Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Elexalde inguruan babes publikoko lehen 10 etxebizitza eraikiko dituzte, eta dagoeneko esleituta daude

Busturialdeko Hitza — 2026-05-02 09:27:00

Mendatako Udalak dagoeneko esleitu ditu Elexalde inguruan eraikiko dituzte babes publikoko lehen 10 etxebizitzak. Jarduera hori 23 etxebizitza aurreikusten dituen proiektu zabalago baten barruan kokatzen da, eta udal ordezkariek diote hori “aurrerapauso nabarmena” dela herrian antzemandako behar nagusienetako bati erantzuteko: Mendatan bizitzeko “benetako aukerak” sortzea, “sustraitzea erraztea”, eta, bereziki gazteei Mendatan geratzeko eta etorkizuna eraikitzeko bidea ematea.

Babes publikoko etxebizitzak sustatzeko lehen fasean, proiektuak 10 etxebizitza eraikitzea aurreikusten du, dagozkien trasteleku eta aparkalekuekin. Etxebizitza horiek bi bloketan banatuko dituzte, bosna etxebizitza bloke bakoitzean, sarbide independenteak, lorategi espazio pribatuak eta lurraren malda naturalera egokitutako antolamendua izango dutenak. “Diseinuak funtzionaltasunaren, erosotasunaren, energia-eraginkortasunaren, bizigarritasunaren eta irisgarritasun unibertsalaren irizpideak hartuko ditu kontuan, etxebizitza babestuaren arloan indarrean dagoen araudiaren arabera”, gehitu dute.

Eta esleipendunek profil desberdinak nabarmendu dituzte, gehienak eskualdeari lotutakoak direla azpimarratuta, eta gazteen presentzia nabarmena dela gehituta: “Honek proiektuaren helburu estrategikoetako bat indartzen du: biztanleria finkatzea ez ezik, gaztetzea ere bai”.

Hurrengo pausuak
Proiektua duela bost urte abiatu zuen udalak, Elexaldeko lur sailak erosi zituenean. Ordutik hona, hainbat lan egin behar izan dituzte, tartean saneamendu-obrak. Udalak bere gain hartu du proiektua idaztea, kooperatiba kudeatzaile bat sortzea sustatu du, eta higiezinen agentzia batekin hartu-emanak izan ditu egitasmoa bideragarri egiteko.

Kooperatiba duela hilabete batzuk eratu zutela jakinarazi dute, une honetan proiektua birpartzelazio fasean dagoela adierazita. Aurreikuspenen arabera, uda ostean ekingo zaio sustapenari, eta behin obrak hasita, urte eta erdi eta bi urte arteko epea aurreikusten da etxebizitzak amaitzeko.

Gainera, eremuko urbanizazio lanak ere udalak egingo ditu, inguruari beharrezko zerbitzuak emante “esku hartze integrala” osatuz. “Benetan pozgarria da ikustea ibilbide luzeko proiektu hau pausoz pausu aurrera doala eta errealitate bihurtzen hasi dela. Aukerak sortzea da, jendea herrian, eskualdean, geratzeko eta bere bizi-proiektua hemen garatzeko. Ilusioz jarraituko dugu ildo horretan lanean”, adierazi du Mendatako alkate Joseba Malleak.

Ekimen horren bidez, alkateak dio berretsi egiten dutela “udalerri bizi, orekatu eta etorkizuna izango duen eredu baten aldeko konpromisoa”, non etxebizitza —eta, bereziki, etxebizitza babestua— funtsezko elementu gisa sendotzen den, biztanleria erakartzeko eta finkatzeko ez ezik, belaunaldien arteko erreleboa eta komunitatearen bizitasuna bermatzeko ere.

21.000 zuhaitzen bila, denboraldiko azken landaketan

Busturialdeko Hitza — 2026-03-25 13:01:59

Negua atzean uzteagaz eta udaberria bertaratzeagaz batera, Lurgaia Fundazioak denboraldiko azkenengo landaketa egingo du apirilaren 2an. Mendatako Berrekondo inguruan egingo dute, 09:30ean hasita. Aurtengo denboraldian 20.000 zuhaitz landatu ondoren, “21.000 landaketen bila” joateko deia luzatu diete herritarrei. Izen ematea Internet bidez egin beharko dute interesdunek, eta epemuga bihar [martxoak 26] izango da.

Apirilaren 2an, 09:30ean ipini dute hitzordua, Muxikako Ariatzako 1845 autobus geltokiaren aldameneko aparkaleku gunean. Bertan, parte hartzaileak autoetan antolatuko dira, Berrekondora joateko. Antolatzaileek ura eta jateko zer edo zer eroateko gomendatu dute, baita praka luzea janzteko ere; horrez gain, mendiko botak eta uretarako arropa edo aterkia ere komenigarriak izan daitezkeela ohartarazi dute. Izena eman ostean, antolakuntzak baieztapena bidaliko duela azaldu dute.

Zarrabentako ehun urteko eukaliptoa neurtzeko bilduko dira

Busturialdeko Hitza — 2026-03-18 09:30:18

Mendatan hitzordu berezia finkatu dute zapaturako (martxoak 21). Izan ere, Mendatako Zarrabenta auzoan 100 urte inguru dituen eukalipto bat dago, ustez Mari Tere Agirre mendatarrarena dena. Ba, zapatuan bertan eukaliptu hori neurtzeko bilduko dira zenbait herritar, aditzera eman dutenez. Benjamin Erleaga izango da zuhaitzaren neurketaren protagonista, bera izango baita neurtuko duena.

Zarrabarri Elkartean elkartuko dira interesdun guztiak, 12:30ean, eta azaldu dute handik zuhaitza dagoen tokira arte oinezko txangotxoa egingo dutela: “Guztiok batera joango gara oinez eukaliptura heldu arte. 5 minutu inguruko txangoa izango da oinezean, eta errepide ertzetik joango gara. Aldaparik gabeko bide erraza da”. Neurketa bera, ordea, 13:00ak aldera izango dela aurreratu dute.

