Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Hezeguneen garrantzia balioan jartzeko mundu eguna ospatuko dute

Busturialdeko Hitza — 2026-01-28 10:00:02

Domekan [otsailak 1] ospatzen da Hezeguneen Mundu Eguna, eta hegaztien migrazio ibilbideko naturguneetan egiten den legez, Urdaibai Bird Centerrek ere bat egingo du hitzorduagaz. Hala, hegaztien zentroko sarrera doakoa izango da 11:00etatik 17:00etara bitartean, eta eraztunketa zientifikoaren jardunaldi bat ere egingo dute, 10:00etatik 12:00etara, eguraldiak lagunduz gero. Ez da beharrezkoa erreserba egitea, eta herritarrei bertaratzeko deia egin diete.

Izan ere, nazioarteko egun hori hezeguneen ezagutza eta kontserbazioa maila lokaletik nazioartekorenera zabaltzeko momentua izaten da, eta, aurten, hezeguneen eta komunitateen kultura praktiken arteko loturan jarriko dute arreta, tradizioen eta ezagutza-sistemen arteko loturan sakonduz. Ze, hezeguneetako ekosistemak mantentzeko eta kultura nortasuna zaintzeko ezagutza-tradizionalek denboraz kanpo duten zeregina nabarmendu nahi dute aurten, munduko hezeguneen ia %90 degradatu egin delako 18. mendetik aurrera, eta basoak baino hiru aldiz azkarrago galtzen ari direlako. “Hala, elkarregaz bat eginez gero, hezeguneak kontserbatu eta lehengoratzeko ekintzak sustatu ditzakegu”, esan dute, etorkizuneko belaunaldiek habitat zoragarri horez eta bertan bizi den faunaz gozatzeko aukera izan dezaten. Hegaztien zentrokoek gogoratu dutenez, historian zein egungo kultura askotan, padurak bizi emaile gisa gurtu izan dituzte herritarrek.

Gaur egun, hezeguneak dira hegaztientzako aterpe segurua, eta Urdabaiko hezeguneak babes hori eskaintzen die neguan. Hala, milaka hegazti bertaratu dira. Zortzi flamingoek lasai jarraitzen dute Oruetan, eta beraiekin negua apsatzen ari dira, besteren artean, ahate txistulariak, zertzetak eta ahate buztanluzeak. Arratsaldero, 2oo koartza itzain baino gehiago itzultzen dira padurara, “gogokoen duten zugaitzean atseden hartzera”. Zentroko kideek esan dutenez, ubarroiak ere arrantzara ateratzen dira eta hegaberak beraien koloreekin paisaia zipriztintzen dute: “Neguko paradisu honetan bizi diren altxorren zerrenda luzea da benetan”.

Hala ere, hegaztiei eta basafaunari ez ezik, gizakiek ere hezeguneetako habitat horien onurak jasotzen dituztela adierazi dute hegaztien zentrokoek, eta hori zaindu behar dela nabarmendu dute: “Gazteak edo helduak izan, hezegune batean egoteak naturarekin lotzen gaitu. Pertenentzia zentzua ematen digu eta iraganarekin lotzen gaitu. Biosfera Erreserbaren bihotzean, Urdabaiko hezegunea euskal kulturaren eta nortasunaren parte da”.

Auzoak, San Joan jaien testigu izateko prest

Busturialdeko Hitza — 2025-06-20 11:12:53

Uda ate joka dago, eta udarekin batera, San Joan eguna. Hala, eskola, herri eta etxeetan gaitzak erretzeko prestatzen ari dira dagoeneko. Sorginak, laztoa, egurra, eukaliptoa etabar luze bat; dena dago prest, San Joan bezperan sugarrak piztu eta sutearen inguruan dantzatu, abestu eta saltoka aritzeko. Gertaera txarrak atzean uzteko aukera izateaz gain, konjuruak esanda desioak eskatzeko unea ere bada. Txarra kanporatu, eta onari ongietorria emango diote, alegia.

Herri batzuentzat berebiziko eguna da, eta egutegietan urterik urte markatzen den horietakoa izan ohi da, baina auzoak ere ez dira atzean gelditzen. Horietan ere hamaika ospakizun aurreikusten dituzte datozen egunotan Busturialdean.

Horrela, urteko egunik luzeena ospatzeko ekintzez bete dituzte auzoetako hainbat txoko Busturialdean. Ajangizen, esaterako, Kanpantxu auzoa izango da, beste behin, San Joan jaien testigu. Gaur hasiko dira, eta bihar jarraituko du jai giroak, denetariko ekintzekin; astelehenean emango diote amaiera, aldiz, suaren pizteagaz.

