Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

San Pedro jaietako kartel lehiaketa abian da

Busturialdeko Hitza — 2026-05-21 13:44:48

Mundakako Udalak abian ipini du aurtengo San Pedro jaietarako kartel lehiaketa herrikoia. Ekainaren 5a bitarte, mundakarrek beraien proposamenak aurkezteko aukera edukiko dute, eta txapelketaren irabazleak 300 euroko saria poltsikoratuko du. Udalak argitara eman ditu kartel lehiaketaren oinarriak, eta zehaztu du parte hartzaile bakoitzak gehienez proposamen bi baino ezin izango dituela aurkeztu, DIN A2 formatuan eta euskarri fisikoan zein digitalean. Halaber, proposamenek Mundakako San Pedro jaiak 2026 leloa agerian eduki beharko dute. Udal bulegoetan aurkeztu beharko dituzte, 09:00retatik 14:00etara bitarteko ordutegian.

Lanek aipatutako leloa baino ezin izango dute eduki nabarmenduta, alegia, egilearen izen-abizen barik aurkeztu beharko dira; hori bai, gutunazal baten barruan entregatu beharko dira, eta bertan autorearen izen-abizenak, telefono nahiz NA zenbakiak ipini beharko dira. Lehiaketaren sariketaren data oraindik ez dute publiko egin, baina bai aurreratu kartel irabazlearen eskumenak udalarenak izango dira; lehiara aurkeztutako baina saririk jaso ez duten gainontzeko lanak udal bulegoetan batu ahalko dituzte partaideek. Epaimahaia ere udalak aukeratuko du, eta haren azken hautua apelaezina izango da.

Mundakako kontsultategi berria martxan dago

Busturialdeko Hitza — 2026-05-18 11:09:37

Osakidetzak Mundakako kontsultategi berria martxan jarri du du gaur [maiatzak 18] Goiko kaleko 1. zenbakian, erdigunean bertan. Astelehenetik barikura, 08:00etatik 15:00etara bitartean dago zabalik.

Azpimarratu dutenez, Mundakako Kontsultategi berria abian jartzea Euskadiko Osasun Itunaren ekintza-ildoetako bat da, bertan jasotako lehentasunetako bat “Lehen Mailako Arreta indartzea” baita: “Jarduketa horrekin, Eusko Jaurlaritzako Osasun Sailak eta Osakidetzak aurrera egin dute herritar guztiei arreta hurbilagoa, irisgarriagoa eta kalitate handiagokoa eskaintzeko bidean”.

Azpiegitura berri horri esker, 1.650 biztanletik gorako biztanleriari emandako “osasun-arreta hobetu” ahalko da, “espazio zabalagoak, irisgarriagoak eta egungo premietarako egokiagoak” dituelako. Osakidetzako arduradunen hitzetan, osasun-zentro berriak hobekuntza “nabarmena” suposatuko du lehenengo mailako arretan, “funtzionaltasunean eta pazienteen ongizatean” oinarritutako diseinuari esker: “Ekipamendu berriak aurreko kontsultategia ordezten du, eta jauzi kualitatiboa ekarriko du udalerriaren lehen mailako arretan. Zentroa biztanleria zahartuari arreta emateko diseinatu da —% 18 inguruk 75 urte baino gehiago dituzte—, hau da, oztopo arkitektonikorik gabeko instalazioak egin dira, kronikotasunari eta hauskortasunari arreta emateko programak indartzeko”.

Gainera, biztanleria osoari estaldura eman ahal izateko, ohiko osasun-arazoen aurrean erantzuteko gaitasuna “areagotuko du”, baita erizaintzako arreta eta osasun komunitarioko jarduera ere: “Erantzun hobea eman nahi da patologia akutuetan, erizaintzan eta osasun komunitarioan”. Kontsultategiari esker, zerbitzua “hobeto koordinatu” ahalko da udalerriko adinekoen bi egoitzekin, eta arreta “jarraituagoa” egingo dutela zehaztu dute.

Espazio zabalak. Lokalak familiako medikuntzako kontsulta, erizaintzakoa eta tratamenduetarako, proba funtzionaletarako eta odola ateratzeko eremu espezifikoa, itxarongela segurua eta handia eta komun egokituak dauzka. Espazio horiek guztiak aurretik zeudenak baino “askoz zabalagoak” dira, profesionalen lana “errazteko”.

Azaldu dutenaren arabera, modernizazioaren eta ingurumenarekiko errespetuaren irizpideekin bat eginez, kontsultategiak aerotermia-instalazioak dauka. Sistema horrek klimatizazio “eraginkorra eta jasangarria” ahalbidetzen du, eta Osakidetzak karbono-aztarna murrizteko daukan konpromisoa berresten du.

Bizkaibusen zerbitzua berritzeko aurreproiektuari alegazioak aurkeztu dizkio Mundakako Udalak

Busturialdeko Hitza — 2026-05-11 17:18:29

2026ko apirilaren 1eko 189/2026 Foru Aginduaren bidez, Garraioak, Mugikortasuna eta Turismoa Sustatzeko foru diputatuak Bizkaibuseko errepide bidezko bidaiarien erabilera orokorreko garraio publikoaren zerbitzuen aurreproiektuak onartu ditu, eta Busturialdea-Lea-Artibai eremuari dagokiona aztertu ondoren, Mundakako Udalak alegazioak aurkeztea erabaki du.

Hain zuzen ere, A3515 lineari — Bilbo-Bermeo / Bermeo-Bilbo— dagozkion honako alegazio hauek aurkeztuko dizkiote aldundiari: autobusa Goiko Kaletik igarotzea joan-etorri bietan, asteburu eta jai egunetan maiztasuna handitzea, Gernikako Ospitalean geralekua jartzea, gaueko zerbitzua zabaltzea eta puntako orduetan errefortzu gehiago eskaintzea.

Azaldu dutenaren arabera, udalean ordezkaritza daukaten hiru alderdi politikoek — EH Bildu, EAJ eta Herritar Alternatiba— adostu dituzte eskari horiek: “Aurkeztutako aurreproiektua aztertu ondoren, A3515 lineari dagokionez, ikusi zen proposatutako informazioa 2024ko zerbitzuari dagokiola eta, beraz, ez dela gaur egungo egoerara egokitzen. Aldundiarekin egoera argitu ondoren, maiatzaren 6an Mundakako Udalean ordezkaritza daukaten hiru talde politikoak bildu ziren. Bizkaiko Foru Aldundiak bermatu du autobus zerbitzua gaur egun eskaintzen den moduan mantenduko dela, hau da, Bilboranzko noranzkoan geldialdia Goiko Kalen egingo du eta Bermeoranzko noranzkoan, berriz, saihesbidean”.

