Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Txakolin Eguna ospatuko dute aurtengo Morgako azokan

Busturialdeko Hitza — 2026-04-24 07:51:59

Domekan [apirilak 26] ospatuko dute Morgako Nekazal eta Artisau Azoka, eta inguruko upategiak gonbidatu dituzte, Txakolin Eguna ospatzeko. Horrela, bertako eta inguruko nekazari eta artisauen lana ezagutzera emateaz gain, upategian lana ere erakutsiko dute oraingo honetan.

Urdaibaiko eta Txorierriko sei upategiren eskutik, txakolin dastaketa egiteko aukera edukiko dute azokagunera bertaratzen diren herritarrek. Morgako Talleri, Muxikako Lapazaran, Arratzuko Urdaibai, Gamiz-Fikako Uriarte, Lezamako Magalarte eta Galkarde upategietako txakolinak probatu ahalko dira. Gainera, udalerriko armarria daukaten kristalezko kopak sortu dituzte domekarako. “Tiketarekin batera egongo dira salgai, eta beste herri batzuetan egiten duten modura, horiek hartu eta dastatu ahalko dira txakolinak. Hori da aurtengo nobedadea”, azaldu du Mari Tere Artetxe Barrena Morgako alkateak.

Azokari dagokionez, hamazortzi ekoizleren produktuak eskainiko ditu. Horiek eta upategietako kideak Lehendakari Agirre Plazan egongo dira, eta artisauak, ostera, frontoian. Hamasei artisau ariko dira euren produktuak erakusten eta saltzen; besteren artean, burdin-lanak zein zurgintzakoak erakutsiko dituzte. Ekoizleen zein artisauen artean, ingurukoak izango dira asko eta asko: “Ingurukoek izaten dute lehentasuna; ingurukoei lekua ematen saiatzen gara”. Horrez gain, talo postua eta txosna ere ez dira faltako: “Herritarrek egiten dituzte taloak, eta zelan egiten dituzten ikustea gustatzen zaio jendeari. Taloen postua arrakasta handikoa izaten da; ilara luzeak sortzen dira”.

Bestalde, umeentzako puzgarriak ere egongo dira, 12:00etatik 14:00etara bitartean, haur-parkean.

Parte hartzen duten guztie eskerrak eman dizkie alkateak, eta herritarren laguntza azpimarratu du: “Herrikoen laguntza izango dugu dena aurrera eroateko, eta eskerrak eman behar dizkiegu horiei eta parte hartzen duten denei, eurak barik ezin izango zelako horrelako jai bat antolatu”.

Euskara ikasketak eta ikastaroak egiteagatik diru laguntzak emango ditu Morgako Udalak

Busturialdeko Hitza — 2026-04-20 15:44:48

2025-2026 ikasturtean euskara ikasketak eta ikastaroak egiteagatik diru laguntzak emango dizkie herritarrei Morgako Udalak: “Udalerrian erroldatuta egonda, 2025-2026 ikasturtean euskara ikasketak edo ikastaroak egin dituztenei zuzendutako diru laguntzak dira”. Eskabideak Morgako Udaleko Erregistro Orokorren aurkeztu beharko dira, eta horiek aurkezteko epea urriaren 15ean amaituko da.

Landatartasun handiena duten udalerrietara 5 milioi euro inbertituko ditu BFAk

Busturialdeko Hitza — 2026-02-11 13:49:17

Bizkaiko Foru Aldundiak Bizkaia Denontzat estrategiaren barruan kokatzen den programa berri bat jarriko du abian lurraldean landatartasun-maila handiena duen udalerrientzat. Besteren artean, Morga, Ereño, Arratzu eta Gautegiz Arteaga izango dira programaren onurak jasoko dituztenak. Hala, aipatutako horietan eta gainontzeko udalerrietan, guztira 5 milioi euroko inbertsioa egingo dela jakinarazi du aldundiak. Jarduketak landa-bideak hobetu eta mantentzearen helburuari eusten dio, bizilekua edozein izanda ere, “lurralde-kohesioa indartzeko eta aukera-berdintasuna bermatzeko” asmoz.

Nabarmendu dute programa horrek “zuzenean erantzuten” diela ahaldun nagusiarekin egindako eskubide-topaketetan udalerriek azaldutako eskaerei: “Topaketa horietan agerian geratu zen berariazko sostegua behar dela landa-azpiegiturak mantentzeak dakarren kostu handiari aurre egiteko, batez ere udalerri txikienetan eta biztanleria-dentsitate apalena dutenetan”.

Estrategiak lurraldea era orekatuan garatzeari eta landa-eremuei arreta berezia eman nahi diela esan dute, eta horretarako, Landa Ingurunearen Garapenaren Legean jasotako landatartasun mapa eta biztanleria-dentsitatea kontutan hartuko ditu laguntza horiek arautzeko dekretuak. Hala nola, aurreratu dute “guztira Bizkaiko 83 udalerriri” ekarriko diela onura programa honek; gehienez 60.000 euroko laguntza ezarriko ditu udalerri bakoitzeko.

Irizpideak.

Dirulaguntzak “irizpide objetiboaren arabera” banatuko direla azpimarratu du Bizkaiko Foru Aldundiak, eta horretan “landatartasun-maila eta biztanleria-dentsitatea” kontuan hartuko direla gaineratu du. Alegia, hurrengo irizpideak eman dituzte aditzera: “Arreta Bereziko Egoeretan dauden udalerriek %75erainoko dirulaguntza jasoko dute. Entitate guztiak landa-izaerakoak dituzten udalerriek eta 150 biztanle/km² baino gutxiagoko dentsitatea dutenen, berriz, %65eko dirulaguntza. Dentsitatea 150-300 biztanle/km²-koa duten udalerriek, ostera, %55eko dirulaguntza jasoko dute; eta azkenik, dentsitatea 300-450 biztanle/km²-koa dutenek %50ekoa”.

Gauzak horrela, dekretu arautzailea aurtengo udaberrirako argitaratzea aurreikusten du aldundiak, eta esan dute 2027ko apirilera arteko epea ezarriko dela laguntza horiek justifikatzeko.

Morgakoenetik Andra Marirako bidea egokitzeko lanak egingo dituzte

Busturialdeko Hitza — 2026-01-09 15:58:05

Morgako Udalak Morgakoenetik Andra Marirako bidea egokitzeko lanak egingo dituela jakinarazi du. Hala nola, esan dute Asfaltados Uribe S.A. enpresari esleitu zaizkiola aipatutako obrak, eta 56.194,95 eurotan egingo direla. Gaineratu dute kopuru hori BEZa kontuan hartu gabeko kopurua dela, bide batez.

Horrez gain, Morgako Udaleko kideek nabarmendu dute obra horiek egiteko Bizkaiko Foru Aldundiko Herri Administrazio eta Erakunde Harremanetarako Sailak 59.742,83 euroko behin-betiko dirulaguntza eman diola Udalari.