Bermeon berritasunekin datoz aurten. Izan ere, Areneko jaiak berreskuratu dituzte, eta astelehenerako egun osoko egitaraua aurreikusi dute jai batzordekoek; bazkarian batuko dira eguerdi aldean, eta musika izango da gero nagusi, arratsalde zein iluntzean. Bestalde, San Juan egunean, urtero modura, mezak ospatuko dira Gaztelugatxeko San Juanen; 06:30, 07:30, 08:30, 10:30 eta 11:30 izango dira mezak.

Ereñoko Gabika auzoak urteroko martxa jarraituko du, eta txapelketaz txapelketa arituko dira, sua pizteaz gain. Hain zuzen ere, martitzenean, briska eta txantxiku txapelketak jokatuko dituzte. Jakinarazi dutenez, ereñarrentzat bakarrik antolatu dituzte txapelketa horiek. Errigoitiko Sallobanten ere goi-goitik gozatuko dute sanjoanetaz, beste urte batez. Urteko egunik luzeena ardatz, asto eta idi probak izango dituzte auzoan, jan edanaz gain.

Gernika-Lumon, San Juan Ibarra izango da askotariko ekintzen eszenatoki datozen egunetan. SOMEko Rock’N Band kontzertuak girotuko du jaien hasiera gaur, eta bost egunez hamaika ekintzaz disfrutatzeko aukera izango dute gerturatzen direnek. Gainera, adin guztietako jendeak gozatzeko moduko egitaraua antolatu dute.

Mendatako Lamikizen eta Morgako Ganben ere urtez urteko tradizioari jarraiki ospatuko dituzte sanjoanak. Musika izango da nagusi bietan. Muxikako Ajurian ere izango dute gozamenerako tartea. Bihar hasi eta martitzenera bitartean kirola, musikak eta dantzek hartuko dute nagusitasuna auzoan. Sua ere piztuko dute, gainera, astelehen iluntzean.

Artza frontoiko taberna ustiatzeko deia zabalik

Busturialdeko Hitza — 2024-08-14 10:30:32

Artza frontoiko taberna eta bere erabilera suspertzeko asmoz, Bermeoko Udalak jabari eta erabilera publikoko administrazio-emakida emateko deia zabaldu du herrian, beregain, taberna egokitu, ustiatu eta mantentzeko helburuarekin.

Lehiaketa bidez esleituko da emakida hau. Hau da, interesa erakusten dutenen artean egingo da lehiaketa hori. Bere barnean, urteko gutxieneko lizitazio-kanona 12.339,24 eurokoa izango da, eta horrez gain, Udalak, lokalean berritze lanak egitea beharrezkoa izango dela adierazi du. Horretarako, jada proiektua diseinatuta dagoela haintzat hartuta.

20 urterako izango da lehiaketa bidez esleituko den emakida hori, eta administrazio agirian formalizatzen den egunetik hasiko da zenbatzen. Emakida hau eskuratzeko interesdunek, irailaren 13ra arteko epea dute eskabide tramiteak egiteko. Hala nola, Berhaz bulegoan zein Bermeoko Udaleko kontratatzailearen profilean egin daitezke eskaera guztiak. Era berean, Bermeoko Udalak informazio gehigarria eskuratzeko webguneko atal bat ahalbidetu du.

Ondo eginiko lanaren isla

Busturialdeko Hitza — 2024-03-15 09:48:22

Surarte Garbitxuk urteak daramatza tximinia, beheko su edo hodien inguruko edozein arazori konponbidea ematen. Kide bik osatzen dute lantaldea: batetik, Lorenek; bestetik, Jonek. Beren zerbitzuak Bizkaiko luze-zabalean ematen dituzte, Busturialdetik, Lea-Artibaitik, Mungialdetik nahiz Durangaldetik hasita. Jonek, hain zuzen, 25 urte baino gehiagoko eskarmentu zabala du ogibide horretan.

Duela lau urtetik, tximinien eta parekoen mantenuagaz, garbiketagaz eta arazoen konponketagaz lotutako edozein arazori irtenbidea ematen die Surarte Garbitxuk. Etxez etxeko sistema baliatuz, beraien zerbitzuak arazoa dagoen lekuan bertan eskaintzen dituzte Loren eta Jonek, hau da, hurbiltasunezko eta aurrez aurreko tratuagaz.

Tximinia bakoitza «mundu bat» denez, kasu bakoitzari egokitutako lana egiten du Surartek. Urte asko dituzten eraikinetako tximinia sistemak moldatzea da, esate baterako, egiten duten lanetako bat. Izan ere, eraikuntza horien isolamendua sarritan oso zaharkitua egoten da, eta urak kalte egiten die. Beraz, Surartek, tximinia sistema garbitzeaz gain, hezetasunaren aurkako lana ere egiten du: «Ohikoa izaten da horrelakoak egitea, adibidez, baserri zaharretan; hezetasunari aurre egitea gure eguneroko helburuetako bat da».