Maiatzaren 22ra bitartean aurkeztu daitezke alegazioak, eta mundakarrak hori egitera animatu dituzte.

Musika, kirola eta aldarrikapena, Musutruk Mundaka elkartearen lehenengo urteurrena ospatzeko

Busturialdeko Hitza — 2026-05-11 12:57:39

Ospakizunez betetako asteburua eduki dute mundakarrek. Musutruk Mundaka elkartearen lehenengo urteurrena ospatu dute; atzo Kirol Egunean elkartu ziren, eta herenegun, berriz, Musika Egunean.

Beste behin, herritarren babesa sentitu dute elkarteko kideek, eta asteburuak utzitakoagaz “oso pozik” daude: “Oso ondo atera da dena. Ekintza guztietan jende asko eduki dugu; ekitaldi guztiak kontuan hartuta, 300 pertsona baino gehiago elkartu gara. Gainera, eguraldiarekin ere zortea eduki dugu, ekaitzak gure ekintzak amaitu eta gero sortu zirelako”. Orain arte egindako bideagaz eta lanagaz bezala, urteurren ospakizunarekin ere gustura geratu dira, eta jendearen “inplikazioa” azpimarratu dute.

Argazkia: Musutruk Mundaka

Hain zuzen ere, ekitaldietan elkartearen urtebeteko ibilbidearen errepasoa egiteko tartea ere hartu dute, eta gaur gaurkoz, elkarteak daukan “erronka handiena” instituzio publikoen laguntzak lortzea dela azaldu zieten herritarrei: “Ea diru kopuru nahikoa lortzen dugun, eta baseliza barruan lanekin hasten garen”.

Musika eta kirola. Atzo zein herenegun “giro oso ona” eduki zuten. Zapatu eguerdiko Herria abesten saioa “hunkigarria” izan zen, eta “denak abesten” aritu ziren: “Ez bakarrik musikariak, herria inplikatu zen”. Iluntzean ere kantatzeko aukera eduki zuten; izan ere, 45 minutu inguruko kontzertua eskaini zuen Mundakako Abesbatzak, eta azkenengo lau abestien letrak banatu eta denen artean abestu zituzten: “Kontzertua ere oso ondo atera zen”.

Mundakako Abesbatzaren emanaldia. Argazkia: Musutruk MundakaMusutruk Mundaka

Atzo, ostera, kirol jarduerak izan ziren protagonistak. Lehenago Santa Katalina egunez egiten zuten krosa berreskuratu du elkarteak, eta Santa Katalina Krosaz gain, familia artean herri jokoetan ibili ziren goizean: “Umeen jokoetan eta krosean oso ondo pasatu genuen, eta oso politak izan ziren”. Gero, berriz, aldarrikapenerako eta asteburua biribiltzeko partidua jokatu zuten Isla Kale Kiroldegian. Hain zuzen ere, emakume beteranoen partiduagaz amaitu zuten urteurren ospakizuna: Musutruk Mundakako emakumeek Athletic Clubekoen kontra jokatu zuten. Horiei esker ona adierazi diete mundakarrek: “Eskerrak eman nahi dizkiegu Athletic-eko beteranoen taldeko kideei, gurekin bat egiteagatik. Guztiok pozik amaitu genuen, eta eurak gure asmo eta helburuekin inplikatu ziren”.

Domekan, kontzertua. Bestalde, bere eskaintzarekin segitzen du Musutruk Mundakan, eta domeka honetan [maiatzak 17] musikaz beteko dute Santa Katalina baseliza. 13:00etatik aurrera, Bilbo eta Basurtoko kantariez osatutako Inmakuladako Abeslariak Abesbatzak kontzertua eskainiko du. Gorka Aginaga izango da piano-jotzailea eta Eduardo Lopez de Heredia zuzendaria.

Argazkia: Musutruk Mundaka

Inurri txikien jaia, ederra bezain aberatsa

Busturialdeko Hitza — 2026-05-07 15:50:35

“Iñurrien antzera pauso txikiz aurrera, amestera”, dio ETS musikaren abesti ezagunak, eta txikitasunetik amestea zer den ondo baino hobeto dakite eskola txikiek. Iñurri lana egiten dute egunez egun, eta emaitza oparoak lortzeko gai direla erakusten dute. Gaur [maiatzak 7], inurri horien topaleku izan da Gautegiz Arteaga: XIX. Busturialdeko Eskola Txikien Jaia ospatu dute.

Gautegiz-Arteagako Montorre Eskolak antolatu du aurtengo hitzordua, eta Urretxindorra (Muxika), Uzelai (Busturia), Mundaka eta Haizeder (Ea-Elantxobe-Ibarrangelu) eskolako lagunekin giro ederrean elkartu ziren. Gutxi gora behera 500 ikasle inguru bat egin dute jaian, baina irakasle, guraso eta laguntzaileekin ia 800 lagun elkartu dira.

10:15ean Montorre Eskolakoen harreragaz hasi dute jaialdia, herriko plazan, eta jarraian, horiek bertsoak eta koplak abestu dituzte, eta elkarrekin talde argazkia atera dute. Ondoren, dantza entseguak egin, eta 11:30ean hasi dute dantza ikuskizuna.

Betiko moduan, adin tarteetan banatuta egin dute dantzan. 2-3 urte bitarteko umeek Kilimak abestiaren erritmora dantzatu dute, eta 4-5 urte bitartekoek Ene Kantak-en Ikasle berri bat abestiarenera. Gero, Lehen Hezkuntzakoak atera dira plazaren erdira. Lehenengo ziklokoek The Uski’s eskualdeko taldearen Horrelako aukeratu dute euren koreografia eskaintzeko, bigarren ziklokoek Goazenen Dantza dezagun hil arte eta hirugarren ziklokoek Duplaren Ongi etorri.

Gero, berriz, jolasetarako eta tailerretarako tartea hartu dute, txokotan banatuta; batzuk herriko plazan elkartu dira, eta beste batzuk, ostera, parkean.

13:15ean elkarrekin bazkaldu ostean, 15:30ean agurtzeko ordua heldu zaie. Amaierako ekitaldia bertsoekin eta biribilketan elkartuta girotu dute, eta Gautegiz Arteagakoek Muxikakoei pasatu diete lekukoa; izan ere, datorren urtean Urretxindorra Herri Eskolan elkartuko dira euren jai handia ospatzeko.