Horrez gain, Erleagak neurria esan bitartean, ustezko neurriaren inguruko apusturen bat zein beste egiteko aukera ere izango dela nabarmendu dute, beti ere “giro lagunkoiean”. Behin neurria dakiten, gainera, Zarrabentako txokora bueltatuko dira bertaratzen diren guztiak, eta esan dute han pintxoak eta edariak egongo direla denentzat.

Gauzak horrela, zapatuan Mendatara animatzeko deia zabaldu dute herritarrek, herrian hain esanguratsua den eukaliptoaren inguruko etengabeko zalantza horiek argitzeko “hitzordu ezin hobea” izango baita, eta gainera gero mokadutxoa ere izango baita.

Lurgaiak Berrekondo ingurua baso autoktono bihurtzen jarraituko du landaketak eginez

Busturialdeko Hitza — 2026-01-13 11:46:45

Lurgaia Fundazioak baso landaketa egingo du Mendatan, zapatuan (urtarrila 17). Hain zuzen ere, Berrekondo bailaran egingo dute landaketa, “oso erraz” lantzen den lursailean. Inguru horiek pinuen laborantza intentsiborako baliatu izan dira urte luzez, eta orain bertan baso autoktonoa sortzea edo lehengoratzea da Lurgaia Fundaziokoen landaketen helburu nagusia.

Lurgaia irabazi asmorik gabeko erakundea da, eta biodibertsitatea kontserbatzen eta natura ondarea kudeatzen laguntzea du helburu: espezieak, habitatak, lotutako prozesu ekologikoak eta paisaia. Hala, baso autoktonoak berreskuratzeko lan egiten du, eta horretarako lurrak kudeatzen ditu lurraldea zainduz, erosiz, lagapen edo erabilera hitzarmenak sinatuz jabeekin. “Eta, Berrekondoko landaketen erritmoa ikusita, oso denbora gutxian baso batean bihurtuta ikusiko dugu”, diote.

Eguena (azaroak 15) bitarteko epea dago landaketetan parte hartzeko izena emateko, Lurgaiaren web orrialdera joanda zein info@lurgaia.org posta elektronikora idatzita; izena ematerakoan, parte hartuko duten guztien izen-abizenak eta jatorrizko udalerria ipini beharko dira, baita hartu-emanetarako telefono zenbaki bat ere. Hori bai, izena eman ostean, baieztapena jaso behar da landaketetara joan aurretik.

Hori jasota, 09:00etan ipini dute zapaturako hitzordua Muxikako Ariatzan, 1845 autobus geltokiaren aldameneko aparkaleku gunean. Bertatik joango dira landaketa eremura, auto “gutxi batzuetan” banatuta, eta aurreikusi dute 13:30ak aldera amaitzea jardunaldia.

Eroan beharrekoak.
Landaketan parte hartuko dutenentzako zenbait gomendio zerrendatu gura izan dituzte antolatzaileek. Alde batetik, ura ontzi berrerabilgarrietan eramateko eskatzen dute, baita jateko zer edo zer ere. Praka luzeak beharko dituzte landaketa eremuan segurtasunez ibiltzeko, eta mendiko edo baratzeko botak. Euria egingo balu, euritarako arropak eta aldatzeko zerbait eroatea gomendatzen dute.

105 herritarren topaleku izan da Arrolako harria

Busturialdeko Hitza — 2025-12-08 12:07:27

Arrolako gaineko harria herritarren topagune izan zen atzo, bigarrenez. Izan ere, Arratzuko, Mendatako eta Nabarnizko mugak ezartzen ditu harri horrek, eta hori abiapuntu izanik, 105 pertsona inguru bildu ziren II. Herri-batze martxan. Herri bakoitzak bere ibilaldi propioa egin zuen arren, eguerdian guztiak batu ziren Arrolako mugarrian.

Hala nola, arratzuarrak eta mendatarrak 10:00etan izan zuten hitzordua, ibilaldiari hasiera emateko. Nabarnizatarrek, berriz, 11:00etan ekin zioten ibilaldiari. Besteak beste, jai giroa nagusitu zen, ze, trikiti eta pandero soinuek alaitu zuten topeketa. Gainera, parte hartzaile guztientzat sartenekoa egon zen amaieran.

Martxaren lehenengo aldian Jose Antonio Maruri Nabarnizko alkatearen esku geratu zen irakurketa egitea, eta aldiro ardura hori txandakatzeko asmoa erakutsi zuten orduan. Hala, aurten Mendatako alkate den Joseba Malleak hartu zion testigua Maruriri, testuaren irakurketa egiteko.

Harria, mugarri eta topaleku

Busturialdeko Hitza — 2025-12-05 18:31:22

Arrolako gainean dagoen harriak Arratzuko, Mendatako eta Nabarnizko mugak ezartzen ditu, eta hiru herrietako herritarren topagune bihurtuko da etzi, II. Herri-batze martxa egingo baitute. Herri bakoitzak bere ibilaldi propioa antolatu du, eta 12:00ak inguruan batuko dira denak, Arrolako mugarrian.

Duela bi urte egin zuten martxa estreinakoz, eta 150 lagun inguru batu ziren Arrolan. Aurten ere jai giroa nagusituko da bertan, trikiti eta pandero soinuek alaituko baitute topaketa. Gainera, «animatu eta parte hartzen duten guztientzat sartenekoa egongo dela» iragarri dute.

Abiapuntu hirukoitza.
Arratzuarrek eta mendatarrek 10:00etan ekingo diote bideari. Ordubete beranduago, berriz, nabarniztarrek.

2023an Jose Antonio Maruri Nabarnizko alkatearen esku geratu zen irakurketa egitea, eta orduan aldiro ardura hori txandakatzeko asmoa erakutsi zuten. Hala, domekan jakingo da nori dagokion aurten irakurketa egitea.

Mendatako HAPOaren aurrerakina hizpide izango dute eguaztenean

Busturialdeko Hitza — 2025-11-24 12:31:01

Mendatako Udalak jakinarazi duenez, Hiri Antolamenduko Plan Orokorraren (HAPO) aurrerakinari buruzko informazio-bilera egingo dute eguaztenean (azaroak 26), 19:00etatik aurrera, udal aretoan (liburutegian). Herritarrei bileran parte hartzeko gonbita luzatu die udalak, “udalerriaren etorkizun urbanistikoan funtsezkoa den prozesua ezagutzeko”. Eta, nabarmendu dute Arruti Ark enpresako Oihana Arruti arkitektoa bertan izango dela, dokumentuaren eduki nagusiak aurkezteko asmoz.