Kamera endoskopikoarekin
Kualifikazio handiko profesionalak izateaz gain, Surarteko kideek goi mailako teknologia nahiz materiala erabiltzen dituzte egunerokotasunean. Adibidez, tximinien benetako egoera bertatik bertara eta zehaztasun handiz zein den ezagutu ahal izateko, kamera endoskopiko izenekoa erabiltzen dute.

Arazoaren kokaleku zehatza topatzen dute, euren kamera endoskopikoarekin

Tximinia osorik garbitu ondoren erabiltzen duten baliabidea da hori, eta helburu argi eta garbi bategaz baliatzen dute: «Kamera endoskopikoaren helmuga tximinia barrualdetik aztertzea da, begi hutsez iritsi ezin garen tarteak barne. Kamera bat txertatuta daukan sistema da, eta kamera horrek hartzen dituen irudiak pantaila baten bitartez jasotzen ditugu. Lanabes teknologiko hori erabilita, zehaztasun eta fidagarritasun handiarekin jakin dezakegu tximiniaren zein tokitan kokatzen den arazoa, arazo hori zein motatakoa den eta, zelan ez, traba horri konponbidea zelan jarri diezaiokegun ere bai».

Argazkia: Surarte Garbitxu.

Lanerako oinarriak
Beraien zerbitzuak ematerako orduan gardentasuna eta zintzotasuna mantentzea dira Surarteren gidalerro esanguratsuenak: «Batzuetan, garbiketak, mantenu lanak edota konponketak egiten ditugu; beste batzuetan, berriz, bideoak grabatzeko edota informeak egiteko eskatzen digute. Egiten dugun lana, edozelakoa izanda ere, garden islatzen dugu bai tarifetan, bai fakturetan. Bezeroagaz beti jokatzen dugu zintzotasun osoz».

Lanean aurkitzen duten akats ohikoenetako bat tximinien eraikuntza materialagaz lotuta dago: «Gaur egun, tximinia gehientsuenak goitik behera metalez eginak dira; duela zenbait urtera arte, baina, bestelako materialak ere erabiltzen ziren. Adibidez, inoiz suertatu izan zaigu adreiluzko tximinia sistemekin topo egitea; kasu horietarako soluzioak ematen saiatzen gara».

Bezero bakoitzari egokitutako tratua eta zerbitzu integrala ematea dute helburu

Ez hori bakarrik: etxe berriak erosi orduko, tximiniaren egoera zelakoa den jakiteko zerbitzua ere ematen dute: «Askotan, arazoak gertatu orduko ematen ditugu zerbitzuak, eta ez bakarrik ondoren».

Aholkularitza zerbitzu integrala eta pertsonalizatua ematea da, hain zuzen ere, Surarteren indarguneetako bat. «Kasu bakoitzari hoberen egokitzen zaizkion aukerak azaltzen dizkiogu bezeroari, baita tximiniaren osasuna ahal den hoberen mantentzeko argibideak eman ere. Jendea kontziente izan behar da tximinia behintzat urtean behin garbitzea komeni dela».

Argazkia: Surarte Garbitxu.

Datuek diote gaur egun suteekin lotuta sortzen diren istripu gehientsuenek lotura zuzena daukatela beheko suen eta tximinien mantenuarekin; horien egoera modu erregularrean zaintzea, hortaz, garrantzitsua da. Hain zuzen, bi kideek aho batez azpimarratu dute «orain» dela tximinien eta beheko suen garbiketa egiteko sasoirik egokiena: «Hurrengo neguari begira garbi eta erabiltzeko prest egon daitezen, orain egitea komeni da; neguan eginez gero, bezeroa su barik egon beharko litzateke, guk lanak amaitu artean».

Loren Ortiz eta Jon Martinez dira proiektuaren atzean dauden bi kideak

Listor asiarraren habien garbiketa da Surarteren ohiko beste egitekoetako bat. «Geroz eta gehiago» agertzen ari dira liztor espezie horren habiak han-hemenka eta, beraz, istripuak sortzeko arriskua handitzen ari da; horri aurre egiteko, habia horiek errotik garbitzen ditugu, segurtasun eta fidagarritasun guztiz».

Harremanetarako bideak
Surarteren webean eskaintzen dituzten zerbitzu denak ageri diren arren, tokian tokiko egoeretara moldatu daitezke; beraz, edozein zalantza duenari eurekin hartu-emanetan ipintzeko deia egiten diote. Modu bi daude horretarako: telefono bidez [695 71 93 10 edo 656 72 04 88] eta euren webera jota; hain zuzen, www.surartegarbitxu.com-en atal berezi bat dute, bezeroek beren kontsultak egin ditzaten.