Musutruk Mundaka elkartearen lehenengo urteurrena ospatuko dute asteburuan

Busturialdeko Hitza — 2026-05-07 08:36:28

Urtebeteko ibilbidea osatu dutela ospatzeko ordua heldu zaie Musutruk Mundaka elkarteko kideei. Horretarako, asteburu betea daukate aurretik. Izan ere, zapatuan [maiatzak 9] Musika Egunaren aitzakian elkartuko dira, eta domekan, berriz, Kirol Egunarenean. Herritarrei zapatuko zein domekako ekintzetan parte hartzeko gonbidapena luzatu diete.

Beraz, zapatuan herriko musikariak eta abeslariak elkartuko dituzte. 12:00etatik aurrera, “herria abesten” ipiniko dute, eta 14:00etan, berriz, elkartearen maskota den Gorritxoren urtebetetzea ospatuko dute: “Herriko zenbait abeslari eta musikari gonbidatu ditugu. Gainera, piano bat jaso dugu dohaintzan, eta konponduta daukagunez, zapatuan erabiliko dugu. Bestalde, Gorritxo herriko txakurra bihurtu da; oso ezaguna, maitakorra eta polita da”.

Santa Katalinatik hainbat abesbatza pasatu dira, baina lehenengo urteurrena ospatzeko, Mundakako Abesbatza aukeratu dute: “Performance berezia egingo dugu”.

Domekan, ostera, arineketan hasiko dute eguna: Santa Katalina Krosa berreskuratu dute. “Gure helburua ingurua berreskuratzea da, eta kasu honetan, urte askotan egin gabe egon den krosa berreskuratuko dugu. Lehenago, Santa Katalina egunean egiten zen”, azaldu dute elkarteko boluntarioek. 10:00etan hasiko dute krosa, eta 11:30etik aurrera, familia-jokoak egingo dituzte. Belaunaldiarteko jokoak egitea erabaki dute, “guztiek parte hartzeko”.

13:00etarako, berriz, Santa Katalinatik Isla Kale Kiroldegira joango dira, futbol partidu bereziarekin gozatzera. Elkarteko boluntarioek osatutako Musutruk taldeak Athletic Club-eko beteranoen kontra jokatuko du: “Athleticeko beteranoen nesken taldea etorriko da, eta sei jokalariko taldeak osatuko ditugu. Horrekin amaituko dugu asteburuko jaia”.

Eskaintza zabala. Egindako bideagaz eta lanagaz “pozik” daude elkarteko kideak. Kultur eta kirol jarduerak batzen dituen elkartea da, eta izenak berak ondo adierazten duen modura, doako eskaintza osatzen dute: “Gure helburu nagusia da herriarentzako ekintza desberdinak antolatzea, bizitza hobea lortzeko”. Santa Katalina baseliza dute epizentro, bertan egiten dituzte hitzaldiak, kontzertuak, erakusketak, bisita gidatuak eta abar. Eta, hain zuzen ere, baseliza konpontzea da euren nahia, “ez baitago egoera onean”.

Bederatzi urtez Santa Katalina egunez bakarrik irekitzen zuten baseliza, eta Musutruk Mundakak bere ateak parez pare zabaldu, eta “bizia” ematea lortu du. Elkartearen datuen arabera, 35.000 pertsona baino gehiago pasatu dira bertatik urtebetean, eta 250 egunez eduki dute zabalik, 1.000 ordu baino gehiagotan: “35.000 pertsona baino gehiago izatea kopuru oso garrantzitsua da. Gainera, herriko turismo bulegoak bost bat hilabete daramatza itxita, eta gu hasi gara zerbitzu hori ematen, kanpotik datozen bisitariei informazioa emanez”.

Ildo beretik nabarmendu dutenez, boluntario taldea dira, eta “beti daude beste talde eta elkarteei laguntzeko prest”. Besteak beste, kirol aholkularitza eta kirol prestakuntza ematen dute: “Beste elkarte batzuekin harremanetan gaude, eta esate baterako, helduen elkartekoei laguntza eskaintzen diegu. Gure helburua da herri hobe bat egiteko laguntzak ematea. Urtea bete dugu, eta espero dugu urte gehiago egotea gure lana eta gure helburuak betetzen“.

Instituzioen ekarpena. Santa Katalina baselizaren egoerarekin oso kezkatuta daude, “hezetasun arazoek eraginda, kaltetuta dagoelako”. Orain arteko ekintzekin 20.000 euro inguru bildu dituzte, eta herritarren ekarpenak eta dohaintzak ez ezik, bertako eta inguruko zenbait enpresa ere lagun eduki dituzte. Orain, “erronka handiena” instituzio publikoen laguntzak lortzea da: “100.000 euro behar dira baseliza konpontzeko. Mundakako Udalak, Bizkaiko Foru Aldundiak zein Eusko Jaurlaritzak gurekin bat egitea espero dugu, ea denon artean baseliza konpontzeko dirua biltzen dugun. Enpresa pribatu batzuen laguntza badaukagu, eta oso ondo portatu dira gurekin. Baina inguruan badaude beste enpresa handi batzuk ere, eta eurekin saiatuko gara. Hala ere, lehenengo erronka handia instituzioak dira”.

Herriko jendeak “ondo erantzun” du, “laguntza eta babesa” eman diete mundakarrek, baita kanpotarrek ere. Ahoz ahoko komunikazioari esker, jendea hurbildu dela aitortu dute: “Zentzu horretan, oso pozik gaude. Ikastetxe batzuetatik ere etorri dira eta etorriko dira ikasturte amaiera honetan”.

Urteurreneko ospakizunen egitaraua:

Maiatzak 9 (zapatua):
- 12:00. Herria abesten.
- 14:00. Gorritxoren urtebetetzea.
- 19:00. Mundakako Abesbatza.

Maiatzak 10 (domeka):
- 10:00. Santa Katalina krosa.
  - Kategoriak:
  - Mundakatzen (buelta bat)
  - 16 urtetik gorakoak (3 buelta).
  - 12 urtetik gorakoak (2 buelta).
  - 7 urtetik gorakoak (buelta bat).
  - Musutxiki (Santa Katalinan).
- 11:30. Herri jokoak familiekin, Santa Katalinan.
- 13:00. Futbol partidua, Isla Kale Kiroldegian: Musutruk VS. Athletic Club.

