailan eta kategoria nagusian. Hala, etxeko Jatetxe Nabarnizek irabazi zuen kategoria nagusian eta Maider Uriarte izan zen kinttopekoen lehiako onena.

Etxean geratu zen zen sari nagusia, izan ere, 62 untza, 1/4 eta 0,15eko marka ezarri baitzuen Jatetxe Nabarnizek, bigarren sailkatu zen Garcia baino lan hobea eginda. Izan ere, 51 untza, 3/4 eta 5,80ko marka lortu zuen bigarren sailkatuak. Bestalde, Enkarterri Turf Power izan zen hirugarrena, 44 untza eta 6,30eko markagaz.

Maider Uriarte gailendu da Bizkaiko Kinttopekoen lehian, Nabarnizen.Iluntzar Jai Batzordea

Kinttopekoen lehian, berriz, 59 untza lortuta nagusitu zen Maider Uriarte. Lehia estua izan zen, izan ere, irabazleak baino hiru untza gutxiago (56 untza) lortu zituen bigarren sailkatu zen Gaztiñeik. Eta, hirugarren postua Irubiderentzat izan zen, 50 untza eta 4 metro lortu ostean.

105 herritarren topaleku izan da Arrolako harria

Busturialdeko Hitza — 2025-12-08 12:07:27

Arrolako gaineko harria herritarren topagune izan zen atzo, bigarrenez. Izan ere, Arratzuko, Mendatako eta Nabarnizko mugak ezartzen ditu harri horrek, eta hori abiapuntu izanik, 105 pertsona inguru bildu ziren II. Herri-batze martxan. Herri bakoitzak bere ibilaldi propioa egin zuen arren, eguerdian guztiak batu ziren Arrolako mugarrian.

Hala nola, arratzuarrak eta mendatarrak 10:00etan izan zuten hitzordua, ibilaldiari hasiera emateko. Nabarnizatarrek, berriz, 11:00etan ekin zioten ibilaldiari. Besteak beste, jai giroa nagusitu zen, ze, trikiti eta pandero soinuek alaitu zuten topeketa. Gainera, parte hartzaile guztientzat sartenekoa egon zen amaieran.

Martxaren lehenengo aldian Jose Antonio Maruri Nabarnizko alkatearen esku geratu zen irakurketa egitea, eta aldiro ardura hori txandakatzeko asmoa erakutsi zuten orduan. Hala, aurten Mendatako alkate den Joseba Malleak hartu zion testigua Maruriri, testuaren irakurketa egiteko.

Harria, mugarri eta topaleku

Busturialdeko Hitza — 2025-12-05 18:31:22

Arrolako gainean dagoen harriak Arratzuko, Mendatako eta Nabarnizko mugak ezartzen ditu, eta hiru herrietako herritarren topagune bihurtuko da etzi, II. Herri-batze martxa egingo baitute. Herri bakoitzak bere ibilaldi propioa antolatu du, eta 12:00ak inguruan batuko dira denak, Arrolako mugarrian.

Duela bi urte egin zuten martxa estreinakoz, eta 150 lagun inguru batu ziren Arrolan. Aurten ere jai giroa nagusituko da bertan, trikiti eta pandero soinuek alaituko baitute topaketa. Gainera, «animatu eta parte hartzen duten guztientzat sartenekoa egongo dela» iragarri dute.

Abiapuntu hirukoitza.
Arratzuarrek eta mendatarrek 10:00etan ekingo diote bideari. Ordubete beranduago, berriz, nabarniztarrek.

2023an Jose Antonio Maruri Nabarnizko alkatearen esku geratu zen irakurketa egitea, eta orduan aldiro ardura hori txandakatzeko asmoa erakutsi zuten. Hala, domekan jakingo da nori dagokion aurten irakurketa egitea.

Herriko Taberna berriz ere zabalik, itxuraldaketa sakonaren ondoren

Busturialdeko Hitza — 2025-12-05 07:07:39

Urte eta erdiko itxialdiaren ostean, Nabarnizko Herriko Taberna–Jatetxeak ateak ireki ditu berriro. 2022an azken maizterraren kontratua amaitu zenean taberna itxita geratu zen, eta horren ostean udalak berritze lan sakon bat egiteko hautua hartu zuen.

Horri erantzunez, udalak 2023. urtea osorik baliatu zuen eraikinean beharrezko zaharberritzeak egiteko. Sukaldea erabat berritu dute —altzariak, instalazioak eta suaren aurkako materialak barne—; elektrizitate sistema osoa ordezkatu da; hondakin uren hoditeria berritu; eta ur-galdara berria jarri. Era berean, goiko solairurako sarbidea kentzearekin sortu den espazioan langileentzako aldagela txikia egin da, eta komunak osorik berritu dira.

Kanpoko biltegiak ere eraberritze sakona izan du: teilatu berria, hormen tratamendua, margoketa eta instalazio elektrikoaren egokitzapena. Mostradorearen barrualdean ere hobekuntzak egin dira, eta eraikin osoa margotu da, espazioari itxura garai eta atsegina emanez. Inbertsio guztiak udal aurrekontutik gauzatu dira.

Lan horiek amaituta, udalak 2024ko hasieran atera zuen 10 urterako lizitazio publikoa —beste bost urte luzatzeko aukerarekin—, eta aurkeztu zen hautagaiak baldintzak betetzen zituela egiaztatuta, martxoan esleitu zitzaion. Taberna berriro martxan izanik, herritarrek poz handiz hartu dute zerbitzua berreskuratu izana.

Udalak balioan jarri du egindako inbertsioak udal-eraikinak egokitzeko eta zaharberritzeko estrategiarekin bat egiten duela. Azpimarratu dutenez, «azpiegituren mantentze eta berrikuntza planifikatuak» epe luzerako aurrezkia eta herritarren segurtasuna bermatzen ditu, eta Herriko Tabernaren kasua horren adibide praktiko gisa jarri dute.