Bide batez, abenduaren 3tik aurrera, abenduko eta urtarrileko baliodun eguazten guztietan sor daitezkeen zalantzei erantzuna emateko arreta pertsonalizatua eskainiko du udalak; arratsaldeko 16:00etatik 19:00etara bitartean egongo da martxan eguaztenetako zerbitzu hori. Aurretiaz hitordua hartzea ezinbestekoa izango da, baina, eta horretarako 94 625 47 22 telefonoa ahalbidetu dute.

Udal ordezkariek azaldu dutenez, urte honetan zehar, Mendatako Udalak “prozesu partekatu eta parte hartzailea” bultzatu du HAPO berria lantzeko xedez. Urtarrilaren 29an eman zioten hasiera, Elizoste Aretoan, prozesuaren faseak eta helburuak azaldu zituzten informazio-bilera oinarritzat hartuz. Ondoren, martxoa bitartean, herriaren ekarpen desberdinak jasotzeko hainbat saio ireki antolatu zirela gogoratu dute: hala nola, parte-hartze karpa bat, espazio publikoari, ingurumenari, mugikortasunari, etxebizitzari eta ekipamendu publikoei buruzko jardunaldi tematikoa, edota hiri antolamendu inklusiboaren inguruko tailerra.

Horrez gain, gehitu dute interesa zuten pertsona guztiek beren ideiak, kezkak eta proposamenak errazago partekatzeko asmoari tiraka, online bidezko inkesta bat jarri zuen udalak herritarren eskura.

Lurgaiak Mendatan ekingo dio 2025-2026 landaketa aldiari

Busturialdeko Hitza — 2025-11-04 14:30:49

Lurgaia Fundazioak 2025-2026 denboraldiko estreinako baso landaketa Busturialdean egingo du, asteburu honetan. Hain zuzen ere, Mendatako lurretara joko dute datorren zapatuan [azaroak 8], Berrekondo errekaren ibarrera. Berrekondo inguruak pinuen laborantza intentsiborako baliatu izan dira, eta orain bertan baso autoktonoa sortzea edo lehengoratzea izango da landaketen helburu nagusia.

Eguena [azaroak 6] bitarteko epea dago izena emateko, Lurgaiaren web orrialdera jota zein info@lurgaia.org posta elektronikora idatzita; izena ema ostean, baieztapenari itxaron beharko diote interesdunek. Izena ematerakoan, landaketan parte hartuko duten guztien izen-abizenak eta jatorrizko udalerria ipini beharko dira, baita hartu-emanetarako telefono zenbaki bat apuntatu ere.

09:00retan ipini dute zapaturako hitzordua, Muxikako Ariatzan, 1845 autobus geltokiaren aldameneko aparkaleku gunean. Bertatik ekingo diote landaketa eremurako bideari, lantaldea auto “gutxi batzuetan” banatuta. Landatzaileek aurreratu dutenaren arabera, Berrekondoko saila “lantzeko erraza” da, aldapa gutxiko esparrua delako. Hori “aprobetxatzeko” asmoa dute: “Ea egun horretarako prestatutako 500 zuhaitzen landaketa gainditzen dugun”. Amaieran, tortilla pintxoen janaz gozatuko dute parte hartzaileek.

Eroan beharrekoak.
Landaketan parte hartuko dutenentzako zenbait gomendio zerrendatu gura izan dituzte antolatzaileek. Alde batetik, ura ontzi berrerabilgarrietan eramateko eskatzen dute, baita jateko zer edo zer ere, “gura baldin bada”. Praka luzeak beharko dituzte landaketa eremuan segurtasunez ibiltzeko, eta mendiko botak. Euria egingo balu, euritarako arropak eta aterkia eroatea gomendatzen dute.

Olinpiar Jokoek hartu dute aurrea San Migel jaietan

Busturialdeko Hitza — 2025-09-27 13:51:04

Bi asteburuz jai giroa izango da nagusi Mendatan, sanmigeletan murgilduta baitaude herritarrak. Atzo [irailak 26] ekin zieten jaiei, ohi legez, tortilla txapelketan elkartuta. Agerian gelditu zen herritarrak jaien esperoan zeudela, urteroko hitzorduak erantzun bikaina izan baitzuen; ostean ez zen mus txapelketa falta izan. Gaua girotzearen ardura Adei, Sergio, Nile eta Garazi trikitilari gazteen esku gelditu zen. Gaur [irailak 27], berriz, mozorroak soinean, jaietako egun handia ospatzen dira.

Iaz San Fermin izan zuten mozorrotarako gai; aurten berriz, Olinpiar Jokoak. Hala Los Angelesen 2028an lehiatuko den kirol ekitaldirako prest daudela erakutsi dute mendatarrek; diziplina guztietan beraien onena emateko prest, atleta, igerilari, gimnasta, tenista, futbolari, boxeolariek beraien onena eman dute Elexaldetik Mendaturirainoko bidea egiteko. Gainera, selekzio desberdinetan banatuta egin dute bidea; hala nola, Albiz, Olabe, Elixalde eta Marmiz izan dira elkarren arteko lehia adiskidetsuan murgildu diren selekzioak. Joaldunek ere ez dute ibilaldia galdu. Mendaturiko Bolatokian Karmele Gisasola eta Irati Astondok hartu dute lekukoa, olinpiada erakustaldia eskainiz.

Jaia eteko asmorik gabe, eguerdian herri bazkarian batuko dira herritarrak, frontoian. Arratsaldea dinamizatzearen ardura, berriz, Boilbotxeros Band & Lagunaken esku geratuko da. Gauean Eiho eta Zirkinik Bez izango dira oholtzara igoko diren musika taldeak. Herritarrek “gorputzeko erritmoa ez galtzeko” gauean DJ Matxingen emanaldia edukiko dute.

Kirolak festaren erdigunean jarrituko du bihar [irailak 28] ere, Sustabizen eskutik herrik kirol saioa edukiko baitute eguerdian. Arratsaldea lasaiagoa izango da, 17:30etik aurrera ume eta gaztetxoentzako jolasak eta Briska txapelketa izango baitituzte aukeran.