Ormaetxearen eta Bilbaoren antzinako erretratuak, lehiaketako onenak

Busturialdeko Hitza — 2025-12-09 12:35:12

Morgako XIII. argazki lehiaketak baditu saridunak: Leyre Ormaetxea eta Jon Bilbao. Antzinako erretratuekin udal egutegia osatzeko erronka zuten morgarrek, eta kutxa zaharretan zein kaxoietan bilatzen ibili eta gero, argazki zahar horietako batzuk aurkeztu dituzte lehiaketara.

Leyre Ormaetxeak lehiaketara aurkeztutako argazkia.Leyre Ormaetxea

Hala, denetan onenak izan dira Ormaetxearena (sari onena jaso du) eta Bilbao-Zorroza familia irudikatzen duen Bilbaorena (bigarren saria jaso du).

Hori horrela, Ormaetxeak txakoli sorta eta herriko taberna batean bi pertsonentzako hamaiketakoa jaso ditu, eta Bilbaok, berriz, herriko taberna batean bi pertsonentzako hamaiketakoa.

Bilbao-Zorroza familia irudikatzen duen Jon Bilbaoren argazkia.Jon Bilbao

Martxan dago Morgako XIII. Argazki Lehiaketa

Busturialdeko Hitza — 2025-10-07 12:59:02

Morgako Udalak XIII. Argazki Lehiaketa martxan dagoela iragarri du. Antzineko erretratuek gaipean jorratuko da, aurten, lehiaketa. Parte hartzaile bakoitzak 5 argazki bidaltzeko aukera izango du, urriaren 20ra arte. Irudi digitalak izan behar dira, eta kultura@morga.eus helbidearen bidez aurkeztu behar direla zehaztu du udalak.

“Bidaltzailearen izen eta abizenak, kontaktua eta argazkiaren kokapena jarri behar da argazkiak aurkezterakoan, ‘Argazki Lehiaketa’ izenburupean”, gaineratu dute udal ordezkariek. Hala nola, jasotako argazkiak Morgako Udalaren artxiboan sartuko direla aurreratu, eta “erakusketak, egutegiak eta webguneak apaintzeko” erabiliko dituztela azaldu dute.

Nabarmendu dute, halaber, edonolako erantzunkizuna argazkiaren egilearen mende egongo dela: “Udalak uste dau argazkietan agertzen diren pertsonek baimena eman dutela horietan agertzeko”. Epaimahai baten esku izango da irabazlea aukeratzearen lana, eta bi sari egongo direla aipatu dute. Alde batetik, txakoli lotea eta herriko taberna batean bi pertsonentzako hamaiketakoa eskuratuko du lehen postua jasotzen duenak; bestetik, bigarren sarituak herriko taberna batean bi pertsonentzako hamaiketakoa lortuko du.

Mahastiaren erritmora dantzan

Busturialdeko Hitza — 2025-09-09 15:59:21

Iragan barikuan [irailak 5], zapatuan [irailak 6] eta domekan [irailak 7], Morgako Talleri Berria txakolindegiak gastronomia, kultura eta natura uztartzea helburu duen Mahasti Artean ekimena hartu zuen. Mahasti Komedia, Mahasti Musika eta Mahasti Gourmet egitasmoak prestatu zituzten Bizkaiko Txakolina-k eta Urremendi Landa Garapen Elkarteak, denetariko herritarrei zuzenduta.

Barikuan, Jon Plazaolak Tu-Tum Platz komedia ikuskizunaz gozatu zuten. Zapatuan, txakolin dastaketa eta zuzeneko musika izan ziren arratsalde eta gaualdiko protagonista nagusiak; lehenago, goizez, yoga saio egin zuten. Arrastian, jendetza bertaratu zen Talleri Berrira, Belako mungiarren eta Mikosis gernika-lumotarren kontzertuez gozatzera. Gainera, eskaintza gastronomikoa ere ez zen falta izan: alde batetik, hurreratu zirenek Bizkaiko lau txakolin mota dastatzeko aukera eduki zuten; bestetik, gazta eskaintza ere eduki zuten aukeran.

Argazkia: Txebi Arriaga.

Mikosis taldeko kideak izan ziren oholtzaratzen lehendabizikoak. Hirukote gernika-lumotarrak kaleratu dituen azken abestiak jendaurrean plazarateko aukera eduki zuen, batik bat, Ez Sentitzeko edota Isiltasunaren Lakua, baita Kontrolik Barik EPko kantuak ere. Jarraian, Belakok hartu zuen lekukoa. Mungia, Bilbo eta Andoaingo kideek osatutako laukoteak bere ibilbide luzearen laginak utzi zituen oholtzan, tartean, Sigo Regando 2023ko azken albumekoak. Domekan, jan-edana gailendu ziren: Urdaibaiko Esentziak-ek txoko gastronomikoa antolatu zuen, eta Txuck Turner musika jartzaileak aldartea musikaz girotu.

Argazkia: Txebi Arriaga.

Busturialdeak bigarren aldiz parte hartu du Mahasti Artean egitasmoan, bigarren aldian ere egin baitzuen. Estreinako aldia Bakion egin zuten, eta ondoren Mahasti Artean Txorierritik, Enkarterritik eta Gorbeialdetik igaro izan da, eskualdera itzuli orduko.

Irailaren 5etik 7ra egingo dute Mahasti Artean jaialdia

Busturialdeko Hitza — 2025-08-26 10:30:21

Mahasti Artean jaialdiaren seigarren aldia ospatuko dute Morgako Talleri Berria upategian, irailaren 5etik 7ra bitartean. Eta, arten ere, zuzeneko musika, mahasti arteko ibilaldiak, aire zabaleko yoga eta txakolina uztartuko duen egitaraua aurkeztu dute jaialdia antolatzen duten Bizkaiko Txakolina jatorrizko deiturak eta Urremendi Landa Garapenerako Elkarteak. Hala, txakolina, gastronomia, kultura eta natura lotuko dituzten esperientzia gastronomiko eta kulturalez gozatu gura dutenek horretarako aukera izango dute sarrerak www.bizkaikotxakolina.eus webgunean eskuratuta.

Mahasti Artean mahats bilketaren hasierarekin eta udaren amaieragaz bat etorriz urtero Bizkaian egiten den kultur jardueren zikloa da; Bakio, Txorierri, Enkarterri, Gorbeialdea eta Urdaibain egin dituzte dagoeneko, eta biosferaren erreserbara bueltatuko dira berriro. Emanaldiak upategietan edo mahastietan egiten dituzte eta paisaiaz gozatzeko aukera ematen die bertaratzen direnei. Hala, aurten, Morgako Talleri Berria izango da epizentroa. “Duela mende erdi baino gehiago leku hori hartu zuen teila fabrika zaharra omentzen duen espazioak kontzertuak, komedia, yoga eta esperientzia gastronomikoak hartuko ditu agertoki ezinhobean, paisaia bikainenez inguratuta”, azaldu dute antolatzaileek.