Gauzak horrela, Nabarnizko bizitzan erreferente izan den espazioak, orain, eguneratutako baldintzak eta etorkizunerako sendotasuna uztartzen ditu. Udalaren esanetan, «herritarren topagune naturalari duintasunez eustea» izan da egindako inbertsioen ardatza. Taberna, berriro martxan da, herriaren bihotzean topagune bat.

Eneko Bilbaok Bizkaiko txapela jantzi du Nabarnizen

Busturialdeko Hitza — 2025-12-01 14:16:46

Nabarnizko pilotalekuak gizonezkoen Bizkaiko Giza Proba Txapelketaren final handia hartu zuen domekan (azaroak 30). Lehia gogorrarren ostean, Eneko Bilbaok eskuratu zuen garaipena, 12 puntugaz. Beragaz batera lehiatu zuten finala Aitor Etxanizek eta Aitor de la Concepcionek, baina, onena izan zen Bilbao.

30 minututan, hiru untza, 1/2 eta 4,32 metroko markagaz gailendu zen Bilbao, eta haren atzetik sailkatu zen Etxaniz, hiru untza eta 4,07ko marka eginda. Bata bestarengandik gertu ibili ziren bata eta bestea, baina kortezubitarrarentzat izan zen txapela. Bestalde, Concepcionek untza bat, 3/4 eta 4,74ko marka egitea lortu zuen, hirugarren postuan sailkatuz.

Frontoian bertan egin zuten lehiaketako sari banaketa ekitaldia, eta Bilbaok antolatzaileen eta udal ordezkarien partetik jaso zituen hala garaileari dagokion txapela, nola garaikurra.

20 lagun batu ziren Eibar-Nabarnizen 49. aldian

Busturialdeko Hitza — 2025-10-28 14:08:34

Nabarnizko eta inguruko herritarren artean errotuta dagoen ohitura da Eibarretik Nabarnizerainoko tarte mendirik mendi egitea. Hala, ia mendi erdiko ibilbidea egin zuten zapatuan, Athletic Nabarniz taldeak antolatutako Eibar-Nabarniz lagunarteko martxarekin bat eginez, 49. ekitaldia burutu baizuten. Guztira 20 lagun bildu ziren aurten, Eibar-Nabarnizen 49. aldian.

Urtero bezala autobusa goizeko 06:00etan Nabarnizetik irten zela azaldu dute antolatzaileek, eta 07:00etan hasi zirela ibiltzen Eibarretik. Oizeko San kristobal baselizan 10:30etan hasi ziren lehengoko partehartzaileak agertzen, eta ohitura jarraituz, salda beroa hartu ondoren jarraitu zuten Nabarnizerako bidearekin.

Eguerdi aldean Nabarnizen hamaiketakoa egon zen partaide guztientzat, eta ondoren, beteranoak, partehartzaileak eta antolatzaileak batu ziren, denak batera bazkaltzeko. Esan dute eguraldia ere aldeko izan zutela, eta orokorrean, elkartetik “pozik” agertu dira, beste urte batez ibilaldia egitea lortu dutelako, eta udaletxeari eskerrak eman dizkiote, “eskainitako laguntzagatik”.

Urterokoari hutsik egin gabe

Busturialdeko Hitza — 2025-10-22 14:23:40

Nabarnizko eta inguruko herritarren artean errotuta dagoen ohitura da Eibarretik Nabarnizerainoko tarte mendirik mendi egitea. Ia mendi erdiko ibilbidea du Eibar-Nabarniz lagunarteko martxak, eta zapatu honetan [urriak 25] 49. ekitaldia egingo dute, betiko modura, Athletic Nabarniz taldeak antolatuta. Gaur-gaurkoz, hogei lagun inguru daude mendi martxarako izena emanda. Azken orduko despistatuak, baina, izena emateko sasoiz daude oraindik, bihar [urriak 23] arte. Horretarako, 655 700 652 (Jabi) telenofo zenbakira deitu beharko dute.

06:00retan jarri dute autobuserako hitzordua, Nabarnizen. Handik, Gernika-Lumon nahiz inguruko udalerritatan “geldialdiak” egingo dituzte, nabarniztarrak ezdiren parte hartzaileak batzeko. 07:00rak inguruan ekingo diote 29 kilometro inguruko martxari. Euria eta eguraldi petrala daude iragarrita, eta, horrenbestez, ogibide nekeza edukiko dute martxalariek. Trabakua aldera joko dute lehenik eta behin, gero Zengotita ingurutik Oiz mendiraino igotzeko; handik, Astorkiganera jaitsiko dira, Kanponatik zein Arrolatik barrena Nabarnizera iristeko.

Helmuga harrapatu bezain pronto, mokadua edukiko dute zain, indarberritzeko. Nabarnizko Udalak, gainera, parte hartzaileentzako dutxak ahalbidetuko ditu. 15:00rak aldera, herriko tabernan elkartuko dira, talde bakaritarako. Parte hartzaileez eta antolatzaileez gain, ohitura abiatutako kide beteranoak ere egongo dira bertan; 30 lagun inguru biltzea aurreikusten dute.

2026ko egutegirako argazki lehiaketa, abian

Busturialdeko Hitza — 2025-10-20 18:57:46

Nabarnizko Udaletik aditzera eman dutenaren arabera, abian da 2026. urteko egutegirako argazki lehiaketa. Beste behin, izaera herrikoia edukiko du lehiaketak, udalerrian erroldatuta duden herritar guztiek parte hartu ahalko baitute —udaletxeko beharginek eta udal ordezkariek izan ezik—, eta horrexetarako deialdia egin dute antolatzaileek. Parte hartu gura dutenek azaroaren 21eko 14:00ak bitarteko epea dute.

Lehiaketaren baldintzei dagokienez, azaldu dute aurtengo langaia Gure zuhaitz eta zuhaixkak izango dela, eta horri buruzko zehaztapenak ere eman dituzte: bertoko landareei atera beharko zaizkie argazkiak, eta ez exotikoak edota kanpotik ekarritakoak direnei. Halaber, argazkian ageri den zuhaitz nahiz zuhaizka motaren izena jakinez gero, haren izena zehazteko eskatu dute. Partaide bakoitzak gehienez hiru argazki aukeztu ahalko ditu lehiaketara, baina argazki bakarra argitaratuko dute; parte hartzaile kopurua beharrezko argazki kopurua baino murritzagoa izango balitz, aurreratu dute bigarren argazki bat hautatuko luketela iragarri dute.