Zarrabentako jaiak.
Datorren asteburuan, berriz, Zarrabentako jaiak izango dituzte festarako aitzaki. Urriaren 4an [zapatua] asto probak ikusteko batuko dira: Imanol Erleaga (Mendata), Torrontegi Eraikuntzak (Gamiz-Fika) eta Iñigo Landaluze (Peruri) arituko dira nor baino nor gehiago. 22:00ak aldera, berriz, bakailao janean batuko dira, Obieta aita semeak girotuta.

Urriaren 5ean [domeka], Zarrabentako ermitan elkartu, eta meza osteko txikiteoarekin jaiak datorren urterako agurtzeko prestatzen hasiko dira mendatarrak. Aurretik, baina, herri bazkaria egingo dute txokoan. Ostean, asto proben saio berriagaz —Juan Luis Irazola (Mallabia), Danel Hormaetxe (Gatika), Salba Erleaga (Arratzu) eta Ekaitz Elorduy (Berango)— emango diote azken agurra sanmigeletako ospakizunei.

Udazkenari ongietorria emateko jaiak ere ailegatu dira

Busturialdeko Hitza — 2025-09-26 12:22:35

Uda agurtu, eta udazkenean sartuta, San Migel jaiak ate joka dituzte Busturialdeko bizilagunek. Bermeoko San Migel auzoan, Busturiko Altamiran, Ereñon eta Mendatan dena prest dute datozen egunak alaitzeko. Izan ere, astelehena da aurten santuaren eguna, eta, ondorioz, egitarauetako ekitaldirik gehientsuenak asteburuan izango dira.

Bermeon, berriz, zapatua aukeratu dute goizetik gauera hainbat ekintza prestatzeko. Hala, goizean goiz abiatuko dira kirolzaleak, Taraskatik aterako den bizikleta ibilbidearekin, eta ondoren, familia ibilaldia egiteko aukera edukiko dute herritarrek. Musika ere izango da protagonista: mariatxiak, AIAMA Quarteteren eta Unholy Covers taldearen kontzertuek girotuko dute arratsalde eta iluntzea, San Migel auzoan.

Busturiarren kasuan, Altamira izango da gaur hasi eta domekara arte iraungo duen jai giroaren ezsenatokia. Bertsolariak izango dira jaiei hasiera emango dietenak. Mikel Retolaza busturiarra, Aitor Etxebarriazarraga eta Ibai Amillategi gernika-lumotarrak eta Jone Uria algortarrak bertsoz beteko dute auzoa. Bihar, esku pilota partiduak jokatuko dituzte, eta musikarik ere ez da faltako. Domekan, berriz, San Migel bezperan, musika eta idi probak nagusituko dira.

Ereñon eta Mendatan jai garrantzitsuak dira sanmigelak, eta bi asteburu uztartuko dituzten egitarau biribilak antolatu dituzte bietan. Mendatarrentzat biharkoa izango da egun handia. Iaz San Fermin jaiak aitzakia hartuta, zuri eta gorri koloreekin bete zuten herria, eta aurten, Olinpiar Jokoen txanda izango da. Photocallean argazkiak atera ostean, Elexaldetik Mendaturira joango dira, joaldunek lagunduta. Ezustekoen ostean, frontoira itzuliko dira herri bazkarian batzeko.

Domekan, herri kirol saioak eta bakailao janak osatuko dute goizeko egitaraua. Sustabiz Fundazioko Ane Atxutegi, Uxue Lekunberri, Leire Astoreka, Mikel Ibarguren eta Jon Onaindia izango dira herri kirolen erakustaldiaren protagonistak. Arratsaldean, ostera, briska txapelketan lehiatuko dute.

Ereñon, pilota partiduekin, bakailao janarekin eta Luhartz erromeriaren doinuekin hasiko dituzte San Migel jaiak gaur, eta paella usainak hartuko du herria bihar. Arratsaldez, ohiturari jarraituz, Atxur-Urkulie jaurtiketa egingo dute, eta Dj Koetek jarriko dio doinua gauari.

Hurrengo asteko eskaintzari dagokionez, besteren artean, 39. Ereñozarrera Igoera lehiatuko dute. Bertan egongo dira eskualdeko korrikalaririk trebeenak, baita inguruaz gozatu gura dutenak ere.

EGITARAUAK, HERRIZ HERRI

BERMEO

Bihar.

08:30. Bizikleta ibilbidea, Taraskatik.

11:30. Familia ibilaldia San Migelera, Taraskatik (eguraldia lagun bada).

13:00. Tortilla lehiaketarako izen-ematea.

13:30. Mariatxien emanaldia.

16:30. Haurrentzako jolasak, dantza gunea eta mahai-jokoak.

19:00. Txakolin dastaketa elizpean (10 €). Izen-ematea: 686 58 96 01.

20:00. AIAMA Quarteten kontzertua.

23:00. Unholy Covers taldearen kontzertua.

BUSTURIA

Gaur.

20:00. Bertsolariak, Altamirako Kultur Etxean: Mikel Retolaza, Aitor Etxebarriazarraga, Ibai Amillategi eta Jone Uria.

Bihar.

17:00. Esku pilota txapelketaren finala.

19:30. Uda amaierako musika ekitaldia, Altamirako Kultur Etxean.

Etzi.

11:00. Kalejira, herriko
txistulariekin.

12:00. Meza nagusia.

13:00. Irrintzi Alai Dantza Taldea.

Ondoren. Kantu kantari.

18:00. Idi probak.

EREÑO

Gaur.

19:00. Pelota partiduak:
Lopez-Etxebarria vs Arrate-Perea eta Uribe-Cuairan vs Etxebarria II-Garmendia.

21:30. Bakailau dastaketa.

22:30. Luhartz erromeria.

Bihar.

Goizean. Paella txapelketa.

Era berean. Hamaiketakorik onenari saria.

14:00. Paella aurkezpena.

17:00. Puzgarriak.

18:30. Ereñoko VIII. Atxur-
urkulea jaurtitzea.

21:00. Ari.

22:30. DJ Koet.

Irailak 29, astelehena.

12:00. Meza santua, elizan.