Izan ere, Jon Plazaola aktore eta umorista arduratuko da jaialdiari hasiera emateaz, Tu-Tum, Platz! bakarrizketa saioa eskainita. Eta, zapatu goizean, yoga saio bat izango da mahastiari begira, gero, Urdaibaiko produktuen dastaketaz gozatzeko aukera eskainiz. Gauean, berriz, Mikosis eta Belako taldeek aire zabalean joko dute, txakolin eta Idiazabal gazta dastatzearekin batera. Domekaz agurtuko dute jaialdia, eta horretarako esperientzia gastronomikoa prestatuko dute mahastian: DJ Txuck Turnerren eskutik binilo saioa eta Urdaibaiko Esentziak produktuez osaturiko menu gastronomikoa jarriko dute aukeran.

Antolatzaileek jakinarazi dutenez, jaialdiko egun bakoitzerako, Bilbotik eta Gernikatik irteerak izango dituen joan-etorriko autobus zerbitzua jarriko dute bertaratzen direnen eskura, eta hori erosketa egiten den unean erreserbatu ahalko da.

Egitaraua
Irailak 5, barikua.
19:00-21:30. Tu-Tum, Platz! komedia eta txakolin saioa Jon Plazaola aktore eta umoristarekin. Bakarrizketa berri batekin itzuliko da eszenatokietara Plazaola, eta bertaratzen direnek Bizkaiko lau txakolinen eta Idiazabal gaztaren dastaketaz gozatuko dute.

Irailak 6, zapatua.
11:30-14:00. Mahasti Yoga. Yoga jardunbidea Nerea Izurietarekin, paisaia eta mahasti bikainari begira. Saioaren ondoren, Bizkaiko lau txakolinen dastaketa eskainiko da, eskualdeko produktuekin egindako Urdaibaiko Esentziak lau pintxorekin uztartuta.
19:00-22:00. Mahasti Musika. Musika, txakolina eta mahasti magikoa ilunabarrean. Mikosis eta Belako taldeen kontzertuak eta Bizkaiko lau txakolinen eta Idiazabal gaztaren dastaketa.

Irailak 7, domeka.
12:30-14:30. Mahasti Gourmet. Mahastia eta upategia bisitatu ondoren, lau txakolin dastatuko dira Urdaibaiko Esentziak lau pintxorekin, Urdaibaiko produktuez eta gastronomiaz gozatzeko. Guztia DJ Txuck Turnerren musika saioarekin harmonizatuta.

Morgako udaletxe berria inauguratuko dute

Busturialdeko Hitza — 2025-08-07 15:16:01

Udalerriko armarria eta bandera bere lekuan jartzearen faltan, Morgako Udalak amaitutzat eman ditu udaletxea birgaitzeko lanak. Orain, berrikuntzak herritarrei erakusteko inaugurazio ekitaldia deitu dute, abuztuaren 15ean [barikua], 13:30ean.Azaldu dutenez, udaletxeko ateak zabalduko dituzte herritarrekin batera “instalazioak ikusi eta gosegarri batez gozatzeko”.

Birgaitze lanetan, udaletxeko kanpoaldea erabat eraberritzeaz gain, udal bulegoak ere lekualdatu dituzte. Hala, beheko solairua herritarren “arretara” bideratuko dute eta lehenengo pisuko gelak, berriz, “erabilera anitzetarako” erabiliko dituzte.

Proiektua aurrera eramateko 552.626,15 euroko aurrekontua izan du udalak. Bizkaiko Foru Aldunditik —Herriak Egiten ezohiko funtsa— 100.000 euroko diru-laguntza jaso dute; Garraio, Mugikortasun eta Hiri Agenda Ministeriotik 268.390,47 euroko laguntza jaso dute, eta, Euskao Jaularitzako Ekonomia, Garapen, Iraunkortasun eta Ingurumen Sailetik —Leader programa—, berriz, 75.035,50 euro.

Euriak ere ez du jai giroa itzaliko

Busturialdeko Hitza — 2025-07-25 16:58:40

Eguzkitako krema eta betaurrekoak esku batean eta zira eta euritakoa, bestean. Eguraldia edozelakoa izanik ere, Santiago eta Santa Ana jaiak ospatzeko prest daude eskualdeko herritarrak, eta hala erakutsi dute gaur goizean goizetik [uztailak 25], Kortezubin, Morgan, Busturian eta Nabarnizen.

Kortezubin, Arratzuko abesbatzak lagundutako mezagaz hasi dute eguna, eta segituan iritsi da herriko ume eta gazteek osatutako euskal dantza taldearen emanaldia ere. Dantzaldi aurretik euri apur bat egin badu ere, eguraldiak dantzaldia errespetatu du eta gogotik eskertu dute plazan batu diren kortezubitarrek. Izan ere, herritarrek txalo artean hartu dituzte dantzari txiki eta ez horren txikiak, eta trikitixaren erritmora dantzatu dituzten hamaika euskal dantzez gozatu dute, besteak beste, Agurraz, Txulalaiz, San Petrikez, Sorgin dantzaz, Ibarzabalgo arku dantzaz, Korteseko zinta dantzaz eta Zazpi jauziz.

Dantza emanaldiaren ostean frontoia izan dute topaleku herritarrek, ustez Emakumeen Elite mailako Udako eskuz binakako Master Laboral Kutxa txapelketaz gozatzeko. Pilotari baten huts egiteak baina, neurketa moldatzera behartu ditu antolatzaileak eta bikote izatekotan ziren Olatz Arrizabalaga gernika-lumotarra eta Amaia Zarrabeitia kortezubitarra nor baino nor gehiago aritu dira. Zarrabeitiak ezin izan du herrikideen aurrean garaipena lortu: Arrizabalaga 22 eta 11 nagusitu da.

Eguerdian atseden hartzeko aprobetxatu, eta arratsaldean berriro ekingo diote festari kortezubitarrek. 18:00etatik aurrera umeentzako jolasak izango dituzte aukeran, eta iluntzean, Luhartz erromeriak hartuko du Santiago eguna girotzearen ardura. Hala ere, jai egitarauak asteburu guztian zehar jarraituko baitu, denetariko eskaintzagaz.

Marrazki bizidunez beteta.
Morgan, krema eta aterkiaz gain, mozorroak ere jantzi dituzte goizetik. Minionak, Mario Karteko pertsonaiak, Harriketarrak, superheroiak… denek bat egin dute gaur plazan. Izan ere, marrazki bizidunak gaia izan da aurten jaietako lehen egunerako aukeratu duten gaia. Hiru eguneko egitarauari ekiteko gogoz, sukaki txapelketan batu dira herritarrak, bakoitzak bere erara, gero lagunartean dastatzeko gisatua kozinatzeko duten abilezia erakutsi nahian.