Argazkiak horizontalak izan beharko dira, koloretan zein zuri-beltzean. Kalitate handiko bereizmena hobetsiko dute: gutxienez 2 Mb edo 4000×3000 pixelekoak. Posta elektronikoa baliatu beharko da, aurkezterako orduan; udala@nabarniz.eus helbidera bidali beharko dira, JPG formatuan. Proposamenak aurkezterako orduan, argazkiek ezin izango dute egilearen izen-abizen, sinadura zein bestelako identifikazio daturik eduki. Bestalde, argazkiei azaleko edizioa egitea onartuta egongo da, baina ez, ostera, jatorrizko irudia aldatu dezakeen elementurik kentzea edota txertatzea. Aukeraketa egiteko ardura duen aditu taldeak zalantzarik edukiko balu, jatorrizko artxiboa eskatzeko eskumena edukiko luke. Aditu talde hori, hain zuzen ere, udalaz kanpokoa izango dela argitu dute. Epaileon hautua udalak web orrialdean emango du argitara.

Aipatutako oinarri eta badintza horiek onartzerakoan, parte hartzaileek aurkeztutako argazkien egileak eta horien eskubideen titularrak direla onartuko dute, baita horiek erreproduzitzeko eskubidea doan ematen dutela ere. Ez hori bakarrik: argazkian pertsonaren bat agertuz gero, horren idatzizko baimena aurkeztu beharko dute. Beste alde batetik, onartuko dute argazkiak inori kopiatuak edo lapurtuak ez direla. Egutegirako aukeratutako argazki bakoitzak 50 euroko ordainsaria edukiko du.

Hiru egun, hiru ikuskizun

Busturialdeko Hitza — 2025-09-11 13:37:23

Badira zaldi probak modu berezi eta intentsoagoan dastatzen dituzten herri edo inguruak; horietako bat, zalantzarik gabe, Nabarniz litzateke. Nabarnizko Zaldi Proba Txapelketak mende erditik gorako bidea egin du. Hain zuzen ere, asteburu honetan 55. ekitaldia egingo dute herriko probalekuan, eta ikusleak bertaratzera deituak daude. Iluntzar Jai Batzordeko antolakuntzak, udalaren zein Bizkaiko Euskal Joko eta Kirol Federakundearen laguntzagaz, goi mailako egitaraua prestatu du, zaldi proben jarraitzaileen gozamenerako.

Bihar [irailak 12], 20:00retan hasiko da ikuskizuna, eta parte hartze lea-artibaitarra plazaratuko da: alde batetik, Markina-Xemeingo Gaztañegi; bestetik, Etxebarriko Irubide. Biak ala biak kinttopeko parte hartzaileak izango dira. Barikuko sarrera 10 eurokoa izango dela aurreratu dute antolatzaileek. Hala zapatuan, nola domekan, hiruna parte hartzaile ariko dira zein baino zein gehiago. Zapatuan, gainera, eskualdeko ordezkaritza aparta egongo da: Maider Uriarte kortezubitarra (kinttopekoa) eta etxeko izarra, Nabarniz Jatetxea, izena emanda daude; horiekin batera, Guriezoko (Kantabria) Fermin Santamaria ariko da lehian. Azken biak maila nagusi9koak dira. 21:00retan ipiniko dute abian ikuskizuna.

Domekan, 18:00retatik aurrera, Santamariak errepikatu egingo du, baina beste arerio biren aurka: Zallako Enkarterri Turf Power eta Busturiko Angel Txertudi, iazko garaileetako bat. Hirurak maila nagusikoak dira. Zapatuko eta domekako sarrera 15 eurokoa izango da.

Andra Mari jaiek hainbat eszenatoki izango dituzte Busturialdean

Busturialdeko Hitza — 2025-09-05 10:00:43

Bermeoz gain, Busturialdeko beste hainbat txokotan ere jaiak jarraituko du hurrengo astean; askotariko egitarauez gozatzeko prest daude han eta hemen. Izan ere, Murueta, Nabarniz, Gautegiz Arteagako Kanala eta Muxikako Gorozika auzoa ere Andra Mari jaietan murgiltzear daude. Muruetarrak zapatuan hasi eta martitzenera arteko egitaraua izango dute aukeran, hamaika ekintzez gozatzeko. Denetariko osagaiak izango dituen errezeta paregabea prestatu du udalak, beste urte batez, herri txikietako jaiak indartzeko asmoz. Hala, goi-goitik hasiko dituzte Andra Mariak, paella txapelketarekin. Jana kirolarekin uztartuko dute, ostera, ze, Sustabiz Fundazioaren eskutiko jardunaldi parte hartzaileez gozatu ahal izango dute bertaratzen direnek. Gainera, paella txapelketatik, tortilla txapelketara egingo dute jauzi, arratsaldean zehar, eta jaien estreinako eguna musikaz, ikuskizunez eta briska txapelketaz amaituko dute.

Domekan ere, beste horrenbeste izango dute aukeran herritarrek. Urdaibai Dantza taldearen eskutik Euskal Dantzak izango dira andramarien bigarren egunari hasiera emango diotenak, jarraian Lilibertsok antolatutako bertso saioa izanik. Herritar guztientzako jaiak nahi dituzte Muruetan ere, eta horren erakusle dira, arratsalderako antolatu dituzten umeen jolasak, edota goitiberak. Kirola oso presente izango da jai guztietan zehar, oro har. Ze, domekari itxiera emateko, pala txapelketa mistoaren finalak hartuko ditu frontoiak.