Ondoren. Pintxo dastaketa.

Irailak 30, martitzena.

12:00. Meza santua,
Ereñozarren.

14:30. Herri bazkaria.

18:00. Ugaziyo txapelketa.

Urriak 4, zapatua.

Goizean. Tortilla lehiaketa.
14:00. Tortillen aurkezpena
17:00. Pelota partiduak, Sustabizen eskutik.
18:00. Sustabiz Fundazioaren eskutik, herri kirolen erakustaldia.

Urriak 5, domeka.

12:15. Elizkizuna, Ereñozarren.
13:00. XXXIX. Ereñozarrera Igoera.

MENDATA

Gaur.

18:00. Tortilla Txapelketarako izen ematea.

Jarraian. Tortilla Txapelketa.

20:30. Tortilla Txapelketako sari banaketa.

20:00. Mus Txapelketa.

21:00. Erromeri mundiala trikitilari gazteekin: Adei, Sergio, Nile eta Garazi.

Bihar.

11:00. Photocall-a, Elexalde auzunean.

11:30. Elexaldetik Mendaturi auzunerantz joan-etorria, Joaldunekin batera.

Gero. Bolatokian, Euskal atleten eskutik, olinpiadak: Karmele Gisasola eta Irati Astondoa.

15:00. Herri bazkaria, frontoian.

Gero. Bilbotxeros Band eta Lagunak dinamizatuko dute arratsaldea, dantzaldiak egiteko.

21:30. Eiho taldea.

22:30. Zirkiñik bez erromeria.

Amaitzeko. DJ Matxing.

Etzi.

12:00. Meza.

13:00. Sustabiz Fundazioaren eskutik, kirol erakustaldia.

17:30. Ume eta gaztetxoentzat, Esna Gazte.

18:00. Briska Txapelketa, Aterpe tabernan.

Irailak 29, astelehena.

12:00. Meza.

Ostean. Bakailao kopaua.

Urriak 4, zapatua.

20:00. 49. Asto probak.

22:00. Bakailao jana.

Urriak 5, domeka.

12:30. Ospakizuna Zarrako ermitan.

Ondoren. Trikitilariak eta txikiteoa.

Ondoren. Herri bazkaria, txokoan.

18:00. Asto probak.

Berritasunekin betetako Mendatako 27. Nekazal Azokaz gozatu dute

Busturialdeko Hitza — 2025-09-15 14:33:50

Mendatako Nekazal Azoka herritarrek dagoeneko egutegian finkatuta duten hitzordua da. Aurten, gainera, azokaren 27. aldiak berritasun handi bat hartu du beregain. Izan ere, barikuan, Eoalak Elkarteak antolatuta Euskal Oiloaren Lagunen lehen topaketa egin zuten. Domekan izan zen, ordea, egun handia; urtez urteko giro ona mantendu zen herrian, besteak beste, Euskal Oiloaren egunean. Janariaren 19 postuk eta artisauen 18 postuk bete zuten herria, eguraldia aldeko izan zuten egunean. Artape aurrean, besteak beste, ortuariak, txakolina, gazta eta esnekiak, ogia, eztia edota barazki kontserbak erosteko aukera ahalbidetu zuten, eta 11:30ean, urtez urte hainbesterako arrakasta izaten duen talo tailerrean parte hartu zuten hainbat jendek.

Berritasunagaz dator Mendatako 27. Nekazal Azoka

Busturialdeko Hitza — 2025-09-09 12:42:13

Mendatako Nekazal Azoka egutegian finkatuta dagoen hitzordua da. Aurten, berriz, berritasun handi bategaz helduko da. Hain zuzen ere, domekako [irailak 14] 27. azoka baino lehen, Eoalak Elkarteak antolatuta Euskal Oiloaren Lagunen lehen topaketa egingo dute. Barikuan [irailak 12] izango da, 19:30etik aurrera, Artape Jatetxean. Bertan, euskal oiloen arrautza eta bertoko txakolinaren dastaketa egiteko aukera izango dute bertaratzen direnek.

Egun handia domekakoa izaten jarraituko du: Euskal oiloaren eguna. 09:30etik aurrera Euskal Oiloaren erakusleiho informatiboa jarriko dute. Antolatzaileek azaldu dutenez, hegaztien arteko gaixotasuna dela eta, aurten ez dute Euskal Oiloaren erakusketa edo salmentarik egingo. Faltako ez direnak umeentzako puzgarriak izango dira, baita gero jaterakoan hainbesteko arrakasta izaten duten taloak zelan egiteko tailerra egingo dute 11:30ean.

11:00etan hasiko dira burduntzian egindako txerri pintxoen tiketak saltzen, tiketak amaitu arte. Izan ere, 12:30ean hasiko dira pintxook banatzen eta gogoratu dute tiketagaz ordaindu ahalko direla bakarrik. Hain zuzen ere, bildutako dirua leiomiosarkoma gaixotasunaren ikerketarako Enarak behar zaitu ekintza solidariorako bideratuko dute. Azkenik, 13:00etan, idi proba saioa eskainiko dute, batetik, Busturiko Paresi auzoko Iturbe Anaiek eta, bestetik, Derioko Aurrekoetxeak.

Askotariko postuak
Horrez gain, hamaika postu jarriko dituzte Artape inguruan. Guztira janarien 19 postu jarriko dituzte eta artisauen beste 18, zelan ez, ez da txosnarik faltako. Artape aurrean, besteak beste, ortuariak, txakolina, gazta eta esnekiak, ogia, eztia edota barazki kontserbak erosi ahalko dira. Artisauei dagokienez, askotarikoak egongo dira salgai, osagarriak, eskulanak, zeramika edota margoak, esate baterako.