Ea, Elantxobe eta Mundakako portuetan hobekuntza eta segurtasun lanak egiten ari da Jaurlaritza

Busturialdeko Hitza — 2026-05-02 10:00:43

Hondartzarik bariko kostaldeko udalerrietan lanak egiten ari da Eusko Jaurlaritzako Portu, Itsas Gai eta Litoralaren Zuzendaritza, uda garaian udalerri horietan “zerbitzu egokiak eta segurtasuna bermatzeko” helburuagaz. Hori dela eta, zerbitzuak, azpiegiturak eta erabilera baldintzak hobetzeko jarduketak egiten ari da, besteren artean, Ean, Elantxoben eta Mundakan.

Izan ere, hondartzarik ez dutenez, uste dute arreta espezifikoa behar dutela herritarrentzat zein bisitarientzat “egokiak eta seguruak” diren eta “oinarrizko zerbitzuez hornitutako” espazio publikoak bermatzeko. Testuinguru horretan, Saila udalerri bakoitzaren errealitatera egokitutako esku-hartzeak garatzen ari dela diote, “ikuspegi praktiko eta emaitzetara bideratuarekin”. Koldo Goitia Portuetako zuzendariak esan du udalerri horien beharrei “erantzun zehatza” ematen adi direla: “Zerbitzuak indartuz eta azpiegiturak hobetuz, jende gehien biltzen den hilabeteetan portuetan segurtasuna bermatzen ari gara”.

Mundakako portuan “funtsezko jarduketak” egiten ari dira: komun publikoen lokalaren eta udako zaintza langileentzat den espazioaren berrikuntza egiten ari dira, baita kanpoko dartsenaren dragatzea ere, ontzien ainguratzea errazteko “ezinbestekoa” dena. Horrez gain, kostaldeko eremuko eskailerak konpontzen ari dira, eta segurtasuna indartuko dute ekainetik irailera bitarteko zaintza pribatuko zerbitzu baten bidez.

Elantxoben, esku-hartzeak portuaren segurtasuna eta erabilera-baldintzak hobetzera bideratuko dituzte, udan zaintza pribatua kontratatuz eta portuko biltegi baterako itxitura eginez. Jarduketa hauek lehendik egindako lanekin osatzen direla gehitu dute, hala nola udako igerilekurako sarbideko barandaren konponketarekin, inguruko irisgarritasuna eta segurtasuna hobetuz.

Bestalde, Ean, Jaurlaritzak “lankidetza estua” izan duela udalarekin azpimarratu dute, sasoiko oinarrizko zerbitzuak jartzea errazteko helburuaz. Horrela, portuan dutxak eta hondartzako etxolak jartzea baimendu dute, “jende gehien dagoen hilabeteetan kostaldearen erabilera-esperientzia hobetzeko”.

Jarduketa horiekin lurralde orekaren alde egin dutela gaineratu du Goitiak: “Lurralde-oreka bermatzea da udalerri hauetan ere jardutea, eta egitateekin egitea: inbertsioekin, mantentze-lanekin eta udalekin lankidetza zuzenarekin. Jarduketa hauek sendotu egiten dute Eusko Jaurlaritzaren apustua, portuaren eta udalerriaren arteko harremana indartzen duen kudeaketa-eredu baten aldekoa, tokiko biztanleen bizi-kalitatea hobetuz eta kostaldeko gune hauen erakargarritasuna sustatuz, erabilera antolatu, seguru eta jasangarri baten ikuspegitik”.

Herritarrentzako inkesta, Euskararen Sustapenerako Plan Estrategikoa definitzeko

Busturialdeko Hitza — 2026-04-22 15:56:50

Mundakako Udaletik aurreratu dutenaren arabera, herritarrei zuzendutako inkesta kanpaina martxan ipini dute, udalerrian euskararen erabilerri buruz dauden “iritziak, ohiturak eta proposamenak” jasotzeko asmoz. Jarduera hori Euskararen Sustapenerako Plan Estrategikoa jorratzeko lan prozeduraren barruan kokaturik dagoela azaldu dute. Mundakarrei galdetegi bat luzatu diete, herrian dagoen “errealitate soziolinguistikoa” ezagutze aldera, baita euskararen erabilera “indartsuagoa” den edota “zailtasun handiagoak” dituzten alorrak ezagutzeko ere.

Egitasmoaren noranzko nagusia da herri mailako hizkuntz errealitatea “herritarrekin batera” ezagutzea; horrez gain, Mundakan euskararen “etorkizuna gidatuko” duten “lehentasunak edota ekintzak” zehaztea ere helburu dute. Egun, ezagutza maila esanguratsua izanagatik ere, eguneroko-eguneroko erabileran “beherakada” antzematen dela nabarmendu dute. Horrenbestez, euskararen presentzia “esparru guztietan” hauspotzeko helmugadun neurriak sustatzea “erabat beharrezkotzat” dute: “Hala nola, familian, eskolan, aisialdi jardueretan merkataritzan nahiz administrazioaren esparruan”.

Aipatutako inkesta modu bitara bete ahalko de: Internet bidez edota paperean, udaletxean jarri duten postontzian entregatuz. Parte hartzeko epemuga apirilaren 27a izango da. Horrez gain, maiatzaren 7an, herritarren ideiak eta hausnarketak partekatzeko saio irekia egingo dute; 18:00retan jarri dute hitzordua, Gaztelekuan. Alde horretatik, udal ordezkaritzak mundakarrei parte hartzeko deialdia luzatu die: “Herritarren inplikazioa funtsezkoa da, tokiko errealitatera egokitutako plan eraginkorra diseinatu ahal izateko”.

Mundakako AT, Espainiako txapeldun

Busturialdeko Hitza — 2026-04-20 14:27:43

Arraunzaleentzako, batel sasoiaren amaiera eta trainerillenaren hasiera izan da asteburu honetan bizitakoa. Legutioko (Araba) Urrunaga urtegiak Espainiako Batel Txapelketa hartu du, eta Elantxobe, ostera, Bizkaiko Batel Ligaren lehendabiziko jardunaldiko lehen bi estropaden topagune izan da. Arabar uretan, Orio eta Pasai Donibane izan dira nagusi absolutu mailan, baina arraunlaririk gazteenen lehietan hala Busturialdeko, nola Lea-Artibaiko arraun klubek maila itzela eman zuten. Hain zuzen, bai Bizkaiko, bai Euskadiko Batel Txapelketak poltsikoratuta, Espainiako lehian ere garaile izan ziren Mundakako Arraun Klubeko emakumezko kadeteak. Gazte zein kimu mailetan, berriz, Ondarroa Arraun Elkartea maisuki nagusitu zen emakumezkoen estropadetan; ondarrutarrek, gainera, txapelketako talderik onenaren sari berezia ere jaso zuten.