Astelehen eta martitzenean jarraituko du jaiak, aurreko egunetako ildoa jarraituz. Hala nola, musika, kirola eta giro ona batuko dituzte azken bi egunek. Urteroko boloak eta bingoa, esku pilota partiduen erakustaldia, eta lehen mailako 4 eta erdiko partiduak beteko dute herria astelehenean. Martitzenean, berriz, hildakoen aldeko mezarekin abiaraziko dute goiza, eta eguerdira arte, hamaiketakoa eta boloak eta rifak izango dira aukeran.

Nabarnizen ez dira gutxiago izango, eta bost eguneko egitaraua prestatu dute. Gaur hasi eta eguaztenera arte murgilduko dira, beraz, andramarietan. Pregoia, txikimañak eta txupinazoarekin egingo dute eztanga jaiek, eta urteroko makailau janaren ondoren, Joseba Urrutia trikitilariaren txanda izango da.

Zapatuan, mozorroak izango dira nagusi. Izan ere, herri bazkari mozorrotuan bilduko dira, plazan. Mozorroen ildotik jarraituz, arratsaldean, zirkugintza tailerran murgilduko dira herritarrak, mozorro eta guzti. Iluntzean, musika izango da protagonista; orkestra elektrotunak girotuko du, lehenik, herria. Gauean, berriz, kontzertuen txanda izango da: The Clayton, Trikizio eta Dj Barbik musikatuko dute gaua.

Domekan kirolez eta kirolariz beteko da Nabarniz; Sustabizen eskutiko Herri Kirol erakustaldia izango da goizean, eta arratsaldean, esku pilota partidak. Astelehen eta martitzenean ere izango da zer egin herrian. Pintxoak herriko tabernetan, trikipotekoa eta umeen jolasek gidatuko dute astelehena, eta txantxiku txapelketa izango da aurtengo Aandra Mari jaiei itxiera emateko arduraduna.

Auzoetan ere bai

Muxikan, Gorozika auzoa izango da andramarien eszenatoki. Gaur hasi eta astelehenera bitartean herritarrak biltzeko hainbat hitzordu prestatu ditu Gorosti Kultur Elkarteak, Gaukari Auzokide Elkartearen laguntzarekin, beste behin.

Mugimendua ez da faltako auzoan, ze, prestatutako egitarauak zerbait badu, hori kirola da. Mus txapelketa, zesta punta partiduak, eskupilota partiduak, herri kirolak, umeen jolasak eta briska txapelketa izango dira nagusi, alegia, lau egunetan zehar. Horrez gain, musika, hamaiketako eta afari herrikoiak eta giro ona ere protagonista izango dira Gorozikako eszenatokian.

Gautegiz Arteagako Kanalan, berriz, hurrengo asteburuan izango dute gozamenerako tartea; irailaren 11tik 14ra bitarteko egitaraua prestatu dute. Umeen pala txapelketatik hasi eta pilota partiduetara egingo dute salto, tartean kantu, dantza, kirol eta gozamenerako tarte anitz utziz.

EGITARAUA:

GOROZIKA (MUXIKA)

Gaur, barikua

19:00. Txupinazoa.

20:00. Mus txapelketa.

Bihar, zapatua

11:30. Ume eta gazteen zesta punta eta eskupilota partiduak.

14:00. Sustabiz Fundazioaren eskutik, herri kirolen erakustaldia herriko eta inguruko kirolariekin.

21:00. Afari herrikoia.

23:30. Su artifizialak.

00:00. Kittu taldearen erromeria.

04:00. Txokolatada.

Etzi, domeka

10:30. Meza nagusia.

11:30. Hamaiketako herrikoia.

17:00. Umeen jolasak.

19:30. Txokolatea denontzat.

Irailak 8, astelehena, Andra Mari Eguna

11:00. Meza nagusia.

12:00. Hamaiketakoa.

17:30. Briska txapelketa.

20:00. Jaiei amaiera emateko txokolatea eta traka ikusgarria.

KANALA

Irailak 11, eguena

18:00. Umeen pala txapelketako finala.

18:45. Kanalako 18. pala txapelketa nagusiko finalaurrekoak.

Irailak 12, barikua

17:00. Zinta lasterketa eta umeen jolasak.

18:45. Emakumeen IV. pala txapelketako finala.

19:30. Kanalako 28. pala txapelketako nagusiko finala.

20:30. Arteagako abesbatza.

21:30. Herri afaria.

22:30. Bingo musikatua.

Irailak 13, zapatua

18:30. Mozorro desfilea.

21:00. Bokatak salgai.

22:00. Karaoke gaua eta musika txosnan.

Irailak 14, domeka

11:00. Meza.

11:30. Tortilla eta paella txapelketarako izen ematea.

12:00. Kanalako dantza taldearen emanaldia.

13:00. Hamaiketako herrikoia, frontoian.

14:30. Tortilla eta paellen aurkezpena.

15:00. Sari banaketa.

18:00. Pelota partiduak: umeen partidua, kadeteen mailako partiduak eta nagusien mailako partiduak.

MURUETA

Bihar, zapatua

11:30. Paella txapelketan izena ematea eta Joxepa Kale Kale paellak egiten diren bitartean.

12:00. Herri kirolak: Urdaibai gure kirolak sustatzen jardunaldi parte hartzaileak Sustabiz Fundazioaren eskutik.

14:00. Paul Ormaetxea herriko kirolariari zorion agurra.

14:30. Paella erakusketa eta sari banaketa.

17:00. Tortilla txapelketan izena ematea.

19:00. Tortilla erakusketa eta sari banaketa.

Ostean. Esna Gazte ume eta familientzako ikuskizuna.

19:30-20:00. Briska txapelketan izena ematea.

20:15. Briska txapelketa.

Etzi, domeka

11:30. Meza.

12:30. Euskal dantzak Urdaibai dantza taldaren eskutik.

13:30. Bertso saioa Lilibertsoren eskutik.

16:00. Umeen jokoak.

17:00. Goitibeherak.

19:00. Txokolate jana.

19:00-19:30. Mus txapelketaren izen ematea-

19:45. Mus txapelketa.

20:00. Pala txapelketa mistoaren finala.

Irailak 8, astelehena

11:30. Meza nagusia.

Ostean. Ohorezko aurreskua Muruetako herriari.