Erakustaldi baten isla: Ibai Urrutia eta Raffaella Ciavola, Mendatan garaile

Busturialdeko Hitza — 2025-09-08 16:21:21

XIX. Mendata Ezagutuz mendi maratoiak dominatzaile argi eta garbiak eduki zituen domekan [irailak 7]. Lasterketa sobera ezagutzen duten lasterkari bi, Ibai Urrutia Arandia belendiztarra eta Raffaella Ciavola di Girolamo gasteiztarra, burutik buru nagusitu ziren eskualdeko mendi bideak gurutzatzen dituen proban, eta malgutasunez irabazi zuten proba. Mendata Ezagutuz ekimenak 400 lagunetik gora elkartu ditu aurten, lasterketa eta profil denetara egokitutako mendi martxak aintzat izanda. Antolatzaileak “pozarren” azaldu dira mendizaleek egitasmoari beste behin emandako erantzunagaz, eta domekako aldarte “ederra” nabarmendu dute: “Giroa ez zen soilik mendira mugatu; herrian jai usaina nabaria zen, eta guztia prestatu modura atera zitzaigun”.

Mendatarren laguntza zein inplikazioa azpimarratuta, aditzera eman dute aurtengoa atontzea “erronka polita” izan dela: “Ñabardura oro jagotea gustatzen zaigu, hala nola, anoa postuetan denetatik egon dadila, bidezidorrak garbi egon daitezela, eta abar luze bat. Jasotako iritzi nahiz iradokizunek erakusten digute aurten ere asmatu dugula eta, hortaz, badugu motiborik pozik egoteko”. Parte hartzaileetako zenbait, giro onaren erakusle, bazkaritara geratu ziren, probak behin burututa.

Mendi maratoia izan zen eguneko menuari gatza eta piperra ipini zizkion osagaietako bat. Izan ere, eskualdeko korrikalaririk puntakoenetako batzuk ageri ziren izena emandako 30 lagun inguruko irteera zerrendan, baita urrunagotik bertaraturikoak ere; horietatik entzutetsuenetako bat izan zen urteak joan, urteak etorri Mendatako lasterkari historikoetako bat izatera iritsi den Ciavola. Arabarra, beste ekitaldi batez, nahieran nagusitu zen Arrola, Kanpona edota Oizko gailurrak barnebildu zituen ibilbide itogarri baina bizkorrean. Lanak 04.52.35ean biribilduta, denbora arrakala azpimarragarria zabaldu zuen bigarren sailkatu Ireder Angulo Elexpe munitibartarrarekiko (05.16), eta are esanguratsuagoa emakumezkoen podiuma osatu zuen Ziortza Barruetabeña Erdaide gernika-lumotarrarekiko (05.37).

Gizonezkoen lehian ere, Urrutiak hamargarren kilometro inguruaz geroztik bere legea ezarri zuen. Lehen txanpa hartan, Arrolape Mendi Klubeko bere taldekide Paul Goitisolo Otazua gernika-lumotarra izan zen aurpegia erakutsi ahal izan zion bakarra. Arrola inguruan geratu zen belendiztarra lasterketa buruan bakarrik eta, handik helmugara bitarte, indarrak kudeatu baino ez zuen egin behar izan. Azkenean, “uste baino denbora marka hobeagaz” helmugaratu zen arrolapetarra: 03.27.53koagaz. Goitisolok 03.40.52an gelditu zuen erlojua, eta hirugarren postua, berriz, David Alvarez Uriarte galdakoztarrarentzat izan zen, 04.16.33ko erregistroa eginda.

Ibai Urrutia Arandia: “Abuztu hasieran orkatilan min hartuta ibili nintzenez, ez nekien nire benetako maila zein izango zen, baina azkenean oso gustura aritu naiz”

Bakarkako esamina.
Urrutia “harrituta” geratu zen edukitako sentsazioekin: “Abuztu hasieran orkatilan min hartuta ibili nintzenez, ez nekien nire benetako maila zein izango zen, baina azkenean oso gustura aritu naiz; gainera, Mendatan lortutako denborarik onena nabarmen hobetzea ere polita da”. Lehen zatitik bere erritmoa ezarri zuela azaldu du garaileak eta, behin Goitisolo atzean lagata, “errenta kudeatzen” ahalegindu zela. Halaber, Mendatako azterketa garrantzitsua izan zen Urrutiarentzat: “Aste bi barru Mañaritik Atxetara mendi maratoian ariko naiz; Mendatako ibilbidea bestelako izanagatik ere, gogotsu nengoen neure gorputzaldiari kalitatezko azterketa bat egiteko, eta azkenean eska nezakeen notarik onenagaz gainditu dut”.

Zubizarreta, oroigarria jasoz. Argazkia: Mendata Ezagutuz.

Aipagarria izan zen, bestalde, antolakuntza lantaldeak Pilar Zubizarreta Arbe herrikideagaz edukitako keinua. Zubizarreta, hain zuzen, udalerriko mendi martxan “bai ala bai aritu izan den mendizaleetako bat” da, eta hark egindako ekarpenak omendu zituzten domekan, garaileekin batera podiumera igoz eta oroigarra jasoz.

Zarrabentako Gazte Egunean bilduko dira, bigarrenez

Busturialdeko Hitza — 2025-08-28 16:13:00

Sanmigel jaiez harago, Mendatako gazteak batzeko beste hitzordu bat zehaztu zuten joan den urtean lehenengoz Mendatako gazteek: Zarrabentako Gazte Eguna. Iazko Gazte Egunaren balorazio ona eginda, aurten eguna berriro antolatzea erabaki dute gazteek, baina data azarotik abuztuaren azken zapatura egunez aldatuta. Hala, etzi (abuztuak 30) jai giroz betetako eguna dute Zarrabentan.

“Udari amaiera polita emateko aukeratu dugu egun hau, baita orain egunak azaroan baino luzeagoak direlako eta gehiago aprobetxatu daitezkeelako”, azaldu dute arduradunek. Gainera, horreka eguraldi txarra egiteko arrisku gutxiago dutela diote. “Ondo ateratzen bada, aurrerantzean abuztuko azken zapatuan antolatzen jarraituko dugu”, jakinarazi dute.

Herriko gazteei egun bat eskaintzearren antolatu zuten lehenengoz Gazte Eguna, gazteak batu eta herriko jai nagusietaz aparte beste jai egun bat izateko. Helburuak berdina izaten jarraitzen du, baina egitaraua “herritar guztientzako” prestatu dutela nabarmendu dute, denek gozatzeko modukoa. “Publiko guztientzako jaiak dira, ez gazteentzako jaiak bakarrik”, gehitu dute.