Eguraldiak baten bati gisatua prestatzeko prozesua zerbait baldintzatu badio ere, guztira hamalau izan dira aurten aurkeztu dituzten kazuelak, eta iaz “pare bat gehiago” izan baziren ere “pozik” daude bertaratu den pertsona kopuruagaz. Izan ere, 199 lagunek eman dute izena herri bazkarirako.

Bazkaldondoa girotzeko bingoan batuko dira 17:30ean, eta horren ostean ezagutuko dute norena izan den aurtengo sukalkirik eta onena. Horrez gain, mozorro onenek ere saria jasoko dute: mozorro onenak 100 euro jasoko ditu, eta talde mozorro onenak, beste 100 euro. Eguneko lehiaketetako emaitzak argituta, jan-edanean batuko dira berriro ere, 20:00etatik aurrera taloak izango baituzte aukean.

Etenik barik.
Goizaldera arte Zibilo Records eta Zirkinik Bez erromeriagaz dantzan aritu ostean, herriko txistulariekin kalejiran hasi dute eguna busturiarrek, Axpen. Irrintzi Alai Dantza Taldearen emanaldiaz gozatu aurretik, ohi legez, udal gobernu taldea Andra Mari elizara bertaratu da. Euriak dantzaldia elizpera eramatea eragin du, baina ez du festa eten. Aterkia hartu eta Etxebarria trikitilariekin tabernaz taberna aritu dira busturiarrak.

Hurrengo hitzordua 18:00etarako dute jarrita, frontoian, esku pilota partiduak elkarrekin ikusteko. Behin lekua hartuta, iluntzera arte bertan jarraituko dute, Trapu Zaharra taldeak Eutsi Ramon! antzerkia eskainiko baitu. Estampas de Mexico mariatxi taldeak eta DJ Jaikide izango dira Santiago eguneko gauari soinua jarriko diotenak.

Nabarniztarrak, berriz, Lekerika auzoa izan dute aurten ere topagune Santiago egunean. Herritarrek txantxiku txapelketan punteria eta trebetasuna erakutsi ostean, paella txapelketan elkartu dira. Bazkalondoa girotu eta festa gogoari eusteko, arratsaldean zehar AEIOU Busturialdea jolasak eskainitako ekintzekin gozatzen ari dira. Iluntzean berriz, Hiru Bitan erromeriagaz abestu eta dantzatzea izango dute erronka.

Datozen egunetako egitarauak, herriz herri:

BUSTURIA (AXPE)

Bihar, Santa Ana eguna

11:00. Kalejira, herriko txistulariekin.

11:30. Meza nagusia, Arronategi egoitzan.

Ondoren. Irrintzi Alai Dantza Taldea, Arronategi bisitetxean.

12:00. Sukalki Txapelketarako izen-ematea.

13:30. Kantu Kantari.

14:30. Sukalkien aurkezpena eta sari banaketa.

18:00. Bizkaiko Lasto Altxatie Txapelketa, eta Busturialdeko harri-jasotzaileak.

20:00. Urdaibaiko Organoen kontzertua, Axpeko elizan.

20:30. Animazioa, Kitturekin.

22:30. Tributo a Fito y Fitipaldis eta DJ Mr. Beat.

Etzi.

12:00. Umeen zesta eskolakoen partiduak.

17:00. Umeentzako parkea, Ispiluetan.

19:00. Jaia amaitzeko, txokolatea.

KORTEZUBI

Bihar, Santa Ana eguna.

11:00. Meza santua.

10:30. Jardunaldi parte-hartzailea Sustabiz Fundazioaren eskutik; esku pilota partiduak, herri kirolak…

14:00. Umeen herri bazkaria.

15:00. Nagusien herri bazkaria.

16:30. Umeen jolasak.

Bazkal ostean. Eingo taldea.

20:00. Gauargi erromeria.

Etzi.

10:30. Meza santua.

12:00. Zaldi probak: Azkoititik, Txilibiter eta Urduliztik, Olea.

MORGA

Bihar, Santa Ana eguna.

12:00. Meza Meakaurren eta pintxoak.

Jarraian. Trikitilariak.

14:00. Tortilla Txapelketa.

20:00. Poteo musikatua.

22:00. Kontzertzuak: Suger, Toc eta Altxaporru erromeria.

Etzi.

17:00. Ume jolasak; puzgarriak, tailerrak eta bits jaia.

19:00. Diskodantza.

20:00. Txokolatada.

Ekintzaz josita datoz Santiago eta Santa Ana jaiak

Busturialdeko Hitza — 2025-07-23 16:32:19

Karmen jaiak atzean utzita, Madalenek hartu dute jaien erreleboa Lea-Artibai eta Busturialdeko zeinbat herritan, baina baita Santiago eta Santa Ana jaiek ere, beste zenbaitetan. Busturialdean, Busturiko Axpe auzoan, Kortezubin, Morgan eta Nabarnizko Lekerika auzoan ospatuko dituzte jaiok.

Axpe auzokoek urtez urte irrikaz bizi dituzte Santiago eta Santa Ana jaiak, eta aurten ere ez da gutxiago izango. Lau egunez, askotariko ekintzen eszenatoki bihurtuko da auzoa, bihartik aurrera. Kirola, musika, jan-edana eta giro ona nagusituko dira, beraz. Pala txapelketak, kalejira desberdinek, sukalki txapelketak eta hainbat kontzertuk hartuko dituzte Axpe auzoko bazterrak.

Esaterako, sukalkia ez da faltako oraingo honetan ere Axpen zein Morgan, urtez urteko tradizioari eutsiz. Morgan Santiago egunez lehiatuko dute Sukalki Txapelketa. Horretaz aparte, mozorro eguna ere espero dute Morgako herritarrek. Aurreratu dutenez, aurten, mozorroen eguneko gaia marrazki bizidunak izango da. Taloak, tortilla txapelketa eta beste hainbat izango dira herritarren gozamenerako menuan, nola ez, musika eta jai giroa lehenetsiz.

Kortezubin ere hitzordua mantenduko dute, beste behin. Nabarnizko Lekerika auzoa, ostera, paella txapelketaren eta txantxiku txapelketaren testigu izango da, besteren artean.

Egitarauak, herriz herri:

BUSTURIA (AXPE)

Bihar, uztailak 24

18:00. Pala Txapelketa, Itxasalde kirol taldeagaz.

20:00. Karro poteoa, Otsozulo taldeak antolatuta.

22:30. Zilibito records eta Zirkinik bez.