13:00. Boloak eta bingoa.

19:00. Esku pilota partiduen erakustaldia, Gernikako Arkupe Sustabiz kirol elkarteko eta Bermeoko Artza pilota klubeko pilotarien artean 4 partida.

Gero. Lehen mailako 4 eta erdiko partidua: Aitor Etxebarria vs Gaizka Karregal.

Irailak 9, martitzena

11:30. Hildakoen aldeko meza.

12:15. Hamaiketakoa.

13:30. Boloak eta rifa.

Amaitzeko. Jaiei agurra.

NABARNIZ

Gaur, barikua

19:30. Pregoia, txikimañak eta txupinazoa.

20:30. Makailau jana.

21:00. Joseba Urrutia trikitilaria.

Bihar, zapatua

14:00. Herri bazkaria, plazan, mozorrotuta.

16:30-18:30. Zirkugintza tailerra.

17:00. Mus eta briska txapelketa.

18:00-20:30. Orkestra elektrotuna.

22:00. Kontzertuak: The Clayton, Trikizio eta Dj Barbi.

Etzi, domeka

11:00. Herri kirol erakustaldia Sustabizen eskutik.

12:00. Meza.

18:00. Esku pilota partidak, Garferekin.

Irailak 8, astelehena

13:00. Pintxoak herriko tabernan.

13:00. Trikipoteoa Joseba Urrutiak alaituta.

17:00-20:00. Umeen jolasak.

Irailak 9, martitzena

12:00. Meza.

Ostean. Txantxiku txapelketa.

Euriak ere ez du jai giroa itzaliko

Busturialdeko Hitza — 2025-07-25 16:58:40

Eguzkitako krema eta betaurrekoak esku batean eta zira eta euritakoa, bestean. Eguraldia edozelakoa izanik ere, Santiago eta Santa Ana jaiak ospatzeko prest daude eskualdeko herritarrak, eta hala erakutsi dute gaur goizean goizetik [uztailak 25], Kortezubin, Morgan, Busturian eta Nabarnizen.

Kortezubin, Arratzuko abesbatzak lagundutako mezagaz hasi dute eguna, eta segituan iritsi da herriko ume eta gazteek osatutako euskal dantza taldearen emanaldia ere. Dantzaldi aurretik euri apur bat egin badu ere, eguraldiak dantzaldia errespetatu du eta gogotik eskertu dute plazan batu diren kortezubitarrek. Izan ere, herritarrek txalo artean hartu dituzte dantzari txiki eta ez horren txikiak, eta trikitixaren erritmora dantzatu dituzten hamaika euskal dantzez gozatu dute, besteak beste, Agurraz, Txulalaiz, San Petrikez, Sorgin dantzaz, Ibarzabalgo arku dantzaz, Korteseko zinta dantzaz eta Zazpi jauziz.

Dantza emanaldiaren ostean frontoia izan dute topaleku herritarrek, ustez Emakumeen Elite mailako Udako eskuz binakako Master Laboral Kutxa txapelketaz gozatzeko. Pilotari baten huts egiteak baina, neurketa moldatzera behartu ditu antolatzaileak eta bikote izatekotan ziren Olatz Arrizabalaga gernika-lumotarra eta Amaia Zarrabeitia kortezubitarra nor baino nor gehiago aritu dira. Zarrabeitiak ezin izan du herrikideen aurrean garaipena lortu: Arrizabalaga 22 eta 11 nagusitu da.

Eguerdian atseden hartzeko aprobetxatu, eta arratsaldean berriro ekingo diote festari kortezubitarrek. 18:00etatik aurrera umeentzako jolasak izango dituzte aukeran, eta iluntzean, Luhartz erromeriak hartuko du Santiago eguna girotzearen ardura. Hala ere, jai egitarauak asteburu guztian zehar jarraituko baitu, denetariko eskaintzagaz.

Marrazki bizidunez beteta.
Morgan, krema eta aterkiaz gain, mozorroak ere jantzi dituzte goizetik. Minionak, Mario Karteko pertsonaiak, Harriketarrak, superheroiak… denek bat egin dute gaur plazan. Izan ere, marrazki bizidunak gaia izan da aurten jaietako lehen egunerako aukeratu duten gaia. Hiru eguneko egitarauari ekiteko gogoz, sukaki txapelketan batu dira herritarrak, bakoitzak bere erara, gero lagunartean dastatzeko gisatua kozinatzeko duten abilezia erakutsi nahian.

Eguraldiak baten bati gisatua prestatzeko prozesua zerbait baldintzatu badio ere, guztira hamalau izan dira aurten aurkeztu dituzten kazuelak, eta iaz “pare bat gehiago” izan baziren ere “pozik” daude bertaratu den pertsona kopuruagaz. Izan ere, 199 lagunek eman dute izena herri bazkarirako.

Bazkaldondoa girotzeko bingoan batuko dira 17:30ean, eta horren ostean ezagutuko dute norena izan den aurtengo sukalkirik eta onena. Horrez gain, mozorro onenek ere saria jasoko dute: mozorro onenak 100 euro jasoko ditu, eta talde mozorro onenak, beste 100 euro. Eguneko lehiaketetako emaitzak argituta, jan-edanean batuko dira berriro ere, 20:00etatik aurrera taloak izango baituzte aukean.

Etenik barik.
Goizaldera arte Zibilo Records eta Zirkinik Bez erromeriagaz dantzan aritu ostean, herriko txistulariekin kalejiran hasi dute eguna busturiarrek, Axpen. Irrintzi Alai Dantza Taldearen emanaldiaz gozatu aurretik, ohi legez, udal gobernu taldea Andra Mari elizara bertaratu da. Euriak dantzaldia elizpera eramatea eragin du, baina ez du festa eten. Aterkia hartu eta Etxebarria trikitilariekin tabernaz taberna aritu dira busturiarrak.