Aurten, gainera, eguna luzatzea erabaki dute, arratsaldeko ekintzetatik egun guztiko ekintzetara pasatzea. “Apurbat denetarik dago. Gustu guztiak asetzeko modukoa egitea ezinezkoa da, baina ahalegintzen gara denentzako egitaraua egiten”, adierazi dute.

Hala, herri kirol erakustaldiaz gozatzeko aukera izango dute herritarrek; izan ere, Zihara Zabala, Leire Olea, Gari Elorriaga eta Jon Onaindia ariko dira erakustaldia eskaintzen. Gero, gura dutenek probatzeko aukera ere izango dute. “Mendatan herri kirolekiko zaletasun handia dago, eta horiei balioa ematea pentsatu dugu, bertoko inguruetako herri kirolari gazteak Zarrabentara hurbilduz”, esan dute antolatzaileek.

Eguerdian, mus txapelketan neurtuko dira bizilagunak, eta, bazkaldu ostean, gazteentzako jolasek jai giroa mantenduko dute herrian.

20:00etan hasiko da musika martxan, Dj Bartek jarriko baititu lehen musika doinuak. Eta, gero, Txoriburu taldeak hartuko dio lekukoa, baina ez dira bakarrik ariko, ostean beste bi Dj egongo baitira: Dj I Am Giz eta Dj Domin. “Kontzertuetarako ez daukagu diru askorik, baina daukagunagaz saiatu gara ahalik eta gehien egiten eta bertoko jendeari leku bat eskaintzen. Denak dira bertoko inguruko gazteak, eta oso eskertuta gaude, ze laguntzeko prest egon dira”.

EGITARAUA
Etzi, zapatua.
12:30. Herri kirol erakustaldia: Zihara Zabala, Leire Olea, Gari Elorriaga eta Jon Onaindia.
Ondoren. Herri kirolak probatzeko aukera.
16:30. Mus txapelketa. Izena ematea 20 eurotan, eta ateratako dirua banatuko da sarietan.
18:00. Gazteentzako jolasak.
20:00. Dj Bart.
22:00. Kontzertuak: Txoriburu, Dj I Am Giz eta Dj Domin.

Iker Colmenero, Mendatan garaile

Busturialdeko Hitza — 2025-07-21 14:58:35

Iker Colmenero Larrakoetxeak irabazi zuen, iragan zapatuan [uztailak 19], 35. Mendatako Udalaren Sari Nagusia. Probaren azken txanpan indartsuenek osatutako ihesaldian azkarrena izan zen Colmenero, eta bere talde Alimco-Campagnolok lasterketa osoan egindako behar aparta modurik distiratsuenean biribildu zuen.

Colmenero, helmuga harrapatuz.Danel Gorostiaga

Bizkaiko Kopako tropela osatu zuten 81 txirrindulariek 85 kilometroko eta 1.500 metro inguruko desnibeldun ibilbide gogor eta gorabeheratsuari aurre egin behar izan zioten. Lehendabiziko kilometroetatik, ihesaldiak osatzeko mugimendu ugari egon ziren tropelaren buruan, eta hark lasterketa zoro joatea ekarri zuen. Proban sartzea apur bat kostatu arren, saiakerarik indartsuenak ederto kontrolatu zituen Alimco-Campgnolok.

Mendatako herrigunerako lehen pasaeran egin zen estreinako hautaketa, eta Muniketan zein Urrutxun tropela are murritzago egin zen. Azken tartean, Astorkigana eta Bizkaiko Begiratokia kateatu zituzten. Lasterkariek ziztu bizian ekin zioten azken zati hari, eta probako indartsuenek beren bidea egin zuten, bereziki, Bizkaiko Begiratokian. Hain zuzen, mendatearen gailurretik helmugara, zortzi kilometro inguru besterik ez zeuden.

Alimco-Campagnolo, taldeka ere txapeldun.Danel Gorostiaga

Lau laguneko ihesaldi murriztu bat iritsi zen azkenean Mendatako herriguneko helmuga lerrora eta, azken aldapatxoan, Colmenerok nagusitasun osoz inposatu zuen bere abiadura. Esprintean irabazi zuen proba, 02.12.18ko denbora egin ondoren. Podiumeko bigarren eta hirugarren postuak, hurrenez hurren, Luca Martinez Los Santosentzat eta koparen lidergoari eutsi zion Ibai Villate Momeñerentzat izan ziren, denbora berean helmugaratuta. Laugarren sailkatu Markel Aranaz Sekok osatu zuen helmugarainoko bidea egin zuen ihesaldia. Tropeltxoa 34 segundotara iritsi zen, Unai Moran Aranzabalen gidaritzapean.

Bizkaiko Txapelketa Mendatan erabakiko da

Busturialdeko Hitza — 2025-07-16 13:33:04

Datorren zapatuan [uztailak 19], 35. Mendatako Sari Nagusia txirrindulari lasterketa lehiatuko dute, 10:00etan hasita. Aurtengoa ekitaldi berezi askoa izango da hala antolatzaile, nola parte hartzaileentzat. Izan ere, Mendatako lasterketa gazte mailako Bizkaiko Txapelketaren agertoki izango da. Egun 100 txirrindulari inguruk izena eman duten arren, parte hartze muga 200 lagunekoa izango da. Ziklistek 85 kilometroko ibilbideari aurre egin beharko diote. Ez dute egiteko errazik edukiko errepide estuak, mendate nahiz koskak eta inguru bihurgunetsuak edukiko baititu Gernikesa Txirrindulari Elkarteak prestatutako ibilbide itogarri horrek.

Mendatako herrigunea izango dute bai irteera, bai helmuga eremu. Marmiztik Zarrabentara eta handik Arratzura joko dute lehenik, berriro Marmizera igota lehen itzulia biribiltzeko; bi itzuli egingo dizkiote lehendabiziko barruti horri. Marmiztik bigarrenez igarota, bigarren zirkuituari ekingo diote: Mendatatik pasatu, eta Albiztik Urrutxura joko du tropelak, eta Muniketaganera jarraian. Zugastietara jaitsita, berriro igoko dira Urrutxura, Mendatara bueltatzeko.7

Azken mendatearen, Bizkaiko Begiratokiaren, gailurretik helmugara zortzi kilometro besterik ez dituzte izango

Azken zatian, mendate bi kateatuko dituzte elkarren segidan: Ibertxutik igoko duten Astorkigana eta Gerrikaiztik igoko duten Bizkaiko Begiratokia. Azken mendate horren tontorretik helmugara, zortzi kilometro besterik ez dituzte edukiko parte hartzaileek. Horrenbestez, Bizkaiko Begiratokia giltzarri izan daiteke, bai lasterketa, bai txapelketa nork irabazi erabakitzerakoan.