Etzi, Santiago eguna

11:00. Kalejira, herriko txistulariekin.

12:00. Meza nagusia.

Ondoren. Irrintzi Alai Dantza Taldea.

Gero. Trikitixa tabernaz taberna, Etxebarria Trikitilariekin.

Gero. Esku-pilota partiduak.

Gero. Antzerkia: Trapu zaharraren Eutsi Ramon.

Azkenik. Mariachi Internacional: Estampas de Mexico.

Ondoren. DJ Jaikide.

Uztailak 26, Santa Ana eguna

11:00. Kalejira, herriko txistulariekin.

11:30. Meza nagusia, Arronategi egoitzan.

Ondoren. Irrintzi Alai Dantza Taldea, Arronategi bisitetxean.

12:00. Sukalki Txapelketarako izen-ematea.

13:30. Kantu Kantari.

14:30. Sukalkien aurkezpena eta sari banaketa.

18:00. Bizkaiko Lasto Altxatie Txapelketa, eta Busturialdeko harri-jasotzaileak.

20:00. Urdaibaiko Organoen kontzertua, Axpeko elizan.

20:30. Animazioa, Kitturekin.

22:30. Tributo a Fito y Fitipaldis eta DJ Mr. Beat.

Uztailak 27, domeka

12:00. Umeen zesta eskolakoen partiduak.

17:00. Umeentzako parkea, Ispiluetan.

19:00. Jaia amaitzeko, txokolatea.

KORTEZUBI

Bihar, uztailak 24

18:00. Txupinazoa.

18:00. Tortilla txapelketa.

19:30. Tortillaren aurkezpena eta sari banaketa.

20:00. Urdaibaiko Organoak zikloaren barruko kontzertua, Santiago Apostolua elizan.

21:00. Joseina Etxeberria DJ-a.

Etzi, Santiago eguna

10:30. Meza santua, Arratzuko koruarekin.

12:00. Kortezubiko ume eta gazteen Euskal Dantza taldeak.

13:00. Udako eskuz binakako Master Laboral Kutxa txapelketa. Emakumeen Elite maila: Uriarte-Gamibide eta Arrizabalaga-Zarrabeitia.

18:00. Umeen jolasak.

21:00. Luhartz erromeria.

Uztailak 26, Santa Ana eguna

11:00. Meza santua.

10:30. Jardunaldi parte-hartzailea Sustabiz Fundazioaren eskutik; esku pilota partiduak, herri kirolak…

14:00. Umeen herri bazkaria.

15:00. Nagusien herri bazkaria.

16:30. Umeen jolasak.

Bazkal ostean. Eingo taldea.

20:00. Gauargi erromeria.

Uztailak 27, domeka

10:30. Meza santua.

12:00. Zaldi probak: Azkoititik, Txilibiter eta Urduliztik, Olea.

MORGA

Etzi, Santiago eguna

12:00. Meza nagusia, Meakaurren.

Jarraian. Trikitilariak.

14:00. Sukalki Txapelketa.

Gero. Bazkaria.

17:30. Bingoa.

Ondoren. Sukalki eta mozorroen sari banaketa.

Mozorro onena: 100 euro.

Talde mozorro onena: 100 euro.

Gaia: Marrazki bizidunak.

20:00. Taloak.

Uztailak 26, Santa Ana eguna

12:00. Meza Meakaurren eta pintxoak.

Jarraian. Trikitilariak.

14:00. Tortilla Txapelketa.

20:00. Poteo musikatua.

22:00. Kontzertzuak: Suger, Toc eta Altxaporru erromeria.

Uztailak 27, domeka

17:00. Ume jolasak; puzgarriak, tailerrak eta bits jaia.

19:00. Diskodantza.

20:00. Txokolatada.

NABARNIZ (LEKERIKA AUZOA)

Etzi, Santiago eguna

12:00. Meza.

Ostean. Txantxiku Txapelketa.

14:30. Paella Txapelketa.

15:00-18:00. AEIOU Busturialdearen eskutik jolasak, hiru orduz.

18:00. Jokoak.

19:00. Hiru Bitan erromeria.

Arrolape Mendi Klubekoak podiumaren bigarren postura igo dira Morgan

Busturialdeko Hitza — 2025-03-31 14:06:59

Bizkaia Kopa Trail txapelketaren bigarren proba hartu zuen atzo (martxoak 30) Morgak: mendi lasterketa luze eta laburra, kilometroko martxa luze eta laburra eta txakur kros proba izan zituzten aukeran bertaratu zirenek. Hala, taldekako lehian, Arrolape Mendi Klubak bigarren postua eskuratu zuen, Trail Team Bizkaiaren atzetik eta Jiorings Running Teamen aurretik.

2o kilometroko mendi lasterketa luzekoak izan ziren lehiatzen lehenak, eta denetan azkarrena izan zen Arnaitz Larrazabal, ordubete, 42 minuto eta lau segundoko markagaz. Bere ostean, 34 segundo gehiago behar izanda, Markel Peña helmugaratu zen (1.42.38), eta podiuma Iñigo Oruetak osatu zuen (1.43.17). Arrolapeko Aitor Olivares, aldiz, bosgarrena izan zen (1.44.15), Raul Blacoren atzetik (1.43.32).

Emakumezkoetan, berriz, Maria Delgadok ezarri zuen bere markarik onena, erlojua bi ordu, zazpi minuto eta 21 segundotan geldituta. Bigarren sailkatu zen Eva Gonzalezek irabazleak baino ia zortzi minutu gehiago behar izan zituen helmugaratzeko (2.15.29), eta, Cinthya Moreira izan zen hirugarrena helmugaratzen (2.20.09).

Horiek zein martxa luzean parte hartu zutenek 750 metro positiboko desnibel metatuari egin zioten aurre, bidezidor eta mendi bide gorabeheratsuetatik igarota. Eskerikarantz joan ziren lehenengo, eta gero Kurtziagagana eta Bizkargi mendietara, eta azken kilometroak Aretxabalaganera jaitsita eta Okoriko auzoan barrena igarota bete zituzten.

Mendi korrikalariak Morgako helmugara ailegatzen.Arrolape Mendi Kluba

Martxa eta lasterketa laburreko zein txakur kroseko mendizaleek desnibel apalagoari egin zioten aurre: 10 kilometrotan 270 metro inguru pilatu zituzten.

Eta, gizonezkoetan, 42 minuto eta 35 segundotan amaitu zuen proba lehenengo sailkatu zen Aritz Artetxek, eta bere atzetik, 11 segundora ailegatu zen Aitor Artaraz. Alvaro Rivas izan zen hirugarrena, 43 minuto eta sei segundoko markagaz.

Emakumezkotan ere, estu egon ziren lehen hiru postuak. Izan ere, Garazi Arranz irabazleak 54 minuto eta 40 segundotan amaitu zuen lasterketa, eta berak baino 59 segundo gehiago behar izan zituen Lorena Campomar bigarrenak. Maria Prieto izan zen hirugarrena, 56 minuto eta 28ko markagaz.

Txakur kros proban ere hamar kilometroko bidea bete zuten parte hartzaileek, eta denetan onena izan zen Imanol Marmol: 44 minuto eta 12 segundotan amaitu zuen lana. Bederatzi segundora, Asier Castrillo (44.21) helmugaratu zen, eta bigarrenetik 21 segundora, aldiz, Jorge Zapata (44.42).

Emakumezkoetan, 54 minuto eta 46 segundoko denboragaz, Maite Sanchez ailegatu zen lehenengo postuan, eta Ester Rubio bigarrenean; 55 minuto eta 54 segundoko denbora behar izan zuen. Podiuma, berriz, Sonia Brenak osatu zuen, 56 minuto eta segundo bakarreko denboragaz.

Morgak BKT txapelketako bigarren proba hartuko du

Busturialdeko Hitza — 2025-03-27 12:45:28

Otsailaren 1ean Trapagarango Zugaztietan txapelketari hasiera aparta eman ondoren, Bizkaia Kopa Trail bigarren hitzordura iritsi da. Datorren domekan [martxoak 30], Morgan lehiatuko dute lehiaketaren bigarren etapa, goizetik eguerdira arteko egitarauagaz. Kirola eta aisialdia sustatzen dituen txapelketa da BKT, “maila guztietako” parte hartzaileei zuzendutakoa. Hain zuzen ere, mendi lasterketez gain, mendi martxak eta txakur kros proba ere barnebiltzen ditu. Domekan, diziplina horiek denak egongo dira: lasterketa luze eta laburra, martxa luze eta laburra eta txakur kros lasterketa.

09:00retan ipini dute hitzordua, lehendabiziko lasterketari, 20 kilometroko ibilbidea duenari, hasiera emateko. Korrikalariak abiatu bezain pronto, bost minutu beranduago, martxa luzeko ibiltariek ekingo diote bideari. Jarraian, txakur kros probaren txanda iritsiko da: txakurrak eta gidariak 09:45ean hasiko dira lasterka. Ibilbide laburra, 10 kilometrokoa, hautatu duten partaideak abian ipiniko dira, azkenik: lasterkariak, 10:00etan; martxalariak, 10:05ean.

Bestalde, antolakuntzak ibilbide luzeko lasterkarientzako mozketa orduak egongo direla aurreratu du. Hiru puntu eduki beharko dituzte kontuan. 11:30ak arteko tartea iango dute 10,5 kilometraje puntura iristeko; 12:30ak orduko egon beharko dira 15. kilometroan; helmugako kontrol itxiera, ostera, 14:00etan izango da.

Domekan, debekatuta egongo da Athletic kalean aparkatzea

Dortsalak jasotzeko, proben irteera orduak baino lehen herriko pilotalekuan ipiniko duten gunera bertaratu beharko dira parte hartzaileak; “sasoiz bertaratzeko” eskatu dute antolatzaileek. Frontoian egongo dira, hain zuzen ere, dutxak. Irteera eta helmuga eremuan mahuken espazioa eta hornidura postua jarriko dituzte. Era berean, iragarri dute “guztiz debekatuta” egongo dela domekan Athletic kalean aparkatzea, probak hasieran eta amaieran inguru horretatik pasatuko baitira.

Ibilbideei buruzkoak.
Ibilbide luzeak 750 metro positiboko desnibel metatua edukiko du. Bidezidor eta mendi bide gorabeheratsuak uztartuko dituzte bai korrikalariek, bai ibiltariek. Lehen zatiaren koskarik esanguratsuena bosgarren kilometroan topatuko duten gaina izango da, Eskerika auzo inguruan. Edozelan ere, kilometroek aurrera egin ahala, 557 metroko garaieraraino igo beharko dira: Kurtziagagana eta Bizkargi mendietara. Azken hori izango da lasterkarientzako azken azterketa. Azken kilometroak Aretxabalaganera jaitsiz eta Okoriko auzoan barrena egingo dituzte.

Martxa eta lasterketa laburreko nahiz txakur kros lasterketaaren ibilbideak desnibel metatu apalagagoa edukiko du: 10 kilometrotan 270 metro inguru pilatuko dituzte. Aretxabalagane izango da harrapatuko duten punturik altuena. Proba denetan jatekoa zein edatekoa edukiko dute mendizaleek, hainbat anoa postutan banatuta.

Morgakoa lehiaketaren bigarren etapa izango da, eta beste lau geratuko zaizkio, urtean zehar

Tragaparanez eta Morgaz gain, ondorengo udalerriek osatuko dute 2025eko txapelketa egutegia: Loiuk, apirilaren 28an; Arrietak, irailaren 21ean; Laukizek, azaroaren 2an; eta, azkenik, Ispasterrek, abenduaren 28an.

Santiagoen giro bikainean murgilduta daude

Busturialdeko Hitza — 2024-07-25 16:35:17

Euria ez da aitzakia izan Santiago egunaz gozatzeko. Jai egun goibelari irribarre beroa jarri diote Kortezubin, Morgan, Busturiko Axpe auzoan eta Nabarnizko Lekerikan. Atzo hasi ziren ospakizunak zeinbat gunetan, baina gaur dute egun handia. Hala ere, jaiak ez du etenik izango, bihar, Santa Ana eguna ere, hainbat eta hainbat lekutan ospatuko dutelako.

ARGAZKI GALERIA

Morgako eta Kortezubiko jai nagusiak dira santiagoak, eta irudimenez eta sukalki usainez jantzi dute Morga, beste urte batez. Musika izan da aurtengo gaia, eta herria apaintzen parekorik ez dutela erakutsi dute berriro ere: pop, rock edota punk musikarien mozorroak ikusi ahal izan dira han-hemen. Mozorroak ez ezik, Txorongoak kuadrillak bere karrozagaz eta zuzeneko musikagaz girotu du herria.

Musikariek ere kozinatzen dakitela erakutsi dute: Sukalki Txapelketako kazolak prestatzen aritu dira goiz osoan zehar. Hori eginda, 18 sukalki aurkeztu dituzte. Arratsaldean, talo jana izango dute aukeran. Musikarien gaiari segika, bihar, dezibelen txanda ailegatuko da Morgara: Matxinada, Hofe X 4:40 eta Nahia Novo+DJ Denz taularatuko dira. Domekarako, berriz, umeei zuzendutako egitaraua prestatu du udalak.

Kortezubin, asteburuan Kortezubiko Mendi Martxagaz oinak berotu eta atzo Urdaibaiko Organoen kontzertuan belarriak prest jarri ostean, gaur, Kortezubiko umeen euskal dantza taldearen emanaldiagaz gozatzeko aukera izan dute; jende pila bat elkartu da plazan, umeen dantza saioaz gozatzeko helburuz. Horrez gain, jan-edanagaz eta giro ederrean, kirolariak pilotalekura joan dira, baita ikusleak ere: alebin zein nagusi mailako esku pilota partiduak jokatu dituzte.

Nabarnizko Lekerikako Santiago ermita ingurua ere jendez bete da gaur. Goizetik bildu dira bertan mendi korrikalariak, izan ere, zazpigarren Iluntzar Mendi Lasterketa lehiatu dute. 32 parte hartzaile atera dira irteera lerrotik, eta zazpi kilometrotan 400 metroko desnibelari aurre eginda, Julen Aranguena helmugaratu da lehenengo; 30 minutu eta 26 segundo behar izan ditu ibilbidea osatzeko. Bere atzetik helmugaratu da Paul Hormatxea, irabazlearengatik bost segundotara, eta hirugarrena izan da iazko irabazlea: Paul Goitisolo; 31 minutu eta 23 segundo behar izan ditu. Nesketan, aldiz, Alluitz de Bilbao izan da azkarrena 41 minutu eta 50 segundoko denboragaz. Eta, bigarren postuan berdindu dute Maider Bengoetxeak eta Ziortza Barruetabeñak, eskutik helduta ailegatu baitira helmugako marrara; euren denbora 48 minutu eta 43 segundokoa izan da.

ARGAZKIAK

Iluntzarrera igo ez direnetako batzuk paella lehiaketan parte hartu dute; izan ere, 9 paella aurkeztu dituzte lehiaketara, eta onenea izan da Iburri Taldearena.

Santiago Eguna ohituraz betetakoa izaten da Busturian. Txistularien kalejiragaz abiarazi dute eguna, eta meza ostean, Irrintzi Alai Dantza Taldearen ikuskizunagaz gozatzeko aukera izan dute beste urte batez, Arrotegi aurrean. Arratsaldean ere, ohiturari eutsiko diote, eta esku pilota partiduen ostean, karrozen desfilea egingo dute. Iazko legez, aurten ere antzerkia izango dute aukeran: Pink Impacten El Gran Rufus antzezlanaz gozatzeko aukera izango dute.

Jaiak ez du etenik.
Bihar, Santa Ana egunean, umeentzako parkeaz gozatzeko aukera edukiko dute gaztetxoenek. Horrez gain, Urdaibaiko Organoak zikloaren emanaldia hartuko du Andra Maria elizak. Txokolate janaren ondoren, Xaiborren Disko Festagaz dantza egiteko aldartean elkartuko dira busturiarrak. Zapatuan iritsiko da kazolak atera, eta sukalkirik onena egiteko unea. Txistu doinudun dianaren ostean, sukalki txapelketak hartuko du protagonismoa. 18:00etan Bizkaiko Lasto Botatze Txapelketa lehiatuko dute, eta gaua Trikizio erromeriaren eta DJ Ismederren emanaldiek biribilduko dute.

Kortezubin ere, biharko zein astebururako eskaintza zabala dute herritarrek: hamaiketakoa, tortilla txapelketa zein DJ Joseinaz gozatuko dute bihar, eta Sustabiz Fundazioaren herri kirol parte hartzaileek zein herri bazkariak beteko du herria zapatuan.

Egiteko, ikusteko, dastatzeko eta gozatzeko jaiak

Busturialdeko Hitza — 2024-07-19 11:28:18

Termometroen tenperaturek gora egiten duten heinean, Busturialdeko hainbat herritan ospakizunerako grinaren berotasunak ere gora egin ohi du, uztaila bere amaierara heltzear dagoela. Santiago eta Santa Ana jaiak herriko jai nagusiak dira Kortezubin, Busturian eta Morgan; hori bai, Nabarnizko Lekerika auzoan ere letra gorriz gordetzen dituzte jaiok herritarrek beraien egutegietan.

Busturiko Axpe auzoan herriko txistularien doinuekin abiatuko dituzte Santiago eta Santa Ana jaiak. Meza ostean, Irrintzi Alai Dantza Taldeko kideek girotuko dute jaietako lehen jardunaldia. Pilotalekuan goi-mailako esku pitota partiduez gozatu ondoren, karrozen desfilearen txanda iritsiko da; desfile horretarako izena emateko azken eguna gaur [uztailak 19] izango da, eta herritarrek liburutegia egin beharko dute. Gaualdiak zapore latinoa edukiko du, D’Capricho taldeak bere kubatar musika taularatuko baitu, Izpiluetan.

Busturiko sukalki txapelketarako eta baztarirako mahaia eskatu gura dutenek bihar arteko epea dute

Santa Ana egunean, umeentzako parkeaz gozatzeko aukera edukiko dute gaztetxoenek. Horrez gain, Urdaibaiko Organoak zikloaren emanaldia hartuko du Andra Maria elizak. Txokolate janaren ondoren, Xaiborren Disko Festagaz dantza egiteko aldartean elkartuko dira busturiarrak. Hilaren 27an iritsiko da kazolak atera, eta sukalkirik onena egiteko unea. Txistu doinudun dianak eguna iratzarri ostean, 12:00etan zabalduko dute sukalki txapelketarako izen ematea. Udaletik aurreratu dutenez, sukalki txapelketarako eta bazkarirako mahaia eskatu gura dutenek bihar [uztailak 20] edukiko dute horretarako azkenengo aukera eta, behin bukatuta, mahaia dagokion tokira bueltatu beharko dute. 18:00etan Bizkaiko Lasto Botatze Txapelketa lehiatuko dute, eta gaua Trikizio erromeriaren eta DJ Ismederren emanaldiek biribilduko dute.

Musika izango da Morgako jaietan mozorrotzeko aurtengo gaia

Morgarrek mozorrotuta eta tripazorriak uxatuta ekingo diete jaiei. Santiago egunak esangura berezia du beraientzat: sukalki eta mozorro eguna da. Aurtengo gaia musika izango da. Epizentro bi edukiko ditu jaiak: batetik, Andra-Mari; bestetik, Meakaur. Bigarren horretan hasiko dute jaia, trikiti soinuz. Ondoren lekualdatuko dira Andra-Marira, eta bertan erabakiko dute sukalki onena zeinena den. Mozorrorik onenek ere saria izango dute: bakarkakoa eta taldekakoa. Uztailaren 26an, dezibelen txanda ailegatuko da: Matxinada, Hofe X 4:40 eta Nahia Novo+DJ Denz taularatuko dira.

27. mendi martxagaz ipiniko dituzte abian jaiak, bihar, Kortezubin

Kortezubitarrek jaiari gorputza doituz ekingo diete, bihar [uztailak 20]: 27. mendi martxagaz. Eguaztenean, Urdaibaiko Organoak zikloa herrira iritsiko da. Santiago eta Santa Ana egunetan, denetariko jarduerez gozatuko dute: hilaren 25ean, herriko umeen dantza saioak eta esku pilota partiduek; 26an, tortilla txapelketa eta Joseina Etxebarria DJak. Hurrengo egunean, Sustabiz Fundazioak herri kirolen jardunaldi parte hartzailea gidatuko du.

Kirola, gastronomia eta musika izango dira nagusi Nabarnizko Lekerikan

Iluntzarrera begira.
Nabarnizko Lekerika auzoan arineketan hasiko dituzte santiagoak: VII. Iluntzar mendi lasterketan. Paella eder batekin indarrak berreskuratzeko aitzakia ere izango dira jaiak, paella txapelketa lehiatu, eta eguerdian jai giroan jango baitute.

37an Bizkargi gaineko Espainiako bandera ikurrinagaitik aldatu zuten gudariak omenduko dituzte

Busturialdeko Hitza — 2024-05-01 14:00:05

Busturialdeak urte guztian zehar memoria ariketa ugari egiten baditu ere, garai hauetan eskualdeko protagonismoa bereganatzen dute horiek. Gernikako bonbardaketa atzean utzita, Bizkargiko Eguna ospatzeko txanda iritsi da. Egun horretan oroitzen dira Larrabetzuko, Muxikako, Morgako eta Zornotzako lurretan dagoen mendian 36ko gerran bertan hildako gudariak.

Bizkargiko batailan, euskal gudariek Bizkargi gaina berreskuratu zuten. Tartean izan ziren Amaiur, Larrañaga, Amuategi edota Euzko Indarra batailoietako gudariak, zeintzuk han zegoen Espainiako bandera kendu, eta ikurrina kokatu zuten. Bataila harek utzi zituen hildakoak zein bertan borrokatu zuten gudariak omentzen dira, urtez urte.

Ernaik, ohikoa duen bezala, zapaturako(maiatzak 4) antolatu ditu ekintzak. 10:00etan hasiko dute Bizkargira igoera, eta eskualdeko Ernaikideek 09:30ean izango dute hitzordua Gernika-Lumoko tren geltokian. Busturialdekoekin batera egingo dute hitzordua, 10:00etan, Larrabetzukoek eta Zornotzakoek, eta igoera herrika egingo dutela azaldu dute. Ostean, Larrabetzura jaitsiko dira denak batera, eta bertan egun osoko egitarauaz gozatuko dute, plazan.

12:00etan, Ainhoa Egiluzek, Maialen Arteagak eta Imanol Ziluagak eskainitako mahainguruan batuko dira. Ondoren, 13:30ean ekitaldia egingo dute, eta 14:30ean bakoitzak bere etxetik eramandako bazkaria bazkalduko dute. Ekitaldiak alde batera utzita, 16:00etan trikipoteoari ekingo diote. Ospakizunetako tradizioei jarraituz, musikak ere bere tartea izango du. 18:00etan, Larru eta Lagunak izango dira Aretxabalan, eta 20:00etatik aurrera Dj Bizkargik girotuko du HoriBai gaztetxea.

Domekarako egitaraua.
Ernaik ez bezala, Bizkargi Gogoratuz Elkarteak domekaz antolatzen ditu ekimenak. 11:00etan hasiko dira Bizkargi gaina animatzen, eta Soinu Txikie taldea arduratuko da horretaz. 12:30ean, omenaldietarako tartea iritsiko da: 36ko gerrako gudariak omenduko dituzte. Euskal Prospekzio ikerketa taldea izango da bertan, eta Aranzadiren lanen azalpenak eskainiko dira. Gainera, Larrabetzuko Bizkargi dantza taldeak parte hartuko du ekitaldian, eta ez dira adarra, txalaparta eta alboka faltako. Horrekin batera, Etxanoko nagusiaren ongietorria eta txuzoa sartzea egingo dira.

Egun horretako tradizioetako bat da bertsolarien presentzia. Aurton, Onintza Enbeita, Etxahun Lekue eta Txiplas izango dira, eta 13:00 Kittu Taldearen erromeria saioaz gozatuko dute bertaratutakoek. Antolatzaileek gogoratu dutenez, txosna “ederra” egongo da Bizkargi gainan.

Eguna eta giro ona, baina, ez dira Bizkargin bukatuko. Muxikako auzokideek gogorazi dute Gorozikako txokoa egun osoan zehar egongo dela irekita, eta Eingo musika taldekoek girotuko dute gunea 15:30etik aurrera. Denak gonbidatu dituzte eguna ospatzera.

Bertako produktuen erakusleiho izango da Morga

Busturialdeko Hitza — 2024-04-25 13:41:29

23. Morgako Azokak inguruko ekoizleak zein erosleak batuko ditu domekan (apirilak 28), 10:00etatik 15:00etara bitartean. Aurten ere, nekazal eta artisauen postuak zein txosna egongo dira herriko plazan, baita animalien erakusketa ere.

Udaletik jakinarazi dutenez, ekoizleen 36 salmahai egongo dira, hamazortzi izango dira nekazarienak eta beste horrenbeste artisauenak. Ohiko azoka eremuan banatuta egongo dira ekoizleak, nekazariak plazan eta artisauak frontoian. “Inguruko ekoizleei euren produktuak erakusteko plaza bat eskaini gura izaten diegu”, azaldu du Mari Tere Artetxe Morgako alkateak.

Aurrekoetan modura, aurtengoan ere denetariko produktuak egongo dira. Nekazariek txakolina, sagardoa, estia, gaztak, ogia edota pastelak salduko dituzte, eta artisauek egurrezko zein telazko produktuak, Artetxeren esanetan. Ohi legez, animalia mota zein espezie desberdinak ere egongo dira Andra Mari elizaren inguruan. “Bertaratzen jendearen ikusmira sortzen dute, eta jende asko biltzen da animalien inguruan”, gehitu du.

Produktuen salmentaz harago, urtero ekitaldi osagarriak antolatzen dituzte, eta aurton, herri kirolak sustatzearen aldeko apustua egin dute udal ordezkariek: “Gure kirolak sustatzeko ezinbestekoa da horiei ikusgarritasuna ematea”. Hala, lasto, harri eta ingudeak jasotzeko, trontzako eta txingak eroateko erakustaldia eskainiko dute Sustabiz Herri Kirol Zentroko kirolariek: Leire Oleak, Zihara Zabalak, Iñaki Rafaelek, Engels Bellok, Lucia Perezek, Bingen Erleagak eta Inhar Urruzunok.

Azoka girotzeko, ezinbestekoa da jendea bertaratzea, eta horretarako gonbidapena egin diete udal ordezkariek herritarrei zein inguruko bizilagunei.