Hurrengo hitzordua 18:00etarako dute jarrita, frontoian, esku pilota partiduak elkarrekin ikusteko. Behin lekua hartuta, iluntzera arte bertan jarraituko dute, Trapu Zaharra taldeak Eutsi Ramon! antzerkia eskainiko baitu. Estampas de Mexico mariatxi taldeak eta DJ Jaikide izango dira Santiago eguneko gauari soinua jarriko diotenak.

Nabarniztarrak, berriz, Lekerika auzoa izan dute aurten ere topagune Santiago egunean. Herritarrek txantxiku txapelketan punteria eta trebetasuna erakutsi ostean, paella txapelketan elkartu dira. Bazkalondoa girotu eta festa gogoari eusteko, arratsaldean zehar AEIOU Busturialdea jolasak eskainitako ekintzekin gozatzen ari dira. Iluntzean berriz, Hiru Bitan erromeriagaz abestu eta dantzatzea izango dute erronka.

Datozen egunetako egitarauak, herriz herri:

BUSTURIA (AXPE)

Bihar, Santa Ana eguna

11:00. Kalejira, herriko txistulariekin.

11:30. Meza nagusia, Arronategi egoitzan.

Ondoren. Irrintzi Alai Dantza Taldea, Arronategi bisitetxean.

12:00. Sukalki Txapelketarako izen-ematea.

13:30. Kantu Kantari.

14:30. Sukalkien aurkezpena eta sari banaketa.

18:00. Bizkaiko Lasto Altxatie Txapelketa, eta Busturialdeko harri-jasotzaileak.

20:00. Urdaibaiko Organoen kontzertua, Axpeko elizan.

20:30. Animazioa, Kitturekin.

22:30. Tributo a Fito y Fitipaldis eta DJ Mr. Beat.

Etzi.

12:00. Umeen zesta eskolakoen partiduak.

17:00. Umeentzako parkea, Ispiluetan.

19:00. Jaia amaitzeko, txokolatea.

KORTEZUBI

Bihar, Santa Ana eguna.

11:00. Meza santua.

10:30. Jardunaldi parte-hartzailea Sustabiz Fundazioaren eskutik; esku pilota partiduak, herri kirolak…

14:00. Umeen herri bazkaria.

15:00. Nagusien herri bazkaria.

16:30. Umeen jolasak.

Bazkal ostean. Eingo taldea.

20:00. Gauargi erromeria.

Etzi.

10:30. Meza santua.

12:00. Zaldi probak: Azkoititik, Txilibiter eta Urduliztik, Olea.

MORGA

Bihar, Santa Ana eguna.

12:00. Meza Meakaurren eta pintxoak.

Jarraian. Trikitilariak.

14:00. Tortilla Txapelketa.

20:00. Poteo musikatua.

22:00. Kontzertzuak: Suger, Toc eta Altxaporru erromeria.

Etzi.

17:00. Ume jolasak; puzgarriak, tailerrak eta bits jaia.

19:00. Diskodantza.

20:00. Txokolatada.

Ekintzaz josita datoz Santiago eta Santa Ana jaiak

Busturialdeko Hitza — 2025-07-23 16:32:19

Karmen jaiak atzean utzita, Madalenek hartu dute jaien erreleboa Lea-Artibai eta Busturialdeko zeinbat herritan, baina baita Santiago eta Santa Ana jaiek ere, beste zenbaitetan. Busturialdean, Busturiko Axpe auzoan, Kortezubin, Morgan eta Nabarnizko Lekerika auzoan ospatuko dituzte jaiok.

Axpe auzokoek urtez urte irrikaz bizi dituzte Santiago eta Santa Ana jaiak, eta aurten ere ez da gutxiago izango. Lau egunez, askotariko ekintzen eszenatoki bihurtuko da auzoa, bihartik aurrera. Kirola, musika, jan-edana eta giro ona nagusituko dira, beraz. Pala txapelketak, kalejira desberdinek, sukalki txapelketak eta hainbat kontzertuk hartuko dituzte Axpe auzoko bazterrak.

Esaterako, sukalkia ez da faltako oraingo honetan ere Axpen zein Morgan, urtez urteko tradizioari eutsiz. Morgan Santiago egunez lehiatuko dute Sukalki Txapelketa. Horretaz aparte, mozorro eguna ere espero dute Morgako herritarrek. Aurreratu dutenez, aurten, mozorroen eguneko gaia marrazki bizidunak izango da. Taloak, tortilla txapelketa eta beste hainbat izango dira herritarren gozamenerako menuan, nola ez, musika eta jai giroa lehenetsiz.

Kortezubin ere hitzordua mantenduko dute, beste behin. Nabarnizko Lekerika auzoa, ostera, paella txapelketaren eta txantxiku txapelketaren testigu izango da, besteren artean.

Egitarauak, herriz herri:

BUSTURIA (AXPE)

Bihar, uztailak 24

18:00. Pala Txapelketa, Itxasalde kirol taldeagaz.

20:00. Karro poteoa, Otsozulo taldeak antolatuta.

22:30. Zilibito records eta Zirkinik bez.

Etzi, Santiago eguna

11:00. Kalejira, herriko txistulariekin.

12:00. Meza nagusia.

Ondoren. Irrintzi Alai Dantza Taldea.

Gero. Trikitixa tabernaz taberna, Etxebarria Trikitilariekin.

Gero. Esku-pilota partiduak.

Gero. Antzerkia: Trapu zaharraren Eutsi Ramon.

Azkenik. Mariachi Internacional: Estampas de Mexico.

Ondoren. DJ Jaikide.

Uztailak 26, Santa Ana eguna

11:00. Kalejira, herriko txistulariekin.

11:30. Meza nagusia, Arronategi egoitzan.

Ondoren. Irrintzi Alai Dantza Taldea, Arronategi bisitetxean.

12:00. Sukalki Txapelketarako izen-ematea.

13:30. Kantu Kantari.

14:30. Sukalkien aurkezpena eta sari banaketa.

18:00. Bizkaiko Lasto Altxatie Txapelketa, eta Busturialdeko harri-jasotzaileak.

20:00. Urdaibaiko Organoen kontzertua, Axpeko elizan.

20:30. Animazioa, Kitturekin.