Kadete mailan, Mundakako ATko emakumezkoek ez zuten aurkaririk topatu uretan: Cabo da Cruz boteretsuarekiko ia hiru segundoko aldea urratuta (07.16,85), bandera etxera eroan zuten. Gazte mailan, erakustaldi handia eman zuen Ondarroa AEk, Espainiako Txapelketa estreinakoz patrikaratzeko: gazte mailako emakumeek 09.55,98an biribildu zituzten lanak. Gizonezko gazteak ere ez ziren atzean laga, zilarreko domina lortu baitzuten, 09.05,84ko erregistroa eginda. Emakumezko kimu mailan, 02.24,96ko markarekin nagusitu ziren ondarrutarrak; kategoria horretan, bestalde, Isuntza Arraun Elkartea podiumetik segundo bat baino gutxiagora geratu zen; beren denbora 02.33,11koa izan zen. Emakumezkoen hau mailan, baina, garaipenak ez zien ihes egin lekeitiarrei: 04.48,10eko denborarekin gailendu ziren; bigarren postua Mutriku Arraun Taldearentzat izan zen, 04.52,61ekoarekin.

Trainerillen lehiako lehena.
Asteburuan, bestalde, Busturialdeko eta Lea-Artibaiko klubek Bizkaiko Trainerilla Ligako lehen bi jardunaldiak lehiatu zituzten, Elantxoben, zapatuan eta domekan. Hurrengo bi asteburuetan, hurrenez hurren, Lekeitiok eta Ondarroak hartuko dituzte lehiaketaren jardunaldiak. Bermeo Arraun Elkartea nagusi izan zen gizonezkoen absolutu mailan: zapatuan, Bermeo A-k 14.38,03ko denborarekin lortu zuen garaipena, Isuntza B-ren (14.57,89) eta Bermeo B-ren (15.10,67)ren aurretik. Isuntza A eta C, Mundaka eta etxeko talde Elantxobe sailkapenean urrunago geratu ziren. Emakumezko absolutuen lehian, Ondarroak 17.34,38koarekin irabazi zuen lehen estropada; Isuntzak osatu zuen lehia hartako sailkapena.

Emakumezko gazte mailan, lekeitiarrek, azken postua barik, garaipen estua lortu zuten; Isuntzak segundo biko arrakala (18.17,31) urratu zien elantxobetarrei (18.19,20). Etxekoek, gainera, gizonezkoen estropadan hirugarren postua lortu zuten, 16.23,55eko erregistroa sinatuta. Zierbena nagusitu zen lehia hartan; Isuntza eta Mundaka ohorezko postuetatik urrun aritu ziren. Kadete mailan, Isuntza nahieran gailendu zen (07.46,08) gizonezkoen artean, baina laugarren postuagaz (09.07,17) konformatu behar izan zen emakumezkoen estropadan; proba hura Itsasoko Amak irabazi zuen, Ondarroaren (08.37,57) aurretik.

Domekako bigarren jardunaldian, bermeotarrek erabateko dominantzia uretaratu zuten gizonezkoen absolutu mailan: lehen hiru postuak eskuratu zituzten, hurrenez hurren, Bermeo A, B eta C taldeek; garaileek 14.54,18an gelditu zuten erlojua. Jarraian sailkatu ziren Isuntza, Mundaka eta Elantxobe. Emakumezkoen artean, Ondarroak ere nagusitasun osoz (18.12,99) irabazi zuen estropada, Isuntzari ia minutuko aldea (19.03,50) aterata. Lekeitiarrek, hori bai, emakumezko gazteen estropada irabazi zuten (19.33,08). Gizonezkoen artean, aurreratuena Mundaka (16.31,639 izan zen; estropada hura Deustuk irabazi zuen. Kadete mailan ere, klub lea-artibaitarrak sendo asko azaldu ziren: Isuntzak emakumezkoen estropada ozta-ozta irabazi zion (08.43,33), Ondarroari (08.4466), eta Elantxobe laugarrena izan zen (08.59,63). Lekeitiarrek, gainera, hirugarren postua ere lortu zuten gizonezkoen artean (08.03,43).

5.000 bisitaritik gora hartu ditu Santa Katalinak

Busturialdeko Hitza — 2026-04-13 13:23:33

Musutruk Mundakak hainbat kultur egitasmo atondu ditu Santa Katalinan, baselizaren birgaitzea sustatzeko eta haren inguruko aisia zein interesa bultzatzeko. Antzerkitik zuzeneko musika saiora edota xake txapelketa herrikoira, denetarikoak antolatu dituzte. Azken bi ekimenak, hain zuzen, iragan asteburukoak izan dira: zapatuan [apirilak 11], 13:00etan hasita, Bermeoko Abesbatzak ermitan bertan kontzertua eman zuen. Emanaldi “zoragarria” izan zela nabarmendu dute antolatzaileek. Abesbatzaren saioa, gainera, ez da asteburuko hitzordu bakarra izan. Domekan [apirilak 12], baselizaren aldeko azoka herrikoia egin zuten, 12:15ean.

Hala herritarrek, nola bisitariek bikain erantzun diote antolakuntzaren deialdiari. Izan ere, Aste Santuko oporraldian, 5.000 lagunetik gora pasatu dira Santa Katalinatik; bisitaldi gidatuak nahiz eskualdeari buruzko informazio turistikoa eman dituzte, halaber. Bestalde, baselizaren konponketa bultzatu gura dute elkartekideek; 100.000 euro lortzea da Musutruk Mundakaren jomuga nagusia. Herritarrei “irtebidearen parte” izateko eskaria luzatu diete, eta, ekarpen ekonomikoak egiteko, ES90 2095 0130 24 9016854250 kontu korronte zenbakia plazaratu dute; ekarpena egiterakoan, Santa izena jartzeko eskatu dute. Ez hori bakarrik: maiatzeko bigarren asteburuan, Musutruk Mundakak bere ibilbideko lehen urtea beteko du, eta “ezustekoz beteriko jai handia” egingo dutela iragarri dute.

Santa Katalinaren aldeko merkatua eta kontzertua, apirilean

Busturialdeko Hitza — 2026-03-31 15:46:29

Musutruk Mundaka kultur elkarteak merkatu txikia antolatu du apirilaren 12rako. Merkatu herrikoi hori Santa Katalina baselizaren aldekoa izango da, eta ermitaren atzealdean bertan egingo dute, 12:15ean hasita. Ez hori bakarrik: Bermeoko Abesbatzak, bere 70. urtemuga tarteko, kontzertua emango du Santa Katalinan; apirilaren 11n izango dela aurreratu dute, 13:00etatik aurrera.