Tradizioari jarraipena emanez ospatuko dituzte sanpedroak

Busturialdeko Hitza — 2025-06-27 11:46:19

San Joan bezperan, txarrak erre eta onak ekartzeko eskatzeko asmoz, suaren inguruan elkartu ziren hango eta hemengo herritarrak. Askok, onak ate-joka dituzte dagoeneko; izan ere, urteko urtaro beroenari hasiera jai giroan ematera datoz asteburuan sanpedroak, eta Busturialdeko hainbat herri eta auzotako herritarrak goi-goitik ospatzeko prest daude.

Lumoko bizilagunak izango dira jaiei hasiera ematen lehenak: bihar [ekainak 28] ekingo diete ospakizunei, ohi legez, txupinazoa botata. Karta jokoan trebeak direnek mus txapelketarako hitzordua dute arratsalderako, eta ume eta gaztetxoek, herri kiroletako hainbat modalitate probatzeaz gain, Sustabizeko kirolarien harri jasotze erakustaldiaz ere gozatuko dute. Gauean musika eta dantza izango dira nagusi, Lumon: Xaibor diskofestaren ostean, III. Playback lehiaketan batuko dira herritarrak. Helburua ondo pasatzea baldin bada ere, txikienak La Boca jatetxean afari bat irabazteko ilusioz oholtzaratuko dira; helduek, bestalde, 150, 100 eta 50 euroko sariak irabazteko aukera izango dute. Etzi, San Pedro Egunean [ekainak 29], Elai Alai Dantzari Taldearen emanaldiaren ostean, Lilibertsoko Ibai Amillategi, Aitor Etxebarriazarraga eta Asier Galarza bertsolariek girotuko duten herri bazkarian elkartuko dira.

Mendatarrek, bestalde, Zarrabenta izango dute San Pedro Egunean topaleku, Zarra Barri Lagun Elkarteak baseliza inguruan antolatu duen jaian. Mezagaz hasiko dute eguna, jarraian, trikitilarien erritmora, ardoa eta galletak dastatzeko. Herri kirolak ere ez dira faltako, iaz egin bezala, Aitor de la Concepcion, Eneko Bilbao eta Aitor Etxaniz nor baino nor gehiago arituko baitira, giza proban. Eguna biribiltzeko, lagun arteko bazkarian bilduko dira, Zarrabentako Lagunarteko Txokoan. Mendatako Udalak bertaratzeko deia zabaldu die Mendatako zein inguruko herritarrei, San Pedro “egun paregabea” izango delako.

Sanjoanak atzean utzi eta sanpedroak bete-betean ospatzeko prest daude ibarruritarrak ere. Aurten ere, trikitilariek girotutako kalejiragaz hasiko dute eguna. Meza ostean, Ibarruriko Baso Txoritxu Dantza Taldekoek emanaldia eskainiko dute, eta bertaratzen direnentzat pintxoak egongo dira aukeran. Eguerdian herri bazkarian elkartuko dira; aurretik, baina, porra txapelketaz disfrutatuko dute.

Arrantzaleen patroi nagusia.
Arrantzari lotutako herria da Bermeo, eta San Pedro arrantzaleen patroi nagusia izanik, domekan hitzordua edukiko dute bermeotarrek ere. Arrantzaleen Kofradiako Eguna ospatuko dute, ohiturari jarraipena emanez: Udalbatzak kofradiako zuzendari batzordea agurtuko du, eta segituan, 10:30ak aldera, San Pedrogaz prozesioan aterako dira, herritik ibilbidea egin eta berriro ere Santa Eufemia elizara itzultzeko.

EGITARAUAK

BERMEO

Etzi, San Pedro eguna.
- 10:15. Bermeoko Udalbatza kontziopean elkartuko da.
- 10:30. San Pedrogaz prozesioa, Goiko Plazatik hasita.

LUMO

Bihar, San Pedro bezpera.
- 12:00. Jaien hasierako txupinazoa.
- 13:00. III. Aixerrota igoera (Igoera herrikoen liga), Arrolape Mendi Klubaren eskutik.
- 14:30. Sari banaketa.
- 15:30-16:30. Mus Txapelketarako izen ematea, txosnan.
- 16:30. Mus Txapelketa.
- 18:00 Ume eta gaztetxoen txokoa: Sustabiz Fundazioaren eskutik, umeentzako herri kirol parte hartzaileak eta erakusketa.
- 19:30. Txokolatada.
- 20:00. Xaibor diskofesta.
- 21:30. III. PlayBack lehiaketa girotua.
- Ostean, sari banaketa.
- 23:00. Kontzertua: Apokhalipsis.
Etzi, San Pedro eguna.
- 13:00. Meza Nagusia.
- Ostean. Hamaiketakoa.
- 13:45. Elai Alaiko gaztetxoen taldearen emanaldia.
- 14:30. Herri bazkaria.
- 17:00. Idi probak: Kamiñoko, Rafa Alegria eta Iñaki Lopategi.
- 20:30. Jai amaierako txupinazoa.

MENDATA (ZARRABENTA)

Etzi, San Pedro eguna.
- 11:00. Meza, San Pedro baselizan.
- Ostean, ardoa eta gallerak.
- 12:30. Giza probak: Aitor de la Concepcion, Eneko Bilbao eta Aitor Etxaniz.
- 15:00. Lagun arteko bazkaria.

MUXIKA (IBARRURI)

Etzi, San Pedro eguna.
- 11:00. Kalejira txistulariekin.
- 11:30. Meza Nagusia, abesbatzagaz.
- 0stean. Baso Txoritxu dantza taldearen emanaldia.
- 13:00. Umeen jolasak eta porra txapelketa.
- 15:00. Herri bazkaria.