22:30. Tributo a Fito y Fitipaldis eta DJ Mr. Beat.

Uztailak 27, domeka

12:00. Umeen zesta eskolakoen partiduak.

17:00. Umeentzako parkea, Ispiluetan.

19:00. Jaia amaitzeko, txokolatea.

KORTEZUBI

Bihar, uztailak 24

18:00. Txupinazoa.

18:00. Tortilla txapelketa.

19:30. Tortillaren aurkezpena eta sari banaketa.

20:00. Urdaibaiko Organoak zikloaren barruko kontzertua, Santiago Apostolua elizan.

21:00. Joseina Etxeberria DJ-a.

Etzi, Santiago eguna

10:30. Meza santua, Arratzuko koruarekin.

12:00. Kortezubiko ume eta gazteen Euskal Dantza taldeak.

13:00. Udako eskuz binakako Master Laboral Kutxa txapelketa. Emakumeen Elite maila: Uriarte-Gamibide eta Arrizabalaga-Zarrabeitia.

18:00. Umeen jolasak.

21:00. Luhartz erromeria.

Uztailak 26, Santa Ana eguna

11:00. Meza santua.

10:30. Jardunaldi parte-hartzailea Sustabiz Fundazioaren eskutik; esku pilota partiduak, herri kirolak…

14:00. Umeen herri bazkaria.

15:00. Nagusien herri bazkaria.

16:30. Umeen jolasak.

Bazkal ostean. Eingo taldea.

20:00. Gauargi erromeria.

Uztailak 27, domeka

10:30. Meza santua.

12:00. Zaldi probak: Azkoititik, Txilibiter eta Urduliztik, Olea.

MORGA

Etzi, Santiago eguna

12:00. Meza nagusia, Meakaurren.

Jarraian. Trikitilariak.

14:00. Sukalki Txapelketa.

Gero. Bazkaria.

17:30. Bingoa.

Ondoren. Sukalki eta mozorroen sari banaketa.

Mozorro onena: 100 euro.

Talde mozorro onena: 100 euro.

Gaia: Marrazki bizidunak.

20:00. Taloak.

Uztailak 26, Santa Ana eguna

12:00. Meza Meakaurren eta pintxoak.

Jarraian. Trikitilariak.

14:00. Tortilla Txapelketa.

20:00. Poteo musikatua.

22:00. Kontzertzuak: Suger, Toc eta Altxaporru erromeria.

Uztailak 27, domeka

17:00. Ume jolasak; puzgarriak, tailerrak eta bits jaia.

19:00. Diskodantza.

20:00. Txokolatada.

NABARNIZ (LEKERIKA AUZOA)

Etzi, Santiago eguna

12:00. Meza.

Ostean. Txantxiku Txapelketa.

14:30. Paella Txapelketa.

15:00-18:00. AEIOU Busturialdearen eskutik jolasak, hiru orduz.

18:00. Jokoak.

19:00. Hiru Bitan erromeria.

Eguraldi txarrari, festa eta giro ona

Busturialdeko Hitza — 2025-07-14 15:26:09

Sankristobalak ospatu dituzte asteburuan Busturian, denetariko eskaintzagaz. Euriak zeresana izan du jaietan, eta ekintzaren bat edo beste bertan behera uztea ekarri badu ere, Busturiko Udaletik jaien balorazio “positiboa” egin dute, Busturiko zein inguruko herritarren erantzuna “ona” izan baita.

Barikuan [uztailak 11] Otsozulo Gazte Asanbladak antolatutako gazte bazkarian elkartu ziren herriko zein inguruko ehun gazte inguru, eta arratsaldea Kantu Kantarigaz pintxo potean aterata biribildu zuten. Gau aldera baina, eguraldiak okerrera egin zuen, eta euriak eta tximistek Oxabiren kontzertua bertan behera uztera behartu zituen: “Pena handia izan zen, 22:30etik 00:00etara egon ginen itxaroten baina taldeak ekipo elektriko eta elektronikoa zuen, eta horrek tximistak erakarri zitzakeen. Bertan behera uztea erabaki eta dena batzeagaz batera, atertu eta tximistak gelditu ziren”. Sankristobaletako barikuetan “zapatuetan baino jende gutxiago” egoten da Busturian, baina hala ere, oztopoak oztopo, plaza “erdi beteta” egon zen: “DJ Jaikidek bai jo zuen eta txosnak goizeko seiak arte zabalik egon ziren, giro polita zegoelako”.

Herenegun [uztailak 12], berriz, dena “oso ondo”joan zen. Eguna Busturia Urzelai Futbol Klubak lehenengoz antolatutako futbol partida herrikoiagaz hasi zuten. Busturitik zein beste hainbat herritatik etorritako 5 eta 14 urte bitarteko “60 ume inguru” elkartu ziren eta denak topaketaren domina oroigarriagaz itzuli ziren etxera. Arratsaldean, bestalde, Busturia Txirrindulari Taldeak deitutako lasterketaz gozatu zuten: “Zirkuitu moduko bat prestatu zuten, proba eta erronka ezberdinekin eta oso polito egon zen”. Iluntzean danborradaren txanda izan zen, eta beste urte batez, “plaza beteta” egon zen herriko danbor jole txiki zein helduek prestatatutko emanaldia ikusteko.

Gaua goizaldera luzatzearen ardura Jagoba&Hazasen, Zutik Erromeriaren, D.J.Bullen eta Otsozuloko Otso eta Zulo DJen esku zegoen, eta ez zuten hutsik egin: “Plaza jendez gainezka egon zen, eta txosnak goizaldera arte zabalik egon ziren”.

Axpera begira. Barikuko ezbeharra kenduta, San Kristobal jaien balorazioa positiboa egin dute: “Eguraldia ez dago inoren esku, baina hala ere, jaietan herriko eta kanpoko jendea egon da eta lau eguneko balorazioa oso ona da”. Otsozuloko kideak jaietako kontuak oraindik egiteke badituzte ere, orokorrean “pozik”agertu dira egindako lanagaz: “Uste dute bai barikuan, bai zapatuan —bereziki zapatuan— gauza ondo joan dela txosnan”.