Punta-puntako zerbitzuak eskuragarri, herrian

Busturialdeko Hitza — 2024-03-01 06:47:54

Laguntzea eta sendatzea. Lorederrek filosofia sinple baina boteretsua dauka: pazienteei barneko zein kanpoko gaitzak hobetzen lagunduko dieten zerbitzuak eskaintzea. Ikuspegi holistikoa daukate: oso ondo kualifikatutako profesional taldearen eskutik, osasuna berregituratzen eta orekatzen jartzen dute arreta.

Pazienteari hurbileko zerbitzua eskaintzeagatik nabarmentzen dira. Diziplinarteko taldea da, eta pazientearekin konektatu nahi dute, hainbat arlo landuz, beti ere desberdin egiten dituen kalitatea eta konpromisoa eskainiz.

Zerbitzuen artean, naturopatia, akupuntura, omeopatia, nutrizionista, terapia emozionala eta estetika holistikoa eskaintzen dituzte.

Horrez gain, askotariko tresna eta tratamenduak erabiltzen dituzte, eta besteak beste, analisi mikroekologikoak egiten dituzte. «Mikrobiota aztertzen dugu bai ileekin bai gorozkiekin, eta test epigenetikoak ere egiten ditugu. Horietatik ateratako informazioa erabiltzen dugu bezeroak aurretik dituen patologiak orekatzeko, edo, bestela, osasuntsu egonda ere, desorekaren bat badago bitaminetan, mineraletan, proteinetan etab. orekatzeko».

Azterketa eta jarraipen koordinatua
Analisia eta ondorengo jarraipenaren bermea ematen ditu Lorederrek. Gainera, arazoren bat egonez gero, oreka lortzeko edo berreskuratzeko lantalde osoaren artean aztertzen dute egoera, ahalik eta erantzun onena emateko: «Koordinazioa funtsezkoa da. Arlo guztiak lantzen ditugu, eta, horregatik, desoreka zerk eragiten duen jakin dezakegu».

Heste meharreko bakteriak desorekatzean sortzen diren Sibo arazoak ere lantzen dituzte, umeetatik helduetara.

Punta-puntako zerbitzuak eta punta-puntako produktu espezifikoak bermatzen ditu Lorederrek. Denetarikoa, askotarikoa topatu daiteke bertan, eta bezeroak behar duena eskuratzen dute.

Zerbitzu arina eskaintzen du, eta etxez etxeko bidalketak egiten dituzte, bizum bidez ordaintzeko aukera emanda. Bezeroari erosotasuna eman asmoz, WhatsApp bidez eskariak egin daitezke, 647 85 90 59 telefonora idatzita. Era berean, zerbitzuetarako ordutegi malgutasuna daukate, bezeroaren beharrizanen araberakoa. Merkataritza-ordutegitik kanpo hartzen dituzte aurretiazko hitzorduak.

Lorederrek arazoaren sorburura iristeko konpromisoa hartzen du, horrela osasun egoera optimoa lortzeko.

Busturialdeko hiru herritan zenbatu dituzte positiboak

Busturialdeko Hitza — 2021-02-18 14:00:23

Eusko Jaurlaritzak gaur argitaratutako txostenaren arabera, azken orduetan 14 positibo zenbatu dituzte Busturialdean: 7 Bermeon, 6 Gernika-Lumon eta 1 Foruan.

Gune gorrian dauden herrien zerrenda ere gaur eguneratu du Jaurlaritzak, eta Bermeok zerrenda horretan jarraitzen du. Intzidentzia-tasa, hala eta guztiz ere, apurka-apurka beheraka doa; 626,85ekoa zen atzo. Gune gorrian egon arren, “intzidentzia-tasak beheranzko joera duela ikusita”, Bermeoko Udalak herriko jolasguneak, skate pista eta aire zabaleko kirolguneak zabaldu zituen atzo.

Gernika-Lumok gune horian egoten jarraitzen du, 184,44ko intzidentzia-tasagaz.

Bizkai, Araba eta Gipuzkoako datu orokorrei dagokienez, 11.343 test test diagnostiko egin zituzten atzo, eta, horietatik, 563 positiboak izan ziren. Zehazki, herrialdez herrialde, Bizkaian, 341 positibo zenbatu dira; Gipuzkoan, 133; Araban, 81, eta 8 erkidegotik kanpo bizi diren pertsonetan.

COVID-19aren ondorioz 68 pertsona ospitaleratu ziren atzo, eta 153 pertsona zeuden ZIUn.