Mundaka Arraun Taldeak hiru bandera lortu ditu Bizkaiko Batel Txapelketan

Busturialdeko Hitza — 2026-03-30 17:04:35

Sestaoko uretan aritu dira asteburuan Mundakako, Elantxobeko eta Bermeoko arraunlariak, bertan lehiatu baita, beste behin, Bizkaiko Batel Txapelketa. Zapatuan [martxoak 28] sailkapen estropadak eginda, atzo [martxoak 29] erabaki ziren banderak; guztira lau izan dira Busturialdeko taldeek eskuratutakoak. Mundaka Arraun Taldearentzat “egun historikoa” izan zen atzokoa, lehen aldiz hiru bandera eskuratu baitzituzten Bizkaiko txapelketan: kimu mailako kategoria mistoko eta emakumezkoen zein gizonezkoen kadete mailakoa.

Mundakarrek 02:31,14 segundoko denboragaz lortu zuten kimu mailako garaipena, lanak Kaikuren (02:36,90) eta Itsasoko Amaren (02:43,28) aurretik. Ondarrutarrek laugarren bukatu zituzten lanak 02:49,45eko denboragaz eta Arkotek itxi zuen sailkapena, 03:11,91koagaz. Emakumezkoen kimu mailan, ostera, Ondarroa izan zen onena: 02:28,59 behar izan zituzten. Atzetik sailkatu ziren Isuntza (02:37,51) eta Elantxobe (02:39,22). Kimu mailako gizonezkoetan, laugarren amaitu zuten elantxobetarrek (02:56,06), bandera irabazlea izan zen Zierbena baino ia 29 segundo gehiago behar izan baitzituzten proba amaitzeko.

Elantxobek ordezkaritza izan zuen haur mailako kategoria mistoan, eta maila ona erakutsita, bigarren denbora onena egin zuten, Itsasoko Amaren (05:30,02) atzetik: Elantxobe Arraun Taldekoek 05:36,14ko denboragaz gelditu zuten erlojua, santurtziarrek baino sei segundo motelago. Isuntzak seigarren amaitu zituen lanak kategoria mistoan (05:45,22), baina emakumezkoetan bandera Lekeitiora eramatea lortu zuten, 05:27,77ko marka ezarrita. Itsasoko Amak (05:34,23) eta Ondarroak (05:35,40) osatu zuten podiuma. Atzetik sartu ziren Arkote (05:57,98), Mundaka (06:00,04), Deusto (06:04,15) eta Elantxobe (07:36,37).

Haur mailako gizonezkoen kategorian lehia estua egon zen arren, deustuarrak izan ziren azkarrenak, 05:15,08ko denboran gelditu baitzuten erlojua, Itsasoko Amak baino 75 ehunen azkarrago. Elantxobekoentzat izan zen hirugarren postua (05:20,62) eta bermeotarrentzat, laugarrena (05:21,88). Isuntza, Zierbena eta Ondarroak osatu zuten sailkapena.

Kadete mailan emaitza izugarriak lortu zituen Mundaka Arraun Taldeak; izan ere, emakumezkoen kategorian heldu zen mundakarren bigarren bandera. Bigarren ziabogan Ondarroa aurretik bazuten ere, azken luzean aurrea hartu eta 07:47,93kko denboran gelditu zuten kronoa arraunlariek, ondarrutarrei ia 3 segundoko tartea aterata. Isuntzak hirugarren amaitu zuen, ia 11 segundora. Gizonezkoen tandari dagokionez, lehia guztiz estua izan; halere, mundakarrak banderagaz itzuli ziren etxera, 07.03,73ko denboragaz. Deustuarrek 34 ehunen gehiago behar izan zituzten eta podiuma itxi zuen Isuntzak, berriz, 5 segundo gehiago.

Argazkia: Bermeo Arraun Argazkiak

Gazte mailako emakumeen proba laugarren bukatu zuten mundakarrek, estropadaren jaun eta jabe izan zen Ondarroak ezarritako denboratik (10:17,14) urrun: 10:43,31 behar izan zituzten estropada amaitzeko. Emakumezkoetan bezala, haur mailako gizonezkoetan ere Ondarroa nagusitu zen (09:25,43), laugarrenak izan ziren Mundaka Arraun Taldekoek baino 13 segundo azkarrago gelditu baitzuten kronoa (09:38,50).

Mundakarrek 23 urte azpiko kategoria ere lehiatu zuten, baina ezin izan zuten Zierbenak (09:24,86) ezarritako erritmoa jarraitu. Hala, hirugarren amaitu zuten txapelketa, Deusturen atzetik, 09:37,52ko marka ezarrita. Isuntza (09:39,06) eta Portugalete (09:46,17) izan ziren laugarren eta bosgarrenak, hurrenez hurren.

Absolutu mailako emakumezkoen kategoria izan zen Busturialdeko ordezkaritza izan ez zuen proba bakarra. Horretan, Kaiku nagusitu zen estropada 10:14,66ko denboran amaituta. Deusto (10:16,21), Isuntza (10:22,79), Ondarroa (10:34, 80) eta Portugaletek (11:29,68) osatu zuten sailkapena.

Argazkia: Bermeo Arraun Argazkiak

Gizonezko absolutu mailan, berriz, Bermeok bigarren postuan amaitu zuen estropada; Galipoek ezarritako 09:06,29ko denbora baino bost segundo gehiago (09:11,53) behar izan zituzten estropada amaitzeko.

“Eskualdearen garaipena”.
Mundaka Arraun Taldeko entrenatzaile Sabino Astigarragak atzokoa harrobiarentzat “egun polita” izan zela nabarmendu du, azken urteetako lanaren fruitua jaso baitute: “Eskualdeko gazteek osatutako ontziak dira, Bermeoko, Mundakako, Gernika-Lumoko… oro har Busturialdeko gazteak daude. Eskualdearen garaipena da”. Izan ere, hiru banderen lorpena “Mundako Arraun Taldearen ideiaren garaipena” ere badela deritzo, Busturialdeko taldeak batu eta elkarlanean jardutea helburua duena.