Sankristobalak agurtuta, dagoeneko Santiago eta Santa Ana jaiei begira daude: “Gaurtik Axpera begira gaude. Jaiak antolatuta daude, baina beti dago zer egin: hesiak, sukalki txapelketako mahaiak, sariak… Batzuk agurtu eta beste batzuk hasi, Busturian horrela izaten da, eta gaurtik Axpera begira gaude”.

Busturia ez da baina asteburuan San Kristobal jaietan murgildu den eskualdeko herri bakarra. Nabarniztarrak San Kristobal ermitaren inguruan elkartu ziren atzo [uztailak 13], sankristobalak jan-edanean ospatzeko. Ohi legez, meza ostean urdaizpikoa eta haragi txigortua izan zituzten aukeran herritarrek.

Sankristobalak ospatu zituzten Nabarnizen, atzo.

Zuhaitz zein basoei duten garrantzia emango diete Nabarnizen

Busturialdeko Hitza — 2025-03-05 14:21:26

Zuhaitz Egunean bilduko dira nabarniztarrak zapatuan (martxoak 8), 09:30ean, Elixalden. Handik ibilbidea egingo dute Ikazurietako San Kristobal ermita albora, eta 30 haritz batzuk landatuko dituzte bertan. Gutxi gorabehera 13:00ak arteko plana izango da, eta herritarrei bertaratzeko deia egin diete.

Izan ere, lekuan lekuko zuhaitzek uraren zikloa erregulatzen, lurzorua zaintzen, klima aldaketa arintzen eta, oro har, bizi garen ingurua orekatzen laguntzen dute. Ondorioz, basoei zein zuhaitzei duten garrantzia emateko helburuz antolatu du Zuhaitz Eguna Nabarnizko Udalak, eta aukera aprobetxatuko du kontzientziak pizteko: “Bertoko zuhaitzak landatzeak daukan garrantzia sustatu gura dugu, eta horretarako landaketa txiki bat egitea pentsatu genuen, negu garaiko tradizio honegaz jende gazteari horrelako ekintzek duten garrantzia jakinarazteko. Ume edo gazte askori landaketen garrantzia ezagutaraztea, eta hori nola egiten den erakustea da gure asmoa, lan hori zelan egiten den ikas dezaten eta horri buruzko ezaugarri bat izan dezaten”.

Landaketak egiteko, ibilaldian joango dira Elixaldetik Ikazurietara, txangoan. “Ibilbidea erraza da, ez da oso luzea. Beste gune batzuk ere aztertu genituen, mendiko lurrak-eta, baina denentzako ibilbide erraza egin gura genuen eta San Kristobal ermitara joango gara. Gainera, gunea prestatuta dago, garbiketak egiten ditugulako bertan”, azaldu dute, gunea lasai ibiltzeko egokia dela nabarmendu dute.

Gehitu dute inguru horretan badagoela bertoko baso mistoa, eta landaketak baso horri indarra emateko balioko duela: “Haritzen presentzia indartuko dugu bertan, batzuk badaudeen arren”.

Zehaztu dute nahi duenak parte har dezakeela, gaztetxoek, haurrek zein helduek, eta ahal dutenei aitzurra edo pala eroateko eskatu diete. Gainera, ura edo jateko zerbait eroatea ere gomendatu dute, hori norberaren ardura izango dela esanda.

Landatuko dituzten haritzak aldundiak emandakoak dira, baina landaketa udalak antolatu du. “Duela hainbat urte, aldundiak landaketak egiteko zuhaitzak banatzen zituen, bai udalarentzat bai herritarrentzat, eta aurten urte batzuetan geldi egon den ekimen hori abiatu dute berriro. Eta guk egoki ikusi genuen Nabarnizek dituen lur guztiekin udalaren lurretan landaketa txiki bat egitea”.

Eguraldiak gelditu ezinezko ohitura

Busturialdeko Hitza — 2024-10-28 11:37:42

Urteroko ohiturak, pauso sendoz. Iragan zapatuan [urriak 26], nabarniztarrek 48. Eibar-Nabarniz mendi ibilaldia egin zuten, Athletic Nabarniz Elkarteak atonduta. Aurtengo ekitaldian, hamar izan dira Eibar eta Nabarniz mendiz mendi eta bidezidorrez bidezidor batzen dituen mendi martxara bildu direnak. 06:00retan ipini zuten hitzordua 29 kilometro ingururako ibilaldiari aurre egin zioten partaideek, Nabarnizen. Autobusez egin zuten Eibarrerainoko bidea, eta 07:00retan ekin zioten ibilaldiari.

Martxalariek ez zuten inondik inora ogibide errazik eduki. Izan ere, ibilbide osoan zehar euria eta tenperatura hotzak lagun eduki behar izan zituzten. Trabakuan ingururaino gauez egin zuten oinez, eta Oiz mendiko San Kristobal baseliza inguruan iritsi zitzaien eguneko lehendabiziko geltokia. Atsedenaldi ederraz eta salda beroaz gozatu zuten bertan. Nabarnizko helmugan, herriko udal pilotalekuko dutxetan indarberritu zituzten gorputz nekatuak. Ondoren, talde bazkaritan elkartu ziren, herrian bertan.

Bazkari berezia izan ohi da urtez urte, eta aurtengoa ere ez zen gutxiagorako izan. Hain zuzen ere, parte hartzaileez gain, antolatzaileak eta mendi ibilaldia duela ia mende erdia abian ipinitako “beteranoenak” ere bildu ziren bazkaritarako, antolatzaileen esanetan: “Parte hartzaileen aurpegietan nekea ikus zitekeen, jardunaldi gogorra eta luzea izan zen seinale; dena dela, giro aparta nabarmendu zen”. Martxa beste urte batez egin izanagatik “pozarren” agertu da antolakuntza: “Balorazio positiboa egiten dugu, eta animatu diren guztiei eskerrak ematen dizkiegu, beraiek barik aurtengoa ezin izango baitzen posible izan”.