Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Koroa errepikatzeko hautagaitza aurkeztu dute

Busturialdeko Hitza — 2025-09-23 12:22:12

Donostiako Lauko Finalak Jai Alai Ligako puntistarik onenak hartzen ditu, lau aurrelari eta atzelari onenak. Baina denboraldi osoan zehar aurretik egoteak ez du emaitzik ziurtatzen. Atzo [irailak 22] adibiderik onena ikusi ahal izan zen. Aritz Erkiaga eta Gorka Sorozabal, esate baterako, puntu gehien bildu dituztenak izan dira beraien postuetan. Xabi Barandika eta Imanol Lopez, ordea, laugarrenak izan dira. Berez, lorpenak ikusita, lehendabizikoak ziren hautagaiak, baina iaz ere gernikarrak eta zumaiarrak laugarren postutik lortu zuten Jai Alai Ligako koroa. Gainera, ispastertarra zalantzekin heldu zen azken asteetan besoko minagaz egon ostean.

Barandikak eta Lopezek hasieratik erakutsi zuten zer nolako bikote sendoa osatzen duten. Zumaiarrak erakustaldia eskaini zuen atzeko koadroetan, pilota nahieran mugituz. Aurrelariak bere aukerak baliatu zituen eta errebotean min egin zuen. Bien helburua argia zen, Erkiaga sahiestu eta pilota asko atzeratu. 1-5 aurreratu ziren, baina Barandikak dagoeneko hiru pasa egin zituen, eta ispastertarra aurrean izanda, hori bereziki arriskutsua da. 6-8 hurbildu baziren ere, errebotea bilatuz min ikaragarria egin zuten: 7-15.

Bigarren jokoan, Erkiaga jokoan gehiago sartzen saiatu bazen ere, Barandikak eta Lopezek sendo jarraitu zuten. Gernikarrak 20 tanto amaitu zituen, erakutsiz tantoak ez direla bakarrik aurrean amaitzen, baita atzean edo errebotean ere. Azkenerako, 8-15 eta finalerako txartela, zain dituzte Eñaut Urreisti eta Thibault Basque. Barandikak nabarmendu zuen “bikote langilea” osatzen duela Lopezegaz eta “tantorik tanto” lan egiten dutela: “Partida borobila jokatu dugu eta finalean ere bikote oso gogorra izango dugu aurrean, maila oso potentea dute, baina gu lan egiteko prest etorriko gara”.

Gogenola eta GoikoetxeaEraman Jai Alai

Lehena, beti berezia
Nesketan ere iraultza eman zen, eta hemen ere atzeko koadroetan ezarri zen legea. Bertan, nagusi izan zen Maia Goikoetxea gaztea. Elaia Gogenolak aurrean duen ausardiagaz, hauek ere bikote sendoa osatzen dute. Maite Ortiz de Mendibil eta Maialen Aldazabal 0-2 aurreratu ziren, baina Goikoetxeak erakustaldia eman zuen eta atsedenaldirako 8-5 zeuden aurretik eta lehen setaren amaieran 15-12. Eskumaz eta errebesez dominatu egin zuen gazteak, eta bere aurrelariari aukerako pilotak eskaini. Aldazabal eusten saiatu zen eta Ortiz de Mendibil aurretik jokoaren ekimena aldatzen. Baina aldatzen ez zena markagailuko tartea zen, 11-5etik 15-9ra joan ziren.

Irailaren 29ko finalean Oihana Sorozabal biarriztarra eta Arai Lejardi markina-xemeindarra izango dituzte aurrean. Emakumezkoen Jai Alai Ligako lehen txapeldunak erabakiko dira, horregatik “pozik eta ilusio handiz” agertu ziren bi berriatuarrak: “Ohore bat da finalean egotea, gure plana ezin hobeto egin dugu, atzean dominatu eta aurrean errematatu. Finalean, bikote gogorra izango dugu aurrean, Lejardik pilota asko sartzen du eta Sorozabalek amaitzeko gaitasuna erakutsi zuen, baina guk gure estiloagaz jarraituko dugu”.

Gorpuztiei agur ezin hobea

Busturialdeko Hitza — 2024-06-12 18:55:16

Maiatzaren 30ean eman zieten hasiera ibarrangelutarrek herriko jai nagusiei: gorpuztiei. Ordutik iragan zapatura [ekainak 8] bitartean, Gorpuzti Jaiak goi-goitik ospatu dituzte eta, beste urte batez, herritarren bateragune izan dira. Denetariko jarduerak eduki dituzte herritarrek, denetarik ikusteko, egiteko eta gozatzeko. Zapatukoa ere ez zen makala izan: egun osoko ospakizuna gailendu zen, eta hainbat jende erakarri zuen.

Iaz zortzi kuadrilla aurkeztu ziren paella txapelketara; aurten, berriz, hamabi

Aurreko asteburuko herri bazkarian 200 lagun elkartu baldin baziren, iragan zapatuko paella txapelketaren parte hartzea ere ez zen gutxiago izan. Aurten, gora egin du urteroko lehiaketa gastronomiko horretan parte hartu duten lagunarteen kopuruak: iaz zortzi kuadrilla aritu ziren Elizalden; aurten, berriz, hamabi izan dira.

Argazkia: Marian Olano.

12:00etan ekin zioten txapelketari, eta 14:00ak aldera aurkeztu zituzten paellak. Tartean parte hartu zuten herrian bertan bizi direnak, udatiar herritarrak eta tokikoen adiskideak. Paella txapelketaren balorazio “paregabea” egin dute udaleko antolatzaileek: “Jende gehien erakarri ohi duen jai egitasmoetako bat da; aurten, beste behin, oso arrakastatsua izan da”.

Berdintasuna, helburu.
Bazkalosteko mahaigainekoan tripa ondo asebete ondoren, frontoira jo zuten ibarrangelutarrek. Izan ere, maila handiko pilota partiduez gozatzeko aukera eduki zuten. Ume eta gazte mailako esku pilota partiduek abiatu zuten iluntzeko kirol egitaraua. Jarraian, aurtengo berritasun esanguratsuenetako baten txanda iritsi zen: emakumezkoen arteko pala partidua. Udalak estreinakoz antolatu du neurketa eta, tartean, herriko palista batek ere parte hartu zuen. Jomuga, azaldu dutenez, argi askoa da: “Batetik, emakumezkoen kirola ahal bezainbeste bultzatzen jarraitu beharra dugu; bestetik, pala moduko kirol gutxitu bat indartzeko lanean segitu beharra dago”. Harmailak lepo bete zituzten ikusleen aurrean, Bidasolok eta Anituak 22 eta 19ko markagailu lehiatuagaz lortu zuten garaipena, Zugaza eta Landajoren aurkako norgehiagokan.

Argazkia: Marian Olano.

Azken kantxaratu zirenak nagusi mailako gizonezko pilotariak izan ziren. Partidu “ikusgarria” jokatu ondoren, Bakaikoak eta Morgaetxebarriak osatutako bikotea 22 eta 20koagaz nagusitu zitzaion Larrazabalek eta Lizeagak eratutakoari.

Azken unera arteko jaia.
Ondoren, urteroko beste hitzorduetako batek, mariatxien ibilbide musikatuak, hartu zuen protagonismoa. Elizalde inguruko arkupe, bazter nahiz tabernak girotu zituzten mariatxiek, euriari aurre eginez. Jaiekin amaitzeko, dezibelek ez zuten behera egin: Siesta Destroyer DJak musika emanaldia eskaini zuen.

“Aurtengo gorpuztien irakurketa orokorra “oso baikorra” da

Aurtengo jai egitaraua borobilduta, udal ordezkariek “irakurketa oso baikorra” egin dute. Frontoian proposatu dituzten berritasunak “itxaropentsuak” izan direla azpimarratu dute, eta gainontzeko jarduerek ere “ederto” funtzionatu dutela. Hunkigarritik asko eduki dute aurtengo jaiek, eta hori ere nabarmendu gura izan dute: “Lorea dantza taldeko umeek txupinazoa botatzea une ahaztezina izan zen, gogoratzeko modukoa; horrez gain, Lagako arrantzaleen eta itsasgizonen urteroko bazkarian haritz bat landatu zuten, hildako itsasgizonen omenez. Oro har, jaiak urteko hitzordurik sentikorrenetakoak izan ohi dira, eta aurtengoak ere halaxe suertatu dira”.

Bizkaitar guztiek ikutu nahi duten altxorra, Gernikako Arbolan

Busturialdeko Hitza — 2024-04-09 14:09:49

“Ezinezkorik ez dago/ez du balio ezetzak/ ta ez baduzue sinisten/ hartu hau adibidetzat:/ Borrokatuz geroz egi/ bihurtzen dire ametsak!“. Hori kantatu zuen Xabat Galletebebeitiak 2014ko Bizkaiko Bertsolari Txapelketako finalean, eta hamar urte beranduago, 2024an, Athletic Clubek arrazoia eman dio Galletebeitiari: 40 urte beranduago, Errege Kopako txapeldunak bihurtu dira, hogeita bosgarrenez.

84an bezala, oraingo txapelketak ere ikaragarrizko zurrunbiloa sortu du Bizkaian, eta ospakizunetara batu dira Bizkaiko Batzar Nagusiak. Ana Otadui Biterik, Bizkaiko Batzar Nagusietako Lehendakariak, Batzar Nagusietako Mahaiko kideek eta taldeetako bozeramaileek eta batzarkideek Athletic Clubeko jokalariak eta zuzendaritzaren ordezkariak agurtu dituzte gaur goizean [apirilak 9], Gernika-Lumoko Batzar Etxean.

Argazki galeria

Oihartzun handiko ekitaldia izan da: ehunka lagun batu dira Gernikako Arbolaren inguruan eta ikastetxeetako txikienak ere hurbildu dira ekitaldira “Txapeldunak, txapeldunak, oe, oe, oe” abestuz. Kapitainek kopa eskuan hartuta iritsi da Gernika-Lumora Athleticeko espedizioa, eta Gernikako Arbola berriaren aurrean kokatu dute zapatuan lortutako zilarrezko altxorra. Bertan izan dituzte itxaroten Batzar Nagusietako ordezkariak.

Minutu bateko isilunea.
Otadui arduratu da zuri-gorriei ongi etorria emateaz. Eguneko protagonista nagusiak txapeldunak izan diren arren, atzo Kanalan zendu zen Jose Antonio Ardanza Lehendakari ohia omentzeko tarte bat atera dute gerturatutakoek; txalo zaparrada batekin hautsi dute minutu bateko isilunea. Otaduik zein Jon Uriarte Athleticeko presidenteak oroitu dute Ardanza. “Euskal kirola horrenbeste maite zuen Jose Antonio Ardanza gogoratu nahi dut. Bere heriotzari lotuta, gabarra berriz ikustearekin amestu eta ikusi ezingo dutenak gogoratu nahi ditut. Kopa hau beraiena ere bada”, azaldu du hunkituta Uriartek.

Argazki galeria

Gernikako Arbola euskaldunen ikur den bezala, Athletic Bizkaiaren ordezkari dela goraipatu du Otaduik. Omenaldia jokalariei egin bazaie ere, Bizkaiko Batzar Nagusietako lehendakariak bizkaitar guztiak oroitu nahi izan ditu, egunero eraikitzen duten “Bizkaia maite hau osatzeagaitik”.

Ana Otadui: “Athletic sentimendu bat da. Bere filosofiak harrotasuna sentiarazten du. Ideologia guztietatik at doazen balio argi batzuk zabaltzen ditu Athleticek. Gernikako Arbolak zabaltzen dituen balio berdinak dira”.

“Athletic sentimendu bat da. Bere filosofiak harrotasuna sentiarazten du. Ideologia guztietatik at doazen balio argi batzuk zabaltzen ditu Athleticek. Gernikako Arbolak zabaltzen dituen balio berdinak dira, eta Athleticen ereserkiak dioen bezala, haritz zaharraren enborrak loratuko du orbel berria“, esan du Otaduik.

Talde zuri-gorriaren balioetara bueltatuz, azpimarratu du jokalariak Bizkaiko umeen eredu garbia direla. Talde lanak bere fruituak ematen dituela erakutsi dutela azaldu du, eta hori gazteenek ikasi behar duten zerbait dela.

Otaudik bezala, Uriartek ere Athleticen ereserkiaren esaldi bera aipatu du. Presidenteak, baina, beste irakurketa bat egin du: Iribar eta Azpiazu, 84ko Gabarra gainean joan zirenak, ondoan zituela aprobetxatuz, Uriartek azaldu du garai haietako garaipenei esker irten zirela gaur egungo kopa lortu duten athleticzaleak. Alegia, Iribarren haritz zaharretik atera direla De Marcos eta Lekue bezalako arbola berriak.

Bakarra Munduan.
Lelo horren besopean prestatu du finala Athleticek. Klubaren eredua “erreferentea” dela uste du Uriartek, eta Athletic “indartsu” dagoela azpimarratu du. Ereduari dagokionez, “mugak gainditzen dituen eredu bat dela” gaineratu du. Etorkizunean bizkaitarren garaipen gehiago ospatzea espero duela ere aitortu du.

Argazki galeria

Opariak ere ez dira falta izan. Otaduik, Batzar Nagusien izenean, haritz zaharraren orbel berria eskaini die zuri-gorriei. Lehoien kasuan, kapitainek sinatutako lehen taldeko kamiseta eta partida osteko ospakizunetan atera zuten txapeldunen kamiseta oparitu dizkiote.

Finaleko urduritasunak.
Gaur Gernikako Arbola bisitatu izanaren arrazoia, azken finean, zapatuko partida irabazi izana da. Finalaren inguruan hitz egiteko aukera ere izan du Iker Muniain kapitainak. Penaltietan bisitako urduritasunaren inguruan galdetuta, une horietan izan zituzten urduritasunak eta beldurrak “errepikaezinak” direla aitortu du, eta onartu du egunotan hainbat alditan ikusi duela partidua.

Bizkaian sortu den oihartzunaren inguruan azaldu du izugarria dela jendeak emandako erantzuna. Atzo kalera irten eta “hiru pauso” ere ezin izan zituela eman kontatu du. Jendeak “bihotzetik” hitz egiten diotela esan du, eta eguenerako gogo handiak dituztela ere aurreratu du.

Batzarretxean ohitura den bezala, Gernika-Lumora gerturatu diren Athleticeko ordezkariek bertako liburua sinatu dute, eta ostean, Batzarretxea bisitatu dute. Talde argazkiak atera, eta gerturatutako ume zein horren ume ez direnak agurtu ostean, Bilbora bidea hartu dute: Kopa ondo gorde eta eguenean gabarran distiratsu egon dadin.

Zornotzarrak, Ibarrurin nagusi

Busturialdeko Hitza — 2024-03-05 13:38:40

Eguraldia lagun izan ez arren, aurtengo Ibarruriko Mendi Martxak eta Lasterketak ez dute kale egin. 400 mendizale inguru elkartu ziren domekan [martxoak 3], mendia, aisialdia eta kirola ezkontzen dituen egitarauaz gozatzeko. Aurten, Ibarruriko hitzordua ezin izan da Urdaibaiko Koparen parte izan, baina, edozelan ere, herritarrek gogo onez erantzun diote XI. ekitaldiari. Jende asko elkartu zen bai 21 kilometroko, bai 9 kilometroko mendi martxetan. Horrez gain, mendi lasterketak ere erantzun ederra eduki zuen.

Argazkia: Saltsamendi Kultur Elkartea.

Lasterketak, hain zuzen ere, Zornotzara egin zuen: Itsasne Urkiaga Mugarrak eta Ander Gerrikaetxebarria San Antonek beraien legea ezarri zuten. Ibilbidean zehar, denetarik eduki zuten irteera hartu zuten 76 parte hartzaileek: euritea, haizetea edota elurtea. Ibilbide gogorra, lokatzez josia eta teknikoa bete behar izan zuten; punturik gorena soineko zuriz jantzita topatu zuten, gainera. Izan ere, Astoagana gailurrera eta San Kristobal baselizara heltzeagaz batera, elurra lasterketako ekuazioan sartu zen. Ordurako, lasterketa Gerrikaetxebarriaren eta Arrolape Mendi Klubeko Ekaitz Lejarzegi Urizar ajangiztarraren artean zegoen; atzean, bakarkako lasterketa eginez, Paul Goitisolo Otazua gernika-lumotarra podiumeko hirugarren postuaren lehian zetorren.

Gerrikaetxebarriak lasterketako bigarren zatian egin zituen aldeak, eta Lejarzegi bigarren postuagaz konformatu behar izan zen

Lasterketaren bigarren zatian, baina, zornotzarrak urrats bat aurrera egin zuen, eta 01.43.42ko denboragaz poltsikoratu zuen garaipena; Lejarzegi arrolapetarra minutu bat baino gutxiagora helmugaratu zen; Goitisolo, ostera, 01.48.21eko denboragaz iritsi zen Ibarrurira. Gizonezkoen beterano mailan ere, beste zornotzar bat nagusitu zen: lanak 02.11.43ko denbora egin zuen Jokin Azarloza Gonzalez. Gazteen sailkapenean, 01.59.24ko erregistroagaz, Unai Alberdi Izagirre gailendu zen.

Urkiaga maisuki, bost minutuko aldeagaz, nagusitu zen emakumezkoen senior mailan

Urkiaga, aurkari barik.
Emakumezkoen sailkapeneko garaileak malgutasunez lortu zuen garaipena. 02.23.33ko denbora eginik, bost minutuko aldea urratu zuen bigarren sailkatu Zuriñe Frutos Gutierrez arabarrarekiko. Senior mailako emakumezkoen podiuma beste arabar batek, Alejandra Bueno de Santiago gasteiztarrak, osatu zuen, Ibarruriko helmuga 02.40.08ko denboragaz harrapatuz.

Argazkia: Arrolape Mendi Kluba.

Saltsamendi Kultur Elkarteko antolakuntza lantaldetik XI. aldiaren balorazio “oso positiboa” egin dute, domekako aldarteak prestatuta zuten egitaraua zenbait alderditik “mugatu” egin zuen arren: “Umeentzako jolasgunea egitea geneukan pentsatuta, baina euriak galarazi egin digu; dena dela, hurrengo urterako gordeko dugu egitasmo hori, adin denetakoak eguneko jaiaren parte izan daitezela gura baitugu”.

Bihurritutako orkatila bat salbu, ez zen istripurik egon; antolatzaileek balorazio “positiboa” egin dute

Era berean, mendizaleei “eskerrik beroenak” eman dizkiete, eguraldiari aurre egitearren eta, beste urte batez, probari “bizitasuna” emateagatik: “Martxa luzeko parte hartzaileek, batez ere, ordu dezente egin zituzte aro oso eskasagaz, eta alde horretatik eskertuta gaude; oro har, erantzun polita eman dute guztiek eta, gainera, ez zen inongo istripurik egon, bihurritutako orkatila bat salbu”.

Euleuk Jaia: ahaidetze istorio bat

Busturialdeko Hitza — 2023-09-23 17:46:37

Ez dago hauskorra ez den mugarik. Ez dago apurtu ezin den distantziarik. Ahaidetzea, saretzea eta elkar lagunduz peetsona gisa haztea posible dela frogatu dute gaur [irailak 23] Euleuk elkarteko kideek. Gernika-Lumoko Astra kultur faktoria Senegalen eta Euskal Herriaren arteko ahaidetzearen lekuko izan da, Euleuk Jaian. Euleuk elkartearen ortzimuga nagusia Senegalgo Warang herriari osasun, hezkuntza eta kooperazio laguntza ematea baldin bada, hori are begibistakoagoa egin dute gaur, bertan egindako behar guztiak bertatik bertara argitu baitituzte. Inguruan bizi diren senegaldar mordoa hurreratu da Astrara, hori ere jaialdiaren helmuga baitzen, eta kultura trukaketa nabarmendu da egun osoan zehar.

10:00etan eman zaio hasiera arratsaldera arteko egitasmoari. Ross dantza eskolak umeei merezi duten plaza eman die, eurentzako jolasak atonduz. Beheko solairuan, gainera, etenik gabe zabalik egon da denetariko produktuz osaturiko azokagunea eta, zelan ez, barra. Orduek aurrera egin ahala, geroz eta jende gehiago hurreratu da azokara. Eguerdi aldera, baina, goiko solairua bihurtu da jaialdiaren epizentro. Izan ere, Euskal Herritik Senegalera joandako eta bertan laguntza komunitarioa emandako boluntarioek han topatu zituzten beharrizanen, eginkizunen eta egoeraren berri eman dute.

ARGAZKIAK

Denetariko asistentzia motak eman behar izan zituztela argitu dute. Ohikoenak, ostera, alor bikoak: osasuna eta hezkuntza. Azaldu dute, besteren artean, ez dagoela zertan mediku, erizain edo osasungintzako profesional izan. “Borondatea, ikasteko jarrera eta gutxieneko jakintza dauden bitartean, laguntza emateko gai gara”, adierazi dute. Hunkiduraz hartu dute entzuleek, esaterako, Senegalen topatu dituzten gaixotasunek eragindako kalteak, higienearen eta gutxieneko baliabideen alde egindako borroka, medikamentu eskasia edota dietaren hutsune nabarmenak.

Tamsyr Ndoyek Senegaldik Euskal Herrira etortzeko bizitakoak ikusarazi ditu

Tamsyr Ndoye izan da, hemendik harakoaz barik, handik honakoaz mintzatu dena. Senegaldik etorri zen, eta balentria haren nondik norakoak plazaratu ditu Astran. “Laguntzeko jaio naiz“. Ez du formulazio argiagorik behar izan bere esku hartzearen hasierak. Ndoyek Gernika-Lumon topatutako harrera beroa nabarmendu du: “Atzean utzi dudana baino bizimodu hobea dut hemen; hori hasiera-hasieratik eskuak zabalik hartu nauen jendeari esker da”. Boluntario joandako lantaldeko partaideek, beren aldetik, Warangen aurrera eroandako denetariko proiektuen berri eman dute, batik bat, emakumeen baratzeari, umezurztegiari edota joskintza tailerrari buruz.

ARGAZKIAK

Bizipenen museoa. Irudi batek mila berbaren balioa baldin badu, zein balio luke bizimodu bat islatzen duten hainbeste irudik? Astrako goiko solairuko zati bat 200 argazki eder baino gehiagoz jantzi dute. Aitor Arberas boluntario gernika-lumotarraren eskuek ondo harrapatu dituzte irudietan Senegalgo bizimoldea, paisaiak, usadioak, egindako taldelana, unerik hunkigarrienak edota gaitzenak. Bertaratutakoen interesa bereganatu du bizipen jositako argazkien museoak.

Tamsyr Ndoyeren berbaldia.

Talde bazkarian, besteak beste, Senegalgo edariez gozatu ahal izan dute elkartu diren ia 100 lagunek. Mahaigainekoaren ostean, musikaz, dantzaz, jai giroaz, solasaldiez, gogoratutako esperientziez eta senegaldar borroka ikuskizunaz gozatu dute guztiek. Euleuk elkartekoek, bestalde, Astrara bertaraturikoei egunean zehar egindako argazkiak bidaltzeko deialdia luzatu diete.

Beroari aurre egin behar izan diote San Roman auzoko jaien azken egunean

Busturialdeko Hitza — 2023-08-09 15:10:22

Mezarekin hasi dute eguna Muxikako San Roman auzoan, jaien hirugarren eta azken eguna ospatzeko. Zelaia estalgarriekin bete-bete eginda dena prest zeukaten bero uholdeari aurre egiteko. Baso Txoritxu Dantza Taldeak ikuskizun ederra eman du gero. Txistulariaren doinuekin dantzariak zelai erdian aritu dira ezpata, makila, arku eta zintei helduta, bertara iritsi direnen goiza gozarazteko prest.

[ARGAZKI GALERIA]

Arratsaldea XLVI. San Roman txirrindulari lasterketarekin hasi dute San Romanen, eta ondoren, etxeko txikienentzako tartea heldu da umeentzako jolasak antolatu baitituzte. Lasterketako sariak banatu eta gero, “bertoko produktuaren otzararen zozketa” egingo dute. Eztarriak berotuta etorriko dira gero Koldo Gezuraga, Asier Galarza eta Ibai Amillaltegi iluntzeko bertso saioa beraien doinu eta letrek alaituko baitute. Azkenik, Argi eta Joseba trikitilariegaz erromeriak itxiko du 3 egunetarako atondu duten egitaraua.

Asteburuko bi banderak Urdaibairentzat

Busturialdeko Hitza — 2023-08-07 11:51:59

Joerak berretsi egin ditu asteburuak, Hondarribian eta Lekeition onena izan da Bermeo Urdaibai Arraun Elkartea. Urdaibai bigarrenarekiko tartea handitzen doa, sei punturen aldea du Hondarribiarekin; Bou Bizkaiak 123 puntu dauzka orain eta Ama Guadalupekoak 117.

Liderrak ziren eta izaten jarraitzen dute bermeotarrek. Erakustaldia emanda, Hondarribiako bandera irabazi zuen zapatuan. Itsaso zakarrarekin eta euripean, Bou Bizkaia nagusi izan zen ohorezko txandan. Lehen ziabogan denbora onena eginda, aldeak handitzen joan zen estropadan zehar. Hirugarren ziabogatik helmugara aurkariak hurbilago izanik, gehiago sufritu bazuten ere, bandera lortu zuten azkenerako. Domekan ere, nagusitasunez gailendu ziren bermeotarrak Lekeitioko uretan eta El Correo Ikurriña irabazi. Donostiarra 16 segundora geratu zen, bigarren txandatik, Zierbena hirugrren 19ra eta Hondarribia laugarren, 24ra.

Lekittarra, zapatuan egindako estropadarekin konforme geratu ez, eta etxean, erakustaldia eman zuen domekan, lehen txanda irabazi eta seigarren postua eskuratuagaz. Ondarroaren, Samertolameuren eta Santurtziren aurretik aise irabazi zuen Isuntzak. Itsasoko Amak, bestalde, Samertolameuko galiziarrak bakarrik ditu atzetik, 3 puntura, eta aurretik Ondarroa dauka, 16 puntuko aldearekin.

Arriskuak gora. Zapatuan, lehenengo txandan epaileak Santurtzi kanporatu zuen. Epaileak irteera eman baino lehen abiatu zen Sotera eta hiru segundoko zigorra jaso zuen. Ondoren, Kaiku eta Santurtzi lehia bizian ari zirenean, laugarren kalean, Kaikurenean, sartuta metro batzuk egin zituen Santurtzik, arraunekin elkarren aurka jotzen ari ziren, arraunlari batzuk gelditu behar izateraino, eta bi ontziak tupust egiteko zorian ere izan ziren. Epaileak zenbait abisu eman ostean, azkenean bandera berdea ikusi zuen Soterak eta lehiatik kanpo gelditu ziren.

Eskola Txikien Jaia ospatzeko Mundakan bildu dira aurten

Busturialdeko Hitza — 2023-05-18 16:23:34

Txikiak, biziak eta herrikoak. Eskola txikiak bizirik daudela aldarrikatzeko elkartu dira gaur [maiatzak 18], Mundakan. Busturiko JM Uzelai, Natxituko Haizeder, Gautegiz Arteagako Montorre, Muxikako Urretxindorra eta Mundakako Eskolako ikasleen zein irakasleen eguna da Busturialdeko Eskola Txikien Jaia. Elkarrekin indarrak hartu, harremanak sendotzen jarraitu eta, batez ere, gozatzeko, ondo pasatzeko urteroko hitzordua da.

Goiz-goizetik ume gehiago zeudela nabaritu dute mundakarrek. 10:30ak aldera batu dira, eta talde argazkia atera, kalejira alaia egin eta jolasten ibili dira.

“Herri txikiak eta eskola txikiak bizirik daudela adieraztea da gaurko helburua nagusiena, eta, era berean, Busturialdeko eskolak batzea”, azaldu du Maite Madariaga Mundakako Eskolako zuzendariak. Goizeko harreran momentu hunkigarria ere bizi izan dute: “Bertso batzuekin eman diegu harrera ikastetxe guztiei, eta, aurten omenaldi handi bat eskaini diogu hainbat urtetan Urretxindorra Eskolako zuzendaria izan zen Isidro Rodriguezi. Uste dugu merezi zuela, eta bere alarguna berton egon da”. Rodriguezek jaialdi honek aurrera jarraitzeko “bultzada handia” eman ziola azpimarratu du Madariagak.

[ZUZENEAN ARGAZKI GALERIA IKUSI]

Gero, hamaiketakoagaz indarrak hartu dituzte eguerdiko dantzaldirako. Beste urte batez, ikuskizun ederra eskaini dute. Txikitxoenetatik nagusitxoenetara, mailaz maila atera dira plazara euren koreografia landuak erakustera. Irribarreak ahoan, ilusioa begietan eta konplizitatea aurpegietan. Irakasleen zein bertan bildutako ikusleen txalo beroak ondo merezita izan dituzte.

Emanaldia amaituta, askotariko jokoak eduki dituzte aukeran. Ondoren, alkarregaz bazkaldu dute, eta 15:00etan alkar agurtu aurretik, Mundakako Eskolakoek Haizeder Eskolakoei pasatu diete lekukoa, datorren urtean bertan ospatuko baitute Eskola Txikien Jaia.

Biziberritutako txokoen arteko poteoa

Busturialdeko Hitza — 2023-05-02 13:44:06

Hiru urteko geldialdiaren ostean, “herritarrak alkarregaz batzea eta udalerriari bizitasuna ematea” helburu duen Muxikako, Ibarruriko eta Gorozikako bertso triki pintxo poteoa biziberrituta bueltatu da. 90 pertsona batu ziren zapatuan (apirilak 29), udalerriko sei txokotan.

18:00ak aldera hasi zuten erronda. Bi autobusetan egin zuten gehienek, eta beste batzuk euren ibilgailuetan ibili ziren alde batetik bestera. Oizpe (Maume, Ibarruri) txokoa izan zuten arratsaldeko lehenengo geldialdia. Gero, Dringili Drangolon (Ajuria, Ibarruri), Saltsamendin (Ibarruri), Gaukarin (Gorozika) eta Atxelipen (Ariatza, Muxika) elkartu ziren, eta gauerdian, Kolakainen (Elizalde, Muxika) amaitu zuten pintxoen dastaketa.

[ZUZENEAN ARGAZKI GALERIA IKUSI]

Aurrekoetan pintxo lehiaketa izaten zen txokoen artean, eta oraingoan halakorik egon ez bada ere, txoko bakoitzak bi pintxo prestatu zituen. Beste urte batez, askotariko proposamenak izan zituzten, herritarrek pintxo tradizionalak zein berrikuntzaz betetakoak probatu zituzten. Osagaiak ere askotarikoak izan ziren: odolosteak, piper gorriak, ortuariak, olagarroa, gazta, gilda, solomoa… Goxo-goxo jan zituzten denak ere.

EinGO! taldeko musikariek eta Lilibertsoko kide Asier Galarza, Koldo Gezuraga, Ibai Amillategi eta Aitor Etxebarriazarraga bertsolariek lagunduta ibili ziren txokorik txoko.

Beroari eutsiz, Akorda jai giroz jantzi da asteburuan

Busturialdeko Hitza — 2022-07-20 17:56:33

Ibarrangeluko Akorda auzoan ospakizun giroa jaun eta jabe izan da joan den asteburuan. Izan ere, Santa Mañe jaietan murgilduta ibili dira bai zapatuan, bai domekan. Zapatu gauean, Obieta Aita-Semeak taldeak erromeria eman zuen plazan. Ordu pare batez, zuzeneko musikagaz girotu zituen jaiak eta, ondoren, txosna giroan bildu ziren auzotarrak. Domekan, ostera, Ibarrangeluko Lorea dantza taldekoek ikuskizuna eman zuten, bero itogarriari aurre eginez. Arratsaldean, hainbat eta hainbat izan ziren umeentzako jolasak ikustera bertaratu zirenak, beroari eusteko urezkoak izan baitziren

Auzolanean erreka garbitzen

Busturialdeko Hitza — 2022-07-13 19:14:17

Umetatik hasita ingurumena zaintzeko eta ahalik eta zabor gutxien sortzeko kontzientzia piztea garrantzitsua da, eta umeek ereduak behar dituzte, helduek eredu izan behar dute, ardura denona baita. Hala, umeak eurak ere eredu izan daitezkeela eta badirela erakutsi dute gaur, Ean.

Erreka garbitzeko auzolaren aritu dira goizean. Pauso Txikiak taldearen deialdiari erantzunez, herritar asko batu dira, batik bat udalekuetako umeak. 11:30ak aldera Eako frontoian elkartu ostean sartu dira errekara, eta hondartzarainoko eremuan batu dituzte hondakinak. Eskularruekin errekan topatutakoak jaso, eta poltsetan sartu dituzte, ondoren edukiontzietara botatzeko. Helduen laguntzagaz ibili dira umeak, pozik, eta errekan freskatuta beroari aurre egiten.

Askotariko zabor eta hondakinak batu dituzte, plastiko eta burdin zatiak gehienbat. “Burdin asko topatu ditugu, batzuk tamaina handikoak, hodiak, adibidez. Plastiko zati txikiak ere pila bat topatu ditugu, alga artean asko, eta tanpoiak eta zigarro-puntak ere bai”.

Denboraldiko seigarren garaipena lortu dute basurdeek

Busturialdeko Hitza — 2019-11-12 11:50:05

Ohorezko B mailari dagokion zortzigarren jardunaldia lehiatu zuten zapatuan Gernika Rugby Taldeko jokalariek. Eguraldi txarrak hartu zuen protagonismoa Unben jokatutako norgehiagokan, baina basurdeek denboraldiko seigarren garaipena eskuratu zuten; sailkapen orokorrean bigarren mantendu dira.

Euriak eta hotzak talde gernikarreko zein Avia Eibar Rugby taldeko jokalariengan eragin gogorra izan zuten. Baldintza latzetan, baina basurdeek neurketaren lehen uneetatik markagailuan aurretik jartzeko ahaleginak egin zituzten. Fase estatikoetan garaile aterata partiduko lehen zatian nagusitasun osoa lortu zuten; eibarko taldeak atsedenaldira heldu aurretik lortu zuen lehenengo entsegua, markagailua 5-24an utzita.

Ordutik aurrera eibartarrak berpiztu egin ziren. Pick and go-a da horien indarguneetako bat, eta etxeko zelaian egindako jokaldiekin basurdeei une latzak eman zizkieten.

Nagusitasun osoagaz. Bigarren zatia zailtasunekin hasi zuten gernikarrek. Bruno Mercantik txartel horia jaso, eta basurdeen taldea jokalari bat gutxiagorekin geratu zen. Desabantailan, baina nagusitasunagaz jokatzen jarraitu zuten, entsegu berri bat eskuratuta. Eibarkoek etsi gabe jarraitu zuten partiduagaz. Hainbat jokaldi arrakastatsuren ostean, denborarik galdu barik entsegu batekin erantzun zieten gernikarrei.

Partiduaren azken uneetan basurdeek nagusitasunagaz jarraitu zuten. Hala ere, partidua amaitzeko hamar minutu falta zirela eibartarrek entsegu berri bat lortu zuten; horri esker gernikarrek erasoko bonus puntua galdu zuten, markagailua 17-36ra jarrita.

Partidua amaitzeko zegoela partiduko azken entsegua lortu zuen Gernikako taldeak; azken jokaldiagaz 17-41era utzi zuten partidua. Garaipenagaz sailkapenerako bost puntu eskuratu zituzten zapatuan; 31 puntugaz Getxo Rugbyren atzetik daude sailkapen orokorrean.

Atsedena hartzeko bi aste dituzte aurretik basurdeek; hurrengo partidua Babyauto Zarautz RTren aurka jokatuko dute. Sailkapen orokorrean laugarren postuan aurkitzen da Zarautz bost garaipen, berdinketa bat eta bi porrot lortuta.

Bidegorritik, seguruago

Busturialdeko Hitza — 2019-10-13 19:42:40

Egunero-egunero erabiltzaile asko ditu Forua eta Busturia lotzen dituen bidegorriak. Horien segurtasuna bermatuta egotea da udalen kezka nagusietako bat, eta bide horretan beste pauso bat eman du Foruko Udalak. Kantaleko bihurgunearen gune arriskutsua ekiditeko bidegorriaren zati berria amaituta, gaur eguerdian egin dute inaugurazio ekitaldia.

Forutarrak bizikletekin hurbildu dira Elexalde eta Kantale batzen dituen bidegorriaren gune berrira, eta eurek moztu dute zinta. Jarrain, bizikletetara igo eta pedalkadaz-pedalkada probatu dute 177 metroko tartea.

Bidegorria egin zutenetik puntu beltz bat eduki dutela gogora ekarri du Mikel Magunazelaia Foruko alkateak: “Txirrindulari eta oinezko asko pasatzen den gunea da, eta ezer pasatu orduko konpondu beharreko gauza izan da hau. Orain, segurtasun osoz Busturiraino joateko aukera daukagu”. Kantaleko bihurgunea gune arriskutsua albo batera utzita, irisgarritasuna eta segurtasuna bermatzea eta ikuspena hobea izatea lortu dutela azpimarratu du.

INAUGURAZIOAREN ARGAZKIAK

98.000 euroko inbertsio egin dute, eta lanak burutzeko Bizkaiko Foru Aldundiaren laguntza eduki du udalak: “Aldundiak %25a eman digu”. Aipatu lanok inguruko aparkalekuak atontzeko aprobetxatu dituztela eta azken ukituak egitea falta zaiela zehaztu du alkateak.

Nekazarien eta eskulangileen azoka, giro onean

Busturialdeko Hitza — 2019-09-28 15:43:39

Muxikako, Ibarruriko eta Gorozikako nekazarien eta eskulangileen azoka hartu du gaur Zubieta Errotako aparkalekuak. 10:00etatik 15:00ak aldera arte, zer erosi, ikusi eta gozatu eduki dute bertara hurbildu diren herritarrek.

Abere, nekazal eta artisau azoka egiten zuten lehenago ere udalerrian, eta aspaldiko hitzordu hura berreskuratzea erabaki dute aurten. Batik bat eguerdi partean batu da jende gehien, eta balorazio oso ona egin dute udal ordezkariek: “Jendea gustura dago, eta gu ere pozik. Dena ondo irten da”.

Baserriko eta eskulangintzako produktuen erakusketa eta salmenta ezohiko eran girotu dute. Baso Txoritxu dantza taldekoena izan da eguneko lehen saioa. Herriko dantzariek saio dotorea eskaini dute, beste behin. Ondoren, herri kirolen txanda izan da, eta Lilibertsokoak arduratu dira azoka borobiltzeaz. Asier Galarza muxikarrak, Ander Elortegi natxituarrak eta Ibai Amillategi gernikarrak jarri dute umorea euren bertsoekin. Gainera, umeek euren txokoa eduki dute; puzgarrian eta tailerretan dibertitu dira gurasoak azokan zeuden bitartean.

Merkatu solidarioa ere ipini dute. Global Humanitaria gobernuz kanpoko erakundearen bitartez, Muxikako Udalak besoetan hartuta daukan Guatemalako ume batentzat izango da gaur bildutako dirua: “2011-2012 ikasturtean hasi ginen elkartasun erakundeetara dirua bideratzen. Kontu korronte bat daukagu eta urtero bertan dirua sartu eta ekimen solidarioak egiten dituzten elkarte edo erakundeetara bideratzen dugu dirua”.

[IKUSI HEMEN ARGAZKI GEHIAGO]