Halere, oraindik badagoela zer egin azpimarratu du. Astigarragaren ustez, atzoko bistaratutakoari jarraipena ematea dagokio arraun taldeari, “lanaren emaitza” delako: “Atzokoak ez du gehiago egingo dugula esan nahi, baina lanean jarraitu behar dugu, jarraipena eman behar diogu, denok dakigulako arrauna ziklikoa dela. Lan egiteak ez ditu beti emaitza onak bermatzen, baina lan ezak porrota dakar beti. Gu ondo gabiltza lanean, eskualdeko taldeak elkarrekin lan egiteko ideia txertatuz”. Izan ere, eskualdeko lan bateratuak eraman duela Astigarraga Mundakako entrenatzaile lanetan jardutera: “Bestela ez nintzen etorriko. Eskualdeko lana egitera etorri naiz”.

Zapatuko sailkapen estropadan parte hartu zuten ontzi guztiak sailkatu zituzten mundakarrek banderen lehiara, eta hiru urrezko dominagaz, brontzezko bategaz eta bi laugarren postugaz itzuli ziren etxera. Denetaz harro egonik ere, gazte mailako laugarren postuak “pena apur batekin” bizi izan zituen entrenatzaileak, “lan txukuna” egiten ari direlako.

Bizkaiko Txapelketa igarota, Euskadiko Batel Txapelketara begira lanean jarraituko dute mundakarrek. “Zailagoa” izango denaren jakitun, ilusioa bere horretan mantentzen dute arraunlariek.

Elantxobe, Bermeo eta Badok 13, III. Alakrana Erronkan garaile

Busturialdeko Hitza — 2026-03-23 14:24:49

Gogoangarria izan zen zapatuko [martxoak 22] Alakrana Erronkaren III. ekitaldia. Eguraldiagatik dataz aldatu behar izan arren, bigarren saiakerak fruitua eman zuen, eta Mundakako Arraun Taldeak antolatutako arraun arratsaldea ederra besteko lehiatua izan zen. Beterano mistoen eta nagusi mailako gizonezko zein emakumezko estropada lehiatu zituzten. Eskualdeko hiru taldeek maila handia plazaratu zuten eta haietako bik, Elantxobek eta Bermeok, banderak ere altxatu zituzten.

Ipar haize gozoagaz eta olatu handiegirik gabe, 3.350 eta 5.350 metroko estropada guneari aurre egin behar izan zioten parte hartzaileek; beterano mistoek eta emakumezkoek San Antonio hondartzaren parean eduki zuten hasiera eremua, eta gizonezkoek, ostera, Muruetako ontziolan. Hain zuzen, beterano mailan egon zen lehiarik estuena. Badok 13 talde oriotarra faborito nagusia zen, eta hautagaitza hura uretan berretsi zuen, maila handiko garaipena lortuz. Hori bai, etxeko taldeak gauza oso gaitz ipini zizkien gipuzkoarrei, eta lau segundotara helmugaratu ziren. Ñabardurarik txikiena ere “esangura handia” eduki zuen estropadan, eta edozein maniobra “bikain egitea” giltzarri izan zen. Azkenean, Badok 13k 15.06,42an gelditu zuen erlojua. Mundaka A izan zen, irabazleagaz batera, lanak hamasei minutuen langatik behera biribildu ahal izan zituen bakarra; bisonteek 15.10,84ko erregistro “oso lehiakorra” sinatu zuten etxean.

Argazkia: Bermeo Arraun Argazkiak.

Atzetik ere egon zen lehiarik. Izan ere, beteranoen estropadak erakarri du aurtengo parte hartzerik azpimarragarriena. Hirugarren postua Fortunarentzat (16.11,29) izan zen, Iberiaren (16.18,26) eta Bilboren (16.24,58) aurretik. Ondoren, honakoak sailkatu ziren: Esteirana, seigarren (16.28); Plentzia, zazpigarren (16.32,17); Aizburua, zortzigarren (16.53,71); Mundaka B, bederatzigarren (17.02,36); azkenik, Sestao, hamargarren (17.33,50).

Emakumezkoen nagusi mailan, Elantxobe izan zen parte hartzaile bakarra. Hain zuzen, datozen urteei begira, emakumezkoen esku hartzea “bultzatzen jarraitzea” izan da antolatzaileen helburua: “Aurretiaz talde gehiago izena emanda zeuden, baina data aldaketak kalte egin zigun, martxoan hainbat klubek beste toki batzuetan arraun egitea aurreikusita baitzuten. Hurrengo urteetan, arlo horretan behar egiten segituko dugu”. Elantxobetarrek 18.01,54ko denbora egin zuten.

Gizonezkoen estropadak ere azken orduko hutsegiteak izan zituen, eta hark lehia eskualdeko kluben artean erabakitzera mugatu zuen. Bermeo zen hautagaia, eta ez zuen kale egin: 20.36,93ko denboragaz irabazi zuen proba; Mundaka bigarrena izan zen, 21.12,72koagaz; Elantxobe, hirugarrena, lanak 22.09,90ean osatuta. Antolatzaileek bermeotarren maila nabarmendu dute: “Jakitun gara TKE Ligako maila oso handia dela, baina Bermeok erakutsi zuen aurtengo denboraldian Oriorekin edota gainontzeko klub handiekin parez pare lehiatzeko prest dagoela; Mundakan beren mailaren lagin ederra plazaratu zuten”.

Egonkortzea, jomuga.
Bestalde, arratsalde osoan zein iluntzean Mundakan nabarmendutako “arraun giro atsegina” azpimarratu dute: “Tala jendez bete zen, probez gozatzeko; behin lehia amaituta ere, herrian lagunarteko aldarte itzela egon zen eta, hortaz, dena bikain atera zela esan daiteke. Hurrengo urteari begira, parte hartzea handitzea, talde gehiago erakartzea, emakumezkoen arraunaren bultzadan lanean jarraitzea eta, oro har, Alakrana Erronka taldeen egutegietan finkatzea izango dira bilatu beharreko helburuak”.

Goitiz bideko argiztapena hobetu dute

Busturialdeko Hitza — 2026-02-10 15:48:25

Mundakako Udaletik aditzera eman dutenaren arabera, Goitiz bideko argiteriari eragiten dien hirigintza lanak egin dituzte. Hain zuzen, eremu hori irisgarriago eta seguruago egin asmoz, argiteria hobetzean ipini dituzte indarrak. Lanak aurrera eroateko, aldundiak 17.889,71 euroko diru laguntza eman dio udalari; diru horri esker, hamahiru kale argi berri jarri dituzte Goitiz bidean.

Era berean, udaletik aurreratu dute inguru horri dagozkien esku hartzeak “oraindik ez direla amaitu“: “Udal gobernu taldeak lanean jarraituko du eremu horretan,hobekuntzak eginez, ibilbide osoaren argiztapen berritzea biribildu arte.

Argazkia: Mundakako Udala.

Gazte Zar Dantza Taldeak aratusteetako entseguetarako deia egin du

Busturialdeko Hitza — 2026-02-02 13:18:25

Urteko ospakizunik errotuenetako eta berezienetakoak, inauteriak, ate joka dituzte mundakar herritarrek. Gaur [otsailak 2] eta etzi [otsailak 4] jaiak Agate Deunaren ospakizunagaz bat egingo baldin badu, aurrerantzean aratusteetan bete-betean bilduko dituzte indarrak. Gaur, Antzinako Aratuste Egunez, herriko txistulariek kaleak girotuko dituzte, iluntzean. Eguaztenean, ostera, eskolako haurrak eske errondan ibiliko dira herriaren bazter batetik bestera; lehenago, gainera, nagusien egoitzak bisitatuko dituzte. Iluntzean, Mundakako Abesbatzak kalejira egingo du.

Inateriei begira, hilaren 14tik 17ra bitartean ospatuko dituzte, eta otsailaren 15a, Aratuste Eguna, izango da ospakizunaren gailurra. Beraz, Gazte Zar Dantza Taldeak herritarrei jaiotan parte hartzeko deialdia luzatu gura die, eta entsegu saioak prestatu ditu horretarako. Gaurko ipini dute lehendabiziko hitzordua, 18:00retan. LH 1etik 4ra arteko umeei egin diete deia, eta deialdi hori errepikatu eingo dute hilaren 9an, ordu berean. LH5etik gorakoek, aldiz, otsailaren 11n edukiko dute entseatzeko aukera, 19:30ean hasita.

Urdaibai Renteriak Euskal Ligara igoera lortu du

Busturialdeko Hitza — 2026-01-27 18:24:50

Urdaibai Eskubaloi Taldeak txapelketaz josirik asteburu bete-betea eduki du. Emakumezko kadeteek eta emakumezko zein gizonezko gazteek Euskal Ligarako igoera jokatu dute Andoainen, Eibarren eta Bermeon. Jokatu ez ezik, kadeteen Urdaibai Renteria taldeak maila igoera ere lortu du.

Kadeteena, Andoainen jokatutakoa, igoera fase “gogorra eta landua” izan dela azaldu dute. Barikuan, 29 eta 24 gailendu ziren, Muskiz moduko arerio “lehiakorraren” kontra. Zapatuan, puntu bakarragatik, 37 eta 36, galdu zuten bigarren partidua, Bera Beraren aurkakoa. Domekan, etxeko talde Leizaran 29 eta 28 menperatu zuten. Horrenbestez, aurrerantzean Euskal Ligaren azken fasea jokatuko dute, alegia, kategoria bat gorago eta Euskal Herriko “hamabi talderik puntakoenen artean” arituko dira. “Etorkizunerako urrats oso baliagarria” izan da igoera, azaldu dutenez, eta lantaldea maila berriaren eskakizunetara “egokitu” beharko da orain.

Emakumezko gazteen taldeak, Urdaibai Lurunak, Eibarren jokatu zuten igoera kanporaketa. Bera Beraren, “Euskal Ligako talde baten”, aurka 33 eta 20 galdu zuten; Berangok aurka, aldiz, 36 eta 25 garaitu zituzten; azken lehian, 26 eta 32 irabazi zien Eibarrek. Morala altxatzeko aukera edukiko dute, edozelan ere: “Bizkaiko Kopa lehiatzen hasiko gara orain; finalera heltzea eta garaipenaren borrokan ibiltzea espero dugu”. Gazte mailako gizonezkoek, AUG Urdaibaik, Arene kiroldegian jokatu zuten igoera, baina ezin izan zuten lortu, “oso lehiakor” azalduagatik ere. Salleko 37 eta 30 menpean hartuz abiatu zuten asteburua. Zapatuan, “etenik gabeko borroka latzaren” ostean, 31 eta 30 irabazi zioten Usurbili. Domekan, baina, Eibarrek 26 eta 37 irabazi zion eskualdeko taldeari. Partiduz partidu bizi izan dute asteburua bai Urdaibai ETko kideek, bai jarraitzaileek. Era berean, “erakutsitako jarreraz oso harro” agertu dira.

50 proposamenetik gora eta 331 boto

Busturialdeko Hitza — 2025-12-01 17:35:55

Mundakako Udalak 2026ko udal egutegian agertuko diren hamabi argazkiak zehazteko lehiaketa herrikoiaren irabazleak plazaratu ditu. Gogoangarria izan da aurtengo ekitaldia, proposamen garaileak herri bozketa bitartez hautatu baitituzte eta mundakarrek txapelketarekiko “inplikazio handia” erakutsi baitute. Hain zuzen ere, azaroaren 24tik 28ra bitarteko bozketa epean, 331 herritarrek eman zituzten beraien botoak. Jasotako proposamen kopurua ere ez da makalagoa izan: 50 argazkitik gora aurkeztu dituzte, herriko “paisaiak, txokoak, tradizioak eta eguneroko uneak” bistaratzen dituztenak.

Lehiaren oinarriek zehaztu moura, argazki hautatuen egileek 30 euroko bonua jasoko dute sari, “herriko saltokietan” baliatu ahalko dutena. Abenduaren 9tik aurrera, udal ordezkaritza garaileekin hartu-emanetan ipiniko dela iragarri dute, “bonu horien banaketa koordinatzeko”. Bestalde, bi argazkiak bidali, bai botoa eman duten herritarrei “eskerrik beroenak” eman dizkie udalak: “Herritarren sormenak, konpromisoak eta begiradak ahalbidetu dute, aurten ere udal egutegiak Mundakaren nortasuna, aniztasuna eta edertasuna leialtasunez islatzea”.

Boto gehien jaso dituzten hamabi irudiak, 2026ko egutegiaren parte izango direnak, honakook izango dira:

1. Entre el cielo y el mar – 111 boto

2. Itsasora begira dauden etxeak – 100 boto

3. Bihotzeko egunsentia – 94 boto

4. Portuko kateak – 83 boto

5. Surf eguna – 77 boto

6. Goizean – 76 boto

7. Euskaldun herri bat – 71 boto

8. Mundaka Borda – 69 boto

9. Portuko koloreak egunsentian – 67 boto

10. Burdina eta kresala – 65 boto

11. Egunsentia Santa Katalinan – 65 boto

12. Zapidxek buruen – 